Un bendedó di Botika Coromoto: Ai nò mi yu, awa di suerte ta nada otro ku sobrá di kolonia i perfumenan ku no ta bende, nos ta basha den otro i lanta esaki na awa, ku kisas un tiki èkstra koló.
Den añanan 60 – 70, Elis Juliana huntu ku pader Paul Brenneker a hasi diferente estudio riba kustumber i tradishon di nos pueblo. I nan a dokumentá vários di esakinan den Sambumbu.
Doble R den un su produkshon 1999, a kòrda pueblo riba e tradishon di sensiamentu di kas i awanan di suerte. E disko “Kos ta bai drecha” a sali i huntu ku esaki a laga traha un sorto di awa di suerte koló blou, ku tabata bende huntu ku e disko. E produkto tabata yama: Spanta Fuku.
Bo suerte semper tabata den botika riba rèkinan, den algun bòter òf bleki. Ora bo lesa e diferente etikèt di den e departamento di suerte, ku poko nòmber masha yamativo manera : Mil Flores – Vini Vini – Buena Suerte – Don Juan del Dinero – Hopi plaka – Seven African Power, bo ta komprondé ku esakinan tabata nòmbernan di bòter di awa di suerte i “airfreshner”, ku tabata trese suerte, sèn, salú i satisfakshon den sèks. Klaro ku bo mester sakudí e bleki promé i resa tambe. Asina ei nos tabata gasta nos sèn fin di aña na superstishon..
Suerte i prosperidat pa e kumpradó, òf pa bendedó?
Kasi ningun hende ta kere den nan, pero tòg ta kumpra nan. Fin di aña ta saka delaster un kos for di kas i ta laba kas ku e awa di suerte, pa kore ku fuku. Tabata un tradishon, un kustumber di ántes i bo a lanta i krese ku esaki.
Na mi kas den Mundu Nobo, i den hopi otro kas den mi bario, esaki tabata un kustumber. Hopi habitante di bario, ora nan kaba di laba nan kas, tabata basha e sobrá awa dilanti di nan porta di kas. Bo mama tabata bisa bo, pa mira bo no pasa den e awa ei dilanti di nan kas. Den bario, nos tabata bisa e tempu ei, ku e hendenan akí tabata hasi brua.
Riba e diferente bòternan tabatin teksto ku ta basta direkto, depende kiko bo kier: Kita Fuku òf Bini Bini (Vini Vini). Klaro bo no por bebe nan, pero si bo por a dal un baño ku nan.
Loteria – Gana plaka!
Ántes bo tabata por a haña Abre Caminos i tambe e bleki di spuit Moneyhouse i Exito en el Juego. Abo mester sa kua di nan bo ta kumpra: mi ta kòrda ku Moneyhouse tabata hole dushi i bo tabata kumpra esaki komo bon aroma pa den bo outo, i ya, e por a duna un tiki suerte aserka. Klaro ku esaki ta e sekshon ku tabata mas bendí ku kualkier otro.
Huntu ku esaki, bo tabata haña tambe e buki di soño San Cono, ku ta duna bo un splikashon eksakto di bo soño ku e number di suerte su tras. Kier men soña anochi i bira riku atardi/anochi. Awor tabatin etikèt ku otro nòmber, pero mi ta kalkulá òf ta kasi sigur ku e kontenido tabata meskos, pero simplemente ku otro nòmber i otro etikèt: i nan tabata un tiki mas maskulino: Juan el Conquistador i Don Juan del Dinero. Meskos tabata e kaso ku Suerte Rápida, Dame Pronto i Hopi Plaka, tabata mas yamativa.
7 Poderes
7 Poderes tabata un produkto di Confuscus. Bombay India, por sierto nan mes tabata traha Juan El Conquistador i Don Juan Dinero. E marka akí tabata unu internashonal i importadónan lo a ripará ku e produktonan akí tabata bon pa Kòrsou tambe. Nòmbernan ku tabata aparesé riba e etikèt tabata: Ochun – Chango, Orula – Ogum – Elegua, Obatala – Yemalla. Un meskla di krusifiho, ku plachi di Mama Maria i otro santunan, den kombinashon ku zeta di poder di Afrika. (Power Oil). Zeta Afrikano ku Poder èkstra ordinario.
Orashon
Riba e etikèt tin pará ku lèter grandi pa bo sakudí e bleki i spuit algun biaha. Despues tin ku hasi un krus i resa. E bleki di “airfreshner” aki ta prosedente di Merka, i mas abou den lèternan chikí tin poné, ku e produkto ta un “airfreshner” i no tin ningun forsa èkstra ordinario. Pero ya nan a lesa e lèternan grandi ku ta bisa: Chango Macho i Spirit of Good Luck.
Si bo no tin pasenshi i mester di suerte un be, e ora ei bo tin ku kumpra e bòter Double Fast Luck, ku riba e etikèt, plachinan di suerte, palu di bida: ku takinan di fe, speransa i karidat, kombiná ku un outo Cadillac, un pata di kabai, ku palabranan “spiritual power, wealth and fortune”, ku ta primintí hopi pero no ta garantisá nada.
Mi mester hasi menshon aki tambe, di e bòternan chikí di 59 milimeter ku Laboratorios del Pueblo tabata bende i ku segun su etikèt ta un “extract of oranges, cinnamon and florals”. Segun mi trahá na Kòrsou mes. Parse ku Sr. Metsch di Botika del Pueblo, dilant di barkunan tabatin su fábrika di traha awa di suerte den Scharloo i tabata operá bou di nòmber: Pueblo Pharmacal. Esaki mi no por a konfirmá.
Konosí aki na Kòrsou ta awa den bòter: Pompeya, Agua Divina ku nan tabata yama Awa di Dios, ku ta kontené alkohòl, awa di hole dushi, awa di diferente koló.
E bendedó di botika a konta, ku e mes no tabata sa kua produkto ta bin di kua pais, ni nan no tabata sa e kontenido di e produktonan. “Nan ta hole dushi, esei mi por bisa, pero mi no ta kere ku e kosnan ei ta funshoná”. Ta hasi uso di e awanan di suerte mas komo un tradishon i no ku nan ta kere den e trabou ku e awa tin di hasi. Mas ainda, ta e “hòmber chikí”, tabata kumpra e awa di suerte i otro asesorionan.
Botika Coromoto, Botika del Pueblo, tabata konosí pa bendementu di e diferente sorto di awa di suerte. Nos a konosé tambe e negoshi La Gardenia, ku tambe tabata bende tur sorto di awa di suerte, bela di diferente fragansia, sensia i hopi mas.
Ami a keda ku un tradishon, i esei ta sensia kas fin di aña. Ami ta kere ku e ta yuda, ounke mi no por bisa bo, kon el a yuda mi si. Nunka mi a kumpra awa di suerte, ni maske kon bunita e nòmbernan ta: Flor di Amor – Sigueme, Agua Divina – Vencedor – Ven conmigo Voy contigo i e konosido Esencia Bergamota. Asta nan a konta mi, ku ta tin un awa yamá: Duermes conmigo y mañana serás madre! Elsa mi mama lo ta bòltu den su graf awor akí!
