Mi a duda hopi promé ku mi disidí di skirbi e artíkulo akí. No pasobra e tema ta tabú, sino pasobra nos ta papia mas di prostitushon en bes di papia di e protagonistanan mes. E historia aki no ta pa sensashon. Ta pa tende. Ta basá riba kòmbersashonnan, opservashonnan. Tur nòmber ta fiktisio.

Pa mi programa Zonido di pasado na Radio Hoyer, mi a papia ku dos señora, pero ku despues a nenga pa e entrevista (nan bos) pasa na radio i mi a respetá esei. Mi a disidí di skirbi e artíkulo akí a base di e kòmbersashon ku nan.

Campo Alegre ketu bai ta parse meskos. Mes muraya. Mes porta. Solamente e no ta funshonal mas. Pa e muhénan ku tabata biba ei den, e no tabata un lugá misterioso. Maria ta un señora di kuarenta aña, ounke e ta mustra mas bieu i e ta papia di e tempu ku el a pasa na Kòrsou. Manera vários di nan, Maria a bini di Colombia ku un plan kla. Pero plannan ta kambia.

“Mi no a bini pa keda,” e ta bisa. “Pero bo ta keda sin ripará.”

Bida den un sistema

Bida den Campo Alegre tabata organisá. Tabatin regla, kontrol, siguridat. Den rapòrtnan esei tabata nifiká biba regulá, “pero ami ta mira esaki komo biba segun e sistema” Maria ta sigurá.

“E trabou aki ta mas ku tur kos: warda, warda riba kliente, warda riba sèn. Warda riba e dia ku bo ta bisa: ta basta”

“Tabatin anochi di hopi trabou,di hopi kliente i anochi kaminda silensio tabata grita. Den e momentonan ei, duda ta drenta bo: duda den desishon ku bo ta tuma, den kiko ta pasando na bo kas na Colombia i bo futuro i kon largu bo por sigui hasi e trabou akí.”

Tiki biaha ta papia kon relashon di trabou i emoshon ta meskla. Un sonrisa, skucha i trankilisá, soportá brutalidat di kliente tabata parti di servisio. Ora e kliente bai bo ta keda ku su historia i bo ta keda horká ku e peso.

Mentira pa amor

Mi a puntra Maria si su famia na Colombia sa kon e ta rondia su bida: “Mayoria di nos ta manda plaka pa famia. E plaka ei ta un forma di amor, pero e historia ku ta bai kuné no ta kompletu, òf simplemente bisá ta mentira: nos ta traha den horeka, traha den bar, nos ta traha komo masahista. No ta pa motibu di bèrgwensa, sino pa protekshon. “Mi mama no mester sa tur kos,” Maria ta bisa.” “ E lo no por soportá esei”. E mentira akí ta un forma di keda mama, yu, ruman, sin destruí bo imágen den nan bista.”

“Ora ku bira anochi i tur lus paga, muzik stòp i tur kliente bai, bo ta keda ku pregunta, ken bo tabata promé ku bo a bin Kòrsou i ken bo kier ta ora bo regresá. Ora tur kliente bai, Bo ta keda ku bo mes. Loke ta keda ta kansansio, bashí, i algun biaha un tiki speransa”.

Speransa chikí, pero fuerte

“Mi no ta soña di bira riku, mi soñonan ta simpel, un kas, un tiendesita, un kásalòn. Speransa i mas speransa. Mi no ke keda hasi e trabou akí pa semper, ni lo mi no por tampoko”.

“Miéntras mi ta hasi plan,” Maria ta bisa, “mi ta biba.”

Prostitushon awe: mas invisibel i mas peligroso!

“Campo Alegre a permití komunidat pensa ku prostitushon tabata un kos leu for di nos bario. Nos no por usa esei komo èksküs mas. Awe prostitushon no tin nòmber Blachi Bèrdè, ni tin porta será. Awe prostitushon ta den bario kaminda muchanan ta hunga bala. Den kasnan komun i koriente. Den silensio”.

Reflekshon!

Ora mi a kaba ku e último kòmbersashon, mi no a sinti ku mi a kòmbersá tokante prostitushon, pero tokante hende. Tokante muhénan ku a siña kon pa sobreviví den un sistema ku no a duna masha opshon.
Mi tabata kargá.
Mi a sinti rabia.
No pa e muhénan, pero pa nos komo komunidat.

Pasobra nos a sera Campo Alegre i manda prostitushon bario.