Danki na Spiritu Santu pa e fabor risibï!

Laga mi kuminsá na bisa, ku mi a lanta den un famia katóliko, kaminda mi mama ta ruman di Pastor Bertrandus (Luis) Kranwinkel, ku primeramente a sirbi aki na Kòrsou i despues pa mas di 30 aña komo pastor di parokia di Nort (Aruba) i ku tin un Kolegio “Kolegio Pastor Kranwinkel” na su nòmber tambe. Mi mes pa basta aña huntu ku Sonny, “Shosho” Jacobus, Egbert Espacia, Nelson Scoop, Reynault Bloem, Jan Wolsink i hopi amigu mas di Mundu Nobo a sirbi misa bou di Pastor Rochmans, Mgr. Holterman i Pastor (despues Mgr.) Ellis na Misa di Coromoto. Mi ta laga nos kosnan di mala mucha relashoná ku nos temporada di sirbi misa pa un otro biaha.

Awor akí mi ta kere den un ser supremo, na ken mi tin di gradisí mi eksistensia riba e mundu akí. Mi no ta masha deboto i kasi mi no ta asistí na misa mes mas, salvo okashonnan, kaminda mi ta bai kumpli ku famia di defuntu, pa mi kuminda i deseá famia forsa, ora ku mi no por a asistí na entiero di e defuntu.

Un di e kosnan ku semper a molestiá mi, ta e adorashon eksagerá na santunan i asta na figuranan ku te e tempu ei nan no a deklará komo santu. Mi a asta kompará e adorashon akí igual na MONTAMENTU, kaminda e persona ta opseshoná pa un spiritu.

Spesialmente santunan manera: San Antonio, San Miguel Arcangel, Dr. Jose Gregorio Hernandez, el médico de los pobres i tambe San Filomena, ta esnan ku nan ta venerá mas tantu.

Te poko dia ei, mi a mira den un korant lokal un aviso: “Gracias al Espirito Santo por el favor recibído”. Mi problema mas grandi kontra e avisonan akí no ta nesesariamente ku por a usa e sèn na un mihó manera, pa un mihó meta, pero e echo, ku e persona ta haña ku e mester a kumpli ku un meta pa yama danki públikamente i si e no hasi esaki e ta bai kontra di prinsipio di risibí yudansa. Aki bo ta mira e mesun tendensia di, “Kibra e kadena”. (Karta di kadena). Den e aviso ta pone ku “La persona deberá rezar la oración 3 días seguido sin decir el pedido. Dentro de 3 días será alcanzada la gracia por mas difícil que sea. Publicar cuando se reciba la gracia. Dikon mester mara Spiritu Santu na 3 dia i dikon mester publiká un aviso. Ta obligá bo pa hinka plaka den un medio di komunikashon i t’aki e deboshon pa Spiritu Santu ta bira negoshi. Pakiko publiká e mensahe akí den korant, pakiko na spañó? Mi ta duda ku Spiritu Santu ta lesa korant i spesífikamente esnan na spañó.

Otro punto: e aviso akí den korant ta kosta sigur un 75 florin i ta un suma di kua un famia pober, nos próhimo, lo por kumpra basta un par di kos pa pone den kas.I papiando atrobe den forma humano, mi ta kere asta ku Spiritu Santu lo ta bon rabiá, kada be ku e mira e kantidat di sèn malgastá den aviso den korant, mientras tin hopi hende pober den nos komunidat ku no tin moda di kome i institutonan manera Sokudi, Sinta Ros, Fundashon Alzheimer, pa menshoná un par, ku por usa e sèn ei na un mihó manera.