Julian Coco: Siña! Ta bo úniko salbashon!

29 Jun, 2024

Ami ta bendishoná di por a eksperensia Julian Basilico Coco na diferente okashon i na diferente manera: komo públiko, den entrevista, komo maestro di seremonia, komo stage manager i komo produktor di programa. Den tur e funshonnan akí mi a gosa un bòl ku Julian, pero tambe mi a rabia, hari i krusa dede masha pisá pa kosnan kana bon. Ku Julian Coco nunka bo no tabata sa, kon kosnan lo a bai.

Tin momentu ku bo kier skibi, i bo no por haña informashon i tin otro momento ku bo tin asina tantu informashon, ku bo no sa unda pa kuminsá. Ku Julian Coco mi tabatin un otro problema tambe, mi no por a saka afó tur ora, ki ora ta seriedat, ki ora  ta wega i kiko tabata bèrdat i kiko tabata wega. E tabata gusta floria su bèrdat un tiki. Julian su bida semper tabata parse un wega. P’esei ta difísil pa mi por sita ku seguridat ku tur loke e ta deklará ta bèrdat.

Julian Coco a nase 9 di yanüari 1924 den Colon. Su ruman muhé mayó, Petronilia “Petoi”, un konosido kantante di tambú mester a sòru pa su 7 rumannan, ora su mama tabata traha.Banda di nan kas, tabata biba diferente músiko konosí, manera pianista Wim Statius Muller i tambe famia Palm. Julian mes ta konta, kon ora e hóben Wim Statius Muller tabata siña toka piano, kon e tabata para mira esaki i ta te ora ku su lès kaba, e tabata bai hunga ku su amigunan.

El a konta ku Sra. Elsa Debrot-Palm, ku ta toka piano, a skucha Julian toka kitara i a invitá Julian pa toka ku ne. Pero el a nenga di drenta nan kas, paso esei e tempu ei no tabata por, pa motibu di e segregashon ku tabata eksistí. Nan a toka huntu si, Elsa paden i Julian tokando pafó.

Julian na edat di 8 aña a kuminsá toka kitara. E ta un outodidakto ku a siña toka kitara i mandolin. Su tata tabata toka tur djasabra ku un grupo bou di palu tras di un bar. Komo mucha Julian tambe ta djòin nan. Tur siman nan tabata komponé un kansion nobo i un biaha e kitarista no por a kompañá e grupo i Julian a ofresé pa hasi esaki. Su tata a priminti’é ku si e logra hasi e trabou, e ta haña un kitara. El a kompañá nan, pero nunka a risibí su kitara.

Un momento hopi importante den su bida ta dia Julian a topa ku Jossy van der Linde, ku a pidi Julian dal un “mi”.  I Julian ku no tabata sa mihó, a dal un kos riba e kitara. Jossy a kana bai laga Julian. Esaki tabata e “wake-up call”ku Julian tabatin mester. Julian Coco: “mi no tabata sa e diferensia entre not i akort” i esaki a pone ku mi a sigui un kurso por eskrito for di New York di harmonia i areglo.

Julian a sigui train i toka den diferente orkesta, miéntras di dia e tabata traha na departamento di agrikultura. Tur kos a kambia p’e, dia (1952) el a topa e pedagogo musikal Willem Gehrels, ku a invitá Julian pa bai studia na  su instituto na Hulanda. Sobra ta historia. Julian Coco a barka pa Hulanda, kaminda su chèns pa studia muzik, su soño a bira realidat.

Julian a yega Hulanda i na konservatorio na Amsterdam e no tabata por a studia kitara, komo ku kitara no tabata instrumento prinsipal. I dor ku e kier a toka den un orkesta, el a disidí di studia kontrabas. Algun tempu despues kitara a bira ofisial na konservatorio i Julian a disidí di studia kitara klásiko tambe.

Julian Coco a biba algu mas ku 60 aña na Hulanda. Den kuminsamentu e tabatin basta kontra tempu pa haña kamber na Amsterdam, pa motibu di diskriminashon. Julian tabata sa ku e mester a traha hopi duru, ku e mester a siña hopi, pero pa amor al arte el a sakrifiká hopi pa logra su meta. Esaki ta poné bon kla tambe riba su busto, den su bario Colon: “Siña ! Ta Bo Úniko Salbashon”. ( e busto tabata un inisiativa di Komishon Añoransa, enkabesá pa Stanley Ignacio – 23 di yüni 2004).

Na konservatorio di Amsterdam Julian a sera konosí ku Helena Blans, ku tabata studia fio. Mas despues (1956), nan a kasa i Julian tabatin un tremendo tempu ku su suegronan.

Despues di su estudio Julian Coco a kore mundu i a toka ku diferente di e grandinan den mundu di muzik klásiko. Kasi tur wikènt e tabata toka na Bèlgika i e tabatin mester di e sèn, pasobra su yu Ciro a nase. Tambe e tabata forma parti di “Utrechts Stedelijk Orkest.  Julian a duna lès di kitara i su studiantenan tabata ador’é. E tabatin un studiante di kas real, Prinsesa Christina. Karamba lo mi kier a tende eksperensia di Prinsesa Christina, di su maestro Julian Coco.

Su pashon tabata muzik klásiko i pa kasi 40 aña e tabata forma duo ku flùitista Magdalena Kuhn. Hopi biaha públiko tabata pidi pa piesanan antiano i Julian no tabata komplasé fásil. Tabata solamente komo ñapa e tabata duna komposishon antiano. Nan a biaha rònt mundu i tabata un par di biaha na Kòrsou. Huntu nan a produsí e disko  “Sin Duda” ku músika antiano.

Julian Coco na 1973 a toka den un konsierto Rencontres Internationales de Musique in Vence i tabata e strea di e anochi ei. Tambe el a toka ku violinista mundial Jehudi Menuhin i ku e konosido kitarista spañó Andres Segovia i ku trompetistanan Stan Kenton i Dizzy Gillespie.

Julian Coco a bishitá Kòrsou na diferente okashon i tabatin diferente aktuashon. Memorabel tabata su presentashonnan den Sentro Pro Arte, den Festival di Añanan 50 i su konsierto ku Oswin “Chin” Behilia, na okashon di estreno di nan disko “Afrikatumba” na 2002. Julian Coco tabata diabétiko i nos e tempu ei komo organisadó tabatin basta problema ku Julian, ku no tabata tene su mes na su dieta.

Na 2007 Julian Coco ta sufri un atake selebral i no a aktua mas despues di esei. E tabata haña kuido na su kas serka su kasa Helena, pero pa motibu di su malesa di suku, mester a amputá un pia i e ora ei no por a sigui ku kuido na kas. Na 2011 el a bai kas di kuido Rosa Spierhuis na Laren.

El a sufri hopi e tempu ei i mas ainda pasobra e no por a toka, esei ta loke tabata hasi mas doló. Julian tabata sinti ku su final tabata yegando, i tabata deseá di regresá Kòrsou, pero su salú a bai mas atras.
Dia 4 di febrüari 2013 Julian Basilico Coco a muri. Un hòmber ku un legado grandi.

 

Loading comments...

Komentario resien

  • Lucille Dolorita on Kòrsou mal Mama, bon Madrasa!: “Danki Percy, Esta un bèrguensa mi ta sinti, mara den e aña aki esan responsabel por haña un luga prominente…Jul 13, 21:29
  • Carlos Larmonie on Kòrsou mal Mama, bon Madrasa!: “Mester eduka e mandatarionan. Ja (si nos tin suèltu anto) nan ta bin kompronde dikon nan tin ku kambia e…Jul 13, 20:50
  • Hubert Franklin Pop on Kòrsou mal Mama, bon Madrasa!: “Rason Percy Tristu esun nan ku tin ku duna Kaya nomber no tin un idea kon ta honra nos baluarte…Jul 13, 16:22

Kategoria