Disfrutando di un cruise den Karibe riba barku Renaissance(antigua Maasdam), mi a kòrda riba algun amigu di mi, ku a yega di eksperensiá un “buitenlands verlof” di 6 luna biahando pa Europa òf a biaha den Sur Amérika.
Tabata eksistí un ordenansa tokante dia di verlòf di ámtenar ku ta data di 25 di novèmber 1924 (Koninklijk besluit van 25 november 1924) (Staatsblad no. 537), kambiá i kompletá pa P.B. 1932 no. 103 i finalmente kambiá pa ordenansa di promé di aprel 1946 no. 34. Ami bibando den siglo 21 no por komprondé kon e luho aki tabata eksistí, ku segun mi lo mester tabata un stròp enorme pa gobièrnu i a pone diferente ámtenar den debe grandi.
E areglo tabata insufisiente i diskriminatorio. E antiano mester a pasa 2/3 parti di su verlòf den eksterior ku muchu mas gastu ku su kolega hulandes, ku bon mirá a bai kas bèk pa 6 luna. Esaki tabata motibu tambe pakiko kasi 70% di ámtenar no tabata hasi uso di e areglo akí. Banda di esei, tabatin “uitgezonden krachten” for di Hulanda, ku nan aña den servisio di gobièrnu tabata konta dòbel, pasobra nan a bin di Hulanda.(Remitido di W.A. Maduro i Frans van Drie den Amigoe di Curacao 1973). C.P.I.M tambe tabatin un areglo similar i ku nan empleado (employe) por a bai “buitenlands verlof” despues di un kantidat di aña di servisio.
Pa gobièrnu esaki tabata nifiká, ku hopi biaha un ámtenar bai ku “buitenlands verlof” mester a buska un remplasante pa e ámtenar akí òf paga otro ámtenar overtaim i esun ku a bai ku verlòf ta haña su salario pagá durante seis luna akí.
Mediante publikashonnan ofishal den korant tabata anunsiá areglo speshal pa polis, “schutter” i dosentenan. Pa nan tabatin areglo speshal.
Tabatin tur sorto di posibilidat di bishitá Europa, Sentro i Sur Amérika ku barku. Na Kòrsou, K.N.S.M., C.T.C i S.E.L Maduro & Sons tabata esnan ku tabata bringa pa klientela e temporada di “buitenlands verlof” for di Kòrsou. Barkunan manera: Santa Rosa – Santa Maria – Santa Paula di Grace Line, Donizetti -Rossini- Michelangelo – Leonardo da Vinci- Rafaello – Cristoforo Colombia – Amerigo Vespucci – Andrea Doria – Marco Polo i Verdi di Italian Line. Miéntras K.N.S.M tabatin tur e “dam”nan: Maasdam – Rotterdam – Veendam – Rijndam – Nieuw Amsterdam di Holland America Line. Despues ku KLM a kuminsá ku buelo pa Costa Rica, nos hendenan a ekspandé nan destinashon pa Costa Rica tambe. Sigur empleadonan di Shell tabata hasi esaki.
Van Awasá naar Leidseplein
Den 1956, Jules de Palm a skirbi un remitido den Amigoe di Curacao, kaminda den un forma sarkástiko el a gaba e sistema di “buitenlands verlof” ku nos tabatin i ku ningun otro pais na mundu no tin. “Antia tin hopi problema i otro desafio ku nan tin di enfrentá. Pero ningun hende por kita di nan, ku nan tin un areglonan progresivo i ku por ta ehèmpel pa sobra di mundu”.
Jules de Palm a sigui den su artíkulo ku e antiano ta drenta pániko, pasoBRA dia ta yegando i kasi ta obligá e ámtenar i su famia subi un barku italiano bark’é pa Hulanda, kasi bisando e antiano: “bo ta bai Hulanda sino fono”. “Entre Awasá i Leidseplein, entre funchi i spaguèti, entre bapor i áwaseru, nos a pasa un tempu kaminda fakansi kasi tabata un obligashon”.
Jules de Palm ta sigui deskribí kon un vakashon asina tin di bai, kua lugánan e antiano mester bishitá. E ta hasta sugirí ku por bishitá otro partinan di mundu tambe, en bes di Hulanda.
Di mi mama mi a komprondé (konfirmá despues den Amigoe di Curacao) ku mi tio pader Kraanwinkel tambe a haña e ganga ei di bishitá Hulanda ku un “buitenlands verlof” ku tur kos pagá, dia el a kumpli i selebrá su hubileo di plata komo pader.
Imaginá bo, ku Bestuurscollege di e tempu ei (1964) a bin ku e idea pa eventualmente charter un avion ida i buèlta pa esnan ku tabatin idea di bai ku “buitenlands verlof” Hulanda.
Tabata papia tambe di un dòkter hulandes ku a traha 20 aña i a bai 3 biaha ku “buitenlands verlof” Hulanda riba gastu di gobièrnu.
Stanley Inderson, e tempu ei kabes di skol a manda un karta pa gobièrnu di Kòrsou, oponiendo e desishon di gobièrnu pa paga su gastunan pa “buitenlands verlof”. Alegando ku esaki ta hiba Kòrsou su gobièrnu den gastunan grandi i ku e sistema akí ta un apsurdes di marka mayó. Stanley Inderson a rechasá e “buitenlands verlof”. (Amigoe di Curacao 1953).
Mi a asta pensa, ku si no ta e idea di Stanley Inderson akí a hunga un ròl den e kambio ku a bin despues. Su manera di pensa a toka un punto sensitivo: un sistema ku tabata normal pa añanan largu, pero ku no tabata kuadra mas ku tempu moderno.
Mi a papia ku kuater diferente famia ku a bai ku “buitenlands verlof” i ku a konta di nan preparashon, biahe i estadia den eksterior. Den mi siguiente relato, mi lo konta di nan eksperensia.
Interesante pa sa e pida historia akí, kiko e tabata kome i bebe presis.
Seladonan tambe tabata baha esnan ku por afòrt ku nan buitenlands verlof di 6 luna .
Danki pa e dokumentashon aki !
Keep them coming !
Saludo,
Interesante i danki pa kompartí.
Berdat te ainda mi ya Korsa ku mi tanta kasa ku Un ambtenaar di gobiernu por a bai 6 luna ku vakantie konose ront sir amerika riba barku pasa ront sir amerika di atlantico pa paramo pacifiko bini bek Argentina chile brazil tur e paisnan ei anto ku mantenshon di salario Inkreibel
Un areglo ku nis aworaki no por kompronde
Danki Dios ela ser kambia nos pais no por karga e kos ei I no tin logika den e areglo ei
Pero esnan ku tbt biba e tempu ei a probecha
Hopi interesante. Dia mi a haña mi oportunidat pa bai , tabatin oportunidat pa keda si bai I haña un suma extra manera un vakantiegeld durante 6 aña tambe bo derechi di vakantie ta subi ku un kantidat di dia i mi a tumé. Pues ami no a huza e derechi di tuma un buitenlands verlof. E montante extra di plaka tabatin mas balor pami. Pero danki pa info, bon manera semper.
Mi tata a traha 32 aña pa gobièrnu. Mi sa ku na aña 1950 e a bai ku barku rònt Sur Amerika. Mi tin entendí ku ta na Argentina mi a keda “trahá”. Mi a nase na 1951. 6 aña despues nos tur a bai riba barku Oropa. Na Hulanda mi tata a kumpra un outo ku kual nos a kore bai te Madrid serka mi tio Luis Daal. Ei nan a laga nos serka un famia konosínan di Luis na Los Molinos, serka di Madrid, i nan a sigui bai keiru te Italia. Nos a biaha riba un barku ku bo a lubidá den bo lista ku hopi di e ambtenaarnan aki tambe a biaha riba dje. E famoso i notorio Santa Maria. Despues nos a regresá Kòrsou, i mi tata a barka e outo tambe bin kuné. Un Borgward ku e a kore te na su morto na 1962.
Hopi danki, Percy. Bon artikulo. Ami i mi kasá a kuminsa traha na aña 1967 i nos tur dos a kai den e derecho riba “buitenlands verlof”. Hustamente (segun mi den 1969) e areglo a ser kambiá i bo por a opta pa bai tog buitenlands verlof ora bo kumpli 6 aña, si bo a drenta den servisio durante e lei biew (un “overgangsregeling”) Of bo ta opta pa durante 6 aña largu bo kobra kada aña 1 luna di salario extra.
Pero por a hasi algu otro tmb. Nos ku tbt traha na RK Schoolbestuur a opta pa otro kos. Nos a tuma ontslag i bo werkgever e ora ei, segun regla, tin ku “reken af” ku bo, ke men e vakantiegeld di 6 luna bo ta kobré “en block”. Schoolbestuur ta nombra bo bek siguiente dia. Di bo banda tmb, bo ta kopera ku Schoolbestuur dor di traha e dia liber ei manera nada no a pasa. Kanimi, pa mi kanibo.
E areglo di 6 luna buitenlands verlof a ser instituí den antiguedat pa e ambtenarnan hulandes por a bai nan kas despues 6 aña di labor den trópiko pa asina mantene kontakto ku nan famianan i e bida na Hulanda. Logikamente e ambtenar yu di Korsou tmb a haña e derecho ei komo ku na dado momentu e tambe tbt bira ambtenar. No lubida ku e tempunan ayá ta Hulandesnan só praktikamente tbt ambtenar.
Tremendo topiko Percey i ns ta sa mas di e comments nn di esnan ku a aksperensiè tambe. Mi ta korda ku yu di konosirnan ku a bai e tempu ey, muchanan mester a sigi skol e 6 lunanan ey, pa ora nn bini bek nn no kai atras. Thanks again. Ns ta warda atrobe otro siman ku Dios ke.
E artikulo no ta solamente historiko, pero ta un reflekshon riba loke ta significá bin for di un isla karibeño pa bishita otro parti di mundo i e memoria ku a keda den hopi famianan Antiano riba esaki. Ta un mezcla di historia, kultura, memoria i un poko nostalgia pa e biaha henter i e lagadonan ku tabatin su importansia den bida di trabou i bida personal.
En berdad un artíkulo hopi historiko i interesante Percy.
Danki pa e relato i pida historia, Percy.