Nabegashon
Den un seri di dos artíkulo mi ta atendé un tiki ku historia di nabegashon Boneriano.
Mi no ta komprondé, kon te awe no tin un buki skibí tokante nabegashon di Boneiru. Den mi afan pa buska algun informashon/detaye di Niagara mi a bin haña masha hopi informashon, di un kantidat sin presedente di barku/boto/bapor Boneriano.
Un historia riku di konstrukshon di barku, di haf di Boneiru, nabegashon i hòmbernan ku nan bida tabata laman. Mi ta kere ku esun ku tuma e tarea akí, di skibi un buki lo dura sigur algun aña pa hasi esaki.
Danki Dios a duna algun kaya den barionan di Nikiboko i Tera Kòrá, nòmber di algun barku i kapitan ku a traha nòmber riba tereno di nabegashon.
Mi a haña un sin fin di nòmber di kapitan i di barku di Boneiru, trahá na Boneiru òf ku tabata nabegá di Boneiru entre islanan: Antonio Neuman – Herman Pop – Felipe Clarinda – Lucas Wout – Kachi Craane – Yòmbi Marchena –Jerry Newton – Emilio Booi – Wawa Debrot i barkunan manera Endeavour – Niagara – Ronnie – Isidel I+II+III – Debbie I+II- Fedalma – Ruth – Flora – Lourdes – Flora – Rex – India – Sirena – Dialma – America – Diana – Foca – Con Brio – Mississippi – Proud i hopi mas.
Ami lo kontentá mi ku simplemente duna algu di e historia riku akí di Boneiru/Bonerianonan i nan amor pa laman, i esaki klaro relashoná ku Kòrsou. Kuantu di nos, no a bai keiru Boneiru riba Niagara, pagando 25 florin, bai bin?
Niagara
Segun un artíkulo di Bòi Antoin, Boneiru a konosé dos barku ku e nòmber Niagara. Ámbos barku tabata di e mesun doño, esta Alejandro (Yòmbi) Marchena. E promé Niagara tabata un barku trahá na Boneiru, miéntras e otro barku Niagara, un barku di motor, tabata trahá na Cayman Islands riba enkargo di Gobièrnu Ingles.
Dia 27 di febrüari 1958 e barku a drenta bahia di Kralendijk den oranan di atardi. E kompra di Niagara a resultá un bon dil, konsiderando ku Niagara a bira é medio di transporte di pasahero via laman den dékada sesenta. A duna e bapor aki e nòmber Niagara, komo honor na e golèt Niagara di Yòmbi Marchena.
Niagara a bira asina konosí ku te asta a habri un ofisina na Kòrsou, den Skalo, i na Oranjestad Aruba na unda pasaheronan di e islanan ei por a kumpra pasashi òf pa manda karga Boneiru.
Iterinario
Tur djadumingu Niagara tabata sali for di Boneiru pa Kòrsou. Na promé instante tabata sali pa nueb’or di mainta pa yega tra’i mèrdia. Despues a kuminsá sali pa un’or di mèrdia, pa yega Kòrsou den kareda di sink’or pa seis’or di atardi.
Niagara tabata keda Kòrsou te djaluna mainta, despues di kua e tabata sali pa Aruba ku tantu pasahero komo karga. Tabatin un merkado hopi bon di transporte di karga den e periodo ei entre Kòrsou i Aruba, loke tabata enserá ku tin bia Niagara tabata tira dos biahe pa siman pa hiba karga Aruba.
Niagara tabata e promé barku òf bapor ekipá spesialmente pa transportá pasahero.Promé ku Niagara a bini, no tabatin niun barku ku stulnan spesial pa transporte di pasahero.Pasaheronan mester a buska un lugá pa sinta riba dèk di e barkunan di bela i tambe motor aki. Si nan tabatin bon relashon ku kapitan di un barku asina, esaki por a fasilitá su kama pa nan drumi.
Den e piso ariba di Niagara tabatin un kantidat basta grandi di stul, na unda pasaheronan por a sinta kómodamente, komo si fuera nan tabata den avion. Tambe tabatin WC na bordo.
E fasilidat i komodidat aki a pone ku Niagara a bira famoso komo un barku ku kua tabata organisá ekskurshon pa Boneiru. Pasashi entre Kòrsou i Boneiru tabata kosta 25 florin ida i buèlta.
Na momentu ku tabatin ekskurshonnan ku Niagara, e doñonan di e barku tabata haña un pèrmit spesial. Diferente banda musikal, timnan di futbòl, beisbòl, patfender, Jongewacht tabata biaha ku Niagara pa Boneiru i Aruba. Niagara a nabegá tur tempu sin aksidente òf insidente grandi. Un bia a surgi un kandela den un biahe di Aruba pa Kòrsou, pero a logra paga e kandela aki rápidamente.
Despues di e morto di Yòmbi Marchena, su yu hòmber Nilo a keda atendé ku Niagara. Pero e no a sigui traha hopi mas ku Niagara. El a bende Niagara na Colombia. Despues el a sali for di un di e hafnan na kosta nort di Colombia, sin nunka regresá. El a senk. Asina a yega fin na un barku ku a hunga un papel importante den historia di Aruba, Boneiru i Kòrsou. Nilo Marchena, despues ku el a bende Niagara, a kumpra e barku “Con Brio”, ku sinembargo no por a yena nunka e bashí ku Niagara a laga tras. “Con Brio” tabata un barku di karga ku tabata kana, kontrario na loke su nòmber ta bisa, mashá pokopoko riba laman. Despues di tempu “Con Brio” tabata menshoná den un skandal grandi na Ecuador. Nabegashon tabata un ardu mayó pa Boneiru.
Salvo algun insidente chikí, (barku Sta. Rosa ta dal den Niagara pará den haf, Niagara ta dal den ponton di Emmabrug) no tabatin kasonan serio ku aksidente riba laman ets. Den korant Amigoe mi a lesa dia 23 yüni 1965, ku 8 persona ku tabata a bordo di e barku Ronnie ta yega tera na Aruba despues ku un dia promé e barku a senk dilanti kosta di Aruba. Den mesun aña tabatin un desgrasia fatal tambe riba e barku Hertha.
Den e siguiente edishon di Laman ta duna i Laman ta tuma, nos lo sigui ku mas riba e tópiko akí.
Percy, nan no a menshona bo e bark ‘i bela Miss Boneiru di famia di Popo i John Engelhard. Tabata un barku di 2 òf ta tres master. Komo mucha mi a mir’e hopi aña mará patrasbanda di aFort Nassau. Mi a nse i lanta den e parti di Fleur di Marie ku nan tabata yama Den Boneiru. Popo Engelharh tabata nos bisiña.
Max tabatin mas barku ku mi no a menshoná, pesei mi a pone den e promé artíkulo, ku mester di un research hopi profundo pa skibi e buki ei di historia di nabegashon Boneriano! Danki pa bo aporte.
Sr Pinedo check ku Francois Van der Hoeven di e grupo di trabou di NAAM tokante un barku di palu bonoreano ku nan kier a restoura.
Masha danki, will do
Percy, den e lista falta tambe e ferry Almirante Luis Brion i e ferry di un hulandes na Boneiru.
Don Franso, kapitulo 2 ta na kaminda! Keda pendiente
E artikulo nr1 aki ya tin basta ingredìente pa un buki kaba.
Percy mi ta ripití: trabou hopi grandi.
Pietje abo por sa. Danki pa lesa i opiná
Hopi interesante.Bale la pena mas di e tipo di info asina aki.
Orville ths pa lesa, ku bida i salú ta sigui mas
Percy, tambe tabatin un barku ku yama “Stormvogel” di Martins Felida si mi no ta kibuka. Nan tabata yama e doño i kapitan Martins Stormvogel. E barku aki te algun aña pasá tabata mará den haf di Caracasbaai. Despues un grupo a sak’e bai Boneiru kune pa restourashon i konservashon. Segun mi, tin un Antillean Navigator ku su historia den dje. Ami no tin’e mas si. Si mi haña algun info mas, mi ta manda pa’bo.
Donny si bo por haña esaki, lo mi apresiá sigur. Masha danki
Pipo hopi bon tempo.mi prome salaris ku mi a kobra mi a bai Boneiro na anja 1967 ku grupo di padvinder swinging Scouts fls 25 mi a keda na hotel Roseline na playa.Nos a bai diabierna mainta i bini dialuna mainta.Niagara tabata nabega bon.Hopi bon.
Danki pa lesa i komentá
NABEGASHON.
Percy kon ta bai.? Hopi interesante e artikulo ta.
Mi ta bai agregá algu di mi parti;
Mi prome biaha pa Kòrsou i Aruba tabata ku Niagara di Bela(1958).
Den kuminsamentu di dekada ’60 mi a nabega komo mashinist na bordo.
Di entre otro;
> Ms. Debbie
> Ms. Niagara
> Ms. Ronnie
Tokante e kandela ku a surgi na bordo di Ms. Niagara, nos tabata bayendo Kòrsou for di Aruba (1964).
Nos a pasa kabes di Aruba kaba. Mi tabata mashinist di warda.
Banda di 1or di marduga tur kos tabata ok den mashinkamer.
Tabatin 1 pasahero so na bordo. Diripiente e mener aki blo riba mi morto spanta.
Ela bisa mi ku tin kadela dilanti di e departamentu di pasahero.
Rapido mi a yega ariba i kohe e fummike i supla e boter i hasi’e bashí.
E kandela no a paga kompletu. Mi a bolbe bai abou den mashinkamer, bin ku un otro fummike i kaba paga e kandela.
Mi no sa kiko lo a pasa si e pasahero no tabata tei?
Fummike nan tabata yama aparato di paga kandela. Aventura i nostalgia. Riba laman semper tin aventura.
Sr Damascus masha danki pa bo aporte na e pida historia akí. Huntu nos ta kompletá nos historia. masha danki
Petcy konta bo ta pone mi kordae prome ku.mi a bai Bonaire tabata ku India mi ta tin 14 aña m.o.m.
E kapitan di India tsbata Buchi Soleana tuman di mi wela Petronolia Soleana miho k.onosi komo Nia di kura di shon fielanto semper ora India ta na Korsou mi tabata bai sinta na barku serka nan dilanti di duana gebouw anto fakantienan a bisa mi.ban ku nan Bonaire mi a keda 2 dia ta nabega riba tera prome ku.mi a bira normal atrobe pero e tabsta un dushi aventura nan tabata biba na Antiriol pega ku misa buchi tabata un homber largu kasi 2 meter huma masha hopi mes su yu homber ku ta yama
Boeboei ku a tuma over despues e barku a stop di nabega Boeboei a muri.un par di pasa
Danki pa bo aporte
Intetesante mi ta bai pase pa mi ruman nan.
Danki pa bo bon trabow
Sigur pa motibu di famia Pop!
Pipoo, lesando hinter e artikel ku un plaser i sonrisa riba mi kara. Bon nostalgia. Historia ta esensial pa rekorda i mira kon tur kos ta kambia.
Elco mi tambe a biaha ku Niagara, hopi dushi rekuerdo