Komo mucha yòn, mi no por a bai fiesta, ni drenta klup òf ningun fènklùp, pero ironia tabata, ku mi mester a kompañá mi rumannan muhé mas grandi, komo shaparòn, bai Steenrijk, na kas di fam Scorea, kaminda tabatin aktividat di “Happy Diamonds Fanclub”. Mi rumannan tabata gusta músika e tempu ei di The Everly Brothers i Paul Anka i tabata kumpra nan disko 45 serka “Paps” na La Bonanza den Otrobanda. Tabata masha normal e tempu ei, ku si bo tabatin un smak en komun, ku bo ta djòin un di e tantísimo fènklùpnan ku tabata eksistí.
For di añanan kuarenta i sinkuenta bai ariba, rònt mundu hóbennan tabata forma klupnan sosial den kua nan tabata organisá aktividatnan deportivo kultural. Den mi blog di: “Ki mishi pagano den misa kristian” ( https://percypinedo.com/mikorsou/ki-mishi-pagano-den-misa-kristian/) mi a introdusí e fenómeno di sosiedat/klup ku tabata eksistí na Kòrsou. Pero kòrda tambe gruponan di Punk, Provo, Dolle Mina’s Black Power ets., ku tabata eksistí rònt mundu. I no lubidá The Sharks i The Jets den West Side Story.
Na Kòrsou no ta tur hóben por a partisipá den klupnan di Kòrsou, pa motibu di gremio sosial. Iglesia katóliko tabata promové banda di enseñansa, formashon sosial den oranan liber. Frater i sùrnan tabata forma klupnan, di mucha muhé i mucha hòmber. Kòrda riba patfenderei i asosashon pa mucha muhénan antiano (Antilliaanse Meisjes Gilde). Den añanan kuarenta ku sinkuenta ta klupnan ta dominá, miéntras añanan 60 i 70 e diferente fènklùpnan a nanse i tabata dominá. Nos no por lubidá e “high flying park” den diferente bario. Pero lo mi bin bèk riba esaki, ya ku mi a forma parti masha importante den esaki den e famoso “high flying park”di Mundu Nobo.
Jolly Fellows Society
Den e buki “Di Gallerosteeg pa Concordiastraat, di Nolda Römer- Kenepa, tokante bida di Ornelio “Kees”Martina, Sra Römer – Kenepa ta relatá tokante fundashon di un di e klupnan mas famoso di Kòrsou, ku ta “Jolly Fellows Society”. Nan a sigui den e tradishon di “society” ku tabata eksistí promé ku nan di “De Gezelligheid” i otronan. Aparentemente nan no por a haña akseso na klupnan eksistente, i a disidí di lanta nan mes klup. Despues a sigui diferente otro klup manera, “Bright Society”, “Amusing Society”, “Enjoyment Society”, “Happy Fellow Society”, “Tropical Society” i tambe, “Club Union”, “Flos Juvenis”, “Club Chobolobo” i “Kwiek”..
Tabatin bastante klup, pero mester menshoná sigur sigur “Jolly Fellows Society” komo un di e lidernan den e kategoria akí. Nan tabatin bastante miembro prominente i segun Sra. Nolda Römer- Kenepa, entre otro; Pierre Lauffer, Nicolaas “Cola”Debrot, , Hector Rosario, Aco Henriquez, Echi Jesurun, Frans Nicia, ets. E klup tabata un klup di hende hòmber i na okashonnan speshal, tabata introdusí hende muhé.
Nan tabatin komo meta: traha riba formashon propio di nan miembronan, promové amistat. Ornelio “Kees” Martina tabata e motor tras di e klup akí.
Nan sede tabata forma parti di Hotèl Brion ku tabata keda na Awasa. Despues nan a hür un kas basta espasioso den Rifwaterstraat komo nan sede.
“Jolly Fellow Society”tabata konosí pa nan fiesta na Kòrsou.Nan fiestanan tabata popular i bon bishitá. Un di nan famoso fiestanan ta fiesta piknik ku nan a introdusí, den Hòfi Popo Rojer na Barber. Estrellas del Caribe tabata e banda di “Jolly Fellow Society”. Nan tabata organisá “Bachelors party”pa nan miembronan ku ta bai kasa; nan tabatin diferente anochi/dia literario; fiesta i marcha di karnaval; anochi di debate entre miembronan i anochi di charla. Un klup ku tabata hopi pero hopi aktivo.
Despues di 1958 aktividatnan di “Jolly Fellow Society”a bira ménos i den dékada 60, despues ku a purba pasa batuta over pa hóbennan, mi ta kere ku e klup a stòp di eksistí. Ki dia eksaktamente mi no sa.
Den final di dékada 60 i den dékada 70, tabatin basta moveshon den asuntu di fènklùp, ounke no tur biaha asina ofishal ku karnèt di miembresia ets, pero tòg tabata papia di fènklùp. Asina nos tabatin diferente fènklùp, di kua tur e miembronan tabata forma parti, paso nan tabata fanátiko di e artista, banda, òf lokutor. Nos tabatin fènklùp di Paul Anka ku tabata un di e klupnan ku a keda eksistí basta largu, Sue Thomson fènklùp, Connie Francis fènklùp i mas lat Menudo fènklùp. Nos tabatin rivalidat den bitbènt di Kòrsou i di Aruba. Ounke no tabatin registrashon tabata eksistí un rivalidat enorme, dor di fanátikonan di e diferente bandanan ku tabata eksistí.
A. J. de Jong, tabata traha na Radio Hoyer bou di e nòmber Michel Horares (Horares tabata saka for di e palabranan Hoyer i radio i el a pega un “res” su tras pa laga e nòmber zona mas interesante). E mes tambe tabatin un fènklùp i den un entrevista den Amigoe di 20 di sèptèmber 1965 el a splika di e rivalidat akí, kaminda The Vampires, The Crusaders, Three Aces, Tellstars, Heartbreakers, Three Voices, Impressions, Defenders, The Shyrons, The Thunder Clouds, Highcrooners, i Spacemasters tabata kompetí ku otro. Hopi biaha e rivalidat akí tabata entre kua ta e mihó guitarista, òf kua ta e mihó kantante, Pat Pemberton, Leslie Vos, Little Anthony òf Arnold Grotestam, ets. Pa kolmo, promotornan tabata saka djus for di esaki i tabata organisá kompetensia di e bitbèntnan i fanátikonan tabata asistí na bòshi pa apoyá nan banda. No ta tur biaha kos tabata kaba na bon, pero tabatin biaha, na pleitu i bringamentu. Asta tabatin e kompetensianan akí interinsular, Kòrsou versus Aruba, ku bandanan di Aruba manera The Strangers, Golden Treasures, The Magnificent five, The Roxies .
Na aña 1971, Dick Raylon, e tempu ei super popular ku e kansion “Hasta Siempre” a anunsiá en grande ku e lo bai lanta su fènklùp, si esei a sosodé mi no sa.
Na radio nos tabatin algun lokutor/dj ku tabatin nan fènklùp. Reinaldo Sint Jago na CUROM, Armando Huerta, Hermanito, Freak Out Frans (Frans Heiliger) na Radio Hoyer II i J.A,J, de Jong na Hoyer 2.
Den Amigoe di 16 sèptèmber 1989, Boy Thode di ERA ta publiká ku nan no tin fènklup i ku na Antia nos no konosé e konsepto ei. E ta papia di fanátikonan di ERA. Sinembargo serka Doble R sí e konsepto akí tabata konosí den añanan 75 pa 76.
Siñansa: mira kon den dékada 40 – 50 – 60 i 70, sosiedatnan, klupnan, fènklùpnan, fanátikonan tabata kompetí sanamentu ku otro i tòg tabata djòin otro i logra metanan komun. Kiko a pasa nos?
Hopi great atrobe sr. Pinedo. Mi ta lesa ku smak. Mi ta korda nos mama papia di Fanclup. Mi ta korda tambe mi ruman homber mas grandi su tempu kon bandanan tabata buta hobennan bira asta kreativo i tabata traha nan guitaranan di palu nan mes, ku nan Drumset pa nan por toka. Anto train riba stupi di nos kas pa por bai presenta na Televishon. Mi no ta korda ku nan a logra. El a keda na training so. A lo menos, nan tabata bon bezig. Esta un dushi tempu. Danki pa komparti.
Djis mi ke añadi ku Explosivos / Gio i Explosivos sigur tambe tabatin un fènklùp (hopi) aktivo. Hasta tabatin fiestanan i festival ku e fènklùp tabata organisa. Fen di aña sigur tabata unu bon bringá pa keda skohé. Skibiendo esaki ta ponemi korda riba personahenan ku a bai laga mundu muchu trempan………….. Si mi menshona un, mi lo mester menshona mas of tur. Trupiaal Inn no tabatin mas kaminda di buta.
Loke a keda ta e bunita rekuerdonan ku sigur entre otro un di e motibunan ku lo a pone P.P. skibi e “Hòrta short” aki. Great atrobe P.P.
Norbert masha danki. En bèrdat mi a lubidá riba Explosivos ku tabata basta aktivo riba e tereno akí. Masha danki i sigui lesa.
Hopi gr8, Percy. Ami tbt mas yòng pero mi gusta e piesanan di e tempu ei. Mi tbt sluip skonde bou di mesa di komedor wak fiesta òrganisá na kas. Dushi e piesannan di antes. Mi a lesa e artíkulo aki pa mi rumannan mas grandi. Nn a keda enkantá i rebiba nn tempu. Bon kontentu nn a konta mi di nn fiestanan, fènklúpnn i tambe di nn artistanan preferí International i di Kòrsou. Danki pa kompartí, Percy.
Gera kontentu ku bo a gusta e artíkulo i danki pa pasa esaki pa bo rumannan.
Hopi bon. Danki pa kompartí
Percy, Danki pa e artikulo aki. Komo eks miembro di Happy Diamonds b’a hiba mi bek den un dushi tempu. Mi ta korda kla kla reunionnan na las di Mai Mosa Scorea den Heelsumstraat Steenrijk.
DUSHI tempu nos hubentud
Danki Ruman, danki pa kòrda mi riba Mai Mosa!
Hopi bon,ami ta di The three Voices fanclub..e club tabata den Scharloo,banda e parke un kas ariba.e kas ta tur pinta,pa e artista S.ling
Ki e ” Comment” nan so bo por skibi un artikulo más.
Danki pa eduka nos ku ta más jong.
Hopi bunita un historia interante di antes.
Interesante Percy.
Interesante, Percy.
Danki pa komparti.
Danki pa lesa
De Jolly Fellows Society organiseerde ook schilderijen tentoonstellingen in hun sede.
Hopi interesante.
Mi tanta tbt kasá ku un integrante di The Three Voices y 2 primu tbt integrante di The Telstars. E rivalidat entre nan mi korda aunke mi tbt chiki.
Recuerdo nan ku bo a trese bek
Mi mama Vilma Sprock tabata reina di karnaval di Club Chobolobo.
August Sprock mi tio tatin The Vampires. Nan tabata train den garage di mi opa su kas.
Hopi interesante e asuntu di fanclub. Mi ta kòrda ku mi mayornan tantu den farandula komo den deporte tabata gran fanatiko i esaki den klupnan organisá. Mi tata den deporte tabatin varios rekuerdo di p.e. Sta. Maria Pirates/100 Pipers i SUBT pa loke ta trata e parti di deporte. Lamentabel ku e parti aki di relashon komo miembro (sostenedor) no tei mas.
Percy trobe hopi interesante.
Sigur pa mi, un mundu ku mi no tabata konosé o interesá den dje.
Great pa lesa bo
historia.
Danki pa lesa
Hopi interesante Percy.Great pa rebiba e dushi tempu aki. Ku 16 aña mi a lanta un fènklúp na Suffisant ku tabata karga e nomber The Twinkelstars huntu ku defuntu Armand Belfor. Esaki sin sa di e eksistensia di e banda The Twinkelstars di Oscar Harris. Nos a lanta un banda ku no a dura masha largu debí ku mi mestera bai studia na Holanda.
Surinamnan den Suffisant e tempu ei tabatatin e fènklùp Soulpower ku tambe tabata hopi aktívo. Thanks pa komparti.
Pipoo bo sa mi tin un sentimentu di hopi plaser, pa e artikulo aki informando di kosnan ku nos generashon a lanta ku ne, pero komprendiblemente ta bai perdi pa motibu di desaroyo. Sin ke ser negativo. Lo kual mi tin masha problema ku ne kon nos ta trata pa papiamentisa(?) palabranan, ku de fakto ami ta sinti no ta nesesario.
No ta e intenshon pa forma un diskushon, pero esaki ta un sintimentu ku mi ta deshoga ku respekt pa tur otro hende su opinion. Na prome luga mi tin hopi problema ku nos ta yama nos pais Korsow: e pais aki yama Curacao. Ku un indikashon respetouoso na bo artikulo algun palabra ku a ser tradusi:
Bitbent, fenklup. Mi ta puntra mi mes ken di e generashon ku ta hanjando papiamentu ta rekonose e palabranan aki, te pa relate na lo kual e ta nifika. Kon nos lo tradusi the three voices, the golden treasures, Highcrooners etc. Ningun persona di e “latere” generashon lo no por duna e palabranan e signifikashon adekwa of apropia. Te aki mi ruman stima. En todo kaso mi a apresia e artikulo.
Elco danki pa bo reakshon. Na promé lugá e artíkulo ta importante. E diskushon riba papiamentu ta sigui riba otro ora i otro kaminda. Si mi ta papia internashonalmente mi ta referí na isla komo Curacao, pero mi ta duda ku bo ta bisa un amigu di bo di Boneiru, ku bo ta biba na Curacao en bes di Kòrsou.
Nunka ningun kaminda a tradusí nòmber original di ningun banda, mi no a tende nunka di De Rollende Stenen, pero semper di The Rolling Stones. Pakiko mi mester bai tradusí The Three Voices, òf hasi The VIP’s – e Hendenan di mas Importante.
I por último, siguiendo mi sistema di skibi mi papiamentu fonológikamente, mi bitbènt i mi fènklùp ta zona tremendo.Mi a apresiá ku bo a lesa e artíkulo i a spera un reakshon riba e kontenido i no e papiamentu.
Rudsel esaki lo a kontribuí grandemente si nos tabatin e asuntu di miembro sostenedor
Mi ta kòrda Odoma Stars ku mi tata su negoshi Odoma Stars tabata spònser. Ma kompronde ku nan mester a Bai sea ta Aruba o Boneiru I a bin kose flush na Sasteria Odoma situa den kerkstraat 21 dilanti Elga i pegá ku foto studio Gonzalez i tambe un barberia. Mi Tata a hasi nan un deal ku a enserá e.o ku ta haña flus kompletu pa banda I segun mi e nòmber a bira e ora ei Odoma Stars.
Danki un biaha mas pa tuma tempu pa bai den pasado i inmortalisá historia pa nos por lesa i kompartí.
Mi ta spera ku Dios lo regalá bo tempu i salú pa bo por produsí hopi mas. Mi a lesa ku plaser.
Danki
Mashadanki Silvana, ku bida i salú, mi lo produsí mas