Kada pueblo tin su manera pa kòrda i rekordá su historia

Karamba Kòrsou ta tin hopi aventura/suseso ku a tuma lugá. I hopi di nan ta dokumentá den nos historia, pero den historia kantá. Hopi biaha e susesonan akí, un òf mas kantante a trese esaki dilanti den un komposishon i ta manera nan ta kanta nos historia. Bo ta hole Huma, Boy Dap su komposishon relashoná ku sakeonan di 30 di mei 1969; Sunú a bisti di Macario Prudencia di e barku Superior Producer ku a senk na Ref; e Man di Rignald Recordino, di e aparente man misterioso ku hendenan tabata mira ta zueif; Greaseman, un hòmber ku kurpa hunta tur na zeta (gris) ku lo tabata kore den sierto barionan, Basha kas abou, historia di un diputado ku a laga basha kas di un siudadano abou, i Serafina den Djèt. Asina por sigui menshoná mas komposishon, ku kantantenan tabata kanta di susesonan ku a pasa na Kòrsou.

Inspirashon:
Inspirashon ku Dios ta manda pa bo, por ehèmpel den bo soño, bula lanta for di soño ku pòtlot den man i skibi bo komposishon, i despues bo ta bai refiná e produkto, òf manera e mes a bisa, bo ta kaba di dòrna e bolo. Su promé komposishon, e wals Felisidat ta un ehèmpel, pero pa motibu ku e tabata hopi kritiko riba su bos, el a laga Hortence Sarmaat i Hubert Fernandez kanta i graba e piesa ei. Ken no ta kòrda Atardi: Atardi Kòrsou ta bunita, ora ku solo ta baha, Dushi Kòrsou , òf e nostálgiko Tòg mi sa. Diferente di e komposishonnan akí tabata tin amor komo tema, M’a yega lat, tambe konosí komo Pal’i tamarein. Komposishon ku e ta gaña diferente mucha muhé, ku ta pe el a komponé e piesa.

Motibu Komersial:
Rudy den su charla a trese e djengel ku el a skibi pa banko di Maduro i tambe esun pa Amstel (Amstel wak’e skuma, tuma, dal’e numa), por sierto ku e djengel akí a mantené mas ku 30 aña di popularidat.

Vishon-Revelashon – bista futorístiko
E komposishonnan akí, tambe ta sali for di su soñonan, asina Rudy mes a konta: ya for di 1962/63 e ta tin presentimentu kiko ta bai pasa den 1969 i el a komponé Bírgen di Arrarat,(magistralmente kantá pa Mafalda Minguel) i den e piesa ei el a komponé ku “Kòrsou ta na kandela”, pero su mama lo a poné kambia esaki i finalmente e teksto a bira: “Kòrsou ta na peliger. Tambe e komposishon lamento/desesperashon Mi ke sa den kua e ta puntra, kon Kòrsou lo ta na aña 2000, si lo tin mas hende òf tur a bai Ulanda pa un mihó porvenir. Si Shell lo tei ainda. Ku Antia a spat for di otro ets.
“Mi stima mi isla i ora kosnan no ta bai bon òf na un manera honesto, mi ta protestá atraves di mi komposishonnan” (Rudy Plaate). Tin diferente komposishon, ku e no a graba, pero ku el a kanta i tin hende ku tin e komposishonnan ku el a kanta na un òf otro evento.

Komposishonnan di konsientisashon tambe el a pone riba merkado, manera Respetá Polis ku ta un eksperensia ku e mes a pasa aden, temporada ku e ta “drag” i a hasi esaki riba Nieuwe Haven. Rudy a konta ku un polis Ulandes a par’é i el a bisa e polis ku e sa ku e tabata kore un tiki duru si,  i e polis Ulandes a kontestá ku nò: bo ta bula un tiki abou. Piesanan “puña” tambe e ta tin, sigur pa esnan ku ta konosé e detayenan tokante pa ken e piesa ta bai. Na un manera úniko Rudy tabata kanta e diferente situashonnan akí di nos komunidat i esaki a hasi Rudy Plaate masha popular mes. Un konosí den e género akí ta Raspadó, “raspadó b’a raspa robes, raspadó pa raspa galiña di outoridat”. “Bira minister o diputado i bo tambe por kore den outo grandi i biaha riba kustia di komunidat” òf Si mi bira gouverneur lo mi regalá hende, skol i otronan hopi kos, lo mi hisa penshun di behes etc. Por sierto un piesa ku no a kai den bon tera serka e gobernadó di e tempu ei i asta Radio Hoyer a prohibí pa toka e piesa ei.

Suseso – Aventura
Rudy a skohe deliberadamente pa komponé na papiamentu, pasó e ta stima su isla i siendo revolushonario e por a ekspresá su mes mihó den su idioma i e tabata orguyoso di su idioma. Den e género akí, Rudy a guièrta manera e ta ke. Ta di lamentá no tin un análisis di su obranan, meskos ku ta e kaso di otro artistanan manera: Kimo Candelaria, Augusto Gressman, Augusto Boelijn, Pierre Lauffer, Shon Kola, José Casseres, Oswald Specht òf Boeis Haile. Via di famia mi a haña lista di su komposishonnan, ku na mi konsepto no ta kompletu ainda. Rudy Plaate: “mi a komponé susesonan ku a tuma lugá na Kòrsou, si bo ke bo ta yama esaki historia kantá. Semper mi a trese esaki den un forma humorístiko, ku puña, sin ofendé ningun hende”.

Gas a kaba, problema di gas na Kòrsou ; Please hold on ku kritiká riba Setel ku bo mester warda hopi largu na liña, pa nan yuda bo, si es ku bo haña yudansa; Buraku, e kantidat di buraku ku tin riba kamindanan di Kòrsou, algu ku awor aki ta mas vigente ku nunka; Amigu Looi, di e wikènthùis na Brakapoti ku a senk i kaminda tabatin diferente hende konosí den nos komunidat na e fiesta skondí akí. Rudy di un manera asina humorístiko ta kanta e susesonan akí, ku bo tabata mira e kos pasa bo dilanti.
Kisas e suseso mas importante i e piesa mas famá di Rudy ta Santa Maria, kaminda komo protesta kontra presidente Salazar di Portugal, Shon Galbao ta sekuestrá e barku Santa Maria. Esaki ta tambe e disko 45 ( disko grabá, ku dos komposishon so ariba, un kada banda) mas bendé di Rudy Plaate. Segun Rudy ta konta, ku nan a eksportá e piesa akí pa Portugal i ku asta Rudy lo a bira persona “non grata” na Portugal. Aventura na Hato, relashoná ku sekuestro di un avion Benesolano LAV.
30 di mei 1969 na okashon di e disturbionan; Laga Monte Bai, tempu ku Nelson Monte a kai será; Mara nan, sera nan, e atrako riba Banko di Karibe; riba mesun dia di e atrako e piesa tabata kla. Mata Siguaraya, ku el a komponé pa un shofùr di bùs; Miguelito, Michiel Bijkerk su wèlga di hamber; tambe tabatin un piesa pa spièrta Miguel Pourier, den kiko e ta hinka su kurpa; e tabata hunga tènis ku Miguel Pourier; No mishi ku n’e, e famoso bòlpòint ku ta pistol na Marchena; esaki Shon Bènchi i Frènki a graba; Pan franses, kaminda preis di pan a subi ; Rafaelin, komposishon kaminda el a kanta ku mester a saka Rafaelin komo kantante for di Kòrsou i e problema di gezaghèber i Presidente di Asosashon di Músiko; Defuntu number Dia gobièrnu a prohibí wega di number na Kòrsou; Elia, e taksista ku a hañ’é den problema despues di un aksidente;  Ken Ken Ken, robo di Banko Popular Antiano na Gaito; Manuel Cabra, tópiko hòrtamentu di kabritu; Marsiano, e plaga di kakalaka chikí na Kòrsou; Poyoyo ku dinamit; historia di un dama ku nan a atraká, pero ku a sa di defendé su mes; Himno di protesta, den e piesa akí Rudy Plaate ta opiná ku mester a kambia letra di himno di Kòrsou; Lus a bai, Rudy su protesta kontra e echo ku konstantemente koriente ta kai afó; Minister; outor su opinion, kon bon ministernan ta biba; Police Woman, joke di Rudy riba e promé damanan ku a bira polis; E Para Tristu; opinion di kompositor riba Kòrsou ku a sali for di Antia.

Rudy a bisa ku den hopi di su kansionnan e tabata purba avisá, konsientisá su hendenan”. Un 40 aña pasá ya Rudy Plaate tabata kanta di un Kòrsou limpi i bunita. Banda di wals, tumba, kalipso i bolero, Rudy Plaate a kanta seú tambe, ku e ta kere ta mihó ku tumba pa wapa ariba den karnaval. Rudy Plaate a komponé diferente kantika pa mucha; el a funda Perlitas i huntu ku Marco Dorothea el a traha riba operèt pa fraternan. Hopi hende a lubidá ku el komponé piesanan religioso i huntu ku Sra. Poppy Muzo el a traha riba un buki di misa. Rudy tabata hasi mil i un kos pareu, e tabatin su negoshi, ta músiko, deportista (spesífikamente tènis), tabata “drag” i tabata promové klarividensia i tabata gusta investigashon durante temporada di orkan.

Usando Rudy Plaate su piesanan bo por traha un historia kronológiko di susesonan na Kòrsou.