Ta parse manera ku ta mobilisashon di pueblo tin i tur hende ta kana pariba pabou ku nan stul bou di brasa bayendo den mesun direkshon. Algun di nan ku mesa, djùg i kos di kome. Ta hopi drùk pa un atardi, bayendo den anochi den mi bario Mundu Nobo. Esnan di mas edat ta kompañá pa nan yunan, nietunan, ku ta yuda nan kaminda pa vèlt di bala di Mundu Nobo. Ta ku nostalgia, mi ta kòrda bèk, na e tempu aki i mi ta mira George Merced mi dilanti ta subi vèlt di Mundo Nobo, pa regla e último detayenan p’e anochi aki. Imposibel bo keda sin ripará presensia di George Merced, un figura impreshonante, grandi di estatura, ku ta eksigí rèspèt asina e ta den bo besindario. Ora bo ta papia ku n’ e, bo mester hisa kabes pa mir’é den su kara. George Merced ta un lider outo proklamá di Mundu Nobo, ku ta e persona pa regla tur kos ora ta trata di tipo di aktividat, manera esun di un anochi di Sine Trùk, selebrashon di aña di La Reina i/òf kualkier aktividat deportivo/kultural.

For di atardi algun machi a skohe nan lugá stratégiko den òf dilanti di vèlt di bala, i den nan baki nan tin nan produktonan ku nan ta bende, manera kala, pinda, kos di boka dushi, sigaria detayá, i nan zim ku refresko i serbes.

P’e anochi aki ta spera un bon públiko, kaminda sine trùk lo pasa e pelíkula “Marcelino Pan Y Vino”. Djaluna anochi 12 di yüli a toka turno na bario di Mundo Nobo pa bishita di Sine Trùk. Na diferente radio a anunsiá e bishita di sine trùk, miéntras ku por a lesa esaki tambe den korant. Bishitantenan di Mundo Nobo, Zjaro, Sta. Helena, Marchena, Wishi i Otrobanda a reakshoná en grande riba e yamada pa bishitá Sine Trùk awe nochi.

Na 1956 Rotary International a regalá Stichting Volksontwikkeling Curaçao e Sine Trùk, ku e meta pa pasa pelíkula p’e barionan mas aislá di nos isla.Yegada di e sine trùk ta un alivio den bida diario di Kòrsou. Sine Trùk ta aktivo te den añanan 1983 pa 1984. Na aña 1958 Stichting Volksontwikkeling a pasa e Sine trùk over pa Cultureel Centrum Curaçao ku a sigui ku operashon di e trùk. Te dia no ta tin sèn mas pa a sigui traha ku e trùk, a pone e trùk para den hòfi di CCC, kaminda finalmente a bende e trùk na findishi. Banda di Kòrsou, Aruba tambe ta tin un “FilmBus” ku nan ta usa pa kombatimentu di mal uso di alkohòl.

Komo mucha di 13 pa 14 aña nos ta bai vèlt, kaminda George Merced ta kumindá nos na su manera úniko di: “Jongens. Jongens, wat een pret” i mesora ta sigui ku repartí tareanan ku nos mester a kumpli ku n’ e. Nos mester a habri portanan di vèlt pa trùk di sine por a drenta, bai serka Helena, e bisiña mas serka di vèlt, pa nos por pidi pa eventualmente si tin problema ku gèneraiter, nos por haña un “tiki koriente”, ofresiendo Helena 5 florin pa uso di su koriente; nos mester a traha dos rei riba vèlt, un na man drechi i otro na man robes, i laga mei mei di vèlt abri pa trùk por pasa.

Pa mitar di shete e trùk ta kore drenta vèlt ku aplouso di públiko, pasó a yega di pasa ku e trùk a daña i mester a kanselá e presentashon di e anochi ei i públiko hopi desepshoná ta bolbe kas sin ku nan por a disfrutá di sine.

Anochi di sine trùk ta kuminsá 7or i ta kaba 9or di anochi. Promé ku pasa e pelíkula ta toka algun piesa klásiko. Pakiko nan no ta toka músika lokal a keda un misterio. Di dos biaha ku bo tende aplouso ta ora ku e mashin di sine sende i ku Polygoon Nieuws kuminsá. Semper ta tin notisia promé ku pelíkula kuminsá ku e bos úniko di Philip Bloemendal, ku ta konosí pa notisia di Polygoon. Notisia di Polygoon ta pone bo kòrda e materia di geografia i spesífikamente topografia, pasó riba pantaya ta aparesé e mapa di Ulanda, ku ta un mapa ku na MULO bo mester a siña for di kabes.

Semper den Polygoon Nieuws bo ta haña imáhenan positivo di Ulanda i mundu i e notisianan ta fásil pa komprondé. Públiko ta gusta Polygoon Nieuws i no ta solamente na funshonnan di sine trùk bo ta haña Polygoon Nieuws, pero den funshonnan den teater di sine tambe. Despues di notisia mester a warda un ratu, pa por a bolbe pasa e sinta bèk riba e ril original i pone e ril di e pelíkula prinsipal. Den e espasio aki, bo ta haña e charla di Pader Brenneker, ku ta presentá esaki den su forma úniko “Dia Pa Djo tur yu di Dios”. Despues di e charla, públiko ta bati man. Esaki tambe t’e momento ku bo por bai kumpra un ke otro serka e diferente machinan ku ta bende kos den òf dilanti di vèlt. Bo tin tempu pa hasi esaki promé ku pelíkula kuminsá.

Si e pelíkula ta un pelíkula, ku komo mucha no ta interesá bo, nos komo hóben ta kore bai bin riba vèlt i hopi biaha nos mayornan ta hala nos atenshon i pone nos sinta bèk banda di nan, sin stroba nan pa wak nan pelíkula.

E anochi aki nos ta ketu i ta disfrutá di e bunita pelíkula Marcelino Pan Y Vino, ku personalmente a hasi un impreshon fuerte riba mi i mi amigunan. E pelíkula ta trata e istoria di un mucha hòmber huérfano ku padernan ta kuida i kria den un konbento i ku ta hiba diferente kòmbersashon ku Hesus kologá na krus. Mi ta kòrda ku fo’i e tempu ei nos ta diskutí ku George Merced i ta puntr’é: “Jongens, ta bèrdat ku Hesus a papia ku Marcelino, i ta bèrdat ku ta na spañó e la haña kontesta”, i George den un manera masha trankil i sereno ta kontesta nos:” ku kisas un dia, no awe, ni mayan, pero un dia lo e kòmbersá ku nos tambe”.

Mayoria biaha ku nan pasa pelíkula esaki ta pa adulto i muchu tiki biaha ta kòrda riba nos muchanan, òf tin biaha nos ta haña un kartun promé ku e pelíkula prinsipal. Un kaminda ku grandi i chikí ta gosa i dibertí ta ora pasa un pelíkula di kòbòi.

Despues di sine nos ta bai kas bèk i esaki tambe ta un aventura, pasó mester pasa i yama tur hende bon anochi i ora yega kas mester pone tur stul i mesa na nan lugá bèk, pa despues kue rumba pa kama, pasó mayan ta otro dia di skol. Bo ta spera ku e siguiente turno di bo bario pa sine trùk no tarda muchu. Siguiente dia bo ta bai vèlt un ratu despues di skol, paso George ta warda bo pa bo yuda limpia vèlt i pone tur kos na òrdu, pasó atardi tin wega di bala atrobe