Tin kos ku, pasobra nan ta pasa asina tantu biaha, nos ta kuminsá konsiderá nan normal. Un yu di Kòrsou ta debutá den Major League Baseball. Otro ta sigui. Ta selektá algun pa All-Star Game. Nos ta mira nan na televishon, nos ta sinti orguyo, nos ta felisitá nan i despues bida ta sigui komo si fuera nada no a pasa. Kasi manera ta kos di tur dia. Pero e no ta normal! Un isla chikí manera Kòrsou, ku un kantidat di habitante chikí, ta produsí hungadó tras di hungadó ku ta alkansá e nivel mas haltu di beisbòl mundial. I awor nos tin algu mas grandi ainda. Andruw Jones ta Hall of Famer!
Dia 26 di yüli 2026 ofishalmente Andruw a drenta National Baseball Hall of Fame na Cooperstown. Promé yu di Kòrsou ku a logra esaki. Pensa un tiki riba esei. Un mucha ku a kuminsá hunga beisbòl aki na Kòrsou, awe tin su plakat entre e inmortalnan di beisbòl mundial. Anto ainda nos no tin un Museo di Deporte permanente na Kòrsou.
Nos tabatin un kuminsamentu
21 Di òktober 2016 un grupo di fanátiko di deporte, Valdemar Marcha, Jan Boutmy i Franklin Clemencia a tuma inisiativa pa lanta un museo deportivo den Biblioteka Públiko, dr. Frank Martinus Arion. Museo di Deporte Mordy Maduro. Nan a komprondé ku Kòrsou tabatin sufisiente historia, logro i héroe deportivo pa konta su propio historia. Pero ku desaparishon di Biblioteka Públiko, Museo di Deporte tambe a disparsé. Awor e museo a disparsé, pero nos historia no por disparsé kuné
Nos ta demasiado kustumbrá na éksito. Kisas esei ta parti di nos problema. Nos a kustumbrá (òf ta kustumbrando) na éksito. Nos muchanan den Little League ya pa vários aña ta pone nos den spòtlait na Merka. Vários di nos hungadónan di beisbòl a yega Major League. Un Yu di Kòrsou den All-Star Game a bira algu komun i koriente i kasi no ta sorprendé nos mas. I despues Blue Wave a pone nos isla den un otro dimenshon. Mundu a sera konosí ku un isla chikí. Nos a mira kiko deporte por hasi ku un pueblo. Kòrsou den euforia i un orguyo enorme. Esei tambe ta historia.
Pero unda nos ta warda e historia ei?
Kisas den un kaha bou di kama tin un flanèl ku un deportista a bisti den un partido importante. Na un otro kas tin un medaya.Tin hende ku tin potrèt ku ningun otro hende tin. Tin trofeo yen di stof. Tin korant bieu, grabashon, dokumento, sapatu, bala, bate i mil i un otro kos ku awe ta pertenesé na un famia, pero ku mañan por bira parti importante di patrimonio di nos pueblo. I tempu no ta warda. Hende ta muri. Famia ta muda. Ta benta kos afó i potrèt ta daña. Ku kada kos ku pèrdè òf daña, un pida di nos historia ta bai.
No un skina ku algun trofeo
Mi a trese e asuntu di Museo di Deporte dilanti Minister di OWCS, Sr. Sithree van Heydoorn. E minister a proponé pa mira huntu ku SDK kiko por ta posibel. Pero despues di e kòmbersashonnan ei, mi konvikshon a bira mas fuerte. Nos no mester un skina kaminda nos ta pone algun trofeo i potrèt. Nos mester un Museo di Deporte di bèrdat. Ku su propio espasio. Un edifisio òf lokal destiná pa konservá, dokumentá i konta historia deportivo di Kòrsou. I den e museo aki, inkorporá nos Salon di Fama, ku awor akí no ta nada otro ku un sala i algun potrèt.
Asina ku un hóben ku drenta ei mañan por mira Andruw Jones i despues deskubrí ku tabatin hopi otro promé kuné. E por mira nos hungadónan di MLB. Nos Little Leaguers. Nos futbolistanan, nos atletanan, nos landadónan i nos deportistanan di ayera i di awe. Tambe e entrenadó, dirigente i pioneronan ku a pone e fundeshi pa otro por tin éksito.
Un museo ku ta biba
Mi ta mira un museo kaminda un mucha por tende un relato di un partido históriko. Kaminda por tin pantaya ku imágen bieu. Kaminda skol por bishitá. Kaminda un mucha por mira un flanèl original i pensa: “Si e por a hasié, ami tambe por.” Esei ta balor di un Museo di Deporte. E ta warda pasado, pero e ta inspirá futuro.
Andruw Jones ya tin su lugá na Cooperstown. Nos hungadónan ta sigui pone Kòrsou riba podio grandi di Major League Baseball. Blue Wave a skirbi un página nobo den historia deportivo di nos isla. Awor falta pa nos hasi nos parti. Duna nos historia un kas. Un Museo di Deporte pa Kòrsou no ta un luho. E ta un must. I si nos no hasié awor, mi ta puntra: Ki ora?
Tremendo atrobe, ta kos ku semper mi a bisa. Nos ta asina haltu den deporte tog ta djis un ratu despues nada. Ohala loke bo a pone aki yuda. Thanks Percy
Mi ta kompletamente di akuerdo ku esaki. 🇨🇼⚾️🏆
Kòrsou ta un isla chikí, pero nos logronan deportivo ta enorme. Nos tin atletonan, beisbòlistanan, futbolistanan, Little Leaguers, pioneronan, entrenadónan i dirigente ku a pone nos isla riba e mapa mundial.
E historia no por keda den kasnan di famia, den kaha òf pèrdè ku tempu. Nos mester konserv’é, dokument’é i, mas importante ainda, transmit’é na e generashonnan ku ta bini.
Un Museo di Deporte di Kòrsou no ta simplemente un lugá pa warda trofeo. E ta un lugá pa nos muchanan por mira unda nos a bini di dje, ken tabata e pioneronan i kiko ta posibel ora bo tin talento, disiplin i perseveransia.
Andruw Jones su entrada na Hall of Fame ta un momento históriko pa Kòrsou. Esei mes ta un oportunidat pa nos bisa: nos historia deportivo merece un kas.
Mi ta apoya esaki di kurason. 🇨🇼❤️
Duna nos historia deportivo un kas. Museo di Deporte pa Kòrsou ta un must!
Danki Percy. Mi tabata enbolbí den e humilde intento di e museo ei ku diseño di e interior.
Mi ta pará 100% tras di bo lamento. Nos meresé un museo di deporte, pero tambe nos meresé un museo di karnaval, i un Sentro Pro Arte. Plannan ku a keda kologá. Pa kiko nò den un solo edifisio? Pa kiko nò e edifisio bandoná na Skarlo, den punda i aksesibel pa tur hende. Gobièrnu en kombinashon ku komèrsio ku a kore formal riba e bandwagon di Blue Wave? E Blue Wave ku a para bira un laman mansu mansu. Ta warda ta warda te dia un ekstranhero kumpra e edifisio i krea un moneygetter eiden? Ata tabatin 8 miyon disponibel pa kumpra Campo?
Bon opservashon, Percy!
Ta tópiko ku nos ta tur ora kuné den boka. Hasta kuando esei por bira realidat?
Nos ta un pueblo ku hopi euforia ora kandela ta haltu. Asina kandela baha, lástimamente nos ta lubidá tur kos.Mestér bini un museo di deporte.
Mi a studia e materia i hasta propone un model fasil i no kostoso na 2018. Lastimamente no tabatin “interes”.
Konsekuentemente mi a sigi eduka mi mes tokante museo i a “adapta”. Pa tempu i kosto envolvi, a korto plaso e solushon mas praktiko ta un museo virtual.
Si tin hende intresa pa traha riba e proyekto, mi ta kla pa esaki.
Mi a studia e materia i hasta propone un model fasil i no kostoso na 2018. Lastimamente no tabatin “interes”.
Konsekuentemente mi a sigi eduka mi mes tokante museo i a “adapta”. Pa tempu i kosto envolvi, a korto plaso e solushon mas praktiko ta un museo virtual.
Si tin hende intresa pa traha riba e proyekto, mi ta kla komparti loke mi sa.
Danki pa trese e topiko aki atrobe. Ta duele pa mira ku ns no ta balora ns hendenan den un Museo. Rond mundu tin Museo di nn heroënan. Aki te ahinda ketu… Ns ta muri bai ku ns historianan i pôrtrenan. Buska e luga pa kaba. Pidi famianan bini ku pôrtretnan, korant …etc huntu ku loke un tempu algun a kuminsa ku ne kaba. E Museo ta un Must despues di tur e hazañanan di ns hendenan.
☝🏽🙏🏽👍🏽👏🏽👏🏽👏🏽👏🏽
Niun gobiernu na Kòrsòu no ke un pueblo na tinu. No ke un pueblo desaroya. Sino masha dia nan a drecha e edifisio di nos Bibioteka Nacional kaminda tur e bon kosnan di nos pueblo
Por wordu warda i pone kaminda nos pueblo por mira, gosa, desfruta i siña algu. Laga e edifiosio sigui bai atras i hasta basha bou.
Hopi tristu.