Unabes bo a pèrdè bo bon nòmber, bo ta keda ku mal nòmber. (Sapaté, na bo sapatu! Reginald V Römer)

Hopi ta esnan ku a kere ku Hanchi Moordenaar, Moordenaarsteeg òf Kaya Moordenaar nunka a eksistí.

Den mi búskeda di historia di Moordenaarstraat, mi no a haña masha informashon. Ta parse manera tabatin miedu pa skirbi tokante di e kaya/hanchi akí. Papiando ku un hende ku ta ligá na deskripshon di kayanan den diferente bario, el a remarká ku e tambe ta kere, pasó ta trata di un kaya notorio, no tin masha informashon di e kaya akí.

Tur kaminda na mundu tin kayanan ku nòmber straño, kopioso i asta ekstrabagante. “Callejon de Libranos Señor” na Cuba, i tambe “Sal Si Puedes” na Cuba i kayanan na Venezuela, tur tin nan historia, meskos te kaso den diferente bario na Merka ets.

Awor Ulanda, ei nan ta konosé: Dronkenmansteeg, Moordenaarsteeg, Galgenstraat, Boerenverdriet, Bloedstraat òf Enge Kapelsteeg.

Moordernaarstraat na Kòrsou, djis imaginá bo e nòmber ei den sentro di nos siudat, un asesinato den tur e trankilidat di nos siudat. Kaminda tabatin hende di bon famia ta biba ku a hunga un ròl importante den bida sosial di Kòrsou. Tur e hanchinan smal akí tabata rondoná Heerenstraat, Prinsenstraat i Columbusstraat i e hanchinan akí, anochi ta transformá den e sentro nokturno opskuro di nos siudat, ku prostitushon, bebementu i sentro di droga. Manera mi a bisa, no tabatin masha publikashon tokante e historia di e kaya akí. Pero di e tiki ku mi a haña den mi búskeda, i loke ku mi a haña ta: un asesinato di un hóben Emilio Rodriguez, ku tabata traha riba un tènker i ku un señora di bida lo a mata. Tambe tabatin diferente kandela maltrato i bringamentu.

Den “Curacaoensia – Folkloristische aantekeningen over Curacao door pater Brenneker, tin riba página 73 na number 290: Hanchi Moordenaar
“Ofschoon moordenaar in het papiaments bordugo betekent of iemand cu ta mata hende, is de Passaatstraat in de mond van iedereen bekend als Hanchi Moordenaar. Daar is eens een zekere Lou de portugees vermoord”.

Tambe den Sambumbu di den Amigoe di 8 di yüni 1978 tin e siguiente sita:
“Moordenaarstraat den aña 1919 tabata apénas 1 meter hanchu i ku segun presupuesto di 1920 nan lo a bai hancha e kaya akí”.

Otro notisianan ku sí bo ta haña tokante Moordenaarstraat ta ku e tabata hopi, pero hopi sushi i a-higiéniko. Lesa a pidi akí den Amigoe di 2 di novèmber 1929.

Por último mi no por kaba di komprondé kon un nòmber asin’aki, por tabata un nòmber di un kaya den mi sentro di siudat, i tòg tabata asin’aki, paso finalmente den mei 1930 gobièrnu ofishalmente a kambia e nòmber akí den Passaatstraat.