8 yüni1961 un DC-3 di Forsa Aéreo Venezolano ku tabata transportá 7 prezu (polítiko) di Caracas pa Puerto Cabello a sekuestrá e avion djis despues di lanta vuelo. Un di e bewakernan a haña tiru den kabes i e sekuestradónan a obligá e piloto pa baha na Hato. Miéntras personal di KLM, 2 polis i 2 duanero tabata aserka e avion sin sa kiko a pasa na bordo nan a tende tiru for di e avion. Esaki ta e insidente kaminda shèf di plataforma di KLM, sr. Hailé, a sali na kareda i ku Rudy Plaate a komponé, Aventura na Hato, konosí den boka di pueblo: Na unda Boeis a kore bai?
12 Di mei 1978 algun persona a sekuestrá un avion di Avianca, buelo 163 riba ruta Santa Marta pa Bogotá i despues di a baha na Cali, sekuestradónan a desvia di e ruta i a sigui pa Aruba i finalmente Kòrsou. Na Kòrsou e desenlase a tuma lugá. Algun polis a keda heridá.
Dia 6 di novèmber 1980, algun persona a sekuestrá e avion di Avensa ku tabata ehekutando buelo doméstiko. A bordo tabatin 56 pasahero i e sekuestradónan kièr a bai Cuba i a disidí pa baha na Kòrsou pa tènk. Despues di a tènk nan a sali rumbo pa Cuba.
Dia 29 di yüli 1984 ta kumpli eksaktamente 40 aña di e sekuestro di e DC-9, El Zuliano, di Linea Aerea Venezolana (LAV 252) prosedente di Venezuela. E tempu ei, komo un isla chikí, Kòrsou a mustra su mihó kara pa loke ta trata solushon di e situashon ei. Un kombinashon di nos gobièrnu, ku tur otro instansia a duna e mihó parti di nan pa e situashon ei a yega na un bon final. Bon Final? Kiko ta un bon final? Dos morto a kai tòg?
Ku tur rèspèt pa otro opinion, sigur nos por papia di un bon final? Klaro ku meta di nos gobièrnu tabata, pa skapa bida di tur pasahero i tambe tripulante di e avion i esei a sosodé. Pero tabatin dos morto i ounke ku tabata e dos sekuestradónan ku a muri, nos ta papia di morto di dos hende. Otro punto tristu tabata tambe, ku e amiga di un di e sekuestradónan a haña un gòlpi emoshonal sensitivo,despues ku el a partisipá aktivamente na e desenlase. Tur esaki a kosto di bida di su kompañante, ku kende e tin un yu. Konsiderando tur e puntonan akí, mi ta puntra awe den 2024 ku nos mester tabata kontentu ku e desenlase, mirando ku dos hende a pèrdè nan bida i segun mi, ku komo kristian, ounke ta trata bida di dos sekuestradó, ku a pone bida di otro hende na peliger, ku nos mester tabata kontentu.
E sekuestro!
Dia 29 di yüli 1984, un DC-9, buelo LAV 252 a lanta buelo for di aeropuerto Simon Bolívar, rumbo pa Kòrsou. Un buelo rutinario, ku 82 pasahero abordo i 5 tripulante. Aproksimando Kòrsou na 60 mia i ya kaba kuminsando ku e bahada, e sekuestradónan a sorprendé kapitan Arturo Reina i a eksigié pa bai Margarita. No ta muchu kla, pakiko nan no a bai Margarita, pero finalmente a bai Port of Spain, kaminda e avion a baha i a tènk. E sekuestradónan a eksigí un kantidat di sèn, arma i un helikòpter. For di Venezuela a drenta e ora ei e konfirmashon, ku na bordo tabatin 82 pasahero i mayoria di nan antiano, di kua gran parti tabata Yu di Kòrsou. E sobrá pasaheronan tabata: 13 venezolano, 4 portugues, tres libanes, un dominikano, 4 merikano i un haitiano.
For di Port of Spain, ku un “flight-plan” pa Panama e avion a baha den kareda di mitar di dies na Aruba. Aki e avion a pasa anochi, sin muchu aktividat, pero den e avion tabatin hopi tenshon. For di Aruba e avion a lanta buelo ku destinashon Kòrsou, kaminda nan lo a tènk, paso ya e kapitan di e avion a pidi algun “flight-plan” pa entre otro Oropa, Asia i Medio Oriente. Pero kasi ningun di e plannan aki lo a resultá, pasobra simplemente bo no por bula e rutanan ei ku un DC-9, sin hasi diferente eskala, pa yena kombustibel.
Miéntras tantu na Kòrsou a forma un tim di krísis, enkabesá pa Minister di Hustisia Sr. ing. Don Martina i kasi e gabinete kompletu, ademas di Gezaghèber Ronald Casseres, Kònsùl General venezolano Luis Ochoa de Terán, direktor di Departamento di Salubridat Públiko dr. Carol Elassaiss, i sikólogo drs. Harold Arends.
Sr. Don Martina tabata komuniká ku e pasaheronan na papiamentu i hulandes, tratando di haña informashon di nan di e situashon den e avion i tambe pa haña sa e identidat di e sekuestradónan.
Na vários okashon tabatin yamada dramátiko di pasaheronan, hopi biaha bou di preshon di sekuestradónan, na outoridatnan di Kòrsou, pa hasi algu pa terminá e sekuestro. E sekuestradónan na diferente okashon a demostrá di no ta hasi wega. Nan a basha kerozin den avion i menasá di pega esaki na kandela i tambe a habri kòkpet i lòs tiru.
Na momento ku mester a hasi algu òf entregá algu na avion, e sekuestradónan tabata eksigí pa e hendenan bin avion na paña djabou òf na zuèmbruk. Mirando e situashon akí, ningun hende tabata disponibel pa bai avion i na dado momento, tabata Sr. Roy Singer, chef protokòl di Bureau Buitenlandse Betrekkingen (BBB) ku a ofresé pa bai hiba kuminda avion. Despues ku nan a pone pistol na su kabes, el a ninga pa un di dos biaha.
E sekuestradónan a laga algun persona den libertat, 2 mucha, un señora ku a drenta den shòk i un kabayero argentino, ku a primintí di bai buska un mion dòler pa e sekuestradónan for di su kuenta di banko. A resultá despues, ku e “wise-guy” akí ta mas bashí ku raton di kèrki. E amiga tambe a purba tira un pará, fingiendo ku e tabata na estado i ku e lo a haña un meskram.
Desenlase!
Despues ku e pareha di Hilerand Dominique a yega Kòrsou, outoridatnan a hasi un apelashon na dje, pa e trata na konvensé su partner, pa kaba ku e sekuestro i pa laga e hendenan den libertat. Hopi ta rekonosé ku esaki tabata un momento masha emoshonal. Outoridat a hasi uso di e momento aki tambe, pa a distraí sekuestradónan i miéntras tantu DISIP (Dirección de los Servicios de Inteligencia y Prevención) a subi avion, habriendo porta di parti patras di e avion i ku tirunan dirigí lo a likidá tantu e dominikano Segundo Felix Castillo, komo e haitiano Hillerand Dominique. Tabatin un enorme káos e momento ei, ku tur hende koriendo pa nan bida.
Den e drama akí, Kòrsou a haña bastante yudansa internashonal: DISIP i PTJ (Policia Técnica Judicial) di Venezuela, Denise pareha di Hillerand Dominique i un tim di spesialista for di Merka. For di rònt mundu Kòrsou a haña felisitashon pa e desenlase faborabel den asuntu di e sekuestro. Den un rueda di prensa despues, Sr. Don Martina a splika, ku ningun momento tabata nan intenshon pa kumpli ku eksigensianan di e sekuestradónan, pasobra kumpliendo ku esaki lo por a krea un presedente masha peligroso, ku na Antia sigur nan no kier a krea.
Pa loke ta trata asuntu di prensa, Kòrsou a konosé un momento hopi pretu, ora ku prensa lokal a tilda Kòrsou di a duna prensa internashonal un “red-carpet treatment” miéntras ku a tene prensa lokal rehen den un kamber ariba den aeropuerto.
Ironia di henter e situashon aki ta, ku riba promé di ougùstùs 1984, dia di e desenlase, nos kompania nashonal ALM a selebrá su di 20 aña di eksistensia.
