Manera sa sosodé hopi biaha na Kòrsou, e historia di Medardo de Marchena no ta konosí pa hopi di nos hendenan. Kisas no pasobra nos no ta interesá, pero e no ta dokumentá pa nos mes hendenan. Mi sa ku Aart G. Broek a skibi e buki : Medardo de Marchena. Staatsgevaarlijk in koloniaal Curaçao, Uitgeverij In de Knipscheer. ISBN: 9789493214514. Tambe Aart G. Broek a skibi un artíkulo den Nieuw Letterkundig Magazijn titulá: Medardo de Marchena of hoe een zelfbewuste geest werd weggesloten.
Pedro Pablo “Dada” Medardo de Marchena (1899-1968) a komponé e piesa “Esta Dushi”. E título aki no ta bisa bo nada, pero si mi bisa bo “Bula Waya” esei si ta zona bo konosí. Un piesa ku Daniel Santos a hasi un éksito. Den e komposishon akí e ta ekspresá su deseo di brasa un dama boneriano, pero esei no tabata posibel e momento ei, pasobra e tabata den kampo di konsentrashon será na Boneiru.
Pedro Pablo Medardo de Marchena a nase na Kòrsou 29 di yüni 1899 i a muri 15 di mei 1968 na Boneiru, kaminda el a biba for di aña 1940 te na su morto. Kasi 30 aña el a biba na Boneiru, despues ku gobièrnu kolonial a pone prezu den kampo di konsentrashon pa motibu di su pensamentu revolushonario.
Medardo ta yu di un hudiu ku tabata biba na Kòrsou. Su mama tabata un dama koló skur di Kòrsou ku a kria Medardo. Su tata a sostené su edukashon kompletamente i tambe a rekonosé su yu, for di kua Medardo a haña e fam di su tata, Benjamin Abraham de Marchena. Medardo den e tempu ei tabata negoshante.
Durante di Di Dos Guera Mundial, den mei 1940, Gobièrnu Kolonial a disidí di kue diferente hende sospechoso i ku fam straño prezu. Aparentemente nan tabata un peliger pa estado. Entre personanan akí tabatin Fred Fischer fotógrafo, dòkter J. Benesch, tur dos nasé na Alemania i tambe Pader Paul Brenneker ku nan a kere ku el a nase na Berlin i tambe Medardo de Marchena. Medardo no pa motibu kaminda el a nase, pero si pa su pensamentunan ku nan a kategorisá komo peligroso i antikolonial. E tabata un di e promé personanan peligroso ku nan a arestá na Kòrsou., sospecha di ta simpatisá ideanan komunista i pro nazi. Aparentemente tabatin 2 otro Antiano mas den e kampo di konsentrashon na Boneiru, pero mi no a haña konfirmashon di esaki.
Den dékada 20 Medardo de Marchena ta haña problema ku iglesia katóliko i asta tabata na punto di kuminsá un kaso den korte kontra iglesia katóliko. Medardo a publiká diferente artíkulo kontra mishon katóliko, i tambe kontra dominio hulandes. E tabata kier a habri wowo di nos komunidat kontra di dominio hulandes i tambe kontra katolisismo. Medardo a batisá i kasa katóliko i su yunan tambe el a batisá katóliko. Durante e lucha akí e ta laga un domi batisá su di 4 yu.
Na 1929 Medardo a publiká e buki “Ignorancia o educando un pueblo”, despues el a manda un karta pastoral i tambe artíkulonan ( entre pueblo i gobièrnu) den “De Onpartijdige” (1932 – 1934). Ni e gobièrnu kolonial, ni iglesia katóliko por a imaginá ku Medardo lo a alkansá asina tantu hende. Den e publikashonnan akí e tabatin algun akusashon hopi serio. Por ehèmpel el a puntra ken tin falta, ku nos no tin nos mes hendenan den posishonnan haltu den komunidat, posishon ku ta nesesario pa duna nos hendenan mas rèspèt. Medardo a splika, ku ta: “hòmbernan blanku ku wowo blou ku ta parse hende muhé dor di nan manera di bisti, ku tin tantu Roma komo Hulanda komo nan patria. Ta nan ta kulpabel ku Kòrsou a keda tras, miéntras ku e poblashon di koló pa mas ku kuater generashon kaba ta gosa di abolishon di sklabitut”.Ta esaki a pone ku outoridatnan a konsiderá Medardo de Marchena komo un persona peligroso pa estado i a pone prezu. Despues di a sera Medardo pa algun luna den prisòn na Kòrsou, a deportá Medardo pa kampo di konsentrashon di Boneiru. El a skibi gobernador Kasteel diferente karta kuestionando su aresto sin ku nunka el a haña un kontesta.
Medardo a keda 5 aña será den kampo di konsentrashon na Playa Pariba na Boneiru. Seguridat di e kampamentu tabata den man di Korps Militaire Politietroepen (KMP) despues servisio militar di Antia a tuma mando over. Un di e miembronan di KMP tabata e konosido outor Pierre Lauffer (1920 – 1981) ku a skibi tambe tokante su tempu den servisio den su konosido buki Seis aña kaska bèrdè (1968). E gezaghèber di Boneiru di e tempu ei tabata Pieter H. Van Leeuwen, tata di e konosido Boeli van Leeuwen (1922 – 2007). KMP a keda te 1942 i despues miembronan di servisio militar obligatorio di Antia a tuma seguridat over te na final di Di Dos Guera Mundial. Un di e miembronan di Servisio militar obligatorio tabata Tip Marugg (1923 – 2006).
Medardo de Marchena durante e 5 añanan den kampo di konsentrashon a kuminsá skibi, tantu poema komo kansion dunando asina un kontribushon grandi na literatura antiano. Hopi di su komposishonnan el a traha riba weisnan eksistente. E komposishon di mas eksitoso di dje ta “Esta Dushi”pero ku a bira konosí komo “Bula Waya’interpretá pa Daniel Santos. Parse ku e dokumento original aki ta den e kolekshon privá di Toon Abraham. Medardo lo a skibi e komposishon aki riba e papel di plata ku bo ta haña den paki sigaria. Medardo a komponé e piesa akí riba melodia di “Hisa Bela”,
ESTA DUSHI
Ai para tras di waya
Ai m’a mira un mosa
Su cara ta bunita
Su curpa tin colebra
Refran:
Esta dushi, esta dushi
Esta dushi bo ta.
Si alambre no stroba mi
Si warda no taha mi
Pronto lo bo mira
Ta com ta bula waya.
Un posibel splikashon, kon e komposishon akí a yega serka Daniel Santos ta ku por ta Pierre Lauffer, poeta, eskritor i kitarista, tabata un di e miembronan di KMG enkargá ku seguridat na e kampo di konsentrashon. Posiblemente el a sera konosí ku Medardo i ku ta via di dje e komposishon a yega serka Daniel Santos ku nan a hasi algun kambio na e kansion i a graba esaki ku e título “Bula Waya”. Un splikashon ku ta parse mi lógiko. Ami en todo kaso a lanta i tende e piesa akí na radio. Otro banda di e disko 45 akí ta tin otro komposishon na papiamentu: “Piedra ku tamarein”. E dos piesanan akí ta grabá ku “Conjunto Jovenes del Cayo” di Alfonsin Quintana i segun e buki di Tim de Wolf : Discography of Music from the Netherlands Antilles & Aruba e grabashon ta data di 26 di yüni 1951 ku menshon di Nestor Brito komo kompositor bou di e seyo (Seeco Records). E piesa akí tabata un hit i nunka Medardo a haña un depchi pa su komposishon. Despues di un tempu relativamente kòrtiku, Rufo Wever kompositor arubano ta komponé e kontesta “T’ami a bula waya”, kanta pa Edwin Zichem ku Sonora del Caribe.
Na fin di Di Dos Guera Mundial, Medardo a haña su libertat i a disidí di keda Boneiru i kasa ku e dams Ana Thode ku e tabata mira tras di waya. For di e matrimonio akí a nase 4 yu.
Medardo de Marchena a traha diferente trabou i na diferente ofisina na Boneiru. E tabata hopi enbolbí ku polítika (parse ku partido Demokrátiko Boneriano).
Awor, 55 aña despues di su morto, bo no ta tende nada mas di Medardo de Marchena, ni na Boneiru kaminda el a biba gran parti di su bida, ni na Kòrsou kaminda el a nase. Pedro Pablo Medardo de Marchena ta derá den e santana di Iglesia Protestant na Playa Boneiru.
Danki na Harry Moen i grupo Serenada ku a graba e piesa aki riba un di nan CD den un potpuri den dekada 90.
Un kaya na nòmber di Medardo de Marchena den Kralendijk lo ta na su lugá pa kuminsá?
.
