Nos Parke di Bestia: Manera kaminda nan a mata Kristu (un lugá mashá desolá (morto). (Sapaté, na bo sapatu! Reginald V. Römer.)

Den un pelea kontinuo pa plaka (finansiamentu),falta di hendenan kapasitá pa traha i problemanan organisatorio,semper e parke akí a bringa pa su sobrebibensia.Un parke ku ta eksistí for di,di dos guera Mundial,ku primeramente tabata eksistí komo “proeftuin”, i e nòmber ei e la keda kuné durante su período di gloria.

Den dékada 50, diariamente bo ta mira muchanan ku nan mayornan ta kana keiru den “proeftuin” na Cas Cora,kana wak makaku,warawara, patu etc.,i ta por a kumpra mata, palu ku ta planta den e “proeftuin”. E lugá akí tabata un paraiso chikí di Pieter Anthonie Van Stuivenberg (arkitekto liga ku entre otro Cinelandia, West End, edifisio KNSM etc.). Komo alumno di skol básiko Mgr. Nieuwindt, nos tambe a bishitá e parke e tempu ei i nos mester a tene un charla despues di nos eksperensia di e parke.

Ya for di 1903, tabatin plannan pa traha “proeftuin” na Kòrsou, tabata gobernadornan ku a bin ku e idea pa nos mes proveé nos mes kuminda, maishi, krio di kabritu, karné, porko baka etc. Banda di esaki, DOW/LVV tabata planta palu pa hasi nos kayanan i parkenan bunita. I ademas tabata duna públiko e oportunidat pa bin kumpra mata, palu na e “proeftuin”. E “proeftuin”tabata un invento di ulandesnan, den kua nan tabata hasi algun prueba, den e kaso aki, wak si por planta i kosechá nos propio kuminda i tambe wak kon nos por logra ku nos founa dor di krio di bestia. Kòrsou tabata konosé diferente “proeftuin”: Na Cas Chiquitoe, Klein Sta Martha, Groot Kwartier i “Cas Cora”, di kua e último akí ta esun mas konosí. Na 1940 a habri e parke akí i e nòmber “proeftuin”a keda, pa despues haña nòmber di plantentuin, dierentuin i asta te último Parke di bestia i Parke Tropikal. Ora bo por bisa ku e “proeftuin” a frakasá a disidí di kombertí e parke den un parke di distraishon.

Van Stuivenberg. Komo hefe di “Watervoorzieningsdienst” tabata kere den su “proeftuin” i di tur manera tabata buska fondo pa sigui amplia i mehorá su parke. Tiki tiki tabata amplia e kantidat di bestia den e parke ku turtuga, flamingo , ber, biná, tiger, warawara, suan, patu, ta tin vèiver ku diferente sorto di piska i klaro ku flora tabata sobresalí

Teritorio Insular di Kòrsou tabata mira kon e Parke tabata krese na popularidat i ku komunidat i turistanan tabata haña kaminda pa e parke ku tabata floresé mas i mas. Miéntras tantu, tantu lokal komo internashonal e parke tabata krese na interes. Asta a yega dje leu ei, ku e otro islanan di Antia a bin hasi bishita, pa por a siña di e éksito di nos parke, pasobra ya henter e idea di “proeftuin”a bai pèrdí i e parke a bira un atrakshon turístiko. Imaginá bo, ku asta tabatin petishon hasí na gobièrnu, pa habri un parke di bestia privá, mirando e éksito di e parke na Cas Cora. Sürnam tabata un di e paisnan ku a interkambiá diferente mata i bestia (miereneter, pòwis) ku e parke. Di parke di bestia di Venezuela, nos parke a risibí kaiman, porko di spiña i un tiger, miéntras Ulanda tambe a mustra su interes dor di manda diferente bestia Kòrsou, manera leon, suan, tiger, boa i asta un pareha zebra.

Tabata na aña 55 ku un leon a wèrp i den un tiru nos parke a haña 3 yu di leon aserka i esaki a pone ku e kantidat di bishitante pa e parke a subi drástikamente. I komo regalo pa bishita di La Reina den 1955, Artis a regalá nos parke un kantidat di suan pretu i tambe e elegante suan blankunan. Na aña 1958 Lions Club a bolbe kumpra un otro leon, ku nan a yama Emile, ku ta nòmber di e presidente di Lions Club di e tempu ei, Sr. Emile Dankmeijer.

E parke tabata vibrante pa motibu di e kantidat i diferente sorto di bestia ku tabata biba den e parke. Nos parke tabata manera un paraiso chikí, ku vèiver ku un baranka na miniatura den dje i un imitashon di un katarata. Den e ambiente akí bo por a rilèks i disfrutá di naturalesa ku hende a traha. Kaminda suannan elegante tabata biba, rondoná pa diferente palu di koko i diferente sorto di mata, semper bèrdè.

Pa loke ta trata nos flora den e parke, Ulanda a regalá Kòrsou un kantidat di rosa i ku a kambia nan nòmber pa “Statuutrozen”, en espera di bishita di La Reina. Lamentablemente e rosanan no a wanta te ora ku La Reina a bishitá nos isla i tur a muri promé ku su yegada. Gobièrnu a finansiá un proyekto, kaminda a hasi un eksperimento, plantando 30 mil mata di anasa, pero e proyekto aki a frakasá.

Mirando éksito di e parke, ku tur siman i sigur den wikènt tabata yen, na diferente okashon gobièrnu di Kòrsou a pensa pa kuminsá kobra entrada na porta, pero kada bes di nobo tabata kita for di e idea akí. Sr. Don Martina na 1975 a bin ku e idea pa kobra entrada, mirando ku turista i nos hendenan tabata drenta parke pòrnada, miéntras e mantenshon tabata kosta bòshi plaka. Otro motibu pa a kobra na porta tabata pa e echo ku vandalismo tabata asotá e parke i hóbennan tabata esnan ku tabata hasi nan mes kulpabel na esaki. Nan a bai dje leu ei, ku nan a mata un kaiman dor di batié ku pieda. I mester menshoná tambe ladronisia di kabritu i karné.

Na 1965 Shell Curacao a regalá Kòrsou un “Jeugd Verkeerspark” ku nan a habri djis banda di e parke. Esaki tambe a sòru pa un tiki mas tráfiko pa e parke, ya ku e “verkeerspark”tabata apelá na hóbennan e tempu ei.

Na 1972 tabatin un plaga di djaka den e parke ku a pone ku no tabatin ningun para den e kouchinan i djei padilanti e parke a konosé un “mal tempestat”ku a dura hopi largu i ku te dia djawe nos ta kome e frutanan marga di esaki.
Na 1981 Sr Ronny Winkel, komo hefe di LVV a presentá un proyekto pa ampliashon di e parke i pa dediká hopi atenshon na founa i flora di e parke. Diskushon tabata bai bin tokante si tin di kobra entrada si òf nò.

Na 1999 ta lanta un fundashon nobo, Fundashon Parke Tropikal i na 2002 nan ta tuma rienda di e parke, ku entre otro Jacques Visser komo Presidente i Sr. Stanley Ignacio komo miembro di bestür. Nan tabatin komo meta, trese bèk un bon klima pa e bestianan; hasi e parke mas tropikal; drecha e infrastruktura; mas edukashon relashoná ku e parke i traha un hardin di barbulètè den e parke. Nan a kuminsá ku hopi entusiasmo, a organisá fundraising, Gerard Johling a kanta pa i den parke, tabatin diferente otro aktividat pa generá plaka i asta nos a transmití un programa di salsa (Salsa Mi 95) for di den parke i asta den kouchi di makaku.

Tabatin interkambio ku parke di bestia di Venezuela i asina a manda e bernan Venezuela, ku ta kuadra muchu mas tantu den e klima aya nan ku si nan a keda akí.

Por último Curacao Zoo and Nature a tuma rienda di e parke i nan tabatin un masterplan pa trese diferente kambio na e parke, pero esakinan, manera tur e otronan a kaba na aros di koko. Gobièrnunan di turno a keda hasi promesa i mas promesa (bakoba pa makaku, hopi promesa bashí), i awe sèptèmber 2023, nos parke ta den un situashon deplorabel.