Resientemente mi a kòmbersá ku un amigu, ku a kumpra un oloshi na Spritzer & Fuhrmann sigur 55 aña pasá. E manera ku e ta deskribí e servisio ku el a haña na e empresa i tambe e garantia ku nan a dun’é por si akaso e oloshi daña, ainda ta impreshon’é. Na 1977 e tabata invitá na selebrashon di e hubileo di oro di Spritzer & Fuhrmann i a konta mi, ku ta úniko biaha, ku el a bai un resepshon i ku realmente por a papia di un “Hubileo di Oro”. E istoria di Spritzer & Furhman, The Jewelers of the Caribbean since 1927” ta manera un fantasia.
Sr. Wolf Spritzer a pèrdè su negoshi den Promé Guera Mundial na Budapest. El a keda sin su famia di 1919 te 1923 i despues di a reuní ku su famia, el a disidí na 1927 di bai serka su ruman hòmber na Maracaibo. Via Kòrsou el a sigui su biahe pa Venezuela, Den e tempu kòrtiku ei el a namorá di nos isla, nos idioma i nos hendenan i algun luna despues el a regresá Kòrsou. El a hür un huki chikí den un edifisio i a kuminsá drecha oloshi i hoya.
Charles Fuhrmann, ku den su pais Rumania no tabatin trankilidat pa motibu di brutalidat polisial, a disidí di kumpra un pasashi “one-way” pa Suramérika, pasando Kòrsou pa hib’é Venezuela. Kasualmente el a bin topa ku Wolf Spritzer, ku ya den e tempu ei a traha nòmber komo hoyero. Hustamente den e dianan ei Spritzer tabatin mester di un profeshonal pa yud’e ku trabou atrasá ku e tabatin, pa motibu di un operashon na su wowo. Asina a kuminsá e union di sosio di Spritzer & Fuhrmann. Final di dékada 20, ku krísis ekonómiko mundial, no tabata e temporada mas prometedor pa un negoshi di oloshi i hoya, sinembargo nan a disidí di bai p’e.
Ora bo ta inventivo i traha duru, suerte tambe por ta di bo banda. Nan a haña un chèns di “oro”, ora ku un komersiante biahero a yega Kòrsou ku un kantidat di hoya i no por a sali for di nan. Ku yudansa finansiero di otronan, Spritzer & Fuhrmann a logra kumpra e partido di hoya di e biahero aleman i asina por a start nan negoshi “Spritzer & Fuhrmann” ku a transformá den un empresa mionario. E hòmbernan akí tabatin un kurashi inkreibel. Komersiantenan na Kòrsou tabata importá oloshi pa sigui bende ku Sur Amérika, pero pa motibu di nos klima tabatin sierto problema ku e oloshinan i a disidí di bende e oloshinan ku Spritzer i Fuhrmann. Asina konsekuentemente nan a haña un kantidat respetá di oloshi di diferente marka. Asina nan a habri nan siguiente negoshi na Handelskade, “Relojeria Alemana”. Despues a amplia e surtido ku benta di kámara i mas merkansia óptiko. A sigui mesora tambe, ku apertura di un negoshi na Aruba.
Despues di Di Dos Guera Mundial, negoshi a kuminsá floresé na Kòrsou. Barkunan krusero, Holland Amerika Line, Grace Line, Alcoa i otronan tabata bishitá Kòrsou regularmente. Kòrsou su turismo tabata “booming” i e turista ku tabata yega Kòrsou, tabata esun ku por a gasta, den nan mayoria e merikano ku tabata kumpra hoya, oloshi etcetera, pasobra akí tabata muchu mas barata ku den nan pais. I klaro e lokalnan ku por a afòrt di kumpra i tabata gusta kos bon, tambe tabata forma parti di e klientela di Spritzer & Fuhrmann.
E kresementu a trese ku ne, ku Spritzer & Fuhrmann a disidí di habri negoshi na Aruba, Boneiru, St. Maarten i tambe riba 57th street at Fifth Avenue na New York. Na dado momento Spritzer & Fuhrmann tabatin 32 pakus i mas ku 500 empleado. Mi a mira e “beibel” di Spritzer & Fuhrmann, den kua tabatin un “jobdescription” pa tur funshon den negoshi di Spritzer & Fuhrmann. Ku e kresementu a bin tambe ampliashon di nan surtido, oloshi, hoya, brel, porselana, plata, etcetera. Nan tabata bende di un simpel suvenir te e hoya di mas karu na mundu.
Nan edifisio prinsipal tabata na skina di Helfrichplein, ku despues a kambia bira Gomezplein, e edifisio mahestuoso ku su kariòn. Djei nan Spritzer & Fuhrmann a move pa èrpòrt i tambe a habri branche den diferente hotèl i tambe na Promenade Shopping Center.
E amigu di mi, ku mi a menshoná den kuminsamentu di e artíkulo akí a sigurá mi, ku tabatin dianan den e époka di oro di Spritzer & Fuhrmann, (1958) ku turistanan tabata sinta riba stupi dilanti di e negoshi, wardando e pakus habri. Tambe el a konta mi i mi a haña esaki bèk den Ñapa di 13 di yüni 1998, ku Spritzer & Fuhrmann riba un dia a yega na un volúmen di benta di 1 mion florin. Despues di bastante krítika riba preisnan den negoshi di Spritzer & Fuhrmann, nan ta publiká e buki “Slacht niet de kip die de gouden eieren legt”, kontrarestando tur krítika.
Turista wardando S & F habri
Trahadó profeshonal
Tambe Spritzer & Fuhrmann tabata un skol pa diferente persona ku despues di traha na nan empresa a move bai i kuminsá nan propio negoshi. Aldonio Fernandes, un portugues ku a kuminsá na Spritzer & Fuhrmann i traha 25 aña na e empresa, pa despues a habri su propio negoshi pa drecha oloshi.
Walfried Pieters ku tabata pa hopi tempu kara di Spritzer & Fuhrmann a habri su propio hoyería den Promenade i Sigmund i Els Hermanus ku tambe a bandoná fila di Spritzer & Fuhrmann pa kuminsá ku nan propio negoshi.
Rekonosementu
Spritzer & Fuhrmann i spesífikamente Charles Fuhrmann a risibí diferente distinshon, tantu di Kòrsou, di Reino i di rònt mundu, entre otro: Officier in de Orde van Oranje Nassau, Ridder in de Orde van de Nederlandse Leeuw, nan por a usa e predikado di “Hofleverancier”; Diamonds-International Award, “Cachu di Oro” di Kòrsou i diferente distinshon mas. Na okashon di nan 50 aniversario a pone Spritzer & Fuhrmann riba stampia.
Final di un bunita istoria
Pero lamentablemente esaki ta istoria di Spritzer & Fuhrmann. Den kuminsamentu di dékada 80 e empresa ta sufri pèrdidanan grandi, pa motibu ku barkunan krusero manera, Michelangelo i Queen Elisabeth no tabata mara mas na Kòrsou; na 1985 bolívar ta devaluá i e venezolano ku tabata kumpra hopi na Kòrsou no tabata bin mas. Nan ta purba ku reorganisashon den 1984 i 1985, pero esaki no ta duna solushon pa e problemanan grandi i na 1990 Spritzer & Fuhrmann ta disidí di sera nan porta na Kòrsou. Un pèrdida grandi pa e personal i pa Kòrsou. Kòrsou i e otro islanan di Antia tabata hopi orguyoso di e empresa akí.
Bunita historia Percey. Den Kwartier tambe tin un meneer di edat ku ainda tin su negoshi den kurá ku ta drecha oloshi i e tin su mes marka di oloshi ku ela traha. Meneer Leito, e tambe a kontami ela traha einan. Bo pasa serka dje un dia lo bo haña historia pa skirbu un relato mas di e kompania aki.
Vader por favor app mi su detayenan i mi ta hasi’e un bishita
Bunita historia di S&F! Mi mama tambe a traha einan hopi ten na S&F Gomezplein.
Un pakús ku bunita merkansía i di kalidat.
Great tempu!
Percy, ta bon fiha pa posteridat loke a pasa na Kòrsou. Den e kaso akí nos ku ta grandi a konosé e negoshi di S &F. Pero pa hóbennen di awe e ta historia. Ta di spera pa un dia bo relatonan dokumental di nos pasado sali imprimí.
Sidney mi ta apreisá bo atenshon.
Tremendo danki pa komparti
Mi tata tbt konta nos kon un jood na madeira a siñele e trabow di holloge maker mi ta proud ta joe muher di Aldonio Fernandes S&F tbt un famia ehemplar tur trahado tbt traha dushi ku otro
Mi ta kontentu ku bo reakshon riba e publikashon ta di bo tata.
Tremendo relato di un parti hopi impaktante den nos historia komersial.
Er zijn nog meer werknemers die ooit bij S & F begonnen: de bekendste was zeker Nick Moeller van Avila Hotel, mevrouw Lange uit Duitsland die hier op een leeftijd van meer dan 100 jaren overleed en de bekende ontwerper Rob van de Laar. In de Archiefvriend was al eerder een artikel over het bedrijf verschenen door Helma Maduro, een kenner van het bedrijf: https://www.archiefvriend.com/index.php/ons-kwartaalblad/artikelen-uit-ons-blad/4-spritzer-en-fuhrmann
Percey mashá danki pa e relato aki di nos historia.
Den nos famia nos tabata tin un tanta ku a traha pa sigur 40 aña na Spritzer & Fuhrmann. Un shon mashá pèrtinènt. Semper ku su koyar di pèrla na garganta, pèrla na orea, oloshi banchi di kueru ku 4 diamante grandi(1 pa kada dékada ku ela traha) i diamante mas chikitu pa yena entre nan. E ultimo aki tabata regalo di mener Fuhrmann mes dia ku a selebra e 40 aniversario di e tanchi aki. E resepshon a tuma lugar na kas di mener Fuhrmann mes.
Nos ku tabata subrina/o nan tambe a wòrdu invitá, no hende grandi so.
Tabata un eksperensia úniko pa a topa ku mener Fuhrmann, un eminensia, pero ku un humildat sin fin.
E manera ku e tabata trata su empleado nan ku rèspèt tabata hasi ku tur a bira manera famia ku otro, e empresa kompletu, nan tabata biba ‘committed’ ku e empresa i ku otro.
Un biaha mas danki pa trese e rekuerdo nan dushi aki.
Mi tanchi tabata Julia (Yuya) Pinedo.
Hendenan dushi di Otrabanda.
Mi kier a komentá tokante Yuya Pinedo i su nòmber a bin dilanti, pero mi no tabatin mas informashon
Bon historia!
Pero… Bo no a puntra nan p’e nomber dje alemán (sigur judío) Ku a pasa Kòrsòw Ku yen di hoyas pa bende aki banda nan?
I di Ku prosedensha nan tabatá?
Sr Pellicer, plis informá mi ken mi por puntra. masha danki
Top istoria di S+F. Mi no tabata sa esaki nunka.
Despues di a lesa e istoria di S+F pa nan, mi mama (85) i mi tata (89) ta konta kon e turista nan di e barku nan, Sta. Rosa i Sta. Paula ta bin kumpra joya na kranèl pa bai nan pais kun’é.
Si bo ta den e pakus kumprando mainta òf atardi, bo ta wòrdu sirbí ku kòfi òf té den servies di porcelana. Good old times!
Bunita historia di S&F! Mi mama tambe a traha einan hopi ten na S&F Gomezplein.
Un pakús ku bunita merkansía i di kalidat.
Great tempu!
Tremendo relato di un parti hopi impaktante den nos historia komersial.
Sigi ku e bon trabow Percy!
Mi mama tin 88 i e tambe ta konta meskos🤩👍🏼
Na añanan ‘50/‘60 S&F tabata saka propaganda full page den New York Times, dunando un empuhe grandi pa turismo Merikano pa Kòrsou.
Meskos ku awendia Sandals ta hasiendo ku “commercial” tremendo na CNN i otro kanalnan di televishon na Merka. Impagabel.
Percy, mi mama a konta mi ku despues di Segundo Guera Mundial hopi di hudiu di Europa Oriental a migra bin Kòrsou. Nan tabata kana ku tela di paña riba nan lomba i tabata fia pa paga fin di luna.Hopi di nan a progresa i abri pakus den entre otro Colombusstraat. Madurostraat.Kisas lo ta bon pa amplia un bes riba desaroyo di Punda ku su diferente hotelnan i pakus ku produkto di rònt mundu.
By the way, Spritzer i Fuhrman ta derá na Kòrsou?
.
Danki Max, sigur bon pa un follow up
Doble P danki pa a informami poko di historia di Korsow vooral di joyeria tan nombra ey Spritzer and Furhmann
Si.
Hopi danki Bròder.
Interesante pa sa e parti di historia aki. Mas ahinda pasombra mi papa defuntu tambe a traha komo magazijn meester na S&F.
Anto no lubidá bo ruman tambe a traha ei nan.
Tremendo atrobe Percey. Mi no tbta sa nunka kon e 2 personanan ey a yega na e tremendo empresa di Spritzer and Fuhrman. Mi ta sugeri pa bo traha un Bundel du tur e historianan bunita aku ky bo ta komparti ku nos. Pa nn por ta mas bibu pa ns generashon ku ta bini. Ns mes ta siña masha hopi i ta bale la pena sigi Eduka. Danki un bia mas. Master….
Percy Danki pa e pida historia aki di nos isla. Mi a eksperensia nan bon servisio personalmente ora, bibando na NY mi por a hiba mi oloshi, ku mi a kumpra na S&F Korsou, bai drecha na nan sulursal reina 57th Street, Manhattan.
Tambe ruman homber di mi kasa, Richard van Blarcum, ta un di e empleadonan Ku después di traha na S&F aki na Korsou, a bai habri su propio Optika na Aruba.
Hopi great atrobé. Bolivar a devalúa na 1982. Un bon kliente di Spritzer tabata Duvalier nan di Haití. Ora a deroká Duvalier, nan a pèrdè un bon kliente.
Hopi interessante kosnan grandi i Bendishona di Pais Korsou
Danki Percey tremendo Historia.Mi no tabata niunka ku ta asina aki Spitser & Fuhrman a kuminsa
Interesante pa mi a sa historia komersial di un prestigioso joyeria S&F.
Danki Percy.
Tremendo relati,
Mi mama, ruman muije prima i hopi hende ku mi konose a traha na S+F
Mi Mama a traha hopi aña na e optika Moderns
Danki Percy, bunita relato ku ta trese hopi rekuerdo. Ami ta korda kon semper mi tbt pasa mira hopi hende den e pakus. E empleadonan nechi bisti.
Esta un bunita relato.
Mi no tabata na altura kon Sprtizer & Furhman a start. Mi por confirmation si ku nan tabata bende bon. Mi tio defuntu, Franklin Koko, ku hopi orguyo a traha años na Spritzer & Furhman. E la yega di kontami kon riba un dia e por a bende un joya of oloshi so pa $50k.
Otro bunita historia. Mi ruman homber deftuntu a traha hopi aña na S & F. Despues e tabata hende di konfiansa di famia Fuhrman ku unda ku sra F tin ku bai e ta bel mi mama pa duna mi ruman respondi pa bin buské I hibe tur kaminda ku e tin ku bai. Nan tabata stima mi ruman.
Danki Percey tremendo Historia.Mi no tabata niunka ku ta asina aki Spitser & Fuhrman a kuminsa