Esaki ta kontinuashon di mi artíkulo di siman pasá – Señorita – https://percypinedo.com/mikorsou/senorita/.

E yu muhé no por a bai ningun kaminda sin aprobashon di e mayornan ni sin un ruman òf hende di kas pa kompañá. Na kas, ora mama mester a sali, e no tabata riska laga e yu muhé so sin kompaño di maske ta un ruman chikí i tabatin òrdu estrikto pa no risibí ningun hende na kas durante su ousensia. I pió ainda si e tabata sospechá ku tabatin un yònkuman den bario ku lo por tabatin djis “idea” riba su yu muhé. Te asta ora ku bo a “pidi man” bo no tabata haña chèns pa bai ningun kaminda ku e mucha muhé sin kompaño. Esaki ta eksperensia personal ku mi a pasa aden ku mi ruman muhé Maria ku ora sali ku esun ku a bira su kasá, ami mester a sali ku nan. Mayornan (mama) tabata kontrolá yu muhé te kontrolá su manera di kana. I si den vigilansia mas severo, nan por a nota un kambio na su kurpa òf sea den ekspreshon di su kara nan lo buska pa hasi un investigashon mas profundo, pa wak si ketu bai e tin su birginidat.
Anto si e yu muhé no tabatin suerte di kasa e ta keda trankil den kas di su mayornan te bira “dams bieu”, kombensí ku matrimonio no tabata destiná p’e i te na su kama di behes lo e keda ku e orguyo di ta “señorita” su status di honor, i hamas  lo e akseptá i semper lo koregí e persona ku dirigí palabra na dje, yamando e “señora”.

Kòntròl

Elis Juliana ta deskribí kon severo e kòntròl tabata, spesialmente riba mucha muhé. Birginidat tabata konsiderá komo e honor mas grandi di un mucha muhé. Mayornan tabata wak tur kos: kon e mucha ta kana, kon e sinta, kon e bisti, ku ken e ta papia. Hopi di e kòntròl aki tabata sali for di e mentalidat katóliko di e tempu ei i di e idea ku e destino mas grandi di un mucha muhé tabata kasa i tin yu.

Pidi man, ta un konsepto bon konosí i e kustumber aki ta konosí den hopi otro pais i kultura: Hulanda konosé “om de hand vragen”. Den spañó “pedir la mano”; skucha Juan Luis Guerra su: A pedir su mano : https://www.youtube.com/watch?v=_koz_f4mthE i den ingles “to ask for her hand in marriage”

No ta tur hende tabata di akuerdo o aloménos tabata asina enkantá ku e asuntu di pidi man. Aki ta sigui un fragmento for di e obra di Pierre Lauffer titulá: Pidi Man.

PIDI MAN
,,Bini mi kas diadumingu .mainta, despwes di misa majo”, Madalena a bisami, ,,anto e ora ei mi tata ku mi mama tur dos ta na kas”. Pa papia kla, mi kurason a sera un krenchi. Mi por a hole masha tempu kaba ku riba un bon dia e kos aki lo mester a bin sosode. Maske mi tabata sa ku namora na skondi ta “loke majoria di tata ku mama no sa gusta. Parse ku mester tin e malditu renchi di kompromiso  pa  kapa. Mester tin e permiso ofisial di grandinan, sino pueblo ta kapas di kere ku e asuntu ta un bibamentu. Asina Madalena a kaba di komunikami e deseo di su  hendenan, el  a kamna bai. Pero m’a grit’e : ,,Nena. Tendemi  un  ratu. Nos  no  por  pasa den Pietermaai  nos dos huntu? Mi tin algu di kontabo”.,,No, mi amor”, mi palomba a kontesta disididu. ,,Mamai no ke. Hende­ nan ta papia basta kaba. Mi no por tira mi nòmber riba kaja. I si bo ta stimami di berde, anto bo ta bin pidi mi man diadumingu mainta”.Maske kwantu m’a roga, Nena no kier a tende, i el a sigui kamna bai. Ami a keda wak e sigun e ta tira su zojada. Esta un dushi galinja. Anto koló di mespu!… Esaki ta kon Pierre Lauffer a pensa di Pidimentu di  Man. Kwenta pa kaminda -1964

Promé di tur kos tabata “pidi man”. Esaki no tabata un simpel formalidat. E yònkuman mester bai na kas di e mucha muhé pa pidi pèrmit serka mama i tata. No tabata amor solamente entre dos hende; tabata un negoshashon entre dos famia. E mucha hòmber i e mucha muhé ta topa otro sea durante aktividat o riba kaya i ta kuminsá kòmbersá ku otro.

Elis Juliana ta konta den un entrevista ku promé e yònkuman mester puntra e mucha muhé si e por bai kas serka su mayornan. Despues di esaki tabata bin e momento serio: sinta den sala ku mama i tata pa bisa ku e tin intenshon serio. Mayornan di e mucha muhé ke sa ku e hòmber tin trabou, pasobra nan yu no por drenta/kasa ku hende ku no tin trabou. E mayornan ta bai serka grandinan di e mucha hòmber pa pone nan na altura ku nan yu hòmber a pidi man di nan yu muhé. Si e mayornan ta di akuerdo e ora ei e mucha hòmber por bin kas pa frei, pero ta mayornan ta stipulá ora pa e mucha hòmber por bin.

Freimentu

Freimentu di ántes tabata kasi un operashon militar. Nada no tabata keda sin kòntròl. Mama no tabata laga e pareha nan so ni un momento. Elis ta konta ku mama tabata sinta den sala manera “un klabu”, wak tur moveshon. Si tin demasiado silensio, mama tabata lanta, pasa den sala bin puntra ku yònkuman ke algu di bebe. Mama no ta drumi ni kabishá.

I wak kon tempu a kambia. Awor hopi biaha mucha ta sali ku otro sin ni mama ni tata sa kaminda nan ta bai. Ántes bo no por a bai fiesta sin kompania. Si e mucha muhé ke bai un baile òf fiesta, mama òf un ruman mester bai huntu ku nan.

Freimentu tambe no tabata algu di dos luna. Tin hende ku a namorá dies aña promé ku kasa. E hòmber mester proba ku e por traha, traha kas i mantené un famia. Amor tabata ligá ku responsabilidat.

Anto freimentu tabata kada hende sintá riba nan  stul, nada di frei den sofa. Anto no tabata ni frei tampoko, pasobra ta kòmbersá, papia ku mamai i papai, riba tur kos di bida, kon ta bai traha kas, pasobra no tin kasamentu sin nan kas. Anto mester tene kuenta ku ora di lanta bai tambe. Sino bo ta tende mama ta hala porta i bentananan dal duru sera i laga rèndu zona eksageradamente duru. Esakinan ta señal pa yònkuman komprendé ku e tin ku bai pa nan prepará pa drumi.

Elis ta sigui konta: “Djadumingu e yònkuman ta kasi pasa dia serka su frei. E dia ei e dams mester kushiná, traha kòfi pa mustra e yònkuman ku e por kushiná. Tin biaha ora ku e yega e ta haña e mucha muhé ta strika, pa e sa ku e dams por strika.”

Ora bo lesa Pierre Lauffer òf tende kantikanan di Doble R, bo ta sinti nostalgia di un Kòrsou kaminda amor tabata mas lento, pero talbes tambe mas kontrolá. Doble R a kanta hopi tokante relashon, rèspèt i bida familiar, reflehando e mentalidat popular di su tempu. Su músika tabata un sorto di krónika sosial di nos bida diario.

Pero no tur kos di ántes tabata mihó. Hopi mucha muhé a biba bou di preshon i kòntròl ekstremo. Nan libertat tabata limitá. Nan futuro hopi biaha tabata disidí pa otro hende. Awor hende tin mas libertat pa skohe ku ken nan ke biba, kon nan ke biba, relashon ku hende di mesun sekso i ora nan ke kasa.

Sinembargo, tin algu ku nos por siña for di tempu di ántes: e idea ku un relashon no tabata solamente pashon, pero tambe rèspèt, pasenshi, kompromiso i envolvimentu familiar.

Talbes entre e kòntròl eksagerá di ántes i e libertat total di awor, tin un kaminda mei mei kaminda amor por haña un mihó balanse.

Otro siman: Saka breit!

Material usá: Matrimonio i parto – Elis Juliana desèmber 1988 – AAINA – Rignald Recordino: Sera Konosí – N’ta sistema – Pierre Laufer Pidi – Man – Kwenta pa Kaminda 1964 – A Pedir su mano – Juan Luis Guerra.