¹Sapaté, na bo sapatu! Reginald RömerDen pasado, pa hopi aña, e sneiru/kosedó tabata un persona importante den nos komunidat. E no tabata djis un hende ku tabata kose paña, ma un artista ku tabata traha ku su mannan. E tabata traha paña presis, ku tabata sinta bon na kurpa, i ku tela di mihó kalidat, ku tabata keda masha bunita.

Awe, e profeshon aki a keda rechasá pa e produkshon masal di paña i pa motibu di kosto mas abou. A kambia paña ku tabata dura bida largu, pa paña ku ta benta afó despues di algun biaha di uso. Ku esei, e ofishi di sneiru/kosedó a bira un ofishi di pasado.

Ta algu hopi remarkabel, paso ora bo ta hasi investigashon di bo palu genealógiko (genealogia), òf esun di otro famia bieu, hopi biaha bo ta topa pa e parti di profeshon di bo antepasadonan ku sneiru òf kosedó. Esaki ta mustra kon e profeshon aki tabata asina sentral i importante den nos sosiedat den pasado.

Mi rekuerdonan ta di den Otrobanda, ku tabatin diferente kosedó i sneiru. Laga mi kuminsá na atmití ku mi no sa pakiko tabata hasi distinshon entre kosedó i sneiru/sastre, ku esun tabata kose pa hende muhé, miéntras ku sneiru/sastre ta kose pa hende hòmber. Tur dos tabata i ta kose.

Den Otrobanda tabata biba Ma Dèdè, Adelaida Gressman-Maduro, ku tabata un tremendo kosedó, ku asta nan tabata konsiderá Ma Dèdè un artista den su profeshon.Tempu Ma Dèdè su ten, mayoria di hende ku plaka tabatin nan kòki, labadera, yaya di yu i tambe nan kosedó privá. Ma Dèdè tabatin hopi kliente. Nan tabata yam’é “kosedó di hudiu”. Den “kosedó Dos Be”, den e revista Independiente, Sra Shirley Henriquez-Hanst a skirbi di Ma Dèdè, ku tabata un señora venezolano ku tabata biba banda di misa di Santa Ana i a siña Ma Dèdè e profeshon aki. Bo por a siña pa sneiru e tempu ei, na skol na Skèrpènè. Ma Dèdè tabata konta: “mester a pas dos be, un be ora e bistí tabata ireig i un be ora e tabata tur kla. E kliente mester a trese mitar plaka ora e bin pas pa di promé bes. E ora ei por a piki tur sorto di fout na e paña. E kosedó ku su santu pasenshi di eksperto tabata kambia, hisa, baha, fenetá, reig, skucha tur keho i purba kumpli ku tur deseo”.

Modèl pa paña nobo nan tabata saka for di figurin(komo mucha mi a wak e buki diki ei na kas na dos okashon, i esei tabata pa kasamentu di mi dos rumannan muhé, i mester a saka kua modèl nan ta skohé) i no tabatin kuenta di kose ku patronchi. Ma Dèdè a yega di kose paña pa hende hòmber tambe, pero e no tabata gusta esei.

Di otro banda Tan (Dorothea) Tea tabata un señora balente, ku kabei manera bòl di katuna blanku riba su kabes. Un persona ku mi a konosé, agradabel i kariñoso. Tan Tea a yega di puntra un señora: ”Ta yu di hende riku mi yu ta, ku mi yu no sa kose”? Pa Tan Tea tur pober mester por manehá angua ku hilu. Tan Tea a traha aña aden aña afó durante hopi tempu pa lanta 7 yu, ku tabata i ta personanan desente i bon pará den nos komunidat. Muhénan manera Tan Tea ta skars awendia. Dorothea a bai skol di kose for di su di 9 aña serka su propio ruman, Mai Ia. Su promé tarea tabata kose teduki, pa siña manda mashin i kose règt. Ku su 18 aña ya Tan Tea tabata kose pa hende. Tan Tea, kontrali na Ma Dèdè a bai wenkel di sneiru serka Bas Pipi. Tan Tea ta kòrda ku kasi tur wenkel tabata den Otrobanda. Tan Tea tabata konosé un “sneiru” muhé, Mercelita Baloriano.

Ranka di pampuna no sa pari kalbas.

Tan Tea tabatin dos yu muhé ku tabata kose fini i bunita miéntras un di su yu hòmbernan ta sneiru. Pa siman Tan Tea tabata gana 35 florin i si bo saka bo sòm esei ta 140 florin pa luna. Ku e sèn aki Tan Tea a kria su 7 yunan, ku nunka no a sinti falta di nada. Ni di un tiki kuminda, ni di un dak riba nan kabes, ni di loke ta mas importante  ku tur kos, e amor i atenshon di un mama ku a sa di hiba un bida di trabou i sakrifisio. Un ehèmpel pa nos mamanan di awe i di futuro.

Na 1986 Akademia di Arte a habri su porta den Otrobanda i despues di tempu a muda pa Windstraat. Mi ta kòrda ku Carlos Soliano, tabata esun enkargá ku e instituto. E intenshon tabata, pa duna tur hóben, pero tambe hende mayó, ku kapasidat, talento i kreatividat i smak pa sigui riba e tereno di moda. Nan tabata haña e oportunidat pa un formashon básiko den tur materia ku tin di aber ku moda; desaroyando nan kreatividat i talento na un manera optimal. E estudio tabatin un durashon di 2 aña.

Den e promé aña tabatin materianan spesialisá, ku ta enserá diseño di piesa di bisti kompleto i tambe ehekushon di proyektonan di moda i temanan spesial. Tabatin materianan di konosementu básiko manera: diseño, “styling”, pintamentu di patronchi, moulage (drapea paña na kurpa di manikin o modelo bibu), historia di moda, konosementu di tèkstil, pintamentu di modèl, trahamentu di sombré etcetera.

Den di dos aña e studiante tabata haña algun materia mas manera: makiahe i drechamentu di kabei. E di dos aña tabata mas dirigí riba e konsepto “forma den industria” i studiantenan tabata haña informashon riba “Fashion Marketing”, esta merkadeo di moda. Bo mes por a ripará ku no tabatin atenshon solamente riba kosementu.

Promé ku esaki tantu Ma Dèdè i Tan Tea ta hendenan ku a siña kosé serka otro hende, kisas famia ku a traspasá e konosementu i no tabatin tantu skol, siñansa speshal, pa a siña nan arte di kosementu. Yudá e tempu ei pa e mashin di man, esun di trapa (Singer ku tabatin su tienda grandi kaminda La Prensa tabata den Mundu Nobo) i despues esun eléktriko, Singer, Brother i Bernina(ku te ainda tin presensia akí na Kòrsou). Tòg den sierto manera esaki ta un muestra, ku Kòrsou su hendenan tabata gusta kose, i e mashin pretu, esun klásiko tabata presente den kas di hopi di nos.

Un diferensia grandi e tempu ei tabata ku bo no tabata haña publikashon/aviso di kosedónan ku tabatin nan negoshi. Kosedónan tabata konosí den bario i nan fama tabata kore di boka pa boka. Siendo ku na Kòrsou nos tabata konosé diferente negoshi di sneiru i den archivonan tabatin diferente aviso di negoshi di sneiru i di aviso ku tabata buska sneiru.
Te ainda tin diferente kosedó ku ta traha na kas i ku tin basta kliente i awor nos tin sneiru ta bin djafó pa kose pa hòmbernan.

Toen het kermis bij de snijders was in ‘t huisje bij de brug, toen aten zij met tachtig, Ja acht maal acht en tachtig van een gebakken mug.