Tin kos ku bo no sa ku bo a lubidá, te dia algu hasi bo kòrda nan atrobe.

Asina, sin sa dikon, mi a bin kòrda e trùk di awa ku tabata drenta bario. E slan largu, e blekinan grandi di kerosin òf manteka i hende wardando pa haña awa. Un imágen simpel di mi hubentut, pero ku a pone mi pensa: kua otro servisio Kòrsou tabatin e tempu ei ku awe kasi nos no ta kòrda mas?

I un tras di otro nan a bin bèk den mi memoria. Telefòn públiko. Sine-trùk. Sirena ku tabata indiká ora. Lechi i vitamina na skol. Kranchi públiko, bibliobùs, servisio di salú ku tabata bai bario. Hasta “mobile banking” ku tabata bai den bario.

No, pasado no tabata mihó den tur sentido. I sigur no tur kos tabata grátis. Pero tabatin algu interesante den e manera ku algun servisio tabata organisá: pueblo no semper mester a bai buska servisio; servisio tambe tabata bai buska pueblo.

Laga nos bai bèk un ratu. No solamente pa hasi nostalgia, sino pa kòrda un Kòrsou kaminda e palabra servisio tabatin, literalmente, wil bou di dje.

Tin kos ku bo no ta kòrda pasobra nan tabata importante e momento ei, despues bo ta realisá ku nan a disparsé kompletamente for di nos bida. Un di e kosnan ei ta e manera ku servisio públiko tabata yega serka pueblo.

Awe, si bo ke awa, bo ta habri kranchi. Si bo ke papia ku un hende, bo ta saka bo selular. Si bo ke mira un pelíkula, bo habri Netflix òf YouTube. Si bo ke sa kuant’or tin, bo no tin ni mester di un oloshi: bo telefòn ta bisa bo.

Pero tabatin un Kòrsou kaminda awa tabata yega na bo kas den trùk, kaminda bo mester a kana bai telefòn, kaminda un trùk tabata pasa sine den bario i kaminda un sirena tabata bisa un parti di isla: ta 12’or, bai kome.

E trùk di awa

Un di e imágennan ku a keda grabá den mi memoria di mucha ta trùknan di Landswatervoorzieningsdienst (L.W.D) un nòmber ku pa un mucha tabata kasi mes largu ku e trùk mes.

Nan tabata drenta bario pa parti awa. E trùk tabatin slan largu, trahá di chup, i na kas mester tabatin hèmber òf bleki pa pone awa aden. Tin biaha den bleki grandi ku originalmente tabatin kerosin òf manteka aden. No tabatin nada di e komodidat ku awe nos ta konsiderá normal. Pero ora e trùk di awa a yega, tabatin awa. E historia ta bai hopi mas leu bèk.

Promé ku tabatin un sistema moderno di distribushon, pueblo tabata dependé di pos i (re)bendedó di awa. Tabatin hende ku tabata transportá awa ku garoshi halá pa buriku (Awa di yobe).Despues trùk a tuma e trabou akí over.

Dia 1 di yanüari 1928 Landswatervoorzieningsdienst, L.W.V, a kuminsá. E servisio tabata atendé suministro di awa na e islanan, ku énfasis riba Kòrsou, Aruba i Boneiru. Un “gedenkboek” publiká na okashon di 25 aña di L.W.V ta dediká kapítulonan na historia di awa promé ku 1928.

Historia di awa na nos isla no ta solamente historia di teknologia. Ta historia sosial. Ken tabatin pos, renbak? Ken mester a kana pa bai kranchi públiko? Ken tabata dependé di trùk di awa? Ken mester a kumpra awa? Awa tabata determiná kon bo tabata biba.

E idea di laga pueblo kue awa grátis na kranchinan públiko no tabata solamente di Kòrsou. Dokumentashon di Landswatervoorzieningsdienst ta mustra ku na Aruba i Boneiru tambe a krea pos kaminda abitantenan por a bai saka awa sin paga. Despues a bin instalashon pa destilá awa di laman i un sistema moderno di distribushon. Poko poko trùk di awa a bira ménos nesesario. Pero pa hopi di nos e zonido di e trùk den bario, e slan i e blekinan grandi ta parti di historia di Kòrsou.

“Mi mester hasi un yamada”

Otro kos ku generashon nobo probablemente lo haña straño: un tempu telefòn no tabata algu ku bo tabatin den bo saku. Ni sikiera tur kas tabatin telefòn. P’esei telefòn públiko tabatin un funshon sosial importante.

Mi ta kòrda e telefònnan den diferente bario. Na prinsipio tabatin posibilidat di hasi sierto yamada sin paga; despues a bin aparatonan kaminda mester a paga. Ku tur kos ku ta públiko, desafortunadamente tabatin abuso tambe.

Den Amigoe di 1954 ta papia regularmente di vandalismo, motibu ku regularmente telefòn públiko tabata dañá. Ku yegada di telefòn selular, telefòn na kas, telefòn públiko a pèrdè su funshon. Pero ainda tin lugá kaminda e restonan di nan ta pará manera un monumento chikí di un otro tempu.

Sine den bario

Bo no tabatin moda pa bai West-End, Roxy òf Cinelandia? Bo bario tabata leu for di siudat? Sine tabata bin serka bo.
Cultureel Centrum Curaçao (CCC) tabata usa un trùk di sine den añanan 50 i 60 pa pasa pelíkula den bario. No solamente pelíkula: promé ku e pelíkula, nan tabata pasa Polygoon Filmjournaal, notisia for di Hulanda. Trùk di sine no tabata solamente entretené, pero tabata tambe un bentana pa mundu.

Bo tabata bai ku bo stul. Pone bo stul dilanti di pantaya improvisá, mucha banda di hende grandi, bisiña banda di bisiña, i ora lus paga, bario tabata bira teater di sine.

I e servisio a dura mas largu ku kisas nos ta pensa.Te na 1976 ainda agènda den Amigoe tabata menshoná trùk di sine na Montaña i Mgr. Verriet Instituut. Trùk di sine tabata, literalmente, kultura riba wil. Pero no tabata sine so ku tabata move.

Bibliobùs.

No ta solamente sine tabata riba wil. E konsepto tabata meskos: si pueblo no por a yega biblioteka, laga biblioteka yega serka pueblo. Den añanan 70 bo tabata haña ruta di bibliobùs tur siman den korant. Un dia e bùs tabata para dilanti di misa, otro dia dilanti di skol òf sentro di bario. Bùs tabata drenta bario yen di buki. No pa bende nada. Pa laga hende lesa.

E mesun konsepto akí banko tambe tabata usa pa yega serka kliente, pero esaki ku meta komersial.

Awe nos ta papia di “mobile banking” un app den bo telefòn. E tempu ei “mobile banking” tabata literalmente: banko tabata bin serka bo. Progreso no ta semper inventá un idea nobo. Tin biaha nos ta simplemente hinka un idea bieu den un bachi nobo.

Otro siman e di dos parti.
Material usá: Gedenkboek Landswatervoorzieningsdienst Nederlandse Antillen – 1928 – 1953- Amigoe 1954 i 1976 (Delpher).