Awor aki nos ta sinta den e komodidat di nos kas, ku nos pòpkòrn, kola, ta sinta mira Netflix, Hoeloe i otro kanalnan, pa buska i mira nos pelíkula faborito. Un luho di otro mundu i mas i mas nos ta bai avansando i modernisando.Ken por a kere esaki, ken por a premirá tur e kambio i avansenan aki.
Luis Alfredo Pellicer Hernandez, Don Pellicer manera nan ta yam’é kariñosamente, lo ta orguyoso pa mira e desaroyo akí. Kasi 114 aña pasá, e ta e persona pa kuminsá ku desaroyo sinematográfiko riba nos isla. Na aña 1908 el a kuminsá i a pasa e promé pelíkula na Kòrsou den teatro Naar. E pelíkula ta’ta unu italiano di Carlos Poeti(sin nòmber) i mester a trese un motor tambe for di Venezuela, pasó no ta tin koriente.

First Movie Theater

Don Pellicer a nase dia 29 di ougùstùs 1878 na Caracas, Venezuela i for di 1898 a bin biba na Kòrsou. For di edat yòn e ta tin interes pa teater, pero a destaká mas den e mundu di empresario i e t’esun  pa pone Kòrsou e tempu ei riba mapa sinematográfiko.E ta esun promé tambe pa trese kompanianan di ópera italiano, artistanan kubano i ruso (Tambal, Camila Quiroga, Saavedra, Carlos Pons, Los Cosacos del Zar, Los Niños Cantores de Viena, Revista Velasquez, i e orkesta famá di damanan “Anacaona”). Tambe e tabata move riba tereno di entretenimiento pa mucha, tresiendo Kòrsou e famoso kabaitunan di e tempu ei, Ringling Brother, Dumbar Scharwets i Tabali. Den korant El Independiente, nan a publiká, ku asta e promé prestigioso kabarèt di Rio Rita, den kua ta tin diferente artista internashonal, ku pa e tempu ei ta úniko den su sorto, no solamente na Kòrsou, pero tambe pa den Karibe, el a trese Kòrsou.

Sinematográfiko

Den dékada 30 a surgi un bos den nos region, ku a koutivá kurason di damanan. Ta trata di Carlos Gardel, El Zorzal Argentino, ku a influensiá mundu sinematográfiko tambe i a pone ku nan a kuminsá lubidá Rodolfo Valentino, aktor italiano ku ta hopi gusta serka damanan. Don Pellicer a trese Carlos Gardel e tempu ei Kòrsou i Aruba. Don Pellicer ta tin bon kontakto ku Aruba, kaminda huntu ku empresario Shon Eddy de Veer el a hiba Carlos Gardel Aruba. Teaternan a yena ku fanátikonan ku kier a skucha i mira e kantante di entre otro “Cuesta Abajo” i Luces de Buenos Aires.
Fásil su bida komo empresario no a bai, asina e mester a aparesé den korte pa un kaso kontra Amigoe, e mester a someté su pelíkula “Christus” pa Katólikonan por a weta promé ku e pelíkula a bai pantaya grandi.
Banda di ta empresario den show business, Don Pellicer tabata doño di un hotèl tambe na 1915

For di inisio di époka sinematografia na Kòrsou, te na yegada di pantaya grandi, tabata entre otro Don Pellicer, huntu ku otro gran empresario Sr. Alfredo Moron(Fèchi Moron) ku tabata dominá mundu sinematográfiko na Kòrsou. Esnan ku ta kòrda “Salon Habana” di e famoso Ria Rita i di otro espektákulonan den Hotèl Americano lo ta rekordá e figura kariñoso di Don Alfredo Pellicer. Sr Fèchi Moron a kumpra “Salon Habana” i a kambia su nòmber den Cinelandia. Otro figuranan masha konosí na Cinelandia tabata Eusebio Rodrigues (Chebu) i Martin Palacios ku ta traha einan komo operator.
Sra Ana Romero ta rekordá Don Pellicer komo un “Don Juan” ku ta kana semper bon bistí, na flus ku sombré, ku su baston den man, semper bon pelá i ku un snòr skèrpi kòrtá.

Dia 21 di desèmber 1969 Luis Alfredo Pellicer Hernandez a muri na Kòrsou na edat di 91 aña.