Un parti di pueblo ta gusta mi fleit,
Otro parti ta rabia mashá.
Mi t’un para di pluma i balor,
pues pa mi pinto m’a ser distinguí.
Mi ta un para pretu ku balor;
mi ta trese kambio ku amor;
si mi’n fleit nan no por drumi bon,
sin tende mi inspirashon..
Trahando den medio di komunikashon pa añanan largu, kada bes di nobo mi ta keda asombrá, kon na Kòrsou nos ta trata nos patrimonio kultural intangibel, pero tambe kon doñonan di obranan, poema, komposishon musikal ets., kon nan mes ta trata nan kreashon. Danki na hendenan manera Yapi Martijn, ku a dokumentá parti di nos herensia musikal den dos tomo: Kòrsou musikal I i II, ku nos tin algu di referensia.
Mi no kier menshoná nòmber di ken no, pero di ken si a trata nan produkto manera mester ta. Mi tin dos ehèmpel di kon mester ta: Boy Dap, ku tin tur su komposishonnan masha bon wardá i ku semper tabata masha krepchi banda di su diskonan, i tambe Macario Prudencia. Despues di morto di Makai, tur su komposishonnan, partitura i diskonan ta den man di su subrino Erwin Prudencia.
Si awor akí bo ke sa algu tokante un di nos baluartenan, bo mester ta manera reshèrshi di FBI pa bo yega na nan informashon.
Por ehèmpel di Cedric Ridderplaat, Ced Ride, Erquimedes Candelaria, Rudy Plaate i Rignald Recordino, pa menshoná algun, si bo ke tin nan produkshon kompletu, lo bo mester hasi yamada na pueblo, pa pueblo aportá i yuda kompletá e bida musikal di e kompositor/kantantenan akí.
Otro ehèmpel, den dékada 80, Ced Ride, e tempu ei trahando na Servisio di Kultura, a organisá e festival di mas grandi ku nos tabatin na Kòrsou. Un festival ku a dura 7 dia i den kua a presentá diferente artista grandi di Kòrsou i dos artista internashonal ku un laso fuerte ku Kòrsou, esta Celia Cruz i Daniel Santos. “Festival di Añanan 50” a tuma lugá den Hilton Hotèl. A filma i graba e festival akí, pero nunka Servisio di Kultura a haña e grabashonnan akí. Ta riba Youtube, nos por mira algu di e festival akí, ku Alex Alberto a hasi.
Ami, ku tabata parti di e produkshon ei, pa prufia ku mi tabata, a saka e oudio di e festival ei kompletu i asina ei, ounke ta e parti di oudio mi tin e festival dokumentá.
Mi a disidí di dokumentá bida di Kimu Candelaria (nasé 20 di aprel 1915) i mi tabatin mester di su fecha di nasementu. Den ningun buki/revista esaki no ta pará, ni tampoko den korant. E ora ei mi a kòrda ku tin un kaya na su nòmber i mi tabata kòrda mas o ménos ta na unda. Ora mi a haña e kaya, mi a haña e bòrchi aki bou.
Bisando esaki, mi ta yega na e persona di Erquimedes, “Kimo” Candelaria. Ta ku masha doló i ku hopi pasenshi por a haña informashon di Erquimedes Candelaria. Famia di Kimo, tampoko tin masha informashon di dje. Papiando di herensia kultural intagibel, chèk kuantu buki bo ta haña tokante bida di Celia Cruz, Daniel Santos, Hector Lavoe, The Beatles, Michael Jackson ets. Ku eksepshon di un página den buki di Yapi Martijn, un artíkulo den Independiente di Stanley Cras, i un artíkulo den Amigoe di Kòrsou, mi no por a haña masha informashon di e kompositor/kantante krioyo akí.
Segun mi, i ningun otro kaminda mi no a tende ni lesa otro, Trio Melodia tabata e promé trio di Kòrsou, formá pa Erquimedes “Kimu” Candelaria, Isaac, “Shaki” de Windt i Juchi Minguel. Nan tabata protagonista di muzik di Matamoros na Kòrsou.
Julio Perrenal (Julio Perrenal tabata nòmber ku René de Rooy a forma di e lèternan di e nòmbernan Jules (de Palm), Pierre (Lauffer) i René (de Rooy)) ta e promé nan pa komponé na papiamentu (Merengue Merikano, Jorando, Amor Loco, Cuba Libre, Premio di Feria, Mi Pushi, Anne Marie, Scuridad, Gasolin i Situacion). Despues Trio Melodia a tene duru na komposishonnan na papiamentu.
Kimu a kanta i toka kitara den Típiko Sta Rosa i den Grupo Folklóriko Antiano e tabata toka mandolin. Ku Grupo Folklóriko Antiano el a bishitá diferente pais. Un otro gran kantante/kompositor ku a traha ku Kimu tabata Agustu Gressmann. Kimu a skibi diferente komposishon den forma di puña, pa rifero, pa polítiko, i tambe di relashonnan kibrá ets.
Konosí ta piesanan manera: Esta bira Madam, Azijn Banana ( lesa blog Azijn Banana).
Polítika tabata inspirashon sigur pa 2 piesa di Kimu, “Chubatu Bieu” ku Doble R a graba despues, ku tabata un puña pa doktor (“Chubatu bieu bo ta. B’a kore kosta mi amigu bon. Bo tempu a kaduká pa un penshon di behes. Chubatu bieu bai drumi un banda, Ta lamchi di mosa ta manda awó) E lamchi ei lo tabata Ephrain Jonkheer (artíkulo den Independiente di Stanley Cras). I despues el a bandoná fila di Demokrat i saka un pa “Fein “ titulá “Laga mi afó” (“Bo deseonan tur ta kumpli. Bo ta gosa di un perfekto salú. Mi no ke ta un pruga antó den bo shimis, dia nan trese bo sekretonan na kla.”)
Konosí tambe ta e komposishon di Kimu: Kaya Grandi di Otrobanda, relatando e negoshi di bendementu di number. Nan ta bisa, ku e rifero di mas duru e tempu ei, Fèchi Dorand lo a tuma esaki pe i a pidi Pierre Lauffer kontestá Kimu, loke ku Pierre a hasi: “Tin hende ta mira otro ta buska pidi pan, nan ta hasi mané ta duele, ta rabia ta choka nan. Mete bo den bo asuntu, laga mi na mi lugá. Ki ora ku bo kohe number, 21 ta bo preferí. Awor bo ta kana yanga ku unifòrm bistí. Ke subi riba nos lomba, ke pasa pa gran kantor.”
Anto aki ta kaminda Kimu a komponé e piesa ku a hasié inmortal: Para Pretu.
Den Festival di Añanan 50, den Hilton Hotèl, den mi trabou komo stage manager mi a aserka Kimu riba stage, durante su aktuashon i bis’é: “Kimu esaki ta bo último piesa”, i Kimu a kontesta mi den mikrofon pa henter sala tende: “Mucha bai, laga mi hasi mi kos”!
Dia 12 di febrüari 1992 a haña Shaki morto den su kas, 29 di desèmber 1993 Juchi a muri i 18 di yanüari 1994 Kimu a bai sosegá. Nan entiero no a haña e atenshon ku nan a meresé. Den Amigoe di Kòrsou di 21 di yanüari 1995 , Sra. Ietteke Witteveen a pidi, ku maske ta póstumo, pa duna Erquimedes “Kimu” Candelaria e rekonosementu komo e prekursor di kansion na papiamentu. Kimu, bo a laga un tesoro musikal atras pa nos i ohalá esaki sigui zona i sigui biba.
Oef mi a bai den tempu. Mi ta Tata tabata gusta e kantika Chubatu bieu bai drumi un banda. Ta den e tempu nan ei mi tata a sali for di nashonal bai demokrat. E la bula kura manera nan tabata bisa e tempu ei.
Kimu tambe a bula kura
Danki Percy.
Bo Blog ta un hoya di dokumentashon di nos historia, invesigá i skibí pa un di nos mes, ku konosimentu di unda i kon buska informshon.
Masha danki Lusette, tipo di komentario asina akí ta duna mi mas smak pa sigui. Mi ta hasi esaki ku amor.
Hopi interesante. Kimu komo nos para pretu ku balor a meresé muchu mas rekonosimentu. En berdat danki na Japi Martijn ku a dokumentá un parti di nos farándula. Pero ken lo dokumentá di mas o menos aña 1990 bin ariba?
Korekto Rudsel.Ami ta aportando mi granito!
“Baluartenan” zijn het waard herdacht te worden. Ik hou van deze verhalen, want toen ik het schilderij zag van “Kimu” in “Kaya Kaya wist ik niet wie het was. Percy helpt ook de niet “Yu di Korsou” een betere inzicht te krijgen in het verleden en het erfgoed. Archivo Nashonaal is deel van de overheid, maar als onze volksvertegenwoordigers geen waarde hechten aan kultuur of erfgoed dan dringt het belang niet door tot daar waar het geld kost.
Danki Percy pa trece un tremendo
artikulo dilanti mi a konose otro
Historia di un di nos baluartenn
Bunita relato Percey sigi ku e bon trabou. Senjor lo duna Forsa i Sabidoria pa sigi ku e bon trabownan aki.
Nos mester kumisa sinja balorá obranan di nos artistanan di Korsou na bida.
Lo ta hopi importante pa kumisa duna atenshón pa ku esaki na skolnan, por ehempel den muziekles. Asina e muchanan ta lanta foi chikitu ku amor pa i konosementu di nos artistanan lokal.
Blessings i nogmaals, sigi ke bon trabou.
Masha danki pa bo aporte, anto di mi idolo ta na kaminda
Danki Christel
Masha danki
Tremendo Percy ! Mi ta kòrda toká di Kimu i su grupo na kas di mi tanta na Julianadorp tempo mi tabata chabalitu….. Hesus nos a baila ku mas no tabatin ! Danki pa trese e rekuèrdo ey ariba atrobe ! Tremendo trabao bo ta hasi !!!🙏🤗👍🌻
Henry kontentu pa rebibá e momentunan ei srka bo. Danki pa lesa
Tremendo artíkulo atrobe Percy.Ma toka kitara i kanta kasi 12 aña den Trio Los Arpegio’s i algun aña denTrio Los Kurasoleños rond Korsow. Mi tabata bai Bibliotéka Publiko pa fìa cassette ku grabashonan di Trionan di antes i skucha e musika ei pa toka e piesanan di antes. Nos tabata toka piesanan di Kimu i di Rudi Plate tambe. E piesanan di Kimu semper tabata dal hopi duru durante nos resentashonnan musikal. Mi tabata kanta su piesanan sin sa su historia. Hopi great ku mi por a haña mas informashon tokante e artista grandi aki. Danki pa komparti.
Danki Percy.
Bale la pena pa dokumenta nos historia musikal
Sigui ku e bon trabou.
Danki pa a pone e smm myartikulo disponibel pa nos tur.
Pregunta:
Den aña nan 70-80 Kimo a kompone un jingle pa Moreno Brandao, pero nos no a keda ku ne.
Ta algu ku bo lo por find out?
Segun mi tbt over di sea Bals PK of algu di owto (Chevrolet ?).
Percy, bontardi. Ku hopi plaser mi ta tuma tempu kada biaha pa lesa bo relatenan ku mi haña den mi post. Kada biaha nan ta sumamente importante. Sigui ku e bon trabou aki.
Komo mucha nos a konose Kimo. E tabata kria algu porko di rasa riba un pida tereno ku ela hür serka mi wela. Atardi ora e kaba di duna e bestianan kuminda i tbt sinta bou di un palu i toka su piesanan
Estupendo! Danki pa a kompartí.
Tremendo dokumental..Masha danki pa komparti kada biaha di nobo. Historia d nos grandinan ku no mag bai pèrdí
Redashi di Kimu ta masterrr 😂😂😂
Danki atrobe pa share 🎶
Priceless ♥️
Hopi interesante Percy, mi a keda ku gana di lesa mas. Esaki por ta un promé paso pa un buki over nos patrimonio kultural.?
Portá si nos a duna “Kimu” nan nan balor awe lo nos no tin ku tendè e “versje” nan ku nan ta pusha nos ku ne pa komposishòn.
Rekuerdo Percy, rekuerdo. Mi ta korda komo hoben den Domi ku Kimu tabata bin bishita mi hendenan na nos kas. Semper ku un lenga skèrpi. Amigu, aunke e trabou ta duru i difsil, keda juda nos mantene nos tesoronan kultural.
Hopi great Percy.
Kimu tabata un kolega di mi tata na sociale zaken.
E tabata toka kitara ku su man links ku 4 dede.
E no por a dobla su wijsvinger i tòg kue tur akòrd.
E tabata konta nos ku ora un di su disko nan bende den un di e luganan ku tabatá bende disko e tabatá risibí 5 plaka (12.5 sèn).
Tremendo Percy
Sinta pariba di kas sin hende pa stroba
Nos tabata biba na sta Rosa kaminda botika Mampuritu
Kimo tabata toka den bar di Shon Ma nos ta pasa para den bentana parti pariba skucha Kimu
Danki pa sigui karga nos
Historia musikal
Tremendo. Tur siman bo ta trese algu di historia ku mi no tbt na altura di dje. Bala pena.
Un di e kosnan ku masha lihé gobièrnu i institutonan manera Archivo Nashonal i Naam mester hasi, ta dolemntá nos historia musikal. Happen to be ku mi tin enkargo aworaki di MEO pa formulá un nota di maneho pa e sektor di músika. Den un pida estudio di kon nos músika a originá i yega na lokual e ta awe, mi mester arekurí na algun publikashon di investigashon sientífiko di historia di Kòrsou pa saka algu ku ta validá. Un di e alshonnan ku lo mi rekomendá ta e dokumentashon di lokual te ainda por. Sin konosementu di nos pasado musikal i artstiko hamas nos lo por yega na un sektor ku ta floresé.
Alvin, e nota di maneho mester bin pa kaba. Un “must”!!!!
Tremendo artikulo. Djó laga e atrikulo aki provoka mas dato di bida di Kimo sali na l
kla.
Nos ta sigui hasi esfuerso
E kustumber i tradishonnan di nos pueblo a keda manifestá musikalmente na un manera genial dor di Kimo Candelaria