Resientemente mi a kòmbersá ku un amigu, ku a kumpra un oloshi na Spritzer & Fuhrmann sigur 55 aña pasá. E manera ku e ta deskribí e servisio ku el a haña na e empresa i tambe e garantia ku nan a dun’é por si akaso e oloshi daña, ainda ta impreshon’é. Na 1977 e tabata invitá na selebrashon di e hubileo di oro di Spritzer & Fuhrmann i a konta mi, ku ta úniko biaha, ku el a bai un resepshon i ku realmente por a papia di un “Hubileo di Oro”. E istoria di Spritzer & Furhman, The Jewelers of the Caribbean since 1927” ta manera un fantasia.
Sr. Wolf Spritzer a pèrdè su negoshi den Promé Guera Mundial na Budapest. El a keda sin su famia di 1919 te 1923 i despues di a reuní ku su famia, el a disidí na 1927 di bai serka su ruman hòmber na Maracaibo. Via Kòrsou el a sigui su biahe pa Venezuela, Den e tempu kòrtiku ei el a namorá di nos isla, nos idioma i nos hendenan i algun luna despues el a regresá Kòrsou. El a hür un huki chikí den un edifisio i a kuminsá drecha oloshi i hoya.
Charles Fuhrmann, ku den su pais Rumania no tabatin trankilidat pa motibu di brutalidat polisial, a disidí di kumpra un pasashi “one-way” pa Suramérika, pasando Kòrsou pa hib’é Venezuela. Kasualmente el a bin topa ku Wolf Spritzer, ku ya den e tempu ei a traha nòmber komo hoyero. Hustamente den e dianan ei Spritzer tabatin mester di un profeshonal pa yud’e ku trabou atrasá ku e tabatin, pa motibu di un operashon na su wowo. Asina a kuminsá e union di sosio di Spritzer & Fuhrmann. Final di dékada 20, ku krísis ekonómiko mundial, no tabata e temporada mas prometedor pa un negoshi di oloshi i hoya, sinembargo nan a disidí di bai p’e.
Ora bo ta inventivo i traha duru, suerte tambe por ta di bo banda. Nan a haña un chèns di “oro”, ora ku un komersiante biahero a yega Kòrsou ku un kantidat di hoya i no por a sali for di nan. Ku yudansa finansiero di otronan, Spritzer & Fuhrmann a logra kumpra e partido di hoya di e biahero aleman i asina por a start nan negoshi “Spritzer & Fuhrmann” ku a transformá den un empresa mionario. E hòmbernan akí tabatin un kurashi inkreibel. Komersiantenan na Kòrsou tabata importá oloshi pa sigui bende ku Sur Amérika, pero pa motibu di nos klima tabatin sierto problema ku e oloshinan i a disidí di bende e oloshinan ku Spritzer i Fuhrmann. Asina konsekuentemente nan a haña un kantidat respetá di oloshi di diferente marka. Asina nan a habri nan siguiente negoshi na Handelskade, “Relojeria Alemana”. Despues a amplia e surtido ku benta di kámara i mas merkansia óptiko. A sigui mesora tambe, ku apertura di un negoshi na Aruba.
Despues di Di Dos Guera Mundial, negoshi a kuminsá floresé na Kòrsou. Barkunan krusero, Holland Amerika Line, Grace Line, Alcoa i otronan tabata bishitá Kòrsou regularmente. Kòrsou su turismo tabata “booming” i e turista ku tabata yega Kòrsou, tabata esun ku por a gasta, den nan mayoria e merikano ku tabata kumpra hoya, oloshi etcetera, pasobra akí tabata muchu mas barata ku den nan pais. I klaro e lokalnan ku por a afòrt di kumpra i tabata gusta kos bon, tambe tabata forma parti di e klientela di Spritzer & Fuhrmann.
E kresementu a trese ku ne, ku Spritzer & Fuhrmann a disidí di habri negoshi na Aruba, Boneiru, St. Maarten i tambe riba 57th street at Fifth Avenue na New York. Na dado momento Spritzer & Fuhrmann tabatin 32 pakus i mas ku 500 empleado. Mi a mira e “beibel” di Spritzer & Fuhrmann, den kua tabatin un “jobdescription” pa tur funshon den negoshi di Spritzer & Fuhrmann. Ku e kresementu a bin tambe ampliashon di nan surtido, oloshi, hoya, brel, porselana, plata, etcetera. Nan tabata bende di un simpel suvenir te e hoya di mas karu na mundu.
Nan edifisio prinsipal tabata na skina di Helfrichplein, ku despues a kambia bira Gomezplein, e edifisio mahestuoso ku su kariòn. Djei nan Spritzer & Fuhrmann a move pa èrpòrt i tambe a habri branche den diferente hotèl i tambe na Promenade Shopping Center.
E amigu di mi, ku mi a menshoná den kuminsamentu di e artíkulo akí a sigurá mi, ku tabatin dianan den e époka di oro di Spritzer & Fuhrmann, (1958) ku turistanan tabata sinta riba stupi dilanti di e negoshi, wardando e pakus habri. Tambe el a konta mi i mi a haña esaki bèk den Ñapa di 13 di yüni 1998, ku Spritzer & Fuhrmann riba un dia a yega na un volúmen di benta di 1 mion florin. Despues di bastante krítika riba preisnan den negoshi di Spritzer & Fuhrmann, nan ta publiká e buki “Slacht niet de kip die de gouden eieren legt”, kontrarestando tur krítika.
Turista wardando S & F habri
Trahadó profeshonal
Tambe Spritzer & Fuhrmann tabata un skol pa diferente persona ku despues di traha na nan empresa a move bai i kuminsá nan propio negoshi. Aldonio Fernandes, un portugues ku a kuminsá na Spritzer & Fuhrmann i traha 25 aña na e empresa, pa despues a habri su propio negoshi pa drecha oloshi.
Walfried Pieters ku tabata pa hopi tempu kara di Spritzer & Fuhrmann a habri su propio hoyería den Promenade i Sigmund i Els Hermanus ku tambe a bandoná fila di Spritzer & Fuhrmann pa kuminsá ku nan propio negoshi.
Rekonosementu
Spritzer & Fuhrmann i spesífikamente Charles Fuhrmann a risibí diferente distinshon, tantu di Kòrsou, di Reino i di rònt mundu, entre otro: Officier in de Orde van Oranje Nassau, Ridder in de Orde van de Nederlandse Leeuw, nan por a usa e predikado di “Hofleverancier”; Diamonds-International Award, “Cachu di Oro” di Kòrsou i diferente distinshon mas. Na okashon di nan 50 aniversario a pone Spritzer & Fuhrmann riba stampia.
Final di un bunita istoria
Pero lamentablemente esaki ta istoria di Spritzer & Fuhrmann. Den kuminsamentu di dékada 80 e empresa ta sufri pèrdidanan grandi, pa motibu ku barkunan krusero manera, Michelangelo i Queen Elisabeth no tabata mara mas na Kòrsou; na 1985 bolívar ta devaluá i e venezolano ku tabata kumpra hopi na Kòrsou no tabata bin mas. Nan ta purba ku reorganisashon den 1984 i 1985, pero esaki no ta duna solushon pa e problemanan grandi i na 1990 Spritzer & Fuhrmann ta disidí di sera nan porta na Kòrsou. Un pèrdida grandi pa e personal i pa Kòrsou. Kòrsou i e otro islanan di Antia tabata hopi orguyoso di e empresa akí.
