Artíkulo na okashon di un charla ku mi a tene tokante Otrobanda na Archivo Nashonal di Kòrsou.(27 di novèmber 2022).

“Bon Tardi i bon biní, kontentu di mira boso aki awe tardi. Mi mes no por kaba di kere mi kurashi, di bisa si, ora ku Sra. Modianne Cathalina a pidi mi, pa mi papia di Otrobanda, di mi eksperensia di Otrobanda, ku hendenan di Otrobanda i mas. Ei mes mi a pensa, dikon nò, dikon ami no por papia di Otrobanda, mi ta konsiderá ku mi tin tòg un relashon fuerte ku Otrobanda i asta tin diskushon ku si mi ta Otrobandista si òf nò. Husga pa bo mes!

Tur hende tin algu ku Otrobanda, un teritorio ku ta yega te Mundo Nobo, òf Mundu Nobo tambe ta parti di Otrobanda. Esaki ta un eterno diskushon, ku den diferente reunion, publikashon ta bin dilanti kada biaha di nobo. Ami a nase den Mundo Nobo. Mi ta di Otrobanda?

Kuantu hende no a skirbi di, òf kanta Otrobanda? Boso a kaba di skucha Ced Ride su Otrobanda i sigur konosé Izaline Calister den e tumba di Gibi Doran: Much’i Otrobanda. Gibi a kaba di brua e situashon, menshonando mi nòmber tambe den e tumba ei, komo mucha di Otrobanda.
Mi wela a biba den Kortijnweg 38 (mama di mi tata), e edifisio di Robby’s Lottery na skina di hanchi ei, ta mi teritorio kaminda mi a pasa gran parti di mi hubentut, ounke ku mi a nase den Mundo Nobo. Kortijnweg, Kura di Shon Fil bai paga seter, bai paga Credit Union den Sint Tharsisus, kumpra kos na tienda di bentana serka Pedjen, kumpra pinda serka Madam i bai plasa, kumpra karni fresku na un di e portalnan. I for di 1988 te dia djawe, mi ta bishitá e kas mahestuoso di Curom, sagradamente tur siman i hopi biaha mas ku un bes pa siman. Mi ta Otrobandista?

Pero semper mi ta puntra, dikon e Otrobandista di pura sepa ta defendé su teritorio asina bon i kiko ta hasié asina orguyoso di ta Otrobandista. (Tin hende ku no gusta e nòmber/palabra Otrobandista).

Bo no ta tende hende di otro bario, papia ku asina fervor di nan bario, manera un Otrobandista ta papia di su bario i asta hendenan di otro bario ta papia i gaba bario di Otrobanda, pa su hendenan, su bunitesa, su kayanan, su historia i su sekretonan.

Ounke ku mi ta kana den Otrobanda, mi ruta, Mundu Nobo pa Sint Thomas College, tantu den kurá di Frater komo na Hoogstraat i bèk pa Kortijnweg. Riba e ruta ei, pasando tienda di Madam, sastreria Odoma di famia Isenia, Botika Merikano, Botika Coromoto, Stupi Altu, Casa Blanca, Cornes, funerario di Silie, edifisio di Curom i lora drenta Kortijnweg. Mas aleu mi no ta yega den Otrobanda, klaro den wikènt ora mi ta bai sine na West End.

Pero mi a lesa hopi di por ehèmpel Teenstra i di Norbert Hendrikse, tokante Otrobanda i su kaya i hanchinan smal i di hendenan ku a nase i biba den Otrobanda. Norbert Hendrikse ta splika ku e hanchinan smal akí, hopi biaha ta karga nòmber di hendenan ku tabata biba einan, òf tabatin un tienda/pakus den e hanchi. Por ehèmpel Sebastopolstraat ta konosí den boka di pueblo komo “Hanchi di Warda” paso tabatin un warda den e hanchi ei. E nòmbernan akí tabata konosí te siglo 20, pero tiki tiki ta pèrdiendo nan nòmber di pueblo. Ta p’esei lo ta bon i mi ke rekomendá  boso, pa partisipá na kaminatanan ku ta tuma lugá den Otrobanda i un ku mi por rekomendá boso di kurason, ta esun ku Harry Moen sa organisá.

Sera konosí ku Hanchi di Techi (Dwergsteeg): Techi tabata un limpiadó di sapatu prosedente di Coro ku komo mucha a yega Kòrsou i ku tabatin hopi hende prominente di nos isla komo kliente.
Hanchi di Ma Katea (Boudewijn-Hendriksteeg) ta un kaya kaminda Ma Katea tabata bende pastechi, kòfi etc.
Hanchi di Bientu (Conscientiesteeg) hanchi ku kasi semper tabatin un brisa fresku ta waya.Seru di Trapi (Trapsteeg) un kaya ku ta konsistí di hopi trapi, subiendo di Breedestraat bai Frederikstraat. Aki aparentemente e legendario Don Pancho Pikaflor lo a biba, ku tabata un Don Juan di bèrdat. Aki a surgi e kantika di mucha, ku realmente no ta un kantika di mucha.
Seru di Shon Jos Martijn (Klipstraat) kaminda Shon Jos tabatin su “wenkel”. I Gallerosteeg ku ta nòmber ofishal, aparentemente a haña e nòmber akí, pasobra tabata organisá pelea di gai den e hanchi. E hanchi akí ta patras di e konosido negoshi di Shon Lou de Windt, “La Moda de Paris” ku tabata bende tela di kalidat pa tantu hòmber komo hende muhé. Den 1989 e negoshi a sera i si mi no ta kiboká aña pasá e fachada a basha abou i Fundashon Monumentenzorg Curacao a haña e maneho di e lugá. Ku esaki a bin un fin tambe na un parti típiko di Otrobanda, meskos ku nòmbernan manera Techi, Ma Katea, Don Pancho i hopi otro nòmber mas di e hanchinan.

Den siglo 19 diferente famia prudente a traha kas riba seru di Otrobanda, loke ku nan ta yama “Koralengebied”, pa nos konosí komo diferente “kurá’. Entre Rifwater i Breedestraat tambe tabatin “kura”. E konosido “kurá di Baka”, kaminda tabatin diferente reunion públiko di hopi partido polítiko i ku tabatin masha historia di esakinan. Pero Seru di Otrobanda ta e bario ku ta pará konosí pa diferente “kurá”. E kuránan akí a originá, ora ku e doño kumpra un pida tereno grandi, kaminda ta laga traha un manshon i rònt di esaki tabata traha diferente kas chikí pa personal, pero tambe pa hür. Un kurá konosí ta “Koba” i e hendenan tabata biba “den koba”.
Kuránan konosí ta: “Kurá di Shon Phil”(de Jongh) inisiadó di Loteria Fortuna, ku despues a bira Landsloterij. “Kurá di Shon Thoms”(Pietersz) i “Kura di Joubert”. Otro kuránan i bario tabatin nòmber di pais manera, Hulanda, Panama, Colon, Paris i Cartagena.
Un parti di Ref ku kisas Otrobandistanan no ta papia di dje ta e parti kaminda tabatin “Palu di Horka” i kaminda a konstruí “lazarus- en dolhuys” òf sea Montekristu.

Mi biahe dor di Otrobanda a kuminsá, dor ku mi tabatin e intenshon di skirbi un buki tokante teaternan di sine di Kòrsou i esaki a forma parti di mi hubentut, ya ku frekuensia mi tabata  bishitá Roxy, Cinelandia i West End Teater.
Otrobanda, Molenplein tabatin e promé teater di sine, Cine Curacao, despues a sigui Cine Guillermina den Frederikstraat, riba tereno di famia Joubert, Cine Rialto den kurá di Shon Nene Boom, ku despues a bira Hollywood di Dadachi Evertsz, i pa despues Yòmbi Mensing lanta West End aki nan.

Otrobanda ta kuna di asina tantu hende konosí di nos isla. Carlos Piar, Luis Brion , Ced Ride, Moises F da Costa Gomez, Luis Daal, Mgr. Amado Römer, Guillermo Rosario. Sigur 2 gobernadó a biba den Otrobanda, famia musikal Palm, Jan Gerard, Shon Dòdò i Shon Koko, Shon Djidji de Windt, Shon Janchi Boskaljon, Shon Dòdò Boskaljon, Julian Coco i Petoi, Jose Maria Capricornio, Fifi Rademaker, Harry Moen, Mem Vornis, Jules Blasini, Agustin Diaz, Papa Godet, Roald “Ati” Schotborgh (Dori Maco), Joseph Sickman Corsen, Pierre Lauffer, Luigi Pinedo, Maria Diwan, Luis Daal, Tip Marugg, Boeli van Leeuwen, mihó mi stòp, pasobra tin hopi mas ku a nasé i biba den Otrobanda. Polítiko, artista, eskritor, músiko, kantante, pintor, hende di prensa, dòkter, abogado i un sin fin di otro personahe. Ta bon pa mira ku Otrobandistanan ku a keda biba den Otrobanda, i otro nan ku a bolbe bai biba, t’asina orguyoso di nan bario i ta dispuesto pa yuda pone e bario bèk riba pia.

Banda di figuranan konosí i popular akí, Otrobanda tabata konosé hopi persona popular i partikular mas. Kada un ku su beinam, konsekuensia di su komportashon òf pa motibu di un suseso, desabilidat físiko òf mental.

Mameeuw, Sanikolas a muri, e ta yora sin konsuelo, Ia Kakiña, Piton Barba di suku òf Den Paris tin sneu. Duzjeni bati basia, ku ta kana hasi diferente anunsio den bario.

 Asina bo ta mira, ku semper Otrobanda, ya pa hopi dékada, hendenan tabata biba di nan kreatividat i awor akí komo bario nan ta sigui e mesun rumbo di kua “Kaya Kaya” ta un ehèmpel. Hóbennan ku ta laga mundu sera konosí ku e Otrobanda ku nos no konosé, i tur aña di nobo ta sorprendé mundu ku e tremendo festival akí.

Ta trese mi bèk na kuminsamentu di mi charla, kaminda mi ta sinti mi mucha di Otrobanda. Mi ta papia ku un par di Otrobandista i nan ta splika mi ku e mihó eiskrim di rum raisin, tabata di Recreation Park den Otrobanda, i ami ta trata na konvensé nan ku ta na Mundu Nobo Recreation Park ta pertenesé. Unda Otrobanda ta kuminsá i unda e ta kaba, ken por yama su mes Otrobandista, mi ta kere ku e diskushon ei lo sigui pa hopi tempu mas, pero un kos ta sigur, ku desaroyonan ku tin aworakí, ku estranheronan kumprando diferente edifisio i restourando esakinan, nos ta bai drenta un époka di un Otrobanda vibrante, ku lo tin hopi pa brinda nos mes i tur ku ta bishitá nos isla.”

Material usá: Een wandeling in Oud Otrobanda – Norbert Hendrikse
Tempu di Chinchirinchi – Bida i Muzik den Otrobanda. H. Moen
Otrobanda het verhaal van een stadswijk. René A. Römer
Piesa Otrobanda di Ced Ride- https://www.youtube.com/watch?v=v0ML1-anmNg&list=RDv0ML1-anmNg&start_radio=1
Poema di Luis Daal