Komo mucha den bario di Mundu Nobo, mi a bai Mgr. Niewindt College i esei tabata e skol di mi otro rumannan hòmber tambe. Rene mi ruman, un aña mas yòn ku mi i awor aki di felis memoria na chikí a haña polio, “kinderverlaming”. Banda di Rene mi ruman, tambe tabatin Fòn Fòn (nòmber di kariño pa Alfonso), ku tambe tabata den mesun boto ku Rene, esta ku e tambe a haña polio. Kanamentu bai skol i di skol pa kas tabata bai difísil pa nan i ami hopi biaha tabata kompañá tantu mi ruman komo Fòn Fòn, kargando nan pa bùrt riba lomba. Mi tabata nan defensor tambe ora ku otro muchanan tabata tenta nan i yama nan “mucha mankaron” ku e tempu ei tabata basta kruel, ku otro mucha tabata yama esnan ku hèndikèp físiko. Klaro ku esaki tabata motibu pa mi demostrá realmente ku mi tabata nan protektor i mi a bringa bastante biaha, pa defendé nan. Dòkternan e tempu ei a bisa ku un bon terapia pa esnan ku a haña polio, tabata pa nan hunga mas tantu posibel den santu. E tempu ei, nos, tantu ami, Rene komo Fònfòn, a haña pèrmit di Nederhorst, un kompania di konstrukshon ku tabata establesé banda di Mgr. Niewindt College, ku nos por a hunga den e seru di santu di e kompania, kuantu ku nos tabata ke.
Straño ku por tabata parse, na kas kasi nunka nos tabata papia di mi ruman su malesa i nos no tabatin mester di remedinan karu tampoko pa kombatí e enfermedat, ku no a ekspandé ni no tabata molesti’é ku nada, fuera di e difikultat di kana. E terapia di santu i un remedi blanku ku nos tabata usa pa e pia ku a keda afektá pa polio tabata e úniko remedi. Nunka tampoko mi a tende mi mama mester a hasi un apelashon na ningun organisashon pa a yuda ku kombatimentu di e malesa akí. Sinembargo e mucha “mankaron” tabata un bèrgwensa pa famia i tabata skondé e mucha ei pa komunidat no mir’e i pa hende no haña sa ku den e famia ei tabatin un mucha “mankaron”. Tabatin kaso, ku asta tabata mara e mucha ei i skondé pa públiko. Tabata un trabou inmenso, pa sùrnan haña sa den kua kas tabatin mucha “mankaron”.
Den komunidat nos tabata papia i referí na mi ruman i Fòn Fòn komo “mucha mankaron”. E nòmber ‘macaron’ òf ‘mankaron’ a yega Kòrsou for di añanan 1660 ora e promé katibunan a yega Kòrsou for di Nieuw Nederland Merka (awendia New York). Direktor di West Indische Compagnie, Jacob Beck a hasi un petishon na gobernador di Nieuw Nederland, Peter Stuyvesant, pa importá katibu pa traha na fòrti komo mèslá , karpinté òf peon, pero tambe pa sirbi komo kria.
Stuyvesant tabata un gai bibu i a skohe hende mankaron pa bai traha na Kòrsou pasobra spañónan (ku tabata paga mihó) tabata pidi trahadó di mas kalidat. E katibunan ‘onvolwaardig’ a haña e nòmber di ‘macaron’ for di e palabra ‘macares’ = putri òf moli i na hulandes ‘makkaroen’. Si un katibu tabata falta por ehèmpel un djente, ya kaba esaki tabata señal di behes, ya kaba e tabata haña nòmber di mankaron. Kolonisadornan tabata haña hopi ‘makkaroen’. Na 1905 Beck a skibi ku trahadó di plantashi di gobièrnu (Compagnieplantage) “de meeste negroslaven out en afgeslooft zijn” (‘mayoria katibu pretu bieu i gasta’). Pero e katibunan mester traha mas duru ku tur otro hende te ora nan dal’abou di kansansio.
For di dia promé di yüli 1868, tur èks-katibu por a registrá na kranshi ku nan number i fam i tambe pa haña pèrmit pa por kasa ofisial pasobra ántes esei tabata prohibí. For di e fecha ei hende póber por a haña ayudo segun artíkulo 23 dje lei di emansipashon. Gobièrnu kolonial a keda enkargá pa regla kas i kuido médiko pa huérfano i otro hende sin moda, pues tambe pa hende mankaron. Pero pa 16 sèn so pa dia.
Monseñor Niewindt Vicario-General di Kòrsou, dia 28 di mart 1855 a entregá un petishon na gobernador pa lanta un fondo yamá ‘Christelijke Weldadigheid’ (Karitativo Kristian) pa e …’lijdende menschheid…. (humanidat sufriendo).Tabatin hopi pobresa e tempu ei.Tambe Monseñor Niewindt a pidi pèrmit pa kuminsá ku un hospital i un ‘gasthuis’.
Na febrüari 1945 a habri e kas pa muchanan ku hèndikèp físiko. Esaki tabata otro inisiativa di sùrnan di Hulanda ku tabata kuida e muchanan aki na Habaai. Stichting voor Gebrekkige Kinderen ‘Moeder van Altijddurende Bijstand’, tabatin komo meta kuido di muchanan ku un hèndikèp físiko.
E tempu ei tabata bringa pa konstrukshon di un edifisio, i e hendenan aki a topa ku basta kontra tèmpo i prinsipalmente gobièrnu ku no tabata kooperá ku nan manera mester ta. Ku Iglesia Katóliko komo motor prinsipal i otro instansianan i ku Sr. Emile van de Laarschot komo inisiadó, finalmente a logra konstruí i operá e sentro. Komunidat tabata hopi generoso ku e Fundashon ariba menshoná i na diferente okashon a organisá un feria, fair, konsierto, enkuentronan deportivo, bazar i asta un téletòn, por sierto un akshon “Duna un Man” i despues “Duna un Man Mas” ku pa e tempu ei a resultá di ta e téletòn di mas eksitoso di Kòrsou. Na aña 1972 e akshon ‘Duna un man mas’ a produsí mas di 230.000 florin.
Nos tabata konsiente di eksistensia di “Stichting zorg voor lichaam- gebrekkige kinderen” ku e tempu ayá Stichting Wit Gele Kruis a kuminsá ku ne, i ku despues di tempu a kambia di nòmber i bira Mgr. Verriet Instituut. For di e tempu ei tabata papia di “Het Gebrekkig Kind” òf di Gebrekkige Kinderen.I for di e tempu ei tambe, i mas ainda despues, bo ta ripará mas bien un duele pa e persona ku hèndikèp, ku e deseo pa yuda. Den kaso di mi ruman Rene, e tabata probechá tambe di e echo ku nan tabata tin duele di dje i asta tabata hasi mal uso di esaki.
Personalmente mi tabatin i te ainda tin masha problema ku tene duele di hendenan ku desabilidat, sea mental òf físiko. Ami ta bisa semper ku nan no mester di bo duele, pero di bo yudansa, pero esaki ta algu ku den pasado nan a fomentá asina tantu, ku ta difísil pa nos eliminá esaki. Ora ku nos tin kontakto ku e persona ku un desabilidat físiko, nos ta sinti nos inkómodo, nos no sa kiko pa bisa, nos no sa kon komportá, pasobra nos no sa tin kontakto ku persona ku desabilidat. Mas ainda institutonan karitativo mes tabata fomentá e aktitut di mendigá di e persona ku desabilidat físiko. Por ehèmpel e ekspreshon aki di un sùr e tempu ei buskando yudansa: ‘Als U de arme gebrekkige kinderen eens kondt zien, dan zou uw medelijden vanzelf worden opgewekt. De meesten kunnen niet lopen, tenzij op handen en voeten’. (Amigoe 4 di desèmber 1947)
Awendia kasi no ta usa mas e nòmber ‘macaron’ òf ‘mankaron’, i na lugá di ‘pashènt’ awor nos ta papia di ‘kliente’. Mas i mas ta purba konsentrá riba e persona sin stigmatisá esaki pa motibu di su desabilidat. Mas i mas nos a kuminsá realisá ku e persona ta mas importante i ku e desabilidat no ta e faktor di mas importante i internashonalmente tambe e rekonosementu a bira mas grandi.
Nos a keda lidia Rene mi ruman na kas mes, nos remedinan di kas, terapia di hunga den santu, hunta su kurpa ku un produkto blanku ku dòkter a preskribí i dos ora pa dia bistié un beugel na su pia. Esaki tabata un di e momentunan ku bo ta haña duele di dje, paso e beugel tabata molesti’é i bo tabata haña gana di kita e beugel pe. Nos no a skondé Rene pa komunidat, nos no a hinka ni hiba Rene ningun sentro, al kontrario, e tabata move den su amigunan di bario i tabata basta artístiko. E tabata kanta, toka kitara i sinfonia di boka un tiki i tabata traha poesia regularmente. El a traha na Arbeidszorg te dia el a disidí di baha i stòp di traha.
Ami no ta tene duele di nan, pero si mi ta konsiente ku mi ta privilegiá:
“Ku pia pa hiba mi unda ku mi kier,
Ku wowo pa mira lus di atardi,
Ku orea pa tende loke mi mester sa:
Karamba mi ta bendishoná, mundu ta di mi;
Anto ainda mi ta keha.”
Parti di poema di Red Foley, tradusí liber na papiamentu
