Djaweps dia 2 di mei, mi a hasi pa mi tabata presente na Museo di Kòrsou, kaminda Gabinete di Gobernador na Kòrsou, den estrecho kolaborashon ku Museo di Kòrsou a konservá dos tronkon morto ku eskultura di Mac Alberto aden. Nan lo haña un lugá nobo den e kurá di eskultura botániko di Museo di Kòrsou, kaminda lo ekshibí nan pa públiko. Lo añadí tambe un kolekshon di potrèt di otro obranan di arte di Mac Alberto, akompañá pa splikashon dje obranan i ku informashon di e artista mes. Un akto simpel, den ambiente privá, kaminda famia di Mac Alberto tabata presente i representantenan di Gabinete di Gobernador. Ami a konsiderá esaki komo un komienso pa rekonosementu di un figura, ku nos a lubidá riba dje. Ku esaki ta rekonosé Mac Alberto komo un artista outodidakto di Kòrsou, di ken su trabou tin un impakto duradero den espasio públiko.
Mac Intirer Alberto òf Soft Melody a nasé 16 di ougùstùs 1932 i tabata un figura masha konosí na Kòrsou. “Mac Alberto a nase den un kas situá na rant di Wishi i Marchena, pero el a krese den Colon, Otrobanda. Promé ku el a hasi 14 aña, Mac Alberto a bai traha komo kargadó di barku den haf. Ku su 18 aña el a bai nabegá komo matros, bishitando hafnan di Venezuela, Panamá, Costa Rica, Perú i Chile. Ta den e paisnan aki el a mira realmente kiko ta pobresa”.( Ami ta yu di Kòrsou, ni mas i ni ménos. E arte di graba den palu di Mac Alberto 2021 drs. Lionel Janga). Ami ta kòrda mi djasabranan atardi na Gomezplein, kaminda e tambe tabata bishitá. Un kabayero ku tabata bisti masha bon mes i tabata un hòmber bon lesá. E tabata traha na Shell komo paipfeter i despues a bai traha na 1967 na WEB, e kompania di awa i elektrisidat e tempu ei. Aki ta kaminda ku Mac Alberto realmente a bira un lider.
Segun añanan tabata pasa e tabata konstantemente den spòtlait relashoná ku su derechonan komo trahadó. E tempu ei, suèldu mínimo pa trahadónan di gobièrnu tabata Fl. 1.21 pa ora. Na 1969 a lanta un ola di protesta grandi serka e trahadónan ku tabata reklamá e pago miserabel akí. I mirando ku segun Mac Alberto, e bònt no tabata yuda nan manera mester, nan a lanta Bònt di Trahadónan di Gobièrnu (BTG), e sindikato pa obrero den servisio di gobièrnu. Mac Alberto a bira e promé presidente di e sindikato. Nan a kanta un wèlga i despues di un lucha ku hopi tenshon, nan a gana e lucha i a haña un oumento di 21% riba nan suèldu. Mac Alberto a gana e lucha, pero a pèrdè tur kos, pa motibu di e wèlga i akshonnan akí, el a pèrdè trabou. Mac Alberto tabata e persona tras di e konosido pamflèt di e tempu ei, den kua el a skibi ku: “Ningun hende ku a nase ku un kuchara di plata den nan boka no por pensa pa nos”( Amigoe di Curacao 9 desèmber 1969)
Esaki tabata komienso di Mac Alberto su kontratempu. Na febrüari 1971 Mac Alberto a hañ’é den problema ku hustisia den e konosido kaso di Kámara di Komersio, kaminda nan a tira un Molotòv kòktel ku e intenshon di kima e edifisio. E tempu ei prensa a asta skibi ku nan a haña staf di dinamit den poder di Mac Alberto. Despues di a sinta un kastigu preventivo, nan a laga Mac Alberto bai. Despues a surgi otro problema ku hustisia, ora a hasi un investigashon riba Mac Alberto, supuestamente a haña mariwana den su trùk. A akus’é i a kastig’é. Mac Alberto a para ariba ku e tabata inosente i ku ta un reshèrshi, ku despues a pèrdè trabou komo reshèrshi, ku tabatin rabia riba dje a “set up” e kos akí. Ounke kuantu karta el a skibi pa masha tantu hende i instansia, nunka el a haña e satisfakshon pa demostrá ku nan a ser’é inhustamente. Despues Mac Alberto mester a presentá den korte, pa supuesto ofensa di S.E Gobernador drs. Ben Leito. Manera el a splika, su orguyo i su dignidat tin mas balor ku plaka.
Disgustá i mal frustra Mac Alberto a sigui lucha i a kuminsá un kaso kontra di gobièrnu pa motibu di su retiro i tin papiá ku el a gana e kaso ei i ku gobièrnu mester a pag’é 13 mil florin i parse ku nunka el a haña e sèn aki. Akusando BTG ku nan no tabata hasi nada p’e Mac Alberto a “vloer” e konsehero di BTG den hòspital St. Elizabeth, dia el a topa esaki kasualmente.
Huntu ku Lòli Daal, Mac Alberto a produsí e revista Lus Pretu i ya e promé edishon nan a haña nan den klinchi ku hustisia, pasobra ningun kaminda tabata menshoná nòmber di esnan responsabel pa e revista ku segun hustisia tabatin basta ofensa aden.
Na 1979 Mac Alberto a biaha pa Hulanda, kaminda el a traha i biba dos aña i na 1981 el a regresá Kòrsou. El a disidí di kuminsá ku un otro forma di protesta, kanando den sentro di siudat na karson kòrtiku i limpiando sapatu pa hende.E mesun Mac Alberto, ku mi tabata gusta mira bon bistí, un hòmber bon di train, awor na karson kòrtiku, flanèl kibrá,limpiando sapatu.
Un kos ku a duele inmensamente tabata ku e sindikato ku e a duna bida no a hasi nada pe. E ku su orguyo a disidí di lebumai e kosnan ei i sigui purba na su manera.
Estando den Punda, komo e no tabatin nada di hasi Mac Alberto su mente kreativo a sigui traha i aki a kuminsá un otro kapítulo den bida di Mac Alberto. Sintá hopi biaha bou di palu dilanti di palasio di Gobernador, dado momento el a mira un kònòshi na un palu i el a kuminsá traha un eskultura di dje. Manera Mac Alberto mes a konta, el a traha e promé eskultura ku un pida glas di un bòter bèrdè.
Pronto a sigui di su man un seri di eskultura di palu komo arte públiko den Punda. Algun di e eskulturanan akí ta representá imágen erótiko, loke a kousa poko konsternashon e tempu ei. Sin embargo tabata trata di un forma spesial di arte públiko di eskultura den palu, ku a hala atenshon i duna kuminda pa pensamentu i komentario. E arte di graba den palu komo tal ta siglonan bieu i un medio pa ekspresá elemento kultural, polítiko i religioso. Na otro banda un pida palu riba su mes tambe por inspirá un artista sin mas. E artista ku ta sinti e material i tin bista riba realidat, ku ta tene kontakto ku e ritmo natural di su material, tin biaha mester di masha tiki pa e monta e formanan básiko ku su hèrmèntnan i pa despues elaborá e liñanan brutu di su obra. Ta esaki mes Mac Alberto a hasi ku e palunan den Punda pa realisá su pensamentunan den nan.(Ami ta yu di Kòrsou, ni mas i ni ménos. E arte di graba den palu di Mac Alberto 2021 drs. Lionel Janga).1Lesa Lionel Janga: Ami ta yu di Kòrsou, ni mas ni ménos i Peter Verton Burgers & Broeders
Su obranan kreá no ta privá sino popular eksponé pa un i tur gosa di nan. Poko poko e popularidat pa loke Mac Alberto tabata hasi a kuminsá krese. I atrobe nos por a mira Mac Alberto floria, el a kuminsá bisti nèchi bèk. E tabata bai Punda, tur na blanku bistí ku un flor kòrá na su kamisa. Hopi turista tabata para i saka potrèt di Mac Alberto trahando su arte den tronkon di palu. Un tempu Mac Alberto tabatin un kasita (studio) pegá ku e dry cleaning chines den Ansinghstraat. Na 2010 Mac Alberto a stòp di traha e arte aki, ya ku el a sufri un derame selebral. A konsekuensia di esaki su último añanan di bida el a pasa den kas di kuido na Habaai i den Ricardus tehuis.Dia 21 di ougùstùs 2020, den temporada di COVID 19, Mac Intirer Alberto òf Soft Melody a muri.
Ku baimentu di Mac Alberto Kòrsou a pèrdè un personalidat eksepshonal, ku na su manera spesial a laga marka konkreto atras den sindikalismo i via su arte públiko den Punda.
Tempu ku Mac Alberto tabata bòks, e tabata yama “Soft Melody”. Den su pechu e tabatin un tatuahe di fo’i tempu ku e tabata hóben, nabegando. Un kurason asina grandi ku un puña ta pasa’den. Sanger ta kore for di dje.
Mac Alberto su nòmber i su echonan lo keda skibí den páginanan di historia di nos pais.
Bèrdat nos por yam’é SOFT MELODY?
Defuntu sr.Mac Alberto tabata un “ brother “ pa ami. Den anja 70 Mac tabata sinta algun meter leu na unda e ferrynan ta mara na otrabanda . Sinta abow i dilanti di djie un korant abrí i den e korant tabata tin un seru di marihuana. Ami sa kiko cannabis ta : e marijuana ( door ku mi ta lesa i investiga ) , ma kere ku mi por a kumpra algo .nee hoor , ma hanja un kantidat ( un man Jen) i mi por a huma huntu ku ne einan mes.E tempo ei mi tabata traha na gomezplein .e tempu ei tabatin humamentu di marihuana na gomezplein i polis ta kana rond riba gomezplein sin sa tokante e marihuana . Algún joben fumando i algún komersiante di punda tambe. Pa bo sa kon tempoe a kambia. Awor aki poko poko rond mundo ta invertí shen den Laboratoriumnan pa investiga hasi testnan ku marihuana.A deskubri entre otro ku e mata ta medicínaal i por sana hopi enfermedad. industrial tambe e ta hopi benefisio .
Bo ke sa más,
Lesa /investiga pa bo hanja sa , NO laga otro bisabo .Use your own brain.
mi a observa su artenan korta den palo i a kombersa ku defuntu Max Alberto ora mi tope den punda. R.I.P.
AMi i mi señora a traha un video di Mac su bida. Di su hestoria i ken Mac ta. Ta ami ta uniko hende ku Mac a komfia ku esei. Mi nomber ta Ruben La Cruz bon amigu di Mac Alberto. Si tin interesadonan ku ker tuma e video aki pa archivo di Curacao mi ta na willen di hasi esei. Plabrashon ku mi a palabra ku Mac Alberto.
Mac Alberto mi a lanta mucha den rif konoce mac i su famianan bibando den un hachi na rifwaterstraat e tbt tata di un paar di ohochi i e tbt hopi streng un homber luchado kontra inhusticia
Un berdadero luchado sindikal
Duele ku nos no a/ta sinja di e hendenan ey. Sigi purbá abo. Danki.
Mi a konose Mac dilanti Palasio ku botel di glas kibra ta eskulpando e obra di arte erotiko. Mi tabata pasa pa un tempu semper serka Mac y e ta kombersa hopi kos kumi di bida, mi tabata yong i mi tabata komparti mi cheiba ku Mac. Un dia mi a bin tope ku un sombechi kora den man ta eskulpando y e di ku mi ku un Marinier Makamba a regale pa e por sigi eskulpa su Obra nan den palu. Dia e la kaba e eskultura erotiko e la splika mi kiko e ta pero su splikashon tabata asina abstrak ku ta sinti so mi por a sinti Mac su kurason, e di ku mi na final …esaki yama the flying pussy 🙏
Danki pa kompartí, esaki ta duna e lokual Percy a skirbi, un ttoke personal. Danki Percy.
Un berdadero lider sindikal, ku semper a lucha pa e obreronan, sin buska probrecho personal
Percy masha danki pa e rekuento aki, di bida di un luchadó sindikal/sosial i un artista lokal talents i pashoná. Pas na alma di Mac Alberto.
Danki Percy, pa historia i bida di Mac Alberto, ku mi no tabata sa tur su historia ku ta balioso pa nos a.
Mi ta rekorda Mac Alberto dilanti kas di gobernador, komo artista.
Un historia di un persona pa keda den memoriam pa hobennan.Danki Percy
Hopi bon mi korda ku e tabata biba den Rif.mi sa mire ora mi bai serka fechi regales.E ku Papa Godet ajega di tira konopi riba otro den Breeðe straat punda mi kiersa prome ku 3o mei 69. Mi no ta korda pakiko.mi kiersa 1968.dilanti di Gooshen.mi ta tin hopi respet Pe.Gran homber..
Un figura hopi interesante.
Un historia di un persona pa keda den memoriam pa hobennan.Danki Percy
Mashá interesante i balioso historia!
Ultimo biaha kumi a mira i papia ku Mac tabata e temporada ku e tabata den Habaai.
Tremendo persona.
Perucho, ta manera bo a deskribi Mac, ta asina e tabata.
Komo mucha di Ser’i Otrobanda, ku a roshi den Ser’i Quinta i aereanan di Motete, mi a yega di topa Mac na varios okashon. Un figura partikular, ku nos no por pone un banda. Bon trabou !!
Asina tin mas personanan ku a lucha pa e ínhustisia sosial i laboral ku tabata i ta tumando luga ketu bai numa mas rafiná. Mac a perde kasi tur kos, pero su vishon i e lucha ta bibu bibu ahinda auke ku polítika a penetra den kasi tur organsisashon ku ta pone,ku tur respekt, ku nos no tin lider mas ku ta dispuesto pa sakrifiká nan mes pa ningun inhustisia sosial ni laboral.Percy hopi bon ku bo a informa tokante Mac. Sigí ku e bon trabou informativo aki!!!
Danki Percy pa dokumetá algu di bida di Mac Alberto komo.pensadó, lider sindikal i attista.
Tambe pa yuda krea un konsenshi sindikal.