“Pai, bo tin sinkwent’i seis?”
“Si, na baka, shen florin
e otro baka ta di Serafin
k’a pagami for di antayera.”

‘Mai, bo n’ke un ko’i mañan?
Mi ta hunga dilanti i patras. ‘
‘Pero si mi gana, trese e plaka,
no hasi manera Maria karkas. ‘

T’esei t’e lamento di tur dia,
invershon insigur di bo sodó,
loke ta malográ hopi amistat
i ta un plaga pa komunidat.
Algun kuplèt saká for di obra  “E Ko’i mañan” di: Guillermo E. Rosario, E Kòrsow ku mi ta kòrda. Willemstad, Kòrsou: [s.n.], 1969, p. 23/4

For di 1909 tabata permití loteria na Antia. Promé ku 1930, gobernador tabata duna pèrmit na organisashonnan privá organisá loteria. Liga di Socorro, La Caridad, Asistencia Mutua, Het Armenzorg, Bedelaarsfonds, Eendracht maakt macht, Club Entre Nous, De Gezelligheid, Zeemanshuis ets.

Na 1922, gobernador di Kòrsou a pidi Koloniaale Raad pa intermediá, ya ku Kòrsou tabata gasta hopi sèn na loteria ilegal. El a proponé pa bin ku un “Landsloterij”. Pero miéntras tantu a start ku un “Loterijbond” Fortuna, ku tabatin un bestür nombra pa gobièrnu.Tabatin diferente klup karikativo, ku tabata afiliá na  e “Loterijbond” Fortuna. A funda e Loterijbond akí, pa frena loteria ilegal i pa por a kontrolá loterianan mihó.
Ta te 1949 a bin ku e “Landsverordering”(15 di òktober 1949 P.B. 1965, nr. 122) i finalmente “Landsloterij”a bira realidat na 1951.

“Landsloterij” su kantor inisialmente tabata den e antiguo Hotèl Americana, despues el a move pa e edifisio di Tong Fat i finalmente nan mes a traha nan edifisio, for di nan propio entrada. “Landsloterij” tabata e úniko loteria den Antia ku tabata kooperá ku gruponan karitativo, di arte, kultura i siensia. Tabatin un tempu, ku “Landsloterij” tabatin mas o ménos 650 rebendedó. Lo mi bin riba “Landsloterij” den un artíkulo apart.

Den dékada 50-60 i 70, Kòrsou tabata un “paraiso” pa loteria ilegal. Riferonan tabata pasa kas pa kas, òf tabata stashoná na lugánan stratégiko i tabata bende nan number. Den Punda na Golden Corner, na skina di Kaya Vi Coco i den Otrobanda na hanchi Makatea. Riferonan konosí di nos isla ku nan nòmber tabata zona den asuntu di wega di number: Shon Ma – Bio – You – Djo Pishilingi – Suzanita – Fèchi – Fèntòn – Eddy Broko – Papi Foto – Juancho – Ruben – Samuel – Nachi – Daou – Mem – Nel-Seshi Kayon Bum – Kabesa – Earl – Moesquit – Joe Black. Klaro ku tabatin mas i no ta tur e nòmbernan ku mi a menshoná tabata di mesun époka. Un tabata mas popular ku otro i tambe mas grandi (poderoso) ku otro.

Tin asina tantu historia di bendementu i bendedó di number, ku bo por skibi un buki kompleto di esaki. Por ehèmpel Shon Cola a kanta gezaghèber Kibbelaar un tempu den su tambú “Mi ta bai kura” temporada ku kontròl riba bendementu di number a bira mas intensivo. Otro ehèmpel ta: un dje piesanan mas bunita kantá pa Kimu Candelaria: Kaya Grandi di Otrobanda a bira plasa di number so.
“Kaya Grandi di Otrobanda a bira plasa di number so. Bai pariba, bai pabou, ai nami un heldu p’e ko’i mañan. Kaya Grandi di Otrobanda, a bira plasa di number so. Bai pariba, bai pabou, ai nami un heldu p’e ko’i  mañan. Señorita tantu spòrt, kasadó ku krans ku wal, laga papel di number, bai laba paña pa bo kasá. Na skina di Macatea ei tin klup di sosiedat, riba kaya i den konvoi ai nami un heldu p’e ko’i mañan. Hòmber durunan, ku bras’i heru laga papel di number bai karga wama riba Nieuwpoort”.

Fèchi Durand, un di e pioneronan di wega di number a tuma e kos aki p’e i el a paga Pierre Lauffer pa kanta Kimu.
“Tin hende ta mira otro ta buska pida pan, nan ta hasi mané ta duele, ta rabia ta choka nan. Metebo den bo asuntu, lagami na mi lugá. Ki ora ku bo kohe number, 21 ta bo preferí. Awor bo ta kana yanga ku unifòrm bistí. Ke subi riba nos lomba pasa pa gran kantor.”.
I e ora ei Kimu a komponé e piesa ku a hasié inmortal: “E para pretu”.

Komo mucha, Djo Pishilingi ( te awe mi no sa e nifikashon di e nòmber ei) tabata bin bende number na nos kas den Mundu Nobo i mi mama tabata un kumpradó fihó.  Seshi tabata bin ku e karchinan di loteria di Santo Domingo – Caracas – Zulia – Maracaibo – Tachira i Oriente, bin bende mi mama. E karchinan ku tin un pida kitá, esei kier men ku un otro hende a kumpra mitar di e lòt ei, i ora abo kumpra, bo tabata kumpra e otro mitar, o sea bo ta “bai baka”.

Tur loteria di e tempu ei, ku eksepshon di “Landsloterij” tabata ilegal. For di e tempu ei, te awe, nada, pero nada no a kambia. Awor aki kosnan a bira mas moderno, paso bo ta kumpra number via sistema digital i e ilegalidat ta mas serka di kas, pasobra ta loteria di Aruba ( Diario – Big 4 – Super 4 – Catochi – Zodiac – Lotto di 5 – Lotto di Dia – Lucky 3 – i Aruba tin mas loteria di eksterior) – Boneiru su Flamingo – St. Maarten su Philipsburg AM i PM  i tambe Chatochi), Caribeña etc. Awor tur loteria di e otro islanan ta legal na nan isla, pero ilegal aki na Kòrsou.

Bèto Thomas direktor di “Landsloterij” den pasado, a bin ku e slogan: “Gana ta nada, kobra te kos”. Esaki enfatisando ku serka nan, esta “Landsloterij” si bo gana bo ta haña pago sigur, paso un ta tiki biaha, kumpradónan a haña “palu” kumprando loteria ilegal.

Na 1987, riba inisiativa di gezaghèber Casseres, a legalisá wega di number Kòrsou i esaki mesora a sòru ku e kantidat di rifero a baha, pero e kantidat di ofisina a bira mas grandi, pero tin ménos bendedó. Number ilegal a sigui su kurso, bendementu di loteria ilegal a bira mas tantu, bendementu di number den toko i restorant chines; abiertamente ta bende number sin paga OB i mi por sigui menshoná muchu mas iregularidat.

Kultura di wega di number!

Hasimentu di aña di mi kasá, morto di famia, number di outo ku a dal; kèlder di defuntu; aniversario di personanan konosí den nos komunidat; tur esaki nan ta indikashon pa e number ganadó di e dia ei. Number ta hopi importante den nos bida, manera 1313 – 2222- 3333 ta hopi gusta. Klaro ku tin mas di e numbernan akí ku riferonan ta blòkia. E fecha di dia ta bende hopi, riba Todos Los Santos, numbernan 48 i 84 tambe ta hopi bendí; riba San Valentino number 14 ta bende hopi;  i dia di San Minguel Arcangel number 29 ta hopi bendí. Hopi rifero a drumi malu anochi, 13 di yüni dia di San Antonio, pa motibu di e number 1313 i tin asta rifero ku a kibra pa motibu di e number akí. Tur suseso den komunidat, ta motibu pa kumpra number, anto pa kumpra no ta problema, paso tin un kantor di number na kada skina di kaya, i te na ora ku bo no kier sali kas, den tempu moderno akí, nan ta kore yega bo kas, den outo. Esaki ta hasi e adikshon na wega di number i loteria hopi altu na Kòrsou.

Sifranan di 1990 tabata mustra ku Kòrsou tabatin 94 kantor di number di Joe Black, 60 kantor di Robbies ( awor Smail) sin pone awor aki aserka e kantornan di Curaçao Lottery – Lucky Seven i algun otro ofisina chikí mas.

Nelson Farah, Joe Black ta un ku a krese for di nada i bira un magnate den wega di number aki na Kòrsou.Ku 13 aña el a kuminsá bende number, ku 14 aña e tabata bende number riba baiskel. Den siman e tabata traha na un fábrika di blòki di su tata i djadumingu tabata dia pa bende Santo Domingo. Na 1960 el a kuminsá bende: Caracas – Tachira – Zulia i Oriente. Na 1976 el a kuminsá bende e promé wega di Kòrsou, Sorteo di Pueblo ku radio Hoyer tabata organisá. Semper Joe Black a bende tur loke tin di aber ku loteria. El a habri su promé kantor na Tera Kòrá i despues na Boka Samí.

Den e artíkulo akí, mi no a inkorporá Scratch Lottery, intenshon di Lotto di Kòrsou, Bingo, Bon Ku n’e, i e konosido rifa riba Beautiful Homes etc.