Mi risibimentu, mi Promé Santa Komunion!

Mi a chèk ku diferente otro hende kon nan promé santa komunion a bai, i mi tin e idea ku dia di mi promé santa komunion, esei tabata mas great ku di nan tur.
Tabata promé biaha ku mi a bisti un karson largu, un bachi i hanskun.

E preparashon tabata algu úniko. Mi tabata den klas 5, un tiki grandi den e grupo di muchanan di Mundu Nobo, pa ser eksakto, muchanan di Mgr. Nieuwindt College ku mester a risibí e aña ei. Mi mama mester a bin bei di e gastunan di risibimentu di Poppy mi ruman i mester ta tin tempu pa a hunga su sam, pa asina yega na fondo pa mi risibimentu. Anto mi ta parti di un famia di 8 yu. Risibimentu na kualkier kas e tempu ei, ta un gastu formal: mester drecha i fèrf kas; mester bisti esun ku ta bai risibí di kabes te pia; mester dòrna kas; mester sòru ku tin kos di kome i bebe pa no kaba; tur sorto di bolo i no lubidá e batrei.

E proseso a bai mas o ménos di e siguiente manera: Via pastor di misa di Coromoto, e parokia na kua nos tabata pertenesé, nos a haña sa e fecha di risibimentu i skol a komuniká esaki na nos via di un karta ku nos a bai kas ku n’ e pa nos mayornan. Mayornan mester a aprobá i duna nòmber di e yu ku mester a risibí.
Ta sigui e ora ei e diferente lèsnan di preparashon, pakiko tin ku risibí; akseptashon di kurpa di Kristu; kon bo tin ku kana, na unda tin ku sinta; kon tin ku sinta; kon i kiko tin ku kanta. Bo mester siña Oh Santu Altar, for di kabes, loke riba su mes no ta difísil, ya ku radionan tabata toka esaki diariamente i tabata pasa propaganda na radio, pa bo bai kumpra e disko Oh Santu Altar na La Bonanza, pasó mester a toka e kantika akí, henter dia na kas despues di seremonia. Despues a sigui un dia hopi dushi, ora ku e grupo di muchanan ku ta bai risibí, bai misa pasó nan mester konfesá, esta bisa tur nan pikánan, pa asina nan tabata limpi di paden pa por risibí Kristu. Klaro ku promé ku bo bai konfesá, bo tabata puntra i papia ku otro tokante bo pikánan. E fiesta supuestamente lo mester tabata mi fiesta, paso t’ami a risibí, pero tur e kosnan dèftu ku a sosodé den misa, e drechamentu di kas i tur loke mi mama a hasi rondó di e fiesta akí, mi tabata puntra mi mes si realmente tabata un fiesta pa mucha, esta pa mi, pasó tur e drechamentu di kas, e dòrnamentu di kas, kumpra paña karu i tur e solemnidat den misa, ta kosnan ku e hende grandi a pone na e risibimentu. E pregunta grandi tabata i ta te dia djawe, kiko e mucha mes tin na e fiesta grandi akí? Tur na flus, hopi biaha den e inmenso kalor ku tabata hasi, mester keda bai bin i bai kai sinta riba su trono, riba talmu, kada bes ku un hende yega, pa dun’é man i yama pabien i tuma su regalo. Pa kolmo e no por habri e regalo tampoko, pasó no ta nèchi pa habri e regalo mesora ku bo haña esaki. Despues banda di mèrdia bo mag bai kita bo paña i bisti otro paña nèchi i bisti slòf òf algu otro na pia, paso bo no mag kore pia abou despues di a risibí, pa bo no trapa Kristu. Anto atardi 3 or, ata bo atrobe ta bai bisti mesun flus di mainta, pasó bo tin ku bai misa atrobe i e biaha akí pa konformashon.

Bo bario ta kontentu e dia ei, pasó risibimentu tabata un fiesta kolektivo, kier men tabatin mas famia den bario ku ta tin yu(nan) ku a risibí. Anto hopi biaha ta “risibí den par”. Ya pa dianan largu, komunidat, bo bario ta spera e fiesta akí. Komèrsio a biba un ratu, pasó mester a kumpra paña nobo pa bai fiesta, mester a kumpra regalo i no ta di papia mes di e famia kaminda tabatin risibimentu, kuantu kos nan mester a kumpra pa pone kas “op en top”. Misa ta yen yen, ku mil fotógrafo, tin di nan ku den purá a bai kumpra kámara poloroid, kaminda famia, madrina i padrino i klaro ku esnan kaweta pa no wak e mucha kon el a keda, pero pa wak kon madrina i padrinu a keda.

Danki Dios nos ta biba dos stap for di misa di Coromoto i ta kana nos a kana bai misa, na pia, ku e sapatu nobo, ku ta primi bo pia, i ku bo sa ku ta e promé i delaster biaha ku bo a bisti e flus, e sapatu ei, pasó pa e tempu ei, ya mi a mira mi ta bai skol ku karson largu blanku. Otro muchanan ku ta biba mas leu, padrinu mester a regla transporte, i nan ta yega misa den outo grandi, limpi limpi labá, para dilanti misa i madrina i padrino ta blòf baha for di outo ku e yu ku tabata bai tuma su promé santa komunion.

Na un bon fiesta di risibimentu, bo tabata haña den tempran e chukulati, ku ta bon biní, pasó komo mucha bo a bai misa stoma bashí, pasó bo no ta tin mag di tin nada riba bo stoma promé ku bo risibí kurpa di Kristu. E chukulati tabata bai kompañá pa e famoso lèter. Tabata tin tur sorto di bolo; panlefi, bolo di manteka, bolo di kashupete, bolo di preimu, e famoso bolo pretu i si bo ke konta den e famoso fiestanan di risibimentu den bario, bo mester tin bo bolo di batrei, un bolo di 2 pa 3 dèk, bunita dòrna den sentro di mesa di bolo. Tur e delisianan akí, tabata di show riba un mesa, ku taflak blanku. Komo yu di Kòrsou, semper nos tabatin i tin e kustumber di kompartí. I asina nos a krea komo pueblo e fenómeno di “piki punta”, hendenan ku ta pasa di fiesta pa fiesta di risibimentu, kome i bebe na nan antoho. Den tempu di awendia, nos lo a yama nan “Gatiero”. Hopi biaha nan tabata bai mèrdia, ora ku ta ora pa sirbi e sòpi, pa despues sigui ku e kabritu, ku roibit, pitipuá i banana hasá òf e stobá di galiña i den algun kaso e kalakuna. Hopi biaha, tabata padrinu ta esun ku mester a sòru pa e kabritu ku mester a kushiná pa e mèrdia di risibimentu. I di bebementu no papia mes, den e kamber pegá ku e kaminda di bolo, ta tin un surtido grandi di bebida i prinsipalmente e hende hòmbernan tabata fiesta ku e surtido grandi akí.

Segun mi den mi tempu ainda, ta dos biaha pa aña so ta tin risibimentu. Abo komo mucha mester a bai drumi, pero den bario ta tin na diferente kas muzik masha duru tabata sali for di e trèktunan di Jan Picoteo i  pikidónan di punta i otro invitadonan tabata selebrá te den oranan lat di anochi.

Mainta bo mester a bai skol i na skol bon tabata por a sinta ni para, pasó bo ke bai kas i wak bo regalonan ku bo a haña, pa ora bo yega kas, bo konta e bekernan di plata ku bo nòmber mal skibí ariba, kuchara di plata, algun bòlpòint Parker, diferente plachi ku pabien, sèt di kuchara, kuchú ku fòrki, kos di habri karta (kaminda nunka bo a yega di haña un karta); dos tres kodak pretu firkant. Ningun ènvelòp ku kontenido, ni e buki di banko mi no a mira.

A toka turno na mi yu hòmber di risibí, por sierto el a risibí den e mesun flus ku su ruman hòmber grandi a risibí aden. Un flus kòrá kimá, e tambe a bai tur preparashon na parokia di Janwé, pasó e tabata bishitá St. Margaretha school. Nos a puntra Stephen kiko e tabata ke pa nos hasi komo su fiesta i su kontesta tabata, invitá mi 5 amigunan i nos ta bai wikènthùis na Bándabou. E muchanan a selebrá. Kome, hunga, landa na nan antoho. Ora a puntra Stephen: awor si hende ke bin serka bo, kiko ta pasa, i su kontesta tabata fásil: Laga nan bin Bándabou serka mi. Ta su fiesta tòg?