Asina leu ku mi ta kòrda, ta 30 di aprel semper a selebrá aña di La Reina. Pa straño ku e por parse, e tempu ei e selebrashon tabata pa krea un ambiente agradabel, sentimentunan di lealtat i afekshon pa Kas Real i pa esaki krese i a bira un símbolo di union. Ora bo lesa e frase bunita aki, bo no por ni pensa riba independensia. Por sierto e tempu ei esei no tabata den mi pensamentu at all.
Tin oubade ora tin un selebrashon nashonal, manera aña di La Reina, Dia di Bandera i tambe dia di selebrashon di Libertat. Un oubade ta un homenahe musikal òf un serenada ku ta selebrá mayoria biaha mainta na honor di un persona òf un evento speshal. Nos ta selebrá esaki aki na Kòrsou, kaminda hendenan ta bin huntu pa kanta i toka na airu liber.
Historia di Selebrashon Aña di La Reina
31 di ougùstùs 1885 a selebrá na Hulanda i otro partinan den Reino e promé dia di Prinsesa, e dia ei tabata e di 5 kumpleaño di Prinsesa Wilhelmina. Despues di morto di Rei Willem III a kambia e selebrashon akí pa selebrá Dia di La Reina. Na 1898, na edat di 18 aña Wilhelmina a bira Reina i te 1948 a selebrá aña di la Reina riba 31 di ougùstùs.
Despues, Reina Juliana, ku a sigui su mama Wilhelmina a kambia e selebrashon i a sigui ku selebrashon Aña di La Reina riba su fecha natal, esta 30 di aprel ( for di 1949).
Riba 30 di aprel 1980, ora ku Reina Beatrix a bira Reina Hulandes a sigui onra su mama, lagando selebrashon di Aña di La Reina riba 30 di aprel.
Reina Beatrix a kambia e manera di selebrá aña di La Reina: For di 1980 tabata selebrá aña di La Reina den añanan ku e ta kai riba un djadumingu riba e djasabra promé, esta dia 29. Den añanan promé tabata selebrá aña di La Reina riba promé di mei.
Dia Rei Willem Alexander a asumí poder (2014) el a kambia e dia pa 27 di aprel dia di su aña i awor nos ta selebrá dia di Rei, i riba dia ku 27 ta kai riba un djadumingu, ta selebrá e dia ei e djasabra promé.
E selebrashon aki na Kòrsou tabata koordiná pa entre otro: “Groep van de Nederlandse Antillen van het Algemeen Nederlandsverbond”, “Koninklijke Vereniging Onze Vloot i “Koninklijke Vereniging Oost West. Den e añanan ei e selebrashon tabata kulminá den “Club De Gezelligheid” kaminda Sr. Gobernador tambe tabata partisipá na e fiesta di klousura.
Aña di La Reina mi temporada!
Ya simannan den luna di mart, na skol fraternan a kuminsá prepará pa e selebrashon i bo mester a trein kanta den grupo, pasobra dia 30 di aprel bo mester a djòin míles di mucha den Fòrti pa kanta pa La Reina. Komo hóben di 6de klas na Mgr. Nieuwindt College i kurpa un tiki grandi, mi mester a kana dilanti i karga bandera i mi ta kòrda e bientu frepòstu di nos, kiko e tabata hasi ku bo i e bandera riba brùg Emma. Abo ku bo kamisa blanku i e mucha muhénan ku nan streki oraño den nan kabei. Bo mester a kanta i e tempu ei bo mester a kanta i grita “Lang leve de Koningin” i bo mester a grita duru, pa te na Hulanda La Reina tende bo i asina ei Sr. Gobernador ta duna nos, na nòmber di La Reina, un dia liber. Nos tabata kanta Wilhelmus, Himno di Antia i Himno di Kòrsou. Despues nos tabata sigui ku Schoon is de West, Den Toer Nacion, Curacao, Mijn Vaderland, Korsouw, Zoet land i Nos Isla. Frater Fidelius tabata e dirigente di e kor pa hopi aña.
Banda di oubade, ami a eksperensiá kampeonato den diferente ramo di deporte i tambe marcha di flambeu, parada militar, diferente wega dilanti di Kas di Gobernador, entre otro e famoso palu di seba i den bario e kantidat di aktividatnan ku tabatin, kaminda den Mundu Nobo, George Merced( jongens, jongens) tabata organisá weganan riba vèlt di Mundu Nobo. Bula den saka, kore tayer, kore ku batata den kuchara, ets. Mas atardi/anochi orkestanan Santa Cecilia i St. Vincentius Harmonie tabata toka, riba entre otro Brion Plein, Wilhelminaplein i den kura di Museo. Mas lat anochi tabatin Taptoe i vürwèrk.
Ounke ku mi no a eksperensiá esei nunka, tabatin selebrashon tambe na Banda Ariba i Banda Bou. Tambe tabatin selebrashon na lugánan pa hende grandi, kas di muchanan ku desabilidat físiko i tabatin un èkstra pa esnan ku tabata kobrá ònderstant.
Hopi importante tabata pa nos, e finalnan deportivo entre skolnan di e kampeonato di aña di La Reina.
Na skol bo tabata haña un saku di mangel di Industrias Chocolate Antillano S. A (ICASA). ICASA a sera na 1966. Bo mester kòrda e mangelnan di tur koló, den un saku di plèstik blanku
Despues mi a selebrá aña di La Reina komo patfender i mi mester a marcha den kayanan di Otrobanda riba aña La Reina. Esaki tabata kompletamente otro ku selebrá e dia komo mucha di skol di 6de klas.
Mas aleu mi ta kòrda bishita di La Reina na Kòrsou i riba e dia ei, komo miembro di Jeugd Luchtvaart Brigade (JLB), mi tabata weiter den fòrti sirbiendo invitadonan riba dia di selebrashon di aña di La Reina. Komo miembro di JLB, mi a keda enkantá ku un show di avion di eskuadron di Marina Real ku nan tambe a tene na okashon di aniversario di La Reina.
E aña akí, ta di 10 aña ku nos ta selebrá dia di Rei i bo por bisa ku e 10 añanan aki a karakterisá nan mes pa un selebrashon oraño den Punda, kaminda bo ta haña diferente marshe di pruga, bazar i otro bendementu di artíkulo ku tur sorto di kos, pintamentu di kara pa mucha i hopi otro aktividat. E ta un aktividat, kaminda bo ta haña hopi Hulandes Europeo, hopi kuminda, hopi müzik i un selebrashon ku ta kuminsá tempran i kaba lat atardi bai kue anochi.
Masha ten no tin oubade mas, pero un konsentrashon grandi, den selebrashon den barionan, ku ta usa e dia akí pa fomentá union den bario. Top of Form
