Disfrutando di un cruise den Karibe riba barku Renaissance(antigua Maasdam), mi a kòrda riba algun amigu di mi, ku a yega di eksperensiá un “buitenlandsverlof” di 6 luna biahando pa Europa òf a biaha den Sur Amérika.

Tabata eksistí un ordenansa tokante dia di verlòf di ámtenar ku ta data di 25 di novèmber 1924 (Koninklijk besluit van 25 november 1924) (Staatsblad no. 537), kambiá i kompletá pa P.B. 1932 no. 103 i finalmente kambiá pa ordenansa di promé di aprel 1946 no. 34. Ami bibando den siglo 21 no por komprondé kon e luho aki tabata eksistí, ku segun mi lo mester tabata un stròp enorme pa gobièrnu i a pone diferente ámtenar den debe grandi.

E areglo tabata insufisiente i diskriminatorio. E antiano mester a pasa 2/3 parti di su verlòf den eksterior ku muchu mas gastu ku su kolega hulandes, ku bon mirá a bai kas bèk pa 6 luna. Esaki tabata motibu tambe pakiko kasi 70% di ámtenar no tabata hasi uso di e areglo akí. Banda di esei, tabatin “uitgezonden krachten” for di Hulanda, ku nan aña den servisio di gobièrnu tabata konta dòbel, pasobra nan a bin di Hulanda.(Remitido di W.A. Maduro i Frans van Drie den Amigoe di Curacao 1973). C.P.I.M tambe tabatin un areglo similar i ku nan empleado (employe) por a bai ku “buitenlandsverlof” despues di un kantidat di aña di servisio.

Pa gobièrnu esaki tabata nifiká, ku hopi biaha un ámtenar bai ku “buitenlandsverlof” mester a buska un remplasante pa e ámtenar akí òf paga otro ámtenar overtaim i esun ku a bai ku verlòf ta haña su salario pagá durante seis luna akí.

Mediante publikashonnan ofishal den korant tabata anunsiá areglo speshal pa polis, “schutter” i dosentenan. Pa nan tabatin areglo speshal.

Tabatin tur sorto di posibilidat di bishitá Europa, Sentro i Sur Amérika ku barku. Na Kòrsou, K.N.S.M., C.T.C i S.E.L Maduro & Sons tabata esnan ku tabata bringa pa klientela e temporada di “buitenlandsverlof” for di Kòrsou. Barkunan manera: Santa Rosa – Santa Maria – Santa Paula di Grace Line, Donizetti -Rossini- Michelangelo – Leonardo da Vinci- Rafaello – Cristoforo Colombia – Amerigo Vespucci – Andrea Doria – Marco Polo i Verdi di Italian Line. Miéntras K.N.S.M tabatin tur e “dam”nan: Maasdam – Rotterdam – Veendam – Rijndam – Nieuw Amsterdam di Holland America Line. Despues ku KLM a kuminsá ku buelo pa Costa Rica, nos hendenan a ekspandé nan destinashon pa Costa Rica tambe. Sigur empleadonan di Shell tabata hasi esaki.

Van Awasá naar Leidseplein

Den 1956, Jules de Palm a skirbi un remitido den Amigoe di Curacao, kaminda den un forma sarkástiko el a gaba e sistema di “buitenlandsverlof” ku nos tabatin i ku ningun otro pais na mundu no tin. “Antia tin hopi problema i otro desafio ku nan tin di enfrentá. Pero ningun hende por kita di nan, ku nan tin un areglonan progresivo i ku por ta ehèmpel pa sobra di mundu”.

Jules de Palm a sigui den su artíkulo ku e antiano ta drenta pániko, paso dia ta yegando i kasi ta obligá e ámtenar i su famia subi un barku italiano bark’é pa Hulanda, kasi bisando e antiano: “bo ta bai Hulanda sino fono”. “Entre Awasá i Leidseplein, entre funchi i spaguèti, entre bapor i áwaseru, nos a pasa un tempu kaminda fakansi kasi tabata un obligashon”.

Jules de Palm ta sigui deskribí kon un vakashon asina tin di bai, kua lugánan e antiano mester bishitá. E ta hasta sugirí ku por bishitá otro partinan di mundu tambe, en bes di Hulanda.
Di mi mama mi a komprondé (konfirmá despues den Amigoe di Curacao) ku mi tio pader Kraanwinkel tambe a haña e ganga ei di bishitá Hulanda ku un “buitenlandsverlof” ku tur kos pagá, dia el a kumpli i selebrá su hubileo di plata komo pader.

Imaginá bo, ku Bestuurscollege di e tempu ei (1964) a bin ku e idea pa eventualmente charter un avion ida i buèlta pa esnan ku tabatin idea di bai ku “buitenlandsverlof” Hulanda.
Tabata papia tambe di un dòkter hulandes ku a traha 20 aña i a bai 3 biaha ku “buitenlandsverlof” Hulanda riba gastu di gobièrnu.

Stanley Inderson, e tempu ei kabes di skol a manda un karta pa gobièrnu di Kòrsou, oponiendo e desishon di gobièrnu pa paga su gastunan pa “buitenlandsverlof”. Alegando ku esaki ta hiba Kòrsou su gobièrnu den gastunan grandi i ku e sistema akí ta un apsurdes di marka mayó. Stanley Inderson a rechasá e “buitenlandsverlof”. (Amigoe di Curacao 1953).

Mi a asta pensa, ku si no ta e idea di Stanley Inderson akí a hunga un ròl den e kambio ku a bin despues. Su manera di pensa a toka un punto sensitivo: un sistema ku tabata normal pa añanan largu, pero ku no tabata kuadra mas ku e tempu moderno.

Mi a papia ku kuater diferente famia ku a bai ku “buitenlandsverlof” i ku a konta di nan preparashon, biahe i estadia den eksterior.  Den mi siguiente relato, mi lo konta di nan eksperensia.