Porko pa Chiké, Chiké pa Porko! Ningun no ta mihó ku otro.

8 Jun, 2024

1Sapaté, na bo sapatu! (Reginald Römer)

Na febrüari 2024 a kumpli eksaktamente 55 aña, ku Iglesia Katóliko a dirigí un karta na fielnan i a publiká esaki tambe den nan korant La Union, kaminda a anunsiá un kambio drástiko den lei di entiero. Iglesia Katóliko tin nan propio regla, kon mester a  anda kontra hendenan di moral abou i fielnan ku tabata biba den piká. Nan tabata propaganda ‘bida drechi’. ‘Bida drechi’ tabata nifiká ku matrimonio tabata sagrado, no por a divorsiá, no por a biba huntu sin kasa. Esaki tabata prohibí i un bida den piká, i di mes sèks promé ku matrimonio tabata piká mortal.

Banda di e ekstremonan akí, Iglesia Katóliko tabata diskriminá entre por ehèmpel  muchanan nasí pafó di matrimonio. No por a batisá e yu nasí pafó di matrimonio tur dia den siman. Tabata riba sierto dia i sierto ora, sea hopi tempran mainta, kasi mardugá òf lat despues di bahada di solo. No riba djadumingu i sigur no huntu ku yu “legal”. Tampoko nan no por a haña un padrino di batisamentu, solamente madrina i no tabata permití pa durante e seremonia sende bela i bati klòk, loke ku tabata sosodé si ora tabata trata un yu “legal”.

Esun ku a peka kontra Iglesia Katóliko mester a karga e konsekuensianan òf mester a mustra sinseramente di ta repentí i mester a yena un formulario i firma esaki den presensia di monseigneur, promé ku Iglesia bolbe aksept’é den misa. Esaki tambe tabata e kaso, ku si un fiel a bandoná Iglesia Katóliko i bai otro religion (sekta manera Iglesia Katóliko tabata yama nan) pa bin kas bèk e mester a yena un formulario den presensia di Monseigneur. Anto si un Katóliko kier a kasa ku un protestant, tambe e mester a yena un formulario i e petishon aki mester bai Roma, serka Papa pa por haña pèrmit pa kasa.

Otro regla di Iglesia Katóliko tabata, ku fielnan mester a bai misa, bai hinka rudia serka un pader den konfeshonario i bisa e pader tur bo pikánan i e pader ta pidi Dios pordon di bo pikánan. I Dios spar bo, ku si durante kuaresma bo no bai konfesá, e ora ei tabata nota bo nòmber i bo tabata riba e lista di hendenan ku ta biba den piká.

Si di un òf otro manera bo peka kontra reglanan di Iglesia Katóliko i bo a muri, entre otro sin haña apsolushon, sin haña último sakramento, si bo nòmber tabata riba lista ku bo no a konfesá òf ku di un òf otro manera bo a peka kontra lei di Iglesia Katóliko, e ora ei tabata dera bo patras den un santana Katóliko, riba un pida tereno ku no tabata bindishoná, e asina yamá “Chiké”.

Segun Elis Juliana: “Chiké tabata un parti separá te mas atras den santana katóliko kaminda tabata dera hende ku lo a muri den piká. Hendenan ku a muri sin a kumpli ku kuaresma, pues fuera di konfeshon. Esnan ku a kometé suisidio tambe tabata wòrdu dera den Chiké. Burachénan ku nunka tabata kumpli ku misa, un hende ku lo a muri despues ku el a kometé sierto krímen, esei nan hopi biaha tabata wòrdu derá na Kolebra Bèrdè. Un sementerio ku mes destinashon ku Chiké komo tabata un sementerio ku no a wòrdu konsagrá pa misa katóliko. E berguensa di mas grandi di mas hororoso pa un famia tabata ora un miembro dje famia ei a wòrdu derá den Chiké o Kolebra Bèrdè”. (Guia Etnológiko 2. Elis Juliana)

Segun Iglesia Katóliko tabata siña pueblo, e bebinan ku a muri promé ku nan a haña sakramento di boutismo tabata bai un lugá pafó di shelu, kaminda alma dje yuchinan ku a muri promé ku boutismo, lo bai pasa un temporada, pa purifikashon promé ku nan por haña pèrmiso pa drenta shelu. E lugá ei yama LIMBO. E yuchinan ei no tabata ‘anguelitu’, paso ‘anguelitu’ tabata yuchi ku a batisá katóliko, pero a muri promé ku el a kumpli un aña. (Guia Etnológiko 2. Elis Juliana)

Awor ora ku Iglesia Katóliko nenga bo lugá den santana, a keda un opshon, i esei ta santana públiko di Gobièrnu (Openbare Begraafplaats van de Overheid) na Kolebra Bèrdè. E tereno akí no tabata un tereno bindishoná i tabata karga e nòmber “Chiké”. Ken su idea tabata pa e nòmber ei, mi no a haña sa. Pero esaki tabata un humiashon kompleto pa hende, ku simplemente tabata koba un buraku i hink’e’ bou di tera, sin un graf, sin un kèlder sin nada. Por sierto, morto di un hende ku a muri “den piká”no tabata pasa misa ni tampoko tabata duna e famia e yabi di santana pa drenta ku e kaha di morto pa e porta prinsipal. E kargadónan mester a pasa  patras di santana ku e kaha di morto i hisa esei pasa over di e muraya pa laga e kaha baha den “Chiké”.

Morto i entiero ta hunga un ròl masha importante serka e Yu di Kòrsou. I manera Angel Nieuw a bisa: Yu di Kòrsou gusta dera su defuntu nèchi. (Curacaoenaar wordt graag “Mooi” begraven – Angel Nieuw Amigoe 15 di febrüari 1974).

Ya anteriormente nos a konosé un kaso kaminda Iglesia Katóliko a nenga di dera Dòktor den un santana katóliko. Supuestamente e defuntu tabata bibá den piká, paso el a kasa, parti i bolbe kasa. https://alexdavidrosaria.wordpress.com/2017/11/20/a-ninga-dera-doktor-den-santana-katoliko/ A dera Dòktor den kèrki (santana protestant) i despues a saka e restunan i hiba Bottelier. Morada Santa Bottelier ta un santana Katóliko, pero ku no ta kai bou di obispado.

E Chinesnan ku a muri durante e tragedia di 20 di aprel  1942, tambe ta derá den Kolebra Bèrdè.

Den dékada 60, Iglesia Katóliko a konosé hopi kambio entre otro pa motibu di e konsilio ku a kuminsá 8 di òktober 1962 i a dura te 8 di desèmber 1965. Iglesia a pone un fin na e diferente diskriminashon ku tabatin den Iglesia Katóliko.

Den e karta episkopal di 9 di febrüari 1969, Mgr Holterman a duna komo motibu prinsipal pa kambia e sistema katóliko,  ku mester tene kuenta ku nengando e defuntu un entiero digno, ta duna e defuntu un kondena públiko i ala bes esaki ta un bèrgwensa pa famia di e defuntu, ku no tabatin ni arte ni parti den e bida ku e defuntu a hiba.

Den Koloniaal Archief – Openbare Gezondheid, “Cahier met opgaven van begravenen op de algemene begraafplaats op “Cas Chiquitoe” tabatin entre mei 1930 i mart 1933, 13 hende lokal i 6 bebi derá.

24 Comments

  1. Gilbert (Beppo) Delfina

    Percey danki pa kompartí. Hopi intrresante.

    Reply
  2. Fabiola Cleofa

    Mi ta konosí ku esaki. Danki pa mas detaye ku mi no tabata sa.

    Mi welo parti mama tabata derá na Chiké pa e echo ku e no tabata kasá ku mi wela. El a fayesé na 1953 i mi ta kere lo mester tabata den añanan 60 un ruman muhé di dje, kasá ku un mazon, lo a kumpra un kèlder den Santana di Mazon i regala mi mamá pa nan a saka mi welo foi e Santana na Kolebra Bèrdè i deré na Rodeweg den Santana Mazon pegá ku esun di militar. (@ F. Belliot segun mi ta esaki bo ta referí na dje?).

    Reply
    • percy.pinedo

      Korekto Fabiola, esei tabata esun di masòn.Protestantnan a dera basta katóliko,ku Iglesia katóliko a ninga di dera.

      Reply
      • Carmen Phelipa

        Persy tin informashon di e lugá na Seru di Dòmi kaminda antes tabata dera defuntu? Posiblementu un par di graf i okupantenan a disparsé pa traha espasio pa traha brug. Según mi tin entendí banda kaminda awor aki ta Crown Automotives.

        Reply
  3. Alison H. Manuel

    Hopi informashon. Mi ta riba e bon kaminda. E pikanan ya ta konsiderablemente menos.

    Reply
    • Louise Jolliffe

      Santana Mazon ta pega ku Santana Protestant na Roodeweg

      Reply
  4. Carlos Larmonie

    Hopi interesante Percy.Bale la pena pa hasi un estudio riba e mesun téma aki pa lokwal ta e otro religionnan tambe. Danki pa e informashon!!!

    Reply
  5. Jenny de Windt

    Hopi interesante atrobe. Sigi komparti informashonnan hopi balioso. Spera ku nos hobennan tambe lesa e historianan aki I asta na skolnan hobennan sa di historia di Korsou.

    Reply
    • Rudsel van Lamoen

      Informashon interesante. Mi sa di chiké. Pero awor m’a haña mas detaye. Danki Dios ku iglesia katòliko a hasi e kambio ya ku e ta diskriminatorio.

      Reply
    • Angelo Felisimo La Cruz

      Interesante relato di e parti aki di Nos komo Pais Su Historia í Eksperenshanan kompartí.

      E ta notabel kon e isnstitushonnan religioso aki por reformá í / òf adsptá nan pensamentu, práktika í preferenshanan spirito-religioso (p³.s.r.) ku tantu trankilidat sin (ta parse) tratá e efektonan di nan akto í p³.s.r..

      Den Siglo 21, Instituto Spirito-Religioso Roman (I.S.R. ROMANO) Katiko ta adaptando e.o. E Orashon “Nos Tata.” Un di e rasonnan propagá ta e posibel mal interpretashon di e pasashi “… i no laga nos kai den tentashon …”.

      E Kreyente por skohé pa interpretá esaki di un formá ku no ta na agrado di E I.S.R. ROMANO Katóliko.

      … (pa’wóki .. t’ aki)

      Saludo DI KURASON í KU RASON,

      Baluarte Edifikadó di Kòrsou drs. Angelo Felisimo La Cruz

      Reply
    • Elcida Villarreal

      Danki Percy mi a haña mas informashon di lokual mi tabata sa kaba un bes mad danki

      Reply
  6. Frederik.L Belliot

    Ta berdat.Hopi hende no ta bai e entierro ei,pasobra el a muri den pika,anto no ta asosia na e fam ei.Antes religion katholiko tabata tin hopi Poder.Pipo bo ta korda e santana den Roodeweg banda di esun militar?patras di deje tin brandweer.Dilanti tin borchi di convoi.Di ken esei tabata ta?

    Reply
  7. William L. C. Pandt

    PP, rebibando i profundisando nos historia (kultural), kustumber – norma -balores inkluí. ta pone lus (splika i klarifiká) kon nos a yega di ta e lokual nos ta awe. Asina fasilitando pa nos konsientemente figa ken nos ke ta mañan kDk. Hopi apresio pa bo esfuersonan. Bro.

    Reply
    • Raymond Navarro

      Otro gran rekuerdo Percy

      Reply
  8. William L. C. Pandt

    PP, rebibando i profundisando nos historia (kultural), kustumber – norma -balores inkluí. ta pone lus (splika i klarifiká) kon nos a yega di ta e lokual nos ta awe. Asina fasilitando pa nos konsientemente figa ken nos ke ta mañan kDk.
    Hopi apresio pa bo esfuersonan. Bro.

    Reply
  9. Etienne Ys

    Interesante

    Reply
    • Raymond Navarro

      Interesante

      Reply
  10. Hubert Pop

    Hopi kos a pasa ta bon pa hende lesa .Manera ta na grandi mi Papa a mustra nos Temporada di 30 di mei 69 unda ta kolebra berde

    Reply
  11. Ygmar Wiel

    Bon artikulo Ku ta demonstra dikon Iglesia Katoliko mester a reforma I ta sigi reforma. Mi ta kurioso na sa kuantu “pekador” no ta enterá den santananan ofisial Katoiko?

    Reply
  12. Reginald V Römer

    Mashá interesante! Danki Dios nos por pone tur kos den su époka i tempu i ku esakinan ta historia! Tambe ku awor ta tene kuenta ku rèspèt i dignidat di hende 👍🏽🙏🏽

    Reply
  13. William L. C. Pandt

    PP, rebibando i profundisando nos historia (kultural), kustumber – norma -balores inkluí. ta pone lus (splika i klarifiká) kon nos a yega di ta e lokual nos ta awe. Asina fasilitando pa nos konsientemente figa ken nos ke ta mañan kDk.
    Hopi apresio pa bo esfuersonan. Bro.

    Reply
    • Alexei Sleur

      Hopi bon artíkulo, nos mester konosé nos historia. Sigi asina

      Reply
  14. Clarson Venan Gomez

    Ja. Mi Tata ta yu fuera di matrimonio i dia a risibi, mester a sinta te patras den misa banda di mucha nan ku tambe ta yu fo’i matrimonio. Den Brakapoti tambe mester a soportá deskriminashon di Frater nan ku tabata preveligia e blanku nan ku tabata bini di Islanan Ariba.Tampoko e no por a drenta den Katholieke Verkenners. Ta p’esei e i hopi más, no kier tende i no kier tin nada di haber ku Katoliko.

    Reply
    • Martha

      Na aña 1951 mi papa Wansing, protestant I mama Curiel, katoliko ku a insistí por a kasa Patras den Misa di Sta Ana. Altar no tbt pa nan.

      Reply

Submit a Comment

Lo no publiká bo email. Áreanan rekerí tin e marka *

Komentario resien

Kategoria