Tin kos ku, pasobra nan ta pasa asina tantu biaha, nos ta kuminsá konsiderá nan normal. Un yu di Kòrsou ta debutá den Major League Baseball. Otro ta sigui. Ta selektá algun pa All-Star Game. Nos ta mira nan na televishon, nos ta sinti orguyo, nos ta felisitá nan i despues bida ta sigui komo si fuera nada no a pasa. Kasi manera ta kos di tur dia. Pero e no ta normal! Un isla chikí manera Kòrsou, ku un kantidat di habitante chikí, ta produsí hungadó tras di hungadó ku ta alkansá e nivel mas haltu di beisbòl mundial. I awor nos tin algu mas grandi ainda. Andruw Jones ta Hall of Famer!
Dia 26 di yüli 2026 ofishalmente Andruw a drenta National Baseball Hall of Fame na Cooperstown. Promé yu di Kòrsou ku a logra esaki. Pensa un tiki riba esei. Un mucha ku a kuminsá hunga beisbòl aki na Kòrsou, awe tin su plakat entre e inmortalnan di beisbòl mundial. Anto ainda nos no tin un Museo di Deporte permanente na Kòrsou.
Nos tabatin un kuminsamentu
21 Di òktober 2016 un grupo di fanátiko di deporte, Valdemar Marcha, Jan Boutmy i Franklin Clemencia a tuma inisiativa pa lanta un museo deportivo den Biblioteka Públiko, dr. Frank Martinus Arion. Museo di Deporte Mordy Maduro. Nan a komprondé ku Kòrsou tabatin sufisiente historia, logro i héroe deportivo pa konta su propio historia. Pero ku desaparishon di Biblioteka Públiko, Museo di Deporte tambe a disparsé. Awor e museo a disparsé, pero nos historia no por disparsé kuné
Nos ta demasiado kustumbrá na éksito. Kisas esei ta parti di nos problema. Nos a kustumbrá (òf ta kustumbrando) na éksito. Nos muchanan den Little League ya pa vários aña ta pone nos den spòtlait na Merka. Vários di nos hungadónan di beisbòl a yega Major League. Un Yu di Kòrsou den All-Star Game a bira algu komun i koriente i kasi no ta sorprendé nos mas. I despues Blue Wave a pone nos isla den un otro dimenshon. Mundu a sera konosí ku un isla chikí. Nos a mira kiko deporte por hasi ku un pueblo. Kòrsou den euforia i un orguyo enorme. Esei tambe ta historia.
Pero unda nos ta warda e historia ei?
Kisas den un kaha bou di kama tin un flanèl ku un deportista a bisti den un partido importante. Na un otro kas tin un medaya.Tin hende ku tin potrèt ku ningun otro hende tin. Tin trofeo yen di stof. Tin korant bieu, grabashon, dokumento, sapatu, bala, bate i mil i un otro kos ku awe ta pertenesé na un famia, pero ku mañan por bira parti importante di patrimonio di nos pueblo. I tempu no ta warda. Hende ta muri. Famia ta muda. Ta benta kos afó i potrèt ta daña. Ku kada kos ku pèrdè òf daña, un pida di nos historia ta bai.
No un skina ku algun trofeo
Mi a trese e asuntu di Museo di Deporte dilanti Minister di OWCS, Sr. Sithree van Heydoorn. E minister a proponé pa mira huntu ku SDK kiko por ta posibel. Pero despues di e kòmbersashonnan ei, mi konvikshon a bira mas fuerte. Nos no mester un skina kaminda nos ta pone algun trofeo i potrèt. Nos mester un Museo di Deporte di bèrdat. Ku su propio espasio. Un edifisio òf lokal destiná pa konservá, dokumentá i konta historia deportivo di Kòrsou. I den e museo aki, inkorporá nos Salon di Fama, ku awor akí no ta nada otro ku un sala i algun potrèt.
Asina ku un hóben ku drenta ei mañan por mira Andruw Jones i despues deskubrí ku tabatin hopi otro promé kuné. E por mira nos hungadónan di MLB. Nos Little Leaguers. Nos futbolistanan, nos atletanan, nos landadónan i nos deportistanan di ayera i di awe. Tambe e entrenadó, dirigente i pioneronan ku a pone e fundeshi pa otro por tin éksito.
Un museo ku ta biba
Mi ta mira un museo kaminda un mucha por tende un relato di un partido históriko. Kaminda por tin pantaya ku imágen bieu. Kaminda skol por bishitá. Kaminda un mucha por mira un flanèl original i pensa: “Si e por a hasié, ami tambe por.” Esei ta balor di un Museo di Deporte. E ta warda pasado, pero e ta inspirá futuro.
Andruw Jones ya tin su lugá na Cooperstown. Nos hungadónan ta sigui pone Kòrsou riba podio grandi di Major League Baseball. Blue Wave a skirbi un página nobo den historia deportivo di nos isla. Awor falta pa nos hasi nos parti. Duna nos historia un kas. Un Museo di Deporte pa Kòrsou no ta un luho. E ta un must. I si nos no hasié awor, mi ta puntra: Ki ora?
Tremendo atrobe, ta kos ku semper mi a bisa. Nos ta asina haltu den deporte tog ta djis un ratu despues nada. Ohala loke bo a pone aki yuda. Thanks Percy