Den edishonnan anterior, mi a skibi di Seter, Credit Union i Sam. Den e organisashonnan akí e asuntu di invertí sèn i fia sèn ta algu komun i koriente. “Shon fia” ta hopi konosí na Kòrsou i tin basta mal fama. Nos ta kumpra i nos lo paga un dia. Esnan mihó organisá ta hunga SAM òf ta(a) afiliá na un Credit Union, pa na ora di risibimentu,kasamentu ets., tin algu den banda pa kubri e gastunan.I esnan ku no ta afiliá ta bai hinka kurpa den debe dor di asosiá ku “Shon Fia”. I tin hende ku ta keda añanan largu den problema pa motibu di esaki. Esun ku realmente ta keda den problema ta e doño di negoshi/toko ku ta esun ku ta keda ku debe. Ami sa di negoshinan chikí ku mester a sera nan porta, pa motibu di mal pagadó, ku a laga debe astronómiko atras. Pa straño ku ta parse, e komersiantenan akí tabatin miedu di pone preshon, mi no sa kisas pa miedu pa pèrdè kliente. Anto mi ta puntra: kiko mi tin na un kliente ku no ta paga.

Mi ta kòrda dia mi yega Ulanda i e promé aña na Ulanda, bo tabata haña tur kaminda tabata hasi propaganda pa kumpra kos i paga poko poko. Bo por a kumpra na Wehkamp – Neckerman i Lekturama entre otro. Na Kòrsou mi no tabata konosé e sistema akí i klaro ku tentashon tabata grandi i mi tambe a hasi uso di e sistema akí i mester a kumpli kabalmente ku pago, sino ta bin buska e merkansia bèk, òf tabata pone beslag.

Un temporada na Kòrsou, e nòmber mas kotisá, mas stimá tabata Shon Fia. Maske kuantu nos por bisa i kere ku Shon Fia a muri, ami ta deklará ku Shon Fia ta mas bibu ku nunka, i bon bon di salú, kisas via di un otro sistema, “Bòn(t)” òf via di un lugá ku ta duna fiansa. I bo ta haña esaki tur kaminda, den pakusnan grandi, den bar restorant, na barberia. E kustumber akí ta asina general i inherente na nos sistema, ku bo ta haña esaki den kasi tur kategoria na Kòrsou. Kere mi ku mi no por imaginá mi Kòrsou sin Shon Fia i ku diferente yu di Kòrsou ta famia di Shon Fia.

Bibando den Mundu Nobo, den kas di gobièrnu, nos kas na Piscaderaweg 33 tabata pegá pegá ku kas di famia Brazil, Piscaderaweg 31. Kuantu biaha nos no a para na kura di otro i pidi otro fia un tiki suku, salu, zeta, ets ets.
Mi tempu di Kortijnweg 38, mi tabata bai tienda di Pedjen, tienda di bentana i bai tuma diferente kos i úniko kos ku Pedjen tabata hasi ta, di nota loke mi a tuma, paso despues, Tan Lu mi wela òf Madushi mi tanta ta bai paga.

Banda di esaki, diferente hende tabata hasi negoshi, dor di bai Venezuela, bai kumpra artemurano, oro, prenda i diferente otro kos i bin bende esakinan kas pa kas. I klaro, aki tambe ta kumpra i paga poko poko. Despues tabata Arabirnan ku ta bende kos (vas, olifante, tapeit, ets.) kas pa kas i tambe tabata bende segun e sistema di paga poko poko. Problema di e kumpramentu di kos aki tabata, ku hopi biaha tabata kumpra kos, ku no nesesariamente bo ta tin mester i e famia tabata hinka su mes den problema finansiero inesesariamente.

Semper kumpramentu, ora tin kondishonnan fásil ta atraé hende pa kumpra i asta kumpra kosnan ku na e momentu ei no ta asina nesesario, pero ku hende ta deseá di tin. Anto bendedónan ku konosé mentalidat di pueblo ta splika bo, ku bo por paga pa siman, kinsena, pa luna ets. Ta masha hopi kaso tin, di kompranan ku a bai robes, i di hendenan ku no por a kumpli. Hasta esnan ku a kumpra, usando nan kabes, akseptando kondishonnan di pago, hasta ku nan kosnan por bai robes, malesa, gastu imprevisto, redukshon di salario ets.

Aki ta hunga un ròl, ken ta e komersiante ku bo debe, paso si ta hende di bon kurason, e por akseptá un pago mas abou òf por a laga bo dura un tiki mas largu pa kaba di paga. Pero hopi tambe ta e kasonan, kaminda bo no por paga, nan ta eksigí bo entregá e merkansia ku bo a kumpra bèk, sin haña e sèn ku bo a paga kaba, bèk.

Kasonan kaminda e bendedó a sali perhudiká tambe ta konosí, nan ta aktua di buena fe i e kumpradó ta keda sin paga i asta ta rebendé e produkto òf ta lòt e produkto, sin paga e bendedó su sèn.

Ántes no ta tin kuenta di firma un akuerdo di kompra, ta ku boka bo ta yega na un akuerdo i ta skibi loke bo debe riba un karchi i kada biaha ku bo paga, ta nota esaki. Pero “mal pagadó”a pone ku bendedó tambe a bira mas sabi i tabata pone kondishonnan mas skèrpi.
Bo ta kòrda bòrchi ku tabata bisa: Shon Fia a muri, mal pagadó a mat’e? Loke “Shon Fia” a introdusí ta, ku esnan ku no por a kumpra algu i paga mesora, maske pa un ratu ta kontentá nan mes ku e produkto i a pusha diferente hende bai biba riba nan nivel di bida.

Den e buki: Shon We Evertsz: Handelaar in Otrobanda di Rose Mary Allen, Shon We ta splika su eksperensia ku fiamentu di kos: “Mi tabata hasi esei den mi lugá. E ta papia su deseo, sea bèrdat òf no bèrdat, e ta haña kos fia. No esei so, pero sèn tambe. E por kumpli un biaha, pero despues ku e bira mas tantu, e ta floha. Mi no tabata registrá ku el a fia. Ora nan primintí di trese plaka, no tabatin doló di kabes ku skibimentu. No tabata hopi hende, bo ta retené den bo kabes, no ta muchu tampoko”.El a trata di splika su eksperensia, dor di pone mensahenan skibí riba karton, entre otro: “Kredit ta kria enemistat”  i tambe: “Shon Fia a muri”.

Kòrsou a sigui den gara di fiamentu di tur kos, i sistemanan manera Sam a lanta kabes mas i mas, Credit Union tambe a krese enormemente i entre otro pastor Nooijen, pastor Römer i Jules Rojer tabata enkurashá hendenan pa bira miembro di Credit Union pa spar i pa yuda otro, pero si bo bira miembro djis pa fia sèn, kos ta brua.

Bòn(t)

Bon mirá, ta esnan ku no ta bin na remarke pa por hasi un fiansa na banko òf otro instansia, ta nèt nan ta esnan ku ta “probechá” di e sistema di Shon Fia. Final di dékada 80 i sigur den dékada 90, fiamentu ku “bòn(t)” ( e sistema nobo di fia) tabata algu espantoso. No ku e no tei mas, pero segun mi ménos.

Den 1994 un komishon a skibi e rapòrt ‘Werk aan de Winkel’, i a konstatá ku pa luna tabatin 7 mion florin ta drei den e negoshi di “bòn(t)” i ku doñonan di “bòn(t)”tabatin interes di 200 porshento. Drs. Chos Romero a bisa e tempu ei, ku e tabata balotá,ku tabatin mas o ménos 80 mion enbolbí pa aña ku e sistema di “bòn(t)”.

Un último sifra ku mi tin relashoná ku “Shon Fia” ta dat di novèmber 1989, ku` tabatin un montante di 147 mion na fiansa na banko i/òf otro instituto di fiansa di nos hendenan. I e institutonan akí, tambe ta hasi bon ganashi, paso nan interes ta di 25 pa 30 porshento. Aki si kosnan ta strak strak regla, ta retené parti di bo salario i den kaso ku esei no por sosodé, ta pone beslag.

Kredit ta krea enemistat ; Awe no ta fia, mañan si, Awe ta bende, mañan ta fia, trata tur, ma no konfia ni un; dichonan ku bo tabata haña ántes hopi den tienda, barberia ets, nan tabata purba wanta i tene Shon Fia afó. Pero kere mi Shon Fia no a muri, e ta bibu bibu i ta tur kaminda, i awor asta digital.