Mi a saka tempu pa e entrevista, pasobra mi sa ku e kabayero akí gusta papia i no ta laga bo bai fásil, una bes bo a disidí di papia ku ne. El a kambia su bario di Mundu Nobo pa Dominguito, kaminda ya e tin bastante aña ta biba, pero ketu bai e ta mesun orguyoso di su bario Mundu Nobo. Sintá patras den su kura di kas, nos a kòmbersá, filosofiá i papia di su tempu di oro, i kere mi, su tempu tabata i ta oro. Klaro ku e mester a rekordá momentunan di deporte tambe di su bario, i a papia di un partido di tènis memorabel, ku el a gana di Edsel Everts.
Mi ta papia di Ellsworth Ilfredo Secundo Regales. Kisas e nòmber ei no ta bisa bo nada, pero si mi bisa bo Fèchi Regales e ora ei si bo sa ta di ken mi ta papia. Banda di e nòmber aki, e tin diferente otro beinam: Tòt – Gangaskhan – Kleine i otro nòmbernan ku mi no ta kòrda.
Na edat di 78 aña, e ta un hòmber kontentu ku loke bida a brind’é i orguyoso di loke el a logra den bida. Gusta broma i gusta filosofiá. E ta yu di Antonio Evasio Regales i Edorita Reina Inees. Su tata ta yu di e konosido magnate di sine di Kòrsou, Alfredo Pellicer.
Antes, Kòrsou tabata un lugá ku masha hopi joyería. For di un lista di Kámara di Komèrsio mi a registrá 131 joyería, lugá di drecha prenda i oloshi. Mi ta menshoná un par di den pasado: Candelman Jewelers – Spritzer & Fuhrman – Weisinger – L.A van Eer – Joyería Mendoza – Hermanus Jewelers – Joyería Raghunath – Plateria Chimi-Chimi – Kywi – Joyería Mendoza i Horlogemaker & Goudsmid H.K. Loth. Hopi di e negoshinan akí, tabata bende joya i oloshi i tambe tabata drecha joya. Poko di nan tabata diseñá joya. E trabou akí di traha joya ta trabou di un platé.
Platénan tabata perfekshoná nan mes den obranan di filingrana i tabata usa pa eseinan, entre otro, oro Arubiano. Papiando di platé, den Zaantjessteeg nos tabatin Djul Veeris, tabatin Sadi Centeno den Frederikstraat, Paul surnam den Colon, Fèchi Regales den Rifwaterstraat. L.A. van Eer den Hanchi Biento i Loth den Breedestraat pegá ku emisora CUROM.
Den Siglo 19!
For di e artíkulo “Goud- en zilversmeden op Curacao in de negentiende eeuw” skibí pa Christel Monsanto den “De Archiefvriend” yüni 2011, Bijlage jaargang 17, nr 2, bo por saka afó ku tabatin moveshon di e fishi di platé, pero solamente sakando esaki for di archivo notarial, den kua tabatin informashon di oro i plata ku tabatin den diferente kas aki na Kòrsou. Tambe hèrmènt ku un platé tabata usa. Den siglo 19, e fishi di platé tabata un profeshon respetá. Tambe e artíkulo ta menshoná, ku tabata traspasá e konosementu di e fishi akí den famia, di tata pa yu.
Kisas ta bon pa sa, ku den Katoentuin, nos tin Kaya Pikaron i Kaya Antre, ku ta diseñonan di renchi di orea di filigrana, miéntras ku Kaya Guisano den e mesun bario, ta referí na un pida spiral di oro, ku nan tabata usa pa filigrana (danki na Lucille Berry-Haseth). E tempu ei nan tabata eksportá obranan di filigrana na kantidat grandi pa Colombia i Santo Domingo. Poko poko e tipo di industria akí a desaroyá su mes, den islanan den besindario tambe, poniendo ku pedidonan pa nos platénan a bira kada be mas skars.
Despues nos platénan no por a mantené nan mes, banda di un kompetensia gigantesko manera Spritzer & Fuhrman, ku mei mei di siglo 20 a establesé na Kòrsou. Ta algun platé a keda hasi e trabou akí. Na Fundashon Obra di Man tabatin un kurso, kaminda algun hende a siña prinsipionan di e fishi akí.(Lantèrnu jrg. 3, no 1-2 (Dec 1985), p.36)
Otro problema tabata, ku oro a bira demasiado karu pa asina e hendenan akí por a kumpra i sigui hasi nan trabou di platé.
Awor, un di nan ku a sobrebibí ta Fèchi Regales. El a sigui karga e nòmber di su tata, pasombra su tata tabata karga e nòmber di kariño di Fèchi ku despues a pasa pa e yu. E trabou el a siña di su tata i for di chikí e tabata traha den shòp di su tata. El a bai Mgr Niewindt College i despues a pasa pa gymnasium na Radulphus College. Na 1965 el a konfrontá un problema serio, ora ku vürwèrk a dal den su wowo i el a pèrdè un wowo. El a keda 9 luna sin bai skol i for di e momentu ei, el a dediká su mes kompletamente na e fishi di platé. I pa usa su mes palabranan: “Ku un wowo so mi tabata hasi tur e kosnan akí, kòrda ku mi ta tin tur dos wowo?”.
Mi tata a bisa mi semper: “Sòru pa bo ta tur dia mihó, traha duru i mehorá”. Den e trabou akí bo no por traha purá purá, bo mester tin hopi pasenshi. Traha un prenda na man ta eksigí hopi tempu, hopi pasenshi i klaro, ta muchu mas karu ku algu traha ku mashin. Fèchi a kuminsá traha den su shòp den Rifwaterstraat i despues el a move pa Dominguito.
Por ehèmpel trahando un obra di filingrana, bo ta traha ku diferente forma di basta tempu pasá: “grein” – “tomatiyo”- “platiyo”- “asiento”- “zigzag”i “gusaniyo”. Un joya di filingrana bo ta traha, dor di kombiná e formanan akí ku otro. Fèchi a duna su obranan bunita nòmber tambe, p.e.: “Clarita – Morkooi – Curason di Korsouw – Cadena China – Cadena Payette – Nèshi di Troepial”.
Prince Imaging
1Prince Imaging. Prince Victor
Diferente Tarea
Fèchi ta asina orguyoso, ku den su bida el a haña diferente tarea, pa traha regalonan pa entre otro Reina Beatrix – Prens Claus – Reina Juliana – Presidente Carlos Andres Perez – Presidente Lusinchi – Reina Maxima i Rei Willem Alexander. Ta duele ku por ehèmpel pa su obra pa Reina Beatrix, a tarda pa eksponé e regalo pa pueblo por a atmirá i ora a hasi esaki, a eksponé su obra den Spritzer & Fuhrman. Dia 30 di òktober 1980 Reina Beatrix a haña su regalo trahá pa Fèchi Regales.
Problemanan
Na Final di nos kòmbersashon, Fèchi Regales ta bin bèk riba e problemanan ku el a topa den su kaminda i te ainda ta topa nan. Na promé lugá e preis di oro ku a subi barbaramente i pa manehá e oro bon, mester keinta esaki, pa kua e ta usa gasolin, pero gasolin ta di mal kalidat, ku ora usa esaki, e ta hasi oro pretu. E ora ei bo mester kuminsá di nobo.
E ta kumpra oro na Swissbank Verrein, i promé ku esaki tabata kumpra oro na Maduro & Curiels Bank i tambe na Venezuela i Guyana.
Apesar di tur kontratempu, Fèchi Regales ta stima su trabou i te ainda, ounke muchu ménos ku anteriormente e ta traha den su shòp. E ta stima su fishi i ta lamentá ku e fishi di asina tantu tempu lo bai pèrdí, pasobra no tin hende ta hasi e trabou aki mas, pasobra den e tempu moderno akí, no tin espasio pa e fishi aki mas. Su yu muhé, Daphne Davida ta move den e ramo akí, pero no ku e konvikshon i regularidat ku e komo tata ta deseá.
