Den mi programa di radio riba djadumingu, mi a toka piesanan di den añanan 70 bai ariba, rekordando temporada di High Flying Park. Den mi introdukshon mi a pidi, pa laga nos ban papia di e temporada grait di hopi rekuerdo, pero por fabor apstené di duna opinion kua tabata mas mihó, mas original, mas bishitá ets. Pero ban konsentrá mas riba e kreatividat di nos hóbennan di e tempu ei. Den e artíkulo akí, ami lo konsentrá riba e parti kreativo i e historia di e temporada ei.

Den final di dékada 60 i kuminsamentu di 70, a surgi un movementu, un fenómeno nobo riba nos isla. Hóbennan ku tabata pasa nan tempu riba terenonan bashí, sin nada ariba, òf riba terenonan ku tabatin edifisio/kas, ku no tabata den uso, a disidí di drecha e lugá ei den un forma úniko, hasiendo uso di kreatividatnan di pintura, obra di man i otro artenan, pa desaroyá e tereno ei di tal manera ku nan tabata pasa nan tempu mas agradabel posibel ei nan. Atrobe ami ta sali for di mi bario Mundu Nobo, kaminda nos tambe, meskos ku den otro barionan a krea un sitio asina. Nos sitio tabata na skina di Jan Otzenstraat, dilanti di fèlt di Mundu Nobo. High Flying Park di “Heer Bommel”. E ekspreshon High Flying Park nos a usa e tempu ei, komo un ekspreshon ku tabata kuadra den e temporada ei. Eksaktamente kiko nos tabata kier men ku e ekspreshon ei no ta verifiká, pero lo no straña mi nada ku e tabatin algu di aber ku e estado “high” ku de bes en kuando e hubentut tabata sintié. E holó ku tabatin den e parkenan por a duna un indikashon di unda e nòmber ta bin.

E parkenan akí tabata mas ku simplemente un lugá kaminda hubentut tabata bin sinta i pasa tempu, Tabata ekspreshon di hubentut, di kreatividat, di nos forma e tempu ei pa buska nos independensia di mayornan/adultonan, nos ekspreshon di “peace”. Den e parkenan aki, hubentut tabata interkambiá di idea, músika, toka i rekonfirmá nos “brotherhood”. Músika di entre otro Hermanito Narvaez, tabata kompletá e ambiente den e parkenan akí. Ta masha normal, ku Uriah Heep, Santana, Yes, Billy Paul, Neil Young, Isaac Hayes, Bob Marley i protagonistanan di Wood Stock tabata zona, esaki tabata músika komun i koriente den e parkenan akí. Klaro ku nos bitbèntnan no por a keda atras.

Resiklahe

Kreatividat nos tabata usa i bo por bisa ku ya for di e tempu ei nos tabata resiklá, ya ku dekorashon di e parke tabata kosta masha poko, tirenan bieu, bòter bèrdè, greistenchi, kalbas seku, palèt i hopi otro artefakto, ku no tabata usa mas i ku tabata trese nan den un forma artístiko, kreativo den e parke. I klaro e koriente tabata esensial, paso e “black light” no tabata por a faya.

Banda di nos na Mundu Nobo, hóbennan di Wishi/Marchena a transformá teater Rex den un obra di arte presioso i tabata kompetí ku Mundu Nobo den un forma masha sano ekspresando nan kreatividat. Dòmi tambe tabatin nan parke, Dein, St. Jago, Seru Fortuna, Suffisant, Wespen, Montaña, Oranje Straat i diferente otro parke mas.  Den Mundu Nobo, nos a haña bon koperashon di adultonan ku tabata koperá ku nos den diferente aktividat. Asina por ehèmpel, Charles Fernan, hòpman di Grupo 8 i tambe maestro den ahedres, a organisá kompetensia di ahedres den nos parke, nos a pone misa den parke, ku nos pastor Wim Ellis a hasi, den parke nos banda di bario,Twilight Zone( Eric Calmes, Cedric Dandare,Harry Moen, Axel Prudencia, Rafael Pichardo) a bin toka.

Mantenshon

Hubentut tabata mantené nan parke masha bon i tabata tene e parke limpi, es mas for di kreashon di e parke, a nase un amor mas grandi pa nos bario i tur hende a bin huntu i a kuminsá mantené nos bario limpi i dekorá nos bario den temporada di fiesta i fin di aña. Aki un biaha mas mester menshoná e yudansa grandi ku bario tabata haña di Edsel Evertsz. High Flying Parke a bira un atrakshon turístiko riba nos isla. Mester menshoná Nel Simon ku Norva Sling ku tambe a duna nos diferente idea kon pa organisá i dekorá nos sitio. Remarkabel tambe, ku nos no tabatin un lider den òf di e parke i e parke tabata di nos tur i nos tur mester a kuida e parke. Un idea fuerte di nos e tempu ei tabata, ku ta nos mes a traha nos kos i ta sinti esei komo di nos i tabata protehá esei ku alma i kurpa. Kontrali na un bürtsèntrùm, ku ta un regalo ku nos a haña ku bo por bisa a kai for di shelu. Kontrali na otro parkenan, nos di Mundu Nobo a haña bon koperashon di Aqualectra, ku ta un kompania establesé den Mundu Nobo.

Nos mester bisa ku ta den oranan di atardi i tempran den anochi e parke tabata aktivo, paso mayoria di nos tabata bai skol i/òf traha mainta i p’esei mas lata anochi nos parke tabata sukú.

Sierto barionan a bai muchu leu den organisashon i mehorashon di nan parke, i tabata hasi uso di material i artefaktonan di gobièrnu, pa dekorá nan parke i tabata kue por ehèmpel e flambeunan ku gobièrnu tabata pone riba kaminda i usa esakinan den nan parke. Un tempu polis a start un razia, buskando propiedatnan di gobièrnu.

Ami a bai Ulanda pa sigui studia i tiki tiki kosnan a kuminsá kambia i parkenan a bai atras i hubentut a kuminsá hala pia for di parkenan.
Pa kolmo un partido politiko a disidí di bin ku un kampaña ku a kaba di daña kos mes mes. Nan a pone un kompetensia pa wak kua bario tabatin e parke mas original/bunita. E kompetensia sano, amikal ku tabata eksistí a kambia i bira un kompetensia, kompetitivo ku a kaba di daña tur kos.
Pa motibu di desishon partidario i no ophetivo, mi ta kòrda ku a pega un di e parkenan na kandela.
Na Sint Jago, Oranje Straat i Wespen, ainda bo ta mira sobra di e parke, i durante un plan di fakansi, mi a bai bishitá e parke di Wespen ku mi nietunan, mustrando nan kon nos tabata organisá nos mes den e final di dékada 60 i den 70. Na aña 1980 High Flying Park di Sint Jago tabata kasi e úniko ku tabata aktivo ainda

Boneiru tambe tabatin su High Flying park i na St. Maarten den 2010 nan a purba trese e ambiente di High Flying Park bèk na moda, pero den un par di tempu esaki a para na aros di koko.