Den un artíkulo riba mi blog https://percypinedo.com/mikorsou/porko-pa-chike-chike-pa-porko-ningun-no-ta-miho-ku-otro/, mi a komentá kuantu kos Iglesia Katóliko a kambia despues di e konsilio di Vatikano, ku a dura di òktober 1962 pa desèmber 1965. Mi tabata hopi serka di Iglesia Katóliko, pasobra mi tabata sirbidó di misa na Coromoto i e diferente kambionan ku a bin, ta nèt den e temporada ku mi tabata sirbidó di misa.
Tabatin diferente regla ku nos tabata ehekutá, sin sa e orígen di e regla, sin ku nunka a partisipá e sentido di e regla na nos komo sirbidó di misa. Mi ta kòrda por ehèmpel e asuntu di boutismo di yunan for di matrimonio, ku tabata tuma lugá den oranan lat despues di bahada di solo i ku solamente un madrina komo testigu.

Den Archivo Nashonal di Kòrsou, den registro Katóliko: Vicariaat der Dominicanen 300.2.8 , nan tabata registrá matrimonio “ilegal”, esta entre un katóliko i un no-katóliko. Den “Huwelijksregister van illegale huwelijken in de parochie Sta. Maria, entre 1847 pa 1876.

E di dos konsilio di Vatikano a trese hopi kambio mes den liturgia di Iglesia Katóliko i algun dje kambionan ei tabata hopi visibel:
Misa den nos propio idioma papiamentu, ku anteriormente tabata den latin, na papiamentu fielnan por tin un partisipashon mas aktivo. Komo sirbidó di misa nos tabata orguyoso di por a kanta i respondé misa na latin; a bin mas lesamentu for di beibel; mas partisipashon di fielnan na  misa, awor ku pader tabata hasi misa ku kara pa pueblo i no mas ku lomba pará pa bishitantenan;
Entiero i kasamentu di hendenan ku supuestamente tabata biba den piká a keda eliminá;
Mesa di komunion a keda eliminá i por a risibí Santa Komunion pará, tumando hostia den bo plant’e  man; promé ku konsilio tabata konsiderá tuma hostia den man komo sakrilegio; na 1966 Pastor Kruidenberg, segun liturgia moderno, a kuminsá duna Santa Komunion den man na lugá di den boka; tabata na 1966 ku un grupo di hóben kantadó i tokadó di kitara a kuminsá toka den misa i durante misa, ku selebrashon di misa na papiamentu; na misa di Coromoto, nos banda di bario Twilight Zone a toka i kanta den misa;
Iglesia Katóliko a kuminsá papia mas habrí di seksualidat i uso di antikonseptivo ets;
Na 1967 a introdusí Misa Alegre di Richard Simon, kaminda a kuminsá kanta kantikanan religioso den nos idioma i ku nos ritmonan Kurasoleño;  tambe a introdusí Misal di Pueblo di Dios (1978).

Den dékada 60, mi no ta kòrda ku ta 65 òf 66, un grupo di sirbidó di misa di Coromoto, Sonny “Shosho” Jacobus, Jan Wolsink, Nelson Scoop, Regnauld Bloem, Egbert Espasia i ami a kana rònt misa i nos mester a kita tur plachi di nòmber ku tabatin riba banki den misa. Personalmente mi ta kere ku esaki tambe tabata un akshon ku a sigui despues di desishonnan di, di Dos Konsilio di Vatikano. Nunka mi a mira un hende a bin paga nan lugá riba banki den misa di Coromoto. Sinembargo e plachinan den misa di Coromoto, tabata prueba di esei. Klaro ku tabata esnan mas pudiente ku tabata paga pa sinta, anto mas dilanti mas mihó.

Tabatin un konosido komersiante den Otrobanda ku tabatin su nòmber reservá den misa di Coromoto i e tabatin komo kustumber di yega misa lat i tabata kana bai su lugá i si haña un hende sintá na su lugá, e tabata keda pará banda di e hende ei, te ora pastor for di riba altar, manda un sirbidó di misa bai lanta e persona i bisa esaki pa tuma un otro lugá, paso doño di lugá a yega. Hopi hende tabata haña esaki denigrante i tabata hendenan ku plaka ku por a reservá nan lugá den misa. Sigur den temporada di Pasku Grandi i Pasku di Nasementu e reservamentu di lugá tabata deha.

Via di ret sosial mi a haña basta informashon, ku mi por a hasi un investigashon na Archivo Nashonal di Kòrsou, kaminda mi a logra haña diferente informashon.

Ningun kaminda mi a logra haña un dokumento ofishal ku ta papia di pagamentu pa lugá di sinta den misa. Hendenan ku mi a papia ku ne tabata sa di reservá lugá den misa, pero kasi no ta kòrda kuantu i kon pagamentu tabata bai.

Den “Register inhoudende bepaling der zitplaatsen in de kerk en aangevende de bijdragen van leden van de Broederschap van de H. Geest 1866 – 1928, mi a haña un kantidat di nòmber ku a paga, pero sin pone e kantidat di pago. Den Kasboek R.K. kerk Pietermaai, mi a haña ku di 1940 pa 1948 misa a risibí un montante, pa e tempu ei konsiderabel komo “bankengeld”. Esaki tabata e kaso tambe na parokia di “Willibrordo”, Soto, Santa Ana i Groot Kwartier.

Den “Kroniek van de Parochie van O.L. Vrouw v.d. Berg Carmel te Groot Kwartier”, pader Reginald Dellaert O.P. ta skirbi na página 1 lo siguiente: “prijs der banken, 6 promé banki 10 florin pa aña, 5 siguiente banki 8 fl. i sobra 6 florin. Den e mesun krónika tin pará: “In november 8 nieuwe banken à florin 50,- allen betaald door de kerk zelf”.
Den e mesun krónika por lesa un parti: “misa di 5 i 7or – achterhelft der kerk, plaats voor portugezen. A bin un protesta riba e asuntu di paga 50 florin pa banki pa aña i e mesun dia ei pastor a publiká un aviso, ku el a plak patras den misa:
1. “No bin den misa cu bistir sin manga of cu manga corticu, nan mester ta a lo menos te na ellebog”;
2. “i bistir un pida mas abao ku rodia”;
3. “No ta kere koe nota necesario bisa koe garganta muchoe abao tambe ta taha”;
4. “No bin misa coe shimis muchoe delega i fini, ni coe moda provocante”.

Ki dia ofisialmente a stòp ku kobramentu pa banki den misa, pa mi no ta konosí. Si ta sigur ku tabata kobra, tabata kobra den tur misa katóliko riba e seis islanan. Tabatin parokia ku nan mes tabata graba e nòmbernan i otro parokia e persona mes mester a hasi esaki. E pruebanan ku mi tin di plachi di nòmber den e artíkulo akí, ta di misa San Bernardo na Kralendijk Boneiru.