Den nos edishon di “ Plaka ta manda mundu” nos a papia di nos dependensia di Venezuela den pasado, pa motibu di diferente loteria. Esaki tabata un aktividat kaminda tantu hende muhé komo hòmber tabata praktiká, ounke ku hende muhé tabata den mayoria. Nos tabatin otro aktividat ilegal for di Venezuela, kaminda hende hòmber tabata den mayoria. E deporte mes no tabata ilegal, manera e pustamentu riba e deporte akí. Mi ta referí na kareda di kabai, konosí komo 5 i 6.

Tur siman, riba djasabra i djadumingu i tin biaha for di riba djaweps, Venezuela su kareda di kabai tabata dominá nos wikènt na Kòrsou. Mester distinguí dos kos masha importante pa loke ta trata 5 i 6. E deporte ku tabata yega Kòrsou via di radio, riba dia ku no ta transmití esaki na televishon, i den wikènt na televishon i amantenan di hipismo tabata sigui e karedanan den tur nan splendor. Mas ainda tabatin naradó, ku tabata duna e karedanan mas zjeitu. Ken no ta kòrda Mr Chips, Blas Federico Jiménez, Virgilio Decán, òf manera e tabata konosí pa nos: Ali Kahn. Un señor naradó di kareda di kabai i te awe, esnan ku sa, ainda ta disfrutá di su grabashonnan ku ta riba Youtube. Transmishon na radio: Monitor Hípiko Radio i despues Monitor 590 ku Hector Alonso Rivas i Aly Khan (desde la bola Continental).

Buki i Kuadro!

Nos tabatin nos ritual pa loke ta trata 5 i 6. Tempran den siman, bo buki ku informashon di kareda kabai ta yega Kòrsou i den diferente bario tabatin diferente hende tabata bende e bukinan, bende kuadro, seya kuadro i hiba kuadronan Venezuela, pa bo por partisipá aki na Kòrsou na e wega ilegal akí. Den Mundu Nobo nos tabatin Cola (konosí pa nos komo Cola surdu) i Franky Matheu. Den otro barionan tabatin otro hende. Mi ta kòrda riba Nelson Rosales, ku su tata tabata un di e proménan den e mundu di kareda di kabai, ku tabata bula bai Venezuela, bai sea kuadro i tambe bai buska buki di kareda i tabata un distribuidor pa diferente lugá na Kòrsou, kaminda tabata bende buki i kuadro. Nan tabata sòru pa djamars bo tabatin bo buki, sea bo Gaceta Hipica òf bo Fusta. Si nan no trese esaki pa bo, bo por a haña bo buki den Otrobanda na Cornes òf el Chico den Punda. Bo tabatin mester di bo buki, pa bo wak kua kabai ta kore ki ora i kua preparadó i djòki ta den akshon. Bo tabata bai skol ku bo buki di kabai, pa diskutí ku bo amigunan e próksimo karedanan. Nos tabata konosí ku delaster un ekspreshon den mundu di hipismo: Batakaso (kabai ku bo no a spera ku ta gana) fiho (kabai ku no por pèrdè), final de fotografia (mester bai studia wak potrèt i ripitishon, pa sa ta kua kabai a gana). Skucha òf wak kareda tabata un delisia i mas ainda si bo por a sigui e kareda den bos di Ali Kahn.

Remate!

Fuera ku bo por a traha bo kuadro (ku tabata ilegal) na Kòrsou den tur bario bo por a pusta tambe riba kabai. (remate). Esaki tabata bai den forma siguiente: promé ku kareda kore,  bo por kue un kabai ku bo ta kere ta gana i bo mester paga sierto montante p’e. Klaro ku esun ku paga mas tantu ta bira doño di e kabai pa e kareda ei. Tin formamentu di “pool”, kaminda dos òf persona por sera kabes i kumpra e kabai, garantisando ku otronan no por haña e kabai. E remate aki tabata tuma lugá den diferente bario, den un bar, na un kas di un siudadano, òf bou di palu. Remate tabata super popular i tur hende tabata sa ku tabatin remate, i te ainda tin remate, i na unda esaki ta tuma lugá. Algun lugá konosí tabata bou di palu den Saliñastraat/Lindberghweg, patras den restorant di un konosido rifero i dilanti vèlt na Mundu Nobo.

E otro parti tabata, ku bo por a seya bo kuadro, partisipando den wega na Venezuela.  E hendenan serka ken bo tabata kumpra bo buki, tabata seya bo kuadro tambe; bo ta kumpra bo kuadro (e tempu ei bolívar tabata 50 sèn). Bo ta traha bo kuadro i kuminsando for di 4 bolívar, 8 ,12 ,16, etc. Ora mi papia por ehèmpel di 4 bolívar, ta 6 kabai so bo por a hunga, ku ta un kabai pa kareda. Si bo tabatin idea di mas kabai den un kareda, bo por pusta esei, pero esei ta hasi bo kuadro mas karu. Atrobe, tur hende tabata sa ku seya kuadro tabata ilegal, pero tur kaminda rònt Kòrsou esaki tabata sosodé bou di bista di outoridat. Hopi biaha a papia di e ilegalidat akí, pero nunka a hasi nada kontra di esaki.  Na algun okashon a kue un òf dos persona ku tabata bai seya kuadro, pero nunka mas no a hasi nada kontra di esaki. Tabatin diferente hende ku a yega di saka 6 òf 5 kabai i a haña un bon boká. Nos tur ta kòrda historia di “Jan Kabai” ku a gana un bon sèn, pero a pèrdè esaki masha lihé atrobe. Ami tambe tabatin e suerte di a saka 6 kabai i pa e tempu ei (1973) tabata un bon boká, ku mi mester a parti ku un mucha hòmber hopi yòn e tempu ei.

Komo deporte nos tabata sigui kareda di kabai i nos tabata simpatisá djòkinan, preparadornan i klaro e kabainan mes tambe. Nòmbernan konosí manera: Walter Carrion, Balsamino Moreira, Gustavo “El Monstruo” Avila, Jose Luis Vargas, Adone Belardi. Juan Eduardo “El Negro“ Cruz, Raul Bustamente i klaro “Don tumba Pool” Teofilo Tosta. Despues a bin tempu di Angel Francisco Parra, Juan Vicente Tovar i demas.
Preparadornan popular di e tempu ei: Domingo Noguera Mora; Millard Faries Ziadie” El Musiu” i rumannan Azpurua (Manuel i Eduardo).

Di otro banda Kòrsou tabatin partisipashon real tambe den karedanan den la Rinconada i mas ku un biaha tabatin un kareda klásiko dediká na Kòrsou, manera “Premio Camara de Comercio Curacao”, kaminda e tempu ei presidente di Kámara di Komersio Sr. Jacques Jonkhout(1978) a partisipá na nòmber di Kòrsou na Venezuela. Sr. Jacques Jonkhout mes tabata un gran amante di 5 i 6 di la Rinconada i tabata skirbi tur siman tokante di 5 i 6 den Amigoe di Kòrsou (Wat zal het miljoenenspel ons a.s. zondag brengen).

Doño di kabai i djòki kurasoleño

I no por tabata otro tampoko, nos tabatin doño di kabai kurasoleño ku nan kabai a partisipá na Venezuela i a gana diferente biaha tambe: Kabai di Rolly Perret Gentil, Aldo de Luca, Chando Dou, Tony Halabi, Axton Bronswinkel, Eric Kleinmoedig i otronan.

Por último, nos djòkinan tambe a yega di kore den La Rinconada, pero mi no ta kòrda ku nan a yega di gana den La Rinconada: Shelly Ignacio (yu di Stanley Ignacio), Edsel “Kòrá” Plaate i Randel Victoria. Nos tabata hopi metí den hipismo Venezolano. I klaro, esaki a pone ku nos a bira shete loko un belá i a hasi  i te ainda ta hasi todo por todo pa trese hipismo Kòrsou.

Bastante kontratempu den pasado i te ainda a pone ku e plan aki ainda no kier kristalisá. Pero esaki ta bira otro kapítulo.