Despues di e promé artíkulo Kòrsou su Bida Musikal https://percypinedo.com/mikorsou/korsou-su-bida-musikal/ mi mester bisa ku mi ta ainda mas kontentu ku Japi Martijn su empeño pa a pone e dos tomonan Kòrsou Musikal riba merkado. Lesando e buki Honderd jaar Muziekleven op Curaçao di Rudolf Boskaljon, bo por haña e idea ku no tabata eksistí bandanan i orkestanan lokal.

Den dékada 30 hopi di nos bandanan tabata toka na kas di famia. Esaki tabata sosodé despues di oranan di trabou i e tokamentu por kaba ku un paranda di serenada òf un fiesta te den oranan di mardugá.

Manera deskribí den e promé artíkulo, bandanan a haña chèns di toka den suare na diferente parti di stat. Mayoria músiko popular di e tempu ei a haña nan preparashon serka fraternan di Skèrpènè i tambe serka banda kolonial di Fòrti, ku tabata bou di direkshon di “kapelmeester” Shon Yanchi Boskaljon. ( Yapi Martijn Kòrsou Musikal Tomo 1) Un fenómeno ku tabatin den dékada 30 tabata, ku den Cinelandia un banda tabata toka promé ku e pelíkula kuminsá i tambe den intermedio. E tempu ei nos bandanan tabata toka den Klup Asiento, Hotèl Palace i bandanan tabata kore den trùk toka muzik pa hasi propaganda pa estreno di un òf otro pelíkula. Otro lugánan ku nan tabata toka ta: Salon Brion den Otrobanda, Café Tivoli, Recreation Park na Mundu Nobo, Dancing Montmartre Cabaret riba Ref i den Café Internashonal di Emil Maduro. I klaro ku tabatin fiestanan popular pa plaka den Punda i na Otrobanda na Seru di Tumba Kuater i den Hulanda. E fiestanan akí tabata konosí den boka di pueblo komo tarai. (Yapi Martijn Kòrsou Musikal tomo 1). I no lubidá fiesta den Marchena na shap Onze Vlag, konosí tambe komo “Cabaret di Alpargata”.

Pa dékada 40, ekonomia a drecha bastante i nos a haña mas músiko i tambe mas orkesta. Nos  tabatin Konhunto Crystal, ku pa e tempu ei ya a graba basta disko. Den e tempu ei, tabatin basta klup di sierto kategoria manera e.o. Sentro Sosial Katóliko, Klup Kòrsou. E klupnan akí tabatin nan miembresia i di bes en kuando nan tabata permití introdusido. Tambe tabatin hòfi manera Hòfi Bozo Manchi den Marchena i tambe un hòfi den Plantersrust. E hòfinan tabata mas bien pa piknik riba djadumingu.

Nos Empresarionan

Di 1940 pa 1950, Moi Borgschot tabata organisá “Concurso Victoria”, ku tabata un konkurso ku kada biaha tabata saka un orkesta/konhunto ganador. E konkurso akí a tuma lugá e.o den Roxy i den West End. Den dékada 40, nos a sera konosí ku empresarionan: Moi Galante, Moi Borgschot, Romualdo Hanst, Dugo Schenker i na final di dékada 40 e fenómeno Angel Job a kuminsá bria na firmamentu empresarial.

Moi Galante tabatin su grupo di komedia “Magnolia” i tabata presentá su shownan spesialmente den Roxy. Su shownan tabata eksklusivamente musikal. Kasi tur e mihó orkestanan di Kòrsou a aktua den su shownan. Moi mes tabata tremendo bailarin.

Romualdo Hanst tabata un impresario ku a hasi tur sorto di kos den su bida. Trese artista di afó i Romualdo tabata kantante tambe. Su shownan tabata den Salon Habana ,Roxy, Cinelandia, Klup de Gezelligheid, Chobolobo i asta el a presentá riba e barku di guera Karel Doorman. Su spesialidat tabata organisá Revista Musikal. Kada show tabatin un nòmber, por ehèmpel: Noche de Batanga, Estoy como Nunca, Seleccion 67, Kòrsou di Ayera i Awor, etc. Romualdo tabata bailarin tambe i tabata duna lès di baile, e tabata pela tambe den e barberia bou di Hotèl Americano.

Tur e empresarionan akí tabatin un kos en komun, nan tur tabata baila masha bon. Esei tabata e kaso tambe ku Dugo Schenker, ku no a nase na Kòrsou, pero a kue e isla akí hasi di dje. E tabata skibi i dirigí komedia manera: Droga – Konsekuensia di Aña di hende muhé, Ta mi mes a laga nan kòrta mi orea i mas. Dugo Schenker a komponé diferente kansion, entre nan Redukta (kantá pa Hortance Sarmaat), Un plaka tin dos banda i E palabra di Awe. E delaster dos piesanan e mes a kanta. Dugo tabata lokutor na Radio Hoyer, ku e programa “E kuart’i Ora Surinameño”. Dugo Schenker tabata editá e revista mensual “Cur- Sur”, i tabata instruktor di baile. Ta Dugo ta fundadó di show di “Dia di Mama”. Dugo a presentá su shownan den kasi tur teater di sine na Kòrsou, inkluyendo Rex i Sine Rio. Ku su grupo De Zwaan, Dugo a presentá e famoso show “E Djaka” un total di 58 biaha. Dugo tabata manager di banda, bitbènt, orkesta, grupo di baile i di Shon Bènchi i Frènki. Tambe Dugo tabata manehá diferente klup, manera Moonlight Country Club i un diskoteka. Dugo Schenker tabatin grupo di karnaval i tabata presentá show na Tele Curaçao (Schenker Show). Ta te fin di dékada 40 Kòrsou a haña un supstituto pa Dugo Schenker den persona di “El Gordito di Oro” Angel Job na ken nos lo dediká un artíkulo speshal, paso e fenómeno Angel Job a trese kambionan  grandi den mundu empresarial na Kòrsou. Angel Job a kuminsá ku bendementu di keshi na pia i konsagrá su mes komo “Empresario number un di Kòrsou”. Rignald Recordino: “(refran) Nos ta rekonosé i deklarabu, Rei di trabou, super yu’i Kòrsou, Angel Job i nos a disidí di proklamabu, Rei di Trabou, un ehèmpel pa Kòrsou”.

Pa hopi hende dékada 50 tabata e dékada di oro pa Kòrsou, kaminda nos a konosé asina tantu banda i orkesta i tur kaminda tabatin fiesta, kuminsando na kas di famia, te den klupnan lokal i hòfi. Ta temporada ku tabatin di hür dansflur di palu serka entre otro Jan Picoteo. Klupnan konosí tabata entre otro: Klup Kwiek, J.P.F, Sentro Sosial Katóliko, Klup Kòrsou, Klup di Shell, Barge’s Bad riba Ref, Chobolobo i Klup de West na Hato. I no papia mes di piknik den hòfinan manera: Rafé, Hòfi Nobo, Popo Rojer na Barber.

Na 1956 tabatin basta kritiká riba e kantidat di show ku tabata tuma lugá den teatro Roxy, Cinelandia i West End. Tabatin tur siman show i manera korant a skibi, ku e kalidat di shownan a bai atras, pa motibu ku ta tur siman, i sin mashá preparashon, e shownan tabata tuma lugá. (Amigoe di Curaçao 15 di novèmber 1956 : “Gran revista Musical”: Kunnen de Curaçaose revue-gezelschappen het op deze manier volhouden?

Nos no mester lubidá, ku nos banda-, trio- i tambe orkestanan, tabata toka na Radio Curom, Radio Hoyer i Tele Curaçao.

Ku e empresarionan ariba menshoná, nos isla a konosé un variedat enorme di aktividat riba tur sorto di tereno i rònt Kòrsou, di deporte, sirko, artista lokal i internashonal, bòkseo, kabaitu, Sonora Mantancera, Tongolele, Cassius Clay, Cortijo i su Combo, The Cats, Pelé, Lucho Gatica, Song festival, Chapottin, Miss Hot Pants, Cub Calloway, Miguel Aceves Mejia, Celia Cruz, Shon Bènchi ku Frènki, E Djaka, Show Respetá Polis, Gòspel, Assepoester, mágiko, fakir, show di moda, kòntèst di hisa peso, miss gay contest, resital di piano, festival di salsa, festival di jazz, festival di reggea, festival di merengue, Elis Juliana, Laiza Porko Sushi, festival di Aguinaldo, Gai bieu ta traha sòpi stèrki, los Chavales de España i hopi, pero hopi mas.