Kabei ta hopi mas ku un parti di nos kurpa. Na Kòrsou, durante hopi aña, e tabata i ta un símbolo di identidat, bunitesa, status i tambe di prehuisio. Awe mi no kier papia solamente di kabei, sino di nos memoria, nos kultura i e manera ku un tema asina simpel a marka hopi bida.

Mi tin e imágen ei ainda bibu den mi memoria/mente. Elsa mi mama: un baranka di muhé, den tur sentido di palabra, sintá den komedor, ku un di mi rumannan muhé: Maria, Lucille, Poppy òf Marvis, mei mei di su pia, tené di tal manera ku nan no por skit. Den su man e peña i riba mesa banda di dje, e skeiru di kabei i e bòter di pomada “Dixie Peach”. Un biaha e ta papia pa sinta ketu i si esei no tin resultado, e skeiru ta papia riba nan kabes.
Pober mi rumannan, nan no por a skit i mester a sinta ketu ketu, laga Elsa traha ku nan kabei.

Ora mi kòrda riba e esenario akí, mi ta komprondé e ekspreshon di Elis Juliana, den su obra “Kabei” den Wazo riba Ròndu ”ekspresando: “Si bo mira ku ki entusiasmo nan ta drenta den lucha kontra kabei,…”, pasobra realmente mi mama tabata bringa pa peña mi rumannan.

Ta mi mama tabata papia semper di bon kabei i mal kabei. Bon kabei ta e kabei fini di las i mal kabei ta e kabei krus/peper. Mi mama (Kranwinkel) tabatin bon kabei, kabei di las, miéntras nos a heredá e kabei di antepasadonan di mi tata Pinedo.

Mi amigunan ku kabei fini, tabata usa Brylcream pa nan peña i tene kabei plat, miéntras nos tabata peña i hunta pomada (i no vèt) Dixie Peach òf Moraline. Brylcream ta un krema blanku, miéntras ku Dixie Peach/Moraline ta manera un vaselin, sin koló. Asta den preis tabatin diferensia, pasobra Brylcream tabata mas karu.

Nunka asuntu di kabei tabata punto di diskushon entre nos amigunan. Mi kabei a bira un issue dia mi a bai Hulanda i ku makambanan, algun tabata gusta mi kabei i otronan tabata haña mi “kapsel” straño. Promé di a bai Hulanda, mi tabata sigui desaroyo di kabei afro den programanan manera Soul Train i sigui moveshonnan di Angela Davis, Stokely Carmichael, Malcolm X, ku tabata eksponentenan di afro di promé ora. Mi tabata full den Bo Frei su produktonan, manera Afro Sheen. Mi tabata laba kabei ku habon blou òf Life Boy i tabata flèktu kabei, pa ora mi kabei habri e tabata lusi muchu mas.

Nunka mi tabatin idea di hasi algu otro ku mi kabei, ku no ta laga esaki krese, flèktu, laba i sigui pela i kuida mi kabei manera mi ta hasi te dia djawe. Tabatin temporada ku hende hòmber tabata strika i stret kabei. Temporada di “wetlook”. Mi amigu Lloyd Thielman, músiko tabatin su kabei normal, el a kria afro, el a “föhn”, stret i hasi su kabei “wetlook”. Awor aki di baina e tin kabei mes, te pa papia di bon kabei òf mal kabei. Kada Loko ku su teima!

Kambia peper pa seda.

Hende muhé sí, semper tabatin i te ainda tin basta problema ku asuntu di bon kabei i mal kabei.
Sulin Passial den Kabei Krioyo: ‘I couldn’t even remember what my own hair looked like, because I’ve been straightening my hair from my ninth until I was twenty-one’.

Elis Juliana den su obra ‘Kabei’ : ‘Aña 1962 nos por yama “era di kabei”. Sekso debil a entregá nan bida den “hasimentu di kabei”. Mundu por bira banda robes, ta e kabei ta e kabei. Si bo mira ku ki entusiasmo nan ta drenta den lucha kontra kabei, bo ta keda asombrá…. Anto tin be e oreanan ta na plèki plèki pretu kaminda e peña di sakrifisio a slep”.

Den otro obra di Elis Juliana: “Chichi a bai stret kabei” Elis ta deskribí e kastigu ku un hende muhé mester pasa aden, pa hasi su kabei duru bira plat, kier men bira meskos ku hende ku tin bon kabei. Tabata usa un peña di heru (Elis Juliana a yama esaki: “peña di sakrifisio”) ku tabata keinta riba stof, pa despues peña e dama ku esaki. Manera Elis ta deskribí, esaki ta produsí un holó basta malu, basta desagradabel. E proseso akí tabata dura mas o ménos 5 ora. E tempunan ayá nan tabata pone e peña kenta riba stof, awendia esei ta sosodé riba un plachi eléktriko. Ora bo a pasa den tur e molèster akí, wak pa nan no kima bo ku e peña kayente, bo mester wak pa kabei no muha, sino esaki ta bolbe bira kabei krus atrobe.

Diskriminashon i kompleho!

Final di siglo diesnuebe, prinsipio di siglo binti, kabei las tabata e norma? Bo kabei por ta un motibu pa deskriminashon? I nos mes tambe tin kompleho di koló i kabei?.
Angela Roe, den su buki “Sombra di Koló” ta splika, ku bo kabei, bo koló i bo status sosial tambe por ta motibu pa diskriminashon.

Pader Paul Brenneker a pinta un situashon den su seri Sambumbu: “Ta luna pasá ei nan yu hòmber a kasa i ata e pareha a parti kaba. Ku un mucha muhé kabei las. Pero e no tabata sirbi, b’a tende”. Brenneker a skirbi tambe: ‘Hòmbu, hala un banda lagami pasa.’ ‘Awor pakiko ami mester hala un banda? Pasobra abo ta bruin ku kabei las anto ami ta pretu kabei í peper, no? ‘No binimi ku historia. Abo ke ku bo ta mas ku e neger akí anto p’esei e neger akí mester hala pa abo pasa.’ ‘Bo ta pérmitimi pasa akí nan?’ ‘Mir’aki, gayo, pasobra mi no ke pleitu mi ta hala, no pasobra mi ta pretu ku kabei di peper.’
Anto no mester lubidá Boy Dap su komposishon ‘Ba subi,” kaminda Boy ta kanta: ‘Kabei di peper a bira felpa.’Ba subi!

Awendia nos ta mira kabei ku otro wowo. Natural òf stret, las òf peper, tur tin mésun balor. Ora nos ta lesa e palabranan di Elis Juliana, Sulin Passial, Angela Roe, Pader Brenneker i skucha Boy Dap, nos ta komprondé ku asuntu di kabei nunka tabata solamente tokante moda. E tabata tokante kon nos ta mira otro i algun biaha, kon nos ta mira nos mes. Kambia peper pa seda ta keda un invitashon pa reflehá riba un pasado ku nos no mester lubidá, pa konstruí un futuro kaminda no ta hustifiká ni kondená ningun hende pa motibu di koló i kabei.

Material usá: 2Palabra tomo III Bòi Antoin: Bon kabei i mal kabei – Elis Juliana – Kabei i Chichi a bai strika su kabei – Paul Brenneker, Sambumbu (tomo 6 i 7), Kòrsou, 1973 – Huntu nos ta forma nos museo Nashonal: Peña pa strika kabei – Boy Dap: komposishon B’a Subi.