En bèrdat, talento ta ” tin un don for di nasementu”. Talento bo ta desaroyá solamente dor di esfuerso. I pa hasi esaki tin algun faktor ku ta krusial: bo situashon familiar, motivashon, dedikashon i bo mester gusta loke bo ta hasi.

Den siman mi sinti a dal riba Enith Brigitha. Sinta na kas i repasando algun tarea, mi sinti a dal riba Enith Brigitha i esaki a hiba mi bèk den tempu. Promé kos ku mi a hasi ta, di yama Enith na telefòn i e Enith ku mi konosé, semper alegre, semper kontentu i agradesido pa loke bida a dun’é a kontestá mi yamada. Kon ta ku Enith Brigitha awe den 2024. Bida a kambia pe? Kiko e ta hasiendo?

Enith Brigitha ta bibá na Hulanda, e ta kasá ku Jan Sallé i nan tin tres yu i 7 ñetu. I esei ta promé kos ku Enith ta konta, ku su bida ta yen, e mes ta train 2 biaha pa siman i sobra tempu ta bai na su famia, su ñetunan. Ku nan, su mannan ta yen. E no ta moviendo mas riba tereno di landamentu, ni e no ta dunando lès riba e tereno aki tampoko.

Enith Brigitha a nase 15 di aprel 1955 na Kòrsou. For di chikí el a mustra un afinidat natural pa awa. Pa motibu di divorsio, su mama ku a nase na Hulanda a disidí di regresá su pais natal (1969) i a bai Hulanda ku su yunan ku a keda na su enkargo. Ora el a muda pa Hulanda Enith Brigitha su talentonan di landa a ser alimentá.

Promé di a bai Hulanda, ya Enith a traha nòmber na Kòrsou, partisipando i ganando den weganan di Reino i tambe kampeonato Antiano.

Na Kòrsou nunka Enith a bai un lès pa siña landa, su mama a siñ’é landa na Vaersenbaai, kaminda nan tabata miembro, pa motibu ku su tata tabata polis. Enith a bira miembro di “De Robben” i “De Dolfijnen” i tabata train bou di guia di Toos Breumer ku tabata un tòp landadó i ku semper a motivá Enith pa bai Hulanda, kaminda e lo tin mas chèns pa desaroyá su talento.

Na Amsterdam Hulanda, Enith a bira miembro di “Het Y”, i a bai kai bou di guia di Wil Storm, un señora na ken Enith tin masha di gradisí i ku tabata manera un di dos mama pe. Enith a keda ku amistat ku Wil Storm te dia el a muri na edat di 84 aña.

Na 1972 Enith tabata e promé landadó Hulandes ku a landa 100 meter, estilo liber,  bou di un minüt. Entre 1972 i 1979, Enith Brigitha tabata e mihó landadó di Hulanda. El a gana mas di 21 título nashonal. Enith tabata dominá tur estilo, ku eksepshon di “schoolslag”.

Riba nivel internashonal tambe Enith Brigitha tabata pertenesé den tòp. Na 1973 i 1975 na Weganan Mundial, Enith a gana un plata i 4 bròns. Tambe na Weganan Olímpiko di 1972 i 1976, Enith a gana 2 biaha bròns. E medayanan akí tabata di bròns, pero tabatin balor di oro.

Balor mas haltu

Kiko realmente a pasa. Durante un entrevista ku mi a tene ku Enith, el a konta ku esnan ku kada bes tabata finalisá su dilanti, tabata landadónan di Alemania Oriental. I spesífikamente Kornelia Ender. Ta despues di 20 aña (1997) el a haña un aklarashon pa esei, ora ku na Leipzig nan a habri un archivo, kaminda a sali na kla ku trainer i atletanan di Alemania Oriental a kooperá ku un plan nashonal di programa di “doping”.  Den e entrevista ei, Enith a bisa nos ku esei a hasi hopi doló, paso 1976 mester a bira su aña i tabata den e aña ei ku a deskubrí mas di e iregularidatnan. Mi tabata hopi rabia i desepshoná i huntu ku mi tambe mi kolega landadó Shirley Babashoff ku a purba na kambia e resultadonan di e tempu ei. Pero e no a logra. “Pa bisa bèrdat, mi no a sigui e notisianan ei mas tampoko, paso mi no kièr biba semper di mi bida frustrá pa loke a pasa e tempu ei”.

A sigui diferente rekonosementu pa Enith Brigitha. Na 1974 Kas di Antia ta homenagiá Enith ku “Nochi di Enith Brigitha”, na 1973 i 1974 e tabata deportista femenino di aña na Hulanda; e ta haña komo premio un bishita pa Kòrsou; na 1979 ta kondekorá Enith komo “Ridder in de Orde van Oranje-Nassau.

Na 1989 Enith ta biaha bèk pa Kòrsou, kaminda su kasá Jan Sallé a haña trabou na Feffik komo instruktor. I na Kòrsou Enith ta sigui ku su bida den awa, hungando “waterpolo”, dunando lès i tambe fungiendo komo coach pa tim di natashon Antiano.Enith a trata na lanta un kompleho deportivo, pero manera e mes a bisa: “Bo mester tin bon kontakto si bo kier logra algu na Kòrsou”.

Na 1992 Enith Brigitha ta drenta Hall of Fame.di Kòrsou.

Su plan pa habri un kompleho deportivo ta frakasá i ora na 2008 su di tres yu muhé a disidí di bai biba Hulanda Enith i famia a regresá Hulanda, kaminda el a bolbe bai duna lès na miembronan di su klup bieu “Het Y”, i tambe el a bai traha na pisina di Diemen.

Hall of Fame.

E historia di Enith Brigitha no ta solamente unu atlétiko, pero tambe un testimonio kon el a surpasá barera rasial i pone su nòmber den historia di deporte. Enith Brigitha ta e promé landadó koló skur pa a gana un medaya na Weganan Olímpiko. Na 2015 International Swimming Hall of Fame (ISHOF) ta invitá Enith pa Sta Clara, California, kaminda nan ta introdusí Enith Brigitha ofishalmente den ISHOF. Mi ta rekomendá bo wak e video akí ( https://www.youtube.com/watch?v=AWoypMuR-Ew).
Dos aña despues Hulanda ta rekonosé Enith ku e Black Achievement Award.

Na aprel 2017 Kòrsou ta honra Enith Brigitha, ora ku duna e pisina na Brievengat nòmber di e atleta. Enith mes tabata presente pa e inougurashon.

Na òktober 2022 e siudat Almere ta rekonosé Enith Brigitha, desvelando su estatua. Mo Hersi a sòru pa e sèn i e artista Patrick Mezas a traha e estatua.

Awe mei 2024, Enith Brigitha ta kontentu,felis i ta dediká su tempu na su ñetunan i ta disfrutando di bida. Den dékada 70, medaya olímpiko no a trese tantu benefisio finansiero pa Enith Brigitha, pero esei no ta kita e sabor di orguyo ku e gran dama aki ta sinti.

E historia di Enith Brigitha ta unu di kurashi, perseveransia i triunfo. Su logronan ta kòrda nos ku kaminda pa éksito hopi biaha ta largu i yen di reto i ku solamente determinashon bo por superá i laga un legado duradero.