Resientemente mi a partisipá den un proyekto, organisá pa Wintertuin, den kua huntu ku mi pareha di Spaña, Sara Nogales Sanz (Foreign Language Innovation, FLI), nos a eksplorá kolaborashon entre lenganan krioyo.Den nos kooperashon, importansia di e palabra “ombligo” – lombrishi a kai i e artíkulo akí a nase.

Tin ekspreshon ku nos ta usa asina fásil, ku nos no ta para pensa di unda nan a sali. Un di nan ta: “Kaminda mi lombrishi ta derá.”

Mi a tende e ekspreshon aki hopi biaha. Ora un hende bisa esaki, nos tur sa kiko e ke men. E ta papia di e lugá kaminda el a nase. Su tera. Su bario. Su orígen. Pero pakiko nos lombrishi mester ta derá ei?

Tras di e ekspreshon aparentemente simpel aki tin un kustumber bieu ku poko poko a disparsé: den tempu ku hopi yu tabata nase na kas, kabuya di lombrishi tabatin un balor ku tabata bai mas leu ku solamente un parti di nos kurpa ku mester kai despues di nasementu.E tabata parti di e yu.

I ora e parti ei a bai tera, den sentido literal, e yu a keda mará na e tera kaminda el a nase. Nos ta 8 ruman i di 5 di nos, nos lombrishi ta derá bou di e palu di indju grandi den Piscaderaweg 33.

Tempu ku parto tabata tuma lugá na kas.

Nos mester bai bèk na un Kòrsou kaminda hospital ainda no tabata e lugá outomátiko pa duna lus i ku bishita di frumu na kas pa yuda ku parto tabata algu komun i koriente

Pader Paul Brenneker a dokumentá hopi di e kustumbernan i kreensianan ku tabatin rònt di embaraso, parto i e promé dianan di bida di un mucha.

Por ehèmpel, den Sambumbu nos ta lesa ku despues di parto mama mester a keda un tempu den kas. Tabatin yerba ku e mester a bebe, bañonan speshal, regla tokante bientu i serena, i diferente manera pa protehá tantu mama komo yu. Tin asta un kreensia ku miéntras kabuya di lombrishi no a kai, un muhé na estado no por a drenta kas, pasobra lombrishi di e beibi por a habri.

Lombrishi no tabata simplemente un detaye médiko. Rònt di dje tabatin kreensia, kuido i protekshon.

E material edukativo di NAAM awe ainda ta splika e palabranan frumu/partera, plasenta i kabuya di lombrishi den konteksto di nos tradishonnan (Matrimonio i Parto – Elis Juliana desèmber 1988 – AINA Reports of the Institute of Archeology and Anthropology of the Netherlands Antilles No. 5)

Pero kiko tabata hasi ku e lombrishi?

Aki nos ta yega na e parti interesante. Segun tradishon oral ku hopi hende di generashonnan anterior ainda konosé, e resto di kabuya di lombrishi ku a kai despues di algun dia no tabata simplemente un kos pa tira afó. Tabata derá esaki den kurá òf den serkania di kas na un lugá speshal. Tambe tin memoria oral tokante deramentu di plasenta.

Mi no a haña ainda den dokumentashon ku mi a konsultá un deskripshon sufisientemente kla pa bisa ku na Kòrsou semper tabata dera plasenta bou di porta, ni ken tabata hasi esaki. P’esei mi no ke konvertí memoria oral den un “echo históriko”.

Loke sí mi por dokumentá ta ku e ekspreshon mes ta bieu. Ya na 1974 Pierre Lauffer a inkluí den su Un selekshon di palabra i ekspreshon, bou di e tema “Bida i morto”: “Kaminda mi lombrishi ta derá.” Den e mesun parti nos ta haña palabra manera awa di parimentu, kòrta lombrishi, frumu, partera, karga barika i parto. E ekspreshon pues no ta un invento moderno. E ta parti di nos vokabulario kultural rònt di nasementu i bida.

Un kustumber di Karibe?

Pero aki e storia ta bira ainda mas bunita. Pasobra Kòrsou no ta e úniko lugá ku konosé e kustumber aki. Na Bahamas, investigashon antropológiko a dokumentá ku ora e parti seku di kabuya di lombrishi a kai, nan tabata der’é den kurá. Tin hende ku tabata skohe un lugá speshal, hasta un mata bunita.

Na Jamaica e tradishon ta dokumentá ainda mas spesífiko. Antropólogo Sidney Mintz a registrá ku tabata dera kabuya di lombrishi bou di un mata di fruta, miéntras ku tabata dera plasenta bou di entrada di kas. E interpretashon tabata ku e kustumber ta yuda simbolisá kontinuashon di famia i konekshon di e yu ku su lugá.

Na Jamaica e idea ta asina fuerte ku te ainda den tempu moderno nan ta papia di “navel-string tree”. Un proyekto nashonal di plantamentu di mata a usa mesun e nòmber ei, inspirá riba e kustumber bieu di dera lombrishi i planta un mata na e lugá. E mata tabata krese huntu ku e mucha.

Pensa un tiki riba esaki. Un yu a nase. A dera su lombrishi bou tera. Riba e lugá nan planta un mata. E yu ta krese. Mata ta krese. I tur dos tin nan rais den mesun tera.

“My navel string is buried here”

Na Barbados e mesun ekspreshon ta eksistí. Un estudio publiká den 2024 ta deskribí e tradishon di dera kabuya di lombrishi di un yu den kurá di famia despues di un parto na kas. Ku tempu e práktika a kambia, pero e ekspreshon “my navel string is buried here” a sigui biba. Awe e por nifiká simplemente: aki mi a nase, aki ta mi orígen, aki mi ta pertenesé.

Na Trinidad tambe bo ta tende hende bisa ku nan navel string is buried na un sierto lugá. E frase a bira un manera di bisa: mi por biba otro kaminda, pero aki ta mi tera.

Hasta un estudio moderno di historia i identidat di Grenada tin komo título: “We navel-string bury here.” E investigashon ta usa e idea pa eksplorá kon paisahe, historia, memoria i identidat ta mara hende na un isla.

Pues ora nos na Kòrsou bisa kaminda mi lombrishi ta derá, nos ta papia un idioma kultural.

Otro siman e di dos parti: E kustumber akí a bin for di Afrika?

Material usá: Sambumbu Paul Brenneker – Matrimonio i Parto – Elis Juliana desèmber 1988 – AINA Reports of the Institute of Archeology and Anthropology of the Netherlands Antilles No. 5)