Si, ta bèrdat ku den temporada di kuaresma tin bientu hopi fuerte i ku ta un temporada ekselente pa traha i subi fli. Ta un temporada kaminda hopi biaha, nos hendenan ta apstené di hopi kos i ta sinti ku nan mester hasi algu èkstra pa motibu di nan religion.Ta temporada despues di karnaval ku bo ta haña ku bandanan musikal ta tuma un brake i tin tòg ménos aktividat di farándula ku kustumber.
Ami por ehèmpel ta usa e temporada di 40 dia pa no mishi ku alkohòl i tin algun di mi amigunan tambe a tuma e ehèmpel akí, ounke pa nan e temporada ta “largu manera kuaresma” (dura mashá largu – Sapaté, na bo Sapatu! – Reginald V. Römer)1Sapaté, na bo sapatu! Reginald V. Römer.
Mi sa ku segun informashon oral di grandinan di antaño tabatin mashá kuenta di spiritu,beigelof (e palabra akí no ta eksistí mas na papiamentu, ounke ami a lanta tende esaki) superstishon i ònsebar (hende ku direpente ta bira invisibel) den nos komunidat.Tabatin algun lugá, ku tabata famoso pa e kosnan akí, manera Fontein i Klof. Aparentemente hendenan ku tabata biba na Fontein a bandoná e lugá pa motibu di spiritu i ònsebar. Aparentemente lo a dera basta hende den Fontein ora ku bataya den Klof a terminá. E kunuku di Fontein a keda hopi tempu para bashí i a para bira un mondi grandi. Awor aki tin otro proyekto na Fontein i mi tin gana di hasi un bishita i puntra e hendenan ku nan tin molèster di spiritu i ònsebar.
Pierre Lauffer
Tantu Pierre Lauffer komo Elis Juliana a skirbi hopi tokante spiritu, brua i superstishon.Elis Juliana i Pader Paul Brenneker a hasi basta estudio i tin diferente entrevistá grabá tokante e fenómeno di spiritu, ònsebar, zumbi i almasola. Pierre Lauffer den su obra: Zumbi Spiritu, Almasola, den su prólogo ta skirbi: “Praktikamente henter mi bida m’a biba seka di santana. M’a kana buska nèshi di totolika den santana. I te ainda mi no tabatin e plaser di mira ni sikiera sómbra di spiritu. Tin hende lo bisa ku ta pasobra mi no a nase na saku. Ai, mi shon, pèrmitimi grita hari.” Pa bisa bèrdat, ami tampoko ta kere den e kosnan ei, ounke mi sa ku tin poko kos straño sa sosodé.
Komo mucha/hóben, lantá den bario di Mundu Nobo, bida di hendenan den mi bario tabata yená ku beigelof i klaro ku mi bida tambe. Loke mi ta konta ta kosnan ku mi a lanta kuné di mi bario. For di den barika di e mama, ya ta kuminsá stiwa e mucha ku beigelof. E mama no por hasi nada ku no ta normal, sino e yu su chèns pa nase ku defekto ta hopi grandi. Si por ehèmpel nan mira un hende ku hèndikèp, nan mester a skupi abou anto bisa: “Dios pordoná mi”. Kuantu mucha no a nase ku gan’e kos (un marka/sikatris) na nan kurpa? Ora yunan nase, ta bisti nan un kontra (un saku ku ta kosé na un repi paña pretu) ku tin ku spar e mucha di tur kos malu.
Si bo tabatin kestion ku kualke hende bo mester a paga bon tinu, pa e no bin basha porkeria na bo porta. P’esei bo mester semper bisti algu na bo pia mainta ora bo bai pafó. Si tin algu bashá dilanti bo porta, herebé awa ku binager bash’é riba e mancha i koba mama di esun ku lo a bash’é. Koba su mama i mand’é bai bèk serka esun ku a bash’é. Si bo haña sèn pretu abou den bo kurá tampoko no mishi ku ne. Ta sèn ku nan a usa pa baño pa kita mala suerte anto nan ta bin basha nan mala suerte pa bo. E brua mas usá tabata un galiña pretu morto bentá den kurá di bo enemigu. Tur e kosnan akí ta kosnan ku mester kima i benta nan afó, kompañá ku un letania di kobamentu di mama na adrès di esnan ku lo a manda nan.
Si bo tabata kier a kaba ku un hende mes, bo ta skirbi su nòmber kompletamente shete biaha na forma di krus i hink’é den un bòter ku zeta i klabu i kaba der’é. Asina lo bo destruí e persona.
Semper sòru pa bo tin un mata di yerba di hole, un mata di sentebibu i un galiña pretu pluma birá na porta di bo kas. E yerba di hole i e sentebibu ta pa kita mal airu. E kurason pretu ta yora ora un hende kontrali yega bo porta i e galiña pretu pluma bira ta kome tur brua ku nan basha pa bo. Ahan, papiando di bestia, no lubidá di buska un kachó muhé pretu, pasobra esaki ta mira spiritu i yora kore kuné. Spiritu tin mashá miedu di kachó muhé pretu. Pero si bo ke tin sigur pa brua no kue bo, anto bo tin ku bai fura. Despues di fura, bo ta haña un furu bistí ku lo protehé bo fo’i tur kos malu. Pa hende muhé ku bai fura, un furadó ta fura su matris tambe. I despues di 9 luna un yu lo nase. Esei lo tabata un parti di e seremonia dje furamentu.
Ahan tabatin hende ku por a hasi bo daño sin brua. Esaki tabata hende ku mal wowo òf wowo pisá. Nan tabata duna bo oyada. Bo tabata bira malu i hasta muri sin ku nan tabata sa ta dikon. Pa e motibu ei tabata hunta tur hende ku blous, blous di blousa paña. Pa mucha chikí nan tabata hunta blous bou di nan pia, tras di nan lomba òf garganta. No solamente hende por a haña oyada, pero bestia i mata tambe. Mi mama por ehèmpel no tabata gusta pa hende mishi ku su matanan. Segun mi mama tabatin hende ku man pisá òf mal man. Hopi biaha na hòfi kaminda tin bestia tambe, bo tabata mira kabes (karpachi) di un bestia òf un wea di pishi di bòltu na porta di hòfi. Den mi artíkulo: Sa yama òf pidi morto! – https://percypinedo.com/mikorsou/sa-yama-of-pidi-morto/ mi a deskribí kuantu manera tabatin ku por a yama morto.
Te na ora bo mira un spiritu bo tin ku gloria bo kurpa, bira bo paña banda robes i koba su mama. Nunka respondé si un hende yama bo anochi òf flùit bo, pasobra por ta un spiritu i si bo respondé e por skuma bo. Si bo yega bo kas anochi lat, nunka drenta ku kara. Semper drenta ku lomba pa bo no duna spiritu chèns pa drenta huntu ku bo. Pa evitá tur e kosnan akí, pone un krus na porta di bo kas.
Anto ata 2 manera pa esnan malamente enamorá i ku tin mashá gana di konkistá e shon! Si e persona no ke tende pa bo, bo ta purba kue un blenchi bibu. Bo ta saka su kurason sin mat’é promé, hinka esaki den un bòter di perfume i lag’é para un par di dia. Ora bo haña un chèns bo ta sprengu poko riba e persona deseá. Un otro sistema ta, skirbi nòmber di e persona na krus riba un pida papel, dobl’é ku un pida sèldu i hink’é den bo sapatu. Por último, pa tene pai na kas tin diferente sistema. Esun di mas konosí ta “aw’e shete”. Esaki ta un te trahá di awa ku un kotèks shushi aden. Kané den kòfi tambe ta tene pai na kas. (Zehi Metri, sosegá na pas)
