Na Kòrsou nos ta gusta “kasa plaka”(pusta plaka) Sapaté, na bo sapatu! – Reginald V. Römer.
Kòrsou tabatin un relashon “komersial” masha apart ku Venezuela. Diariamente nos tabata ligá i en espera di notisia for di Venezuela. Di djaluna pa djaluna. Igual ku mayoria di otro pueblo nos tambe gusta purba nos suerte, i si no ta tur dia, maske ta djadumingu òf fin di luna nos ta riska nos heldu. Masha hopi hende ta gana nan pan di kada dia ku bendementu di number i otro nan tabata gana òf drecha nan nan entrada bendiendo karchi òf saka un papel bai sait. Na tur kantor di gobièrnu tin hendenan ku ta “parti nan karchinan” pa fin di luna tan pronto ku un luna nobo kuminsá. I klaro ku tabatin i te ainda tin e “big wheel” den e lukrativo forma di entrada ku bendementu di number. Esaki ta un bisio ku ya no por sali mas di nos pueblo. Pero wega di number ta sigui gewon i ni maske gobièrnu a lanta Wega di Number Kòrsou, loteria ilegal a sigui mesun kos. No for di Venezuela ni Santo Domingo so, pero awor mas serka di kas, di Aruba Boneiru i St. Maarten.
Laga nos ta franko, korant i radio a kuminsá publiká numbernan ilegal ku sali i tabata rekomendá kua number (liña) ta sali i Ced Ride den su kansion ta kombidá tur hende “ban Punda” pa band’i marshe nos por kumpra number. Tur polis konosé tur bendedó di number. Ningun polis no ta kèns ni e bendedó di number tampoko ta kèns.
Desaroyo wega di number!
Na Kòrsou nos tabata konosé wega di number di djaluna pa djaluna. E benta di wega di number tabata den diferente forma. Mi ta kòrda komo mucha den nos kas na Mundu Nobo, kon Djo Pishilingui (Mi no sa su nòmber ofisial te dia djawe) tabata pasa na kas i tabata bende mi mama number, mi mama tabata kumpra su number di kas (33) i su number faborito tabata 55. I Djo tabata puntra mi mama, pone bo “kos” pa bo? Despues mas den siman òf wikènt, Djo tabata pasa kobra. Mi mama tabata paga òf tabata bisa Djo: lag’e bai numa, pasobra awe krus ta bou, indikando ku e no tin sèn pa paga e number i tabata entregá e number(nan) bèk. Por sierto ku Djo Pishilingui tabata un di e riferonan konosí i serio i ora bo number sali bo tabata garantisá di bo sèn. Djo tabata bende number riba papel. Numerá di 00 te 99. Hopi biaha nan no tabata bende 00. Un detaye masha importante tabata, ku e úniko prueba ku mi mama tabatin ta e echo ku el a paga i e prueba ku te tin sierto number, ta solamente Djo Pishilingui tabatin esaki, pasobra e papel ei ta Djo so tabatin.
Seshi (mihó konosí komo Seshi kayon bòm) en kambio tabata bende number pa tersera persona i tabata bende number riba un karchi chikí. Bo por a kumpra e number kompletu pa 1,50, òf bo por a bai baka, kitando un orea di e karchi, indikando ku ta mitar di e karchi so bo a kumpra (Ban baka ku un òf mas hende( Laga nos kumpra un number òf bièchi huntu; si e gana nos lo parti e ganashi (Sapaté, na bo sapatu! Reginald V. Römer). Seshi ta yega nos kas di porta patras, pasobra ta un bisiña bon konosí di nos e ta i ta puntra mi mama: “Elsa, bon ke mi awe? Ta Oriente mi tin, ku ta hunga te lat i bo tin chèns di paga te mas lat”. Òf: Elsa mi tin ko’i mayan, kiko mi pone pa bo?”
Tantu Seshi (wela di Sonny) komo Elsa(mama di Sonny) tabata bisiña di hopi aña di nos den Mundu Nobo i ora nan bin bende number nan tabata kana drenta nos kas, manera ta nan kas nan a yega.
E bendementu di number tabata e tempu ei na kas i bendedónan tabata pasa na kas pa bende i kobra i si a gana pa entregá premio. Ora ku premio kai bo tabata tende mesora e gritu di: “Oh, baka tin sebu ( bo tin moda (hopi plaka)(Sapaté, na bo sapatu! – Reginald V. Romer). E proseso aki tabata un proseso diario, ya ku tur santu dia tabatin otro wega di number, tur di Venezuela – loteria di Caracas – Loteria Zulia – Loteria Maracaibo, Loteria Táchira i Loteria di Oriente. Tur wega tabata hunga den kareda di 8 pa 9or i solamente Oriente tabata hunga den kareda di 10or di anochi. Kasi bo no tabatin kòntròl i ta esnan ku posibilidat di radio i tabata sa e frekuensia por a averiguá kua number a sali. Mayoria biaha tabata wega di number di dos sifra tabatin. Ahan, anto bo por a gana dilanti i patras (back and front). E úniko dia ku bendedó i kumpradó tabata bira shete loko un belá, tabata djadumingu ku wega di Sto. Domingo, ku ta un wega ku tabata riba djadumingu so i tabata hunga de oranan lat di mainta bai kue mèrdia. E wega akí, for di djasabra henter dia, te banda di 11or di mainta djadumingu tabatin Kòrsou den su gara. Na diferente kas, nan tabata skucha resultado via radio.
Tabatin e sistema tambe, ku na boka di trabou bo tabata haña personanan ku tabata bende number riba pakete di fin di aña (ponche krema, kaha di serbes, ham pa herebé, etcetera). Lòt riba muebel, paña di mesa bòrdá i otro artíkulo. Asina diferente hende tabata rondia nan bida.
Despues wega di number a bai un nivel mas haltu, kaminda a kuminsá hunga number di tres i 4 sifra. Bo tabata por a bai kantor di number bai kumpra number i esaki tabata konsistí di bukinan ku tabatin riba un mesa, kaminda bo por a ranka e number deseá i paga esaki serka e persona den ofisina. Premionan a bira mas haltu (mas atraktivo) i number a bira mas karu, pero por a diferensia mas tantu tambe, kumprando number di depchi, dies plaka, un yotin, florin i mas ku’n florin.
Tabata temporada tambe ku yen di kos straño tabata pasa den kompra i benta di number. Numbernan tabata hunga masha straño i e resultado tabata laga hopi hende zonzá. Doble R su komposishon den esaki a papia palabra kla: Wak’ é di tur banda, kaminda nan ta kanta kon 00 tabata sali regularmente i ta riferonan so tabata gana. Kòrsou a drenta despues den un gara di rifa riba outo, i kasi tur fin di luna tabatin lòt riba un outo. Tambe Kòrsou a drenta un drive di rifa kasi tur fin di luna un suma di 100 mil florin. Esaki tabata wega di riferonan mes. Nos no por lubidá “ Radio Hoyer Car Club” kaminda trahadónan a kai será, pa motibu ku delantá algun hende tabata sa kua number lo a sali e anochi.
E siguiente kapítulo tabata lòt riba kas: “ Beautiful Homes”, ku mi no sa na kuantu okashon a rifa e kas i nunka un hende a gana e kas, òf bo a tende ku ta un hende di e famia mes a gana e kas. Tabatin mas kaso di ganamentu di kas i nunka e ganadó a risibí su premio. Kasonan kaminda a lòt outo, sakando potrèt di e outo den showcase i despues tampoko ganadó a risibí su outo.
Miéntras tantu nos a yega na e siguiente nivel. Kaminda rònt Kòrsou tin ofisina di number di 5 pa 6 rifero i ku wega di number ta regulá pa gobièrnu. Esta Wega di number Kòrsou. Pasobra banda di esaki tin, St. Maarten, tin Philipsburg, tin Diario, tin Flamingo tin Super 4, tin Caribeña. Bo tin posibilidat di kumpra Lotto, Powerball, Mega Millions, tur sorto di “ scratch cards” , Fantasy Five, Jackpot, Euro Millions, i Dios sa kuantu otro posibilidat tin riba loteria ilegal aki na Kòrsou. Bai de wei, si bo no a logra kumpra bo number, legal òf ilegal na un di e miles di ofisina di number, chèk bo suerte na e chines pegá ku bo kas, den su toko òf minimarket. Ei tambe bo por kumpra number.
Awe nochi tin tur sorto di wega atrobe, kiko mi pone pa bo?
Bon, laga mi papia manera un yu di un eksbendedó di number, ku a krese den e tempu di 1961 te 1979, kaminda mi tata a bende number riba porta, karchi chikí, i papel chikí ku so su letra.
Pa nos famia, e tempu ei tabata mas ku solamente un benta di number. Tabata un estilo di bida, un kultura ku ta hala henter bario huntu. Mi tata a kominsá ku su boka, despues ku e a tende for di Venezuela kual número a sali. E tempu ey no tabatin radio den tur kas. Pa mi, komo mucha, tabata normal wak hende bini den kas ku un karchi doblegá den man, paga un florin òf dos, i mira ku e karchi e partisá òf kore un orea for di dje pa kumpra “baka”.
E kosnan tabata natural: polis tabata pasa, polis tabata mira, polis tabata sa ken ku ta bende i ken ku ta kumpra, pero ningun hende no tabata wordu molestia. Number tabata pa hende chikí i grandi, hende ku tabata traha i hende ku no tabata traha, hende ku no tabatin otro lus ku speransa ku kisas un dia nan number lo sali i nan lo grita ku “baka tin sebu”.
Pa mi tata, esaki tabata un manera pa yuda henter su famia. E ganashi no tabata grandi semper, pero tabata di dje nos por kumpra pan, suku,paga awa i koriente, paga hur i despues hipotheek òf paga skol.
Na anjanan 70 mi tata a wak e kosnan kambia. Number a bira mas organizá, mas ofisina, mas rifero grandi. Tabata un kos stranjo pa mi tata ku a yega di un sistema chikí ku papel doblá i un stilo di konfiansa, bai na un sistema ku bukinan grandi, rifero ku outo den vitrin, i hasta promesa di kas ku jamas nan no a entregá.
Mi tata siempré tabata bisa: “Number ta pan di hende pober pero number tambe ta un di e trampanan. Si bo no sa para na tempu, number ta kome bo henter bo bida.”
Manera yu di un eksbendedó, mi por bisa ku number a duna nos pueblo masha kos: un speransa, un motibu pa soñá, un manera pa sinti ku sierto dia bo por bai keda riku sin mester kambia bo trabou òf bo bida. Pero number tambe a kosta hopi hende, kosta matrimonio, kosta trabou, i kosta pan riba mesa ku nunka a yega.
Ora mi wak e historia awe, mi a sinti un meskla di orgullo i prekupashon: orgullo pasobra nos pueblo a tene un kultura propio, un sistema ku a kore sin komputer, sin ofisina grandi, solamente riba palabra i konfiansa; prekupashon pasobra te awe nos pueblo no por sali for di dje. Number ta sigui den nos sanger.
Ami lo keda bisa: e tempo di mi tata a mustra mi ku number ta un wega di suerte, pero tambe un refleho di bida na Kòrsou: semper sperando pa un kos mihó, semper kontando ku mañan lo trese un númber nobo.
Tilly mi ta apresiá tur hende su komentario, pero abo mas ku ningun hende riba e tópiko akí. karamba lo ta interesante pa bo skirbi bo tata su historia riba wega di number. Djis pensa esaki!
Tilly, danki!! Ma siña más kos awe! Masha interesante! Sigi skirbi bo tata su istoria manera Percy ta sugerí!!
Percy masha bon mes deskribi i ba bai bek den historia ku hopi no ta para ketu na dje.
Danki pa rekorda mi wela Seshi Kayon Boem. I mi mama.
Pabo semper lo mi keda Sonny. Ke kariño I sintimentunan di semper. Manera nos a lanta i ser kria.
Awor aki bo ta konosí komo Godfried Adem, pero semper bo tabata Sonny pa nos. Saludo pa Tonchi tambe.
Poné mi kòrda ora mi bai keda serka mi tanta. Net promé ku lotería de Tachira, tabata toka Oscar de Leon su hit e tempu ei “lloraras”. Bo sa e ora ei ku resultado ta na kaminda. Di mes después di resultado, ta maldishoná mama di e number nan.
Hopi interesante Percy.
Mashá interesante Percy! Wega di number tambe tin su parti negativo di adikshon i ku a i ta trese hopi problema sosial, enfin kada moneda tin dos kara! Un kordial saludo i un kaluroso i fuerte abraso 👍🏽👊🏽🙅🏽♂️
Great Percy,
Ponemi kòrda Chachi ku su chevrolet pretu ku hel tabata bende number den Dòmi i bisendario. E ta tin mal manera manera ma kompronde ku si bo gana e ta benta e sèn abou p’abo. E tabata bai pela tur siman den Roodeweg i hasi su kabei pretu. Lastima e la kai den wega di droga pa despues bin fayese.
Nos tata tabata “ mordicus” kontra kumpramentu di number. Pero nos Mama si tabata kumpra su katochi ets trankil di dje😂
Nos tambe ta tin un bisiña den bario di Wandomingo ku tabata bende number ku habitante nan di nos bario. Despues mi tabata traha na un banko lokal i ta tin un rifero konosi ku ta tin su kantor kaminda Netto bar ta. Jouw e tabata yama. Si djadumingu hende gana number e tabata bin lanta sèn riba djadumingu na banko (Si na banko🙈servisio total!) pa paga kliente. 😂😂😂
Hopi great Percey
Mi a bai bèk na karchi
Mi wela tbt bende.
Tbt tin hende ku tbt tin number vast.
Hopi dushi tempu
A laga mi kòrda mi tata defuntu kende tur santu dia tabata kumpra number 45, ku bendedónan ku ta bin kas. Ora e mes baha Punda djadumingu, tur rifero tabata rondoné: Dochi, Boeboe Winklaar, Wancho kòrá, Shon Penso, Rolly i hopi mas. Pero e djadumingu ku e yega Punda lat, tur ta kore p’e pa motibu ku nan no por baha nan risiko dor di kumpra nan mes serka otro riferonan pafó di Punda. Negoshi di number sigur a bira parti di nos kultura.
P, mi a lesa ku plaser, korda mi infansia….bendementu di number i lora man tbt den mi famia tambe… tksssss
Wega.
E nòmber mes ta sali advertíbo, Wega di number.
No ta papia di loteria.
Te àwe, Wega di number Kòrsou.
E yui di Kòrsou a lanta krese ku e idea bo tin di purba bo suerte.
Den wega, den e loteria, bo mester partisipá.
Ta asina só, suerte por korda riba bo.
Kompra i benta di number a desaroyá i bira un fuente di entrada pa hopi hende aki na Kòrsou.
Loteria a drenta kasa ku kultura un bes.
Sin kita, sin pone,asta organisashonnan grandi a tuma e systema’ki over.
Aki ” wega ” a bira rifa, pa zona mas serio, mas dèftu den kualke hende su orea.
Otro kos Percy, b’a lagàmi biba parti di mi enfansia ku nòmber manera Seshi kayon bum.
Great pa rekordá