Pa nos kòrda Yapi Martijn!

Esun ku pèrsistí ta logra!

16 Dec, 2023

Den Ñapa di 9 di mart 1991 i Ñapa di 14 di mei 1994, respektivamente Marcel Frans i Ieteke Witteveen a publiká un artíkulo relashoná ku Serapio “Yapi” Martijn. Ami a entrevista Yapi Martijn un biaha den programa AGAN na Curom. For di e tres fuentenan akí, mi a kompilá e siguiente artíkulo: “Pa nos kòrda Yapi Martijn”.

Serapio Gregorio Martijn a nase dia 14 di novèmber 1934 na Kòrsou. Komo mucha di Marchena el a bai na un misa Atventista den Mundu Nobo, kaminda el a siña e promé prinsipionan di muzik. Yapi tabata bishitá diferente ensayo di vários banda i tambe e tabata bishitá fiesta bailabel, kaminda tantu bandanan lokal komo bandanan internashonal tabata toka.

Kon Yapi a kuminsá den muzik!

Yapi Martijn mes a kuminsá su karera musikal den “Sonora del Caribe”, un banda di su bario Marchena. Manera Yapi mes tabata bisa, ku semper tabata lubidá su bario Marchena i for di e tempu ei e bario tabata kategorisá komo un bario marginá. Manera el a konta, el a bai un fiesta na Parera, kaminda “Conjunto Cristal” tabata toka, bou di direkshon di e pianista Arquimedes Fermin. Fermin a impreshoná Yapi dje tantu ei, ku el a disidí di dediká su mes na tokamentu di piano. Nan tabata toka i balia e tempu ei hopi den Bar Onze Vlag, un bar ku nan mes tabata yama “Kabarèt di Alpargata”, kaminda nan tabata balia ka’i òrgel i tambú. “Nos plaser den nos mes ambiente tabata inkomparabel”.

Yapi Martijn den bida diario tabata traha komo ámtenar na Gobièrnu Sentral, i komo músiko el a toka den diferente banda. Yapi su eterno preokupashon tabata ku e ta haña ku no tabata duna e artista lokal e rekonosementu ku e meresé. Siendo ku ora nan bai den eksterior, representando Kòrsou, nan, komo artista, tabata haña un trato tur afó i na nan propio isla esei no tabata e kaso.

Chapo!

Durante e temporada ku Yapi a krese komo hóben, muzik Kubano tabata zona aki na Kòrsou. Guaracha, bolero, danson tabata zona tur kaminda i asta nos na Kòrsou tabata sintonisá muzik di Cuba, via  e emisoranan Kubano, Radio Progreso, Radio CMQ, Cadena Azul i aki na Kòrsou via 1010 Radio Hoyer. Sonora Matancera, Trio Matamoros, Conjunto Casino, Orlando Vallejo, Arsenio Rodrigues i Beny Moré tabata artistanan masha gusta na Kòrsou. Hopi biaha amantenan di e tipo di muzik akí tabata topa otro na El Louvre, Casa América di René Hurtado, Music Store Moderno di Tomas Henriquez, La Bonanza, Benar Sales i Discolandia Cuales. “E muzik kubano tabata esun ku tabata interesá nos i nos tabata hasi nos esfuerso pa imitá esaki mihó posibel”, asina Yapi Martijn a komentá. Esaki a dura te na kuminsamentu di dékada 60. E tempu ei hubentut tabata sigui loke tabata na moda i bo por bisa di e tempu ei ku tur hende tabata “chapo”.

“Popularidat di e bandanan di Cuba tabata grandi i diferente promotor tabata trese e bandanan akí Kòrsou. Tabata bandanan tòp di Cuba”, Yapi tabata komentá, “i nan mester a toka ku nos orkestanan, ku ningun momento no tabata baha kabes pa esnan internashonal. E frater- i brudernan di Brakapoti tabata e proménan pa instruí nos hóbennan músika i di e skina ei a sali entre otro: Chal Atalita, Edgar Supriano, Carlino Snijders, Juan Camelia, Bobby Allee. Komo músiko amatùr, nos no tabata ménos ku esunnan internashonal. Nos isla tabata riku na músiko, kantante i bon músika”.

Den dékada 40 i 50 Kòrsou a konosé masha hopi aktividat musikal.Nos no tabatin instrumènt manera tin awor aki, pero nos tabata zona profeshonal. Por ehèmpel, “Conjunto Universal” den dékada 50 tabata kobra 300 florin pa un banda di 12 hende. Bo no por a kumpra un piano, pero bo mester a hür e instrumènt serka Patrick na Johan van Walbeeckplein, kaminda awor akí ta CITCO. Abo mes mester a transportá e piano. Yapi ta remarká: “Kompará un banda manera Estrellas del Caribe, ku un popularidat enorme, no a yega Hulanda, miéntras ku awor akí kualke banda un pa dos ta na tera friu”.

Rekonosimentu!

Yapi Martijn: “Nos tabata produsí muzik na nivel pero di ningun manera bandanan lokal, músikonan lokal tabata haña e rekonosementu ku nan tabata meresé i ami a purba, na mi manera di trese un kambio den esei, produsiendo dos buki tokante e bida musikal di Kòrsou. Ningun hende no tabata kere den e proyekto akí, ku mi a inisiá na aña 1988. Mi tabatin e idea pa skibi un buki i mi tabata buska informashon tur kaminda”, Yapi Martijn a konta. “Mi kier a duna rekonosementu na e artista/músiko lokal.Pero mi no tabata hasi esaki di un forma struktural.
Tabatin un buki di muzik, skibí pa Edgar Palm, pero den e buki akí el a skibi di un otro tipo di muzik: di nos wals, dansa, mazurka i te na final el a skibi algu di músika popular.
Ántes bo no tabatin programa di farándula manera Waya i AGAN, ku tabata papia i elogiá artistanan lokal. I tabata krea e persepshon ku no tabatin bon artista/músiko lokal”.

Den mi afan pa skibi tokante muzik lokal, mi a disidí di kue e époka di 1930 pa 1989, komo ku esaki tabata e époka ku a trese kambio den nos muzik lokal. Promé ku esei tabata muzik di Dinastia Palm i di Boskaljon tabata toká, pero despues di 1930 septeto i konhunto a drenta i Kòrsou a haña mas radioemisora i e ambiente a kambia. Mi a pasa den hopi problema pa haña informashon, pa dokumentá e pida historia akí, hopi di nos artista-/músikonan no tabata bon organisá i nan no tabatin e informashon di nan karera dokumentá.  Yapi Martijn: “Ku tur e bon boluntat ku hendenan kier a yuda mi, mi a pasa den bastante turbulensia pa mi por a yega na e informashon ku mi tabatin mester”. Resultado: Maleta yen di artíkulo di korant, masha hopi potrèt.

Despues durante dekada 60, a bini e bitbèntnan di Kòrsou, atrobe hopi imitashon, pero den e kaso akí músika pòp, i aki a kuminsá e distinshon entre músika pa hóben i “chapo”. Radionan a kuminsá promové bandanan di guitara plat i orkestanan a kuminsá disparsé. Un San Hose i Estrellas del Caribe a keda un tiki mas largu. Despues tabata époka di Doble R i Dynamic ku òrgel i synthesizer na lugá di trompèt.

Fong Sintjago tabata esun ku a konta Yapi basta historia di 1930 bin ariba i Yapi a kolekta un kantidat di potrèt tambe di e bandanan, ambiente, klupnan di ántes. Yapi ta rekonfirmá: “Kòrsou tabata musikalmente masha bon desaroyá”. I tabatin diferente klup bon tambe, manera Klup Sentro Sosial Katóliko den Penstraat, Klup Kwiek den Otrobanda i Klup Kòrsou, bisiña di Radio Hoyer.

Poniendo skibimentu di e buki komo meta pa realisá e obra di su bida, Yapi, konfrontando masha hopi problema, pleitu ku diferente instansia na Kòrsou, sektor privá ku no tabata koperá manera tabata spera di dje, departamentonan di Gobièrnu, tantu Insular komo Sentral, diferente medio di komunikashon, entre otro ku nos di AGAN, Asosiashon di Músiko di Kòrsou, problemanan finansiero ku OKSNA ets. a pone ku finalisashon di e buki a tuma mas tempu ku a premirá. Den e prólogo di Kòrsou Musikal Tomo 2, Yapi Martijn ta habri afó kontra tur oposishon ku el a haña riba su kaminda pa realisá e proyekto akí.

Na final di 1993 e buki Kòrsou Musikal, Tomo I, un dokumentashon di nos historia musikal popular entre 1930 i 1989, a mira lus di dia. Un buki di 277 página i ku mas o ménos 136 potrèt. Den e buki Yapi ta menshoná mas di 200 banda/konhunto ets. i un kantidat sin presedente di artista. Un kos nos sa sigur, ta un buki skibí ku hopi amor. E no tabatin pretenshon di ta eskritor, pero el a relatá e historia manera e tabata konos’é i manera el a haña informashon serka un gran kantidat di músiko i amante di muzik.
Yapi ta menshoná tambe teater i empresario. Teater manera Roxy, Cinelandia i West End, i empresario manera Angel Job, Romualdo Hanst, Moy Galante, Dugo Schenker, i bailarin manera Juancho Smith, Ana Elegante, Elena Thaina i Chuki Scharbaai.

Na 1999 e di dos Tomo a mira lus i a kubri mas grupo/banda di dékada 60, 70 i 80. E rekuerdonan di nos añanan di gloria, ku asina tantu kos bunita i positivo, ta trese euforia, pero na mes momento ta trese tristesa tambe. Kiko a hasi ku tur e esfuerso kultural i e kreatividat di esnan ku a bai nos dilanti durante e dékadanan akí? Unda e rèspèt pa nan a keda? Fuera di algun kaya ku a haña nòmber di algun kantante/artista/músiko. Un hoben ku pasa, por ehèmpel den Kaya Koko Le Pol, e nòmber di kaya ei no ta bisa e hoben nada, pasobra ningun hende no a siña e hoben ken Koko Le Pol tabata. Por sierto kayanan ku hopi biaha ta sushi, mal mantené.

Yapi Martijn mes tabata hopi desepshoná di kon e mester a konfrontá tantu problema asina pa publiká e dos tomonan akí. Si no tabata pa “amor al arte”i e nesesidat pa krea i ekspresá loke ta di nos mes, awe Kòrsou lo tabata un isla sin detaye di su historia di muzik dokumentá. Afortunadamente Serapio Gregorio Martijn a traha kasi dos dékada riba produkshon di “Kòrsou Musikal”.

Yapi Martijn a mira e nesesidat di dokumentá nos kultura musikal i duna rekonosementu meresí na nos baluartenan, i nos hóbennan tambe por siña konosé nos balornan musikal. Manera Yapi mes a bisa: “Ta duele ku hopi di nos baluartenan a muri bai, sin mira realisashon di e dokumentashon akí den su totalidat”, loke semper tabata su deseo ferviente.

Yapi a fayesé dia 3 di desèmber 2023. Fuera di baluarte di Marchena, na bida Yapi no a haña ningun rekonosimentu. Ta duele ku ta di e manera akí mester pidi atenshon pa esnan ku hopi biaha, demasiado biaha, nos ta lubidá.

24 Comments

  1. Javier de Castro

    Don Percy! Hopi interesante manera semper. Mi tabata hopi jong pero mi ta korda señor Yapi Martijn. Lo mi ke sa mas. By the way no tin chens ku “AGAN” por hasi un comeback?
    Mi ta korda djasabra merdia mi mama tabata klaba na radio pa tende e programa. Lo ta bon pa pasa e grabashon nan atrobe ora por!
    Saludó!
    -Javier

    Reply
    • Naika Martijn

      Masha danki pa e relato Percy, i tambe na tur hende pa nan palabra di konsuelo. Di parti kasá i yunan di Japi.

      Reply
  2. Sherman De Jesus

    Bon tardi Percy, Un articulo fantastico ku hopi informashon tokante muzik ku nunka mi no a tende di dje. Mi ta korda si Curom. Nos tabata sali Fleur de Marie bai ariba den e studio grandi kaminda Estrellas del Caribe tabata toca. Mi ta korda e bassista ku un dobbel bass di koriente. E tabata usa masha tiki noot mes. Masha minimalista. Mi no ta korda su nomber, e tabata fenomenal. Nunka mas mi no a tende un hende toca bass asina. Danki pé artikulo.

    Reply
    • percy.pinedo

      Danki Sherman, e bahista tabata su ruman: Shon Mi Supriano.

      Reply
      • Carlos Larmonie

        Danki pa e informashon aki Percy. Historia di nos faranfula no tin mag di bai perdì jamas i nunka. Ma toka i kanta kasi 12 aña den Trio Los Arpegio’s i sigur 3 aña den Trio Los Curaçoleños kaminda mi tabata fìa tapenan di grabashon den Bibloitéka Publiko pa mi skucha piesanan di antes pa ponenan den nos reportorio. Bunita musika. Einan ma sera konosi ku algun musiko grandi di antes. Bale la pena dokumenta e informashon di nos tesoronan musikal. Sigi ku e bon trabou aki Percy. Thanks pa komparti.

        Reply
  3. Iris Martina-Koeyers

    Danki pa a buta Yapi den Spotlight. Mi ta apresia. Nos mes hendenan na prome lugar. Nos a lanta komo mucha den Wishi, konosiendi e, komo Yapi pianista di Wishi. Yu di Hilda Martijn. Despues el a kasa i sigi biba den Wishi. Un pashon pa su musika i su boekinan ku el a skirbi. E tabata kier a traha un Dokumental di nos artistanan, ku mi kasa. Lastima nan no a logra. Pero mi ta kontentu ku na su morto a dune su Rèspet i ku Frima su kasa i yunan lo a keda kontentu. Spera e haña un rekonosimiento mas, ku e por R.i.p. Masha danki Yapi. I danki na bo tambe sr. Pinedo.

    Reply
  4. Mavis Mambi

    Ta di komprendé frustrashon di Yapi.
    Nos enseñansa, sigur básiko, durante ami su añanan na skol i despues komo maestra na skol preparatorio, masha poko a duna importansha na formashon musikal i nos mes músikonan.
    Kon diferente lo tabata si esaki a tuma lugá.
    🎹🎼🎻🪇🎸🪘🎤🎺
    Loke nos sembra, nos ta kosechá.

    Reply
  5. Mavis Mambi

    Ta di komprendé frustrashon di Yapi.
    Nos enseñansa, sigur básiko, durante ami su añanan na skol i tambe despues, komo maestra na skol preparatorio, masha poko a duna importansha na formashon musikal i nos mes artistanan.
    Ki diferente esaki lo tabata si esaki a tuma lugá.
    Loke bo sembra, bo por kosechá!

    Reply
  6. Frederik L Belliot

    Pipo hopi bon .Ami a Sinja konose Japi na Vi Coco.Einan e tabata trese su komentarionan,i ponensia .E tabata un homber ku tabatin musika hopi na pecho Gran homber,bon musikante .Swa di Gonetnan den Charo R I P Japi.

    Reply
    • percy.pinedo

      Si, serka Vi Coco el a haña hopi innformashon tambe.

      Reply
  7. Solange

    Ahinda mi ta tende Yapi konta su verhaal di kon e mester a kana kaminda di krus pa saka su bukinan.
    E tabata pasa tur siman serka nos (Mensing’s Caminada)pa puntra kuantu buki a bende i si no a bende e kantidat ku e tabata ke, semper e tabata bisa ku “nos hendenan” no ta balorá nos musikonan.

    Reply
    • percy.pinedo

      Solange danki pa bo reakshon. Esei ta e Yapi ku mi tambe a konosé.

      Reply
  8. Pietje

    Percy danki trobe pa e bunita tópikonan ku bo ta relatá, sigur pa e manera ku bo ta deskribí nan. Tópikonan ku ètòl mi no tabata interesá den nan. Danki pa a lagami sera konosí ku nan. Lo mi tabata yalurs riba e hubentud ei si mi no tabatin otro tópiko ku pa esei mes mi no tabatin sufishente tempu.

    Reply
    • Ramon Penzi

      Hoping interesante ya ku tin hopi parti di su bida ka ami no tabata sa.
      Den tur dos business ku e a skill ultimo mi nomber ta mensioná ku potrèt.
      Yapi Deskansa Na Pas.
      Ramon Penzo

      Reply
    • percy.pinedo

      Bon mirá, e dosnan ei por a bai huntu

      Reply
  9. Constanciagildo

    Un berdat lamentabel, pero kon por trese e kambio den esaki.
    E minister van Heydoorn ta parse hopi habri pa juda den algu asina aki.
    Persey abo i Gibi nan aki por bini ku un esentiva pa trese un kambio den esaki, pa e kosnan aki bai Skol i bira historia pa Korsou, sino ta asina aki lo e sigui. Ata Bachata tambe ta dominando kaya 😍

    Reply
  10. Ronny Winklaar

    Percy mi brother, Dios bendishona bo. No kansa. Sigui ku bo esfuerso nan pa yuda nos pueblo ku dolumentashonnan ku tantu nos ta karese di dje.
    Tur kos bon.

    Reply
  11. Raymond Isenia

    Mi konose Yapi hopi aña pasobra nos tbt personanan uriundo di Marchena.
    Ami ku Yapi kasi tur dia tbt topa na Otrobanda na supermerkado Tong Fat ku Archi Maat tbt doño.Yapi semper tbt kuestiona e koperashon ku nunka Asosiashion enkabesa pa sr.Gomez no a dune pa e tra riba su bulinan.
    Pero ta asina bida ta i ela keda lucha te kaminda ku e tbt por pa logra kompila tog lokual ela bai laga pa nos komo historia di nos musika i farandula.
    Saludos Raymond “Ronchi” Isenia

    Reply
    • percy.pinedo

      Ronchi manera bo di i mi ta kontentu tòg, ku huntu ku Yapa e dia ei, bo tambe a haña rekonosementu di bo Bario Marchena.

      Reply
  12. Arlene Parris

    E tipo di itemnan aki mi por share ku mi hendenan aki I esnan den eksterior. Nan ta merikano, úlandes Oropeo, Hapones I mas. Danki Pursey. Nos tur por eduká un pueblo na nivel. Maské nan no ta komprondé papiamentu.

    Reply
    • Mariano Heyden

      No ta lat ainda pa duné un rekonosimentu.

      Kisas un Krus di Mérito postúmo?

      Reply
      • percy.pinedo

        Pa kuminsá un ksminda Mariano. Yes

        Reply

Submit a Comment

Lo no publiká bo email. Áreanan rekerí tin e marka *