Semper Kòrsou a krea su meskla manera un mosaiko di kultura. Tur tempu tin hende nobo ta yega, keda i laga marka den nos bida sosial. Un komunidat ku a laga i ta lagando su marka realmente profundo atras ta komunidat surinameño.

Ora mi a kuminsá buska informashon tokante Klup JPF, mi a topa un historia masha interesante: kon surinameñonan a yega aki, kon nan a keda, unda nan a biba i kon nan a kontribuí na nos isla.

Promé ola: trabou den industria petrolero

Den añanan trinta hopi surinameño a yega Kòrsou pa traha den refineria ku tabata floresiente. Shell tabata buska hopi trahadó di abla hulandes, i surinameñonan a yena e bashí. Segun Ronnie Rens Jr. den Amigoe di Curaçao, tabatin mas o ménos 16.000 trahadó di Shell. Sürnam mes no tabatin hopi oportunidat i asina Kòrsou a bira un promesa pa un bida mihó.

Den añanan ku a sigui, mas surinameño di otro profeshon a yega Kòrsou: entre otro maestro, enfermera, dòkter i tékniko. Ronnie Rens ta menshoná entre otro frumú Lont, dòkter Devid, dòkter Heath, Nassy i Lashly. Otro profeshonalnan ku e ta menshoná ta: Reggie Venlo i Ewald Ong A kwie, konosido sindikalista i diferente maestro di skol ku a kontribuí en grande den nos (mi) formashon: Vos, Sjak Shie, Jesurun, etsetera.

Suffisant

Hopi surinameño a bai biba den Suffisant, kaminda Shell a laga nan sinti nan mes na kas i asta a duna kayanan den Suffisant nòmber ku tabata laga nan kòrda Sürnam: entre otro Brokopondo- Nickerie- i Marowijnestraat . Den nos komunidat, Suffisant tabata konosí komo “het Surinamerdorp”, pa kantidat grandi di famia di Sürnam ku tabata biba den bario. Den Suffisant diferente generashon a nase, Yu di Kòrsou, pero na kas nan ta sigui tradishon surinameño, papia nan idioma Sranan Tongo i durante nan fakansi nan tabata bai bèk Sürnam.

Influensia polítiko

Despues di tempu, surinameñonan a disidí di drenta polítika na Kòrsou. Entre otro Stanley Inderson, Jopie Giskus, Cornelis Smits, Ivo Knoppel i tabata minister. Esaki ta mustra kon komunidat surinameño a adaptá i tira rais den struktura di gobièrnu.

Hopi surinameño a forma famia, haña yu i forma nan bibá aki na Kòrsou i a hasi Kòrsou nan kas. Nan a traha, krese den libertat, kontribuí na nos ekonomia, kultura, polítika i komunidat. No ta straña mi tampoko, ku nan ta hopi orguyoso di loke nan a logra na nan isla Kòrsou.

Klup JPF

Ora mi pensa riba mi hubentut den Mundu Nobo, semper JPF (Justitia Piëtas Fides)(nos tradukshon: Jan Pia Fini) ta den mi mente. Pa mi, JPF no tabata simplemente un edifisio, pero e tabata un lugá di union, di deporte, di fiesta, di kultura. I hopi di e ambiente ei tabata bini di  komunidat surinameño. A funda JPF dia 17 di yüli 1941 i JPF tabata situa primeramente den Scharloo.

Tur hende tabata bon biní na JPF i for di kuminsamentu nan a habri porta pa tur hende i tabata yama hendenan di rònt Kòrsou bon biní den nan klup. E klup tabata disponé di fasilidat deportivo, kaminda nos a hunga bala, vòli i basket riba nan kancha pafó i tambe nos a partisipá na diferente wega di famia den klup mes.

Tabatin tur sorto di reunion ku tabata tuma lugá den JPF i tambe otro aktividat sosial, manera anochi di sine i tayernan konosí pa siña konosé kushina surinameño.

Pero JPF tabata mas konosí pa su fiestanan, ku tabata kasi kompletamente na airu liber, ya ku JPF su patio no tabatin dak. Bandanan di Kòrsou i internashonal tabata aktua den JPF, pero mas ku tur kos, JPF su fiestanan di soul tabata masha konosí. Tabatin momentu, ku hóbennan baldadi tabata para pafó i tira pieda paden i na diferente okashon mester a yama polis i para fiesta pa motibu di e hóbennan akí.

Den JPF bo tabata sinti energia i humor surinameño, bo tabata disfrutá i kompartí nan músika, nan kushina, nan talento i kompartí nan amistat.

Mi rekuerdo

Mi ta kòrda e anochinan di muzik, harimentu, momentunan di deporte, holó di nan kuminda i tambe diferente momentunan speshal. Tambe mi ta kòrda relato di mi amigunan: famia Velder, Benshop, Hoogvliets i otronan:

• kon nan yega Kòrsou pa traha na Isla
• kon nan a haña kas den nos barionan, i
• kon nan kultura a yega meks ku di nos.

JPF tabata e teatro chikí kaminda tur esaki a mesklá.

JPF tabata un lugá kaminda Sürnam i Kòrsou tabata topa sin esfuerso. Músika, idioma, baile, deporte, tur kos tabata kore den un atmósfera di union. Mi mes a siña hopi tokante komunidat di nos isla na JPF.

Un legado ku no por lubidá

Ounke tempu a pasa, JPF ta keda un parti di mi identidat. E edifisio a keda simpel, pero e komunidat ku a duna bida aden tabata riku.

Ku e artíkulo aki, no solamente mi ta rekordá mi hubentut, pero honra tambe diferente famia surinameño ku a forma mi hubentut, i tambe a hasi JPF grandi.