Atrobe e siguiente artíkulo akí, ta relatá algu di mi hubentut. Ismael mi tata tabata traha na Britania i tabata un tremendo “sales man” na e kompania akí. Johny mi ruman mayó tabata un dje bendedó nan grandi di limonada bòter bèrdè/pretu na Criollita den Mexicoweg. Banda di esaki mi tabata rancha hopi den Kortijnweg 38 i un tiki mas pariba den e kaya akí, Benny Prince tabatin su kompania di limonada.
Na 1928 Victor Pinedo Senior ta kuminsá e negoshi: Victor Pinedo & Company i ta kuminsá bende awa di kas pa kas. Sakando probecho for di e sekura ku Kòrsou tabata aden, e tabata bende awa den barí ku buriku tabata hala. E siguiente stap tabata ku na 1938 e tabatin su soda fountain i tabata bende Coca Cola.
Tirando un bista den dokumentashon bieu, mi a haña ku na mas o ménos 1840 tabata bende “limonade gazeuse” importá serka Elias M. Curiel, miéntras ku mi a tuma nota, ku tantu Botica Nacional, komo Botica Central tabata bende awa destilá i tambe tabata yena i bende limonada i soda water .
Na 1924 mi a deskubrí e promé fábrika di limonada di Arturo de Jongh, na Molenplein. Despues di einan mi a haña diferente otro fábrika ku a kuminsá i tambe sera despues. Entre otro: Neerlandia N.V na Saliña, Juliana Limonade fabriek na Penstraat, Britania Christinalaan i despues den Oranjestraat, Curacao Aerated Water Co na Ref, Crystal Bottling de Kortijnweg, Moron Trading na Pietermaai, Coca Cola i Canada Dry Bottling Company, Big Hill na De Ruyterkade, Limonadefabriek na Mina Scharbaai, Criollita, Pepsi Cola na Kaya Max Henriquez i Kortijn Beverages den Kortijnweg.
Tabatin un surtido amplio di bon limonada na Kòrsou: Cola Bidu – Orange Crush – Old Colony Seven -Up – Coca Cola – Big Boy – Coco Rico – Grapette – Diet Rite Cola – Cola Champagne – Frescolita – Lucky Hit – White Rock i hopi mas.
Tabatin un kompetensia masha pisá entre e diferente fábrikanan, i e lucha tabata bai mas entre Pepsi Cola – Coca Cola i Britania, ku tabata e gigantenan entre e fábrikanan di limonada. Masha hopi kampaña di baiskel – trese futbolista Pele Kòrsou – rifa riba biahe i tambe diferente feria i sparmentu di tapa ets. tabatin.
E tempu ei bo ta kumpra kaha di limonada surtí, i si bo entregá bo kaha bashí, e preis di e kaha di limonada tabata mas barata. Kontrali na awor akí, trùknan di limonada tabata sali yen for di fábrika i tabata regresá yen bèk, ku mesun kantidat di kaha di limonada, pero bashí. Poko poko, pero sigur, ku e konkurensia birando mas fuerte, ku subida di suku ets., importashon di e mesun produkto for di eksterior, fábrikanan a bai ta sera nan porta i e último pa sera su porta aki na Kòrsou tabata Pepsi Cola. Awor akí bo ta haña Pepsi Cola si, pero importá. Por sierto ku e dos kompanianan ei tabatin un kompetensia mortal kontra di otro. Den añanan mas lat, a kuminsá na bende limonada den bleki i den bòter di plèstik. Eliminando asina henter e problema di statie geld, pero introdusiendo un otro problema: SUSHEDAT! Bisando esaki ta hiba mi na e siguiente kapítulo.
Bòter di Heineken ta haña un di dos bida!
Mas o ménos den 1960 tabatin 3 fábrika di limonada, loke ku nos tabata yama limonada “bòter bèrdè/pretu”. Tabatin tres di e fábrikanan akí: un di Machado na Palu Blanku, otro di Virgilio Koeiers na Mexicoweg i e otro di famia Metry na Mina Scharbaai. Produkshon di limonada den e fábrikanan akí tabata mas barata ku den fábrikanan grandi. Kasi tur tres fábrika a kumpra mashinnan over di otro empresa. Por ehèmpel Famia Metry a kumpra e mashinnan di Hector Henriquez, ku tabatin fábrika di Big Boy.
Nan tur 3 tabata usa bòternan di Heineken usá, pa yena nan limonada aden, pero no ta nan so tabata hasi esaki, ya ku botikanan i doñonan di snèk tambe ta hasi uso di e bòternan akí, pa yena remedi/ awa blanku, awa pa laba kas i otro líkidonan, miéntras ku snèknan tabata usa e bòternan pa e famoso mabi. Virgilio Koeiers tabatin bòter blanku tambe, pero su preferensia tabata bai pa bòter bèrdè, pasobra e bòter bèrdè tabata por a wanta rayonan di solo mihó. E tempu ei Kòrsou no tabata reklamá sushedat di e bòternan bèrdè, paso fábrikanan di limonada bòter bèrdè/pretu tabata limpia Kòrsou i re-usá e bòternan akí i asina tene nan gastunan abou, hasiendo uso, resiklando bòternan di serbes Heineken. Un otro punto tabata, ku limonada bòter bèrdè/pretu no tabata usa asina tantu gas, manera otro markanan mas grandi.
E proseso tabata unu diferente na otro fábrikanan, pasobra promé ku yena, mester manda e bòternan aki un sorto di wasmashin, kaminda ta laba/desinfektá e bòternan kompletamente, deshasí di e etikèt riba nan, pa despues manda e bòternan bai yena.
Aki mi ta kòrda mi ruman Johny, ku tabata bende limonada Criollita i despues di kaba di bende, ta kore rònt Kòrsou i piki i kumpra e bòternan di Heineken, pa despues entregá esakinan na fábrika di Criollita. Limonada bòter bèrdè/pretu tabata un éksito tur kaminda i e nòmber no por tabata mas apropiá, ya ku rònt Kòrsou limonada bòter bèrdè/pretu tabata konosí i ora klientenan kumpra nan pan franses ku keshi òf ku wòrs dushi; òf ora nan kumpra nan pan será òf nan saté ku batata ta un limonada bòter bèrdè tabata kompaña e menúnan akí. Tabatin asta restorant chines ku pa siman tabata kumpra mil kaha di limonada bòter bèrdè/pretu i regalá tur hende un limonada na kompra di un saté ku batata. Por sierto ta e úniko fábrika ku ta tin limonada ku smak di dròp, te asina leu ku ami ta kòrda. E no a dura masha si, paso a deskontinuá e smak aki despues di un tempu kòrtiku. Na tur nan tabatin 7 smak di limonada.
Pero e desaroyo akí, no a bai mesun fásil ku mi ta deskribí akí. Tur tres propietario di e fábrikanan akí a konta di e lucha ku nan mester a hiba, ora ku otro fábrikanan tabata sintiendo e kompetensia fuerte, i a kuminsá hasi tur kos den nan alkanse pa kibra e fábrikanan, dor di entre otro destruí e bòternan di Heineken usá, ya asina e fábrika di limonada bòter bèrdè/pretu no tabatin bòter pa nan yena. Despues tabatin un idea pa Heineken bai kuminsá usa bòter mas chikí i asta e fábrikanan di bòter bèrdè/pretu tabata kere ku esaki tambe tabata un akshon kontra di nan.
E fábrikanan a disidí e ora ei di buska nan rekurso na Aruba i Boneiru i tabata importá e bòternan di Heineken usá for di e dos islanan akí.
Ku tur e problemanan akí, i tambe ku subida di preis di suku, e fábrika di famia Metry na Mina Scharbaai a sera na 1980. Na 1991, Maris Koeiers ta tuma Criollita over despues di morto di su tata. El a eksperensiá e trabou i lucha duru ku su tata a hiba pa garantisá éksito di e fabriká i na 1994 Sigmund Jansen ta kumpra e fábrika i ta hiba e fábrika na otro éksito i e tambe tabata sinti e lucha ku mester a hiba pa mantené kabes riba awa. Kompetensia tabata masha fuerte mes i tabatin tempu di gloria, ku Criollita tabata produsí mil kaha di limonada pa dia.
Bou di presidensia di Sigmund Jansen a kuminsá pensa i kambia bai na produsí e limonada den bleki i tambe nan a kuminsá produsí cola. Criollita tabata bon establesé den nos komunidat. E fábrika a krese i bai para te den Industrie Park na Brievengat, kaminda nan tabatin mas espasio pa almasená. E tempu ei Criollita tabata hopi aktivo, ku diferente kampaña, pero tambe e tempu ei hasiendo diferente akshon di resiklá i tambe promoviendo akshonnan duradero.
Finalmente Coca Cola a kumpra Criollita na 2013 i asina a yega un fin na e último fábrika di limonada bòter bèrdè/pretu.
