Tin hende ku ta dediká na bida kompletamente na siensia. I tin hende ku apesar di tur éksito den laboratorio i na universidat, ta keda ku dos pia riba tera i ta keda hende, ku kurason pa e hende. Prof. Dr. Herbert Michael (Bob) Pinedo ta un persona asina i ku un gran sonrisa riba su kara.
Bob Pinedo a nase dia 25 di ougùstùs 1943 na Kòrsou. For di chikí, ya tabata bisto ku e no tabata solamente un mucha ku hopi gana pa siña, sino un mucha empátiko i determiná. E mésun kalidatnan aki lo marka su karera despues.
Den un tempu ku hopi hóben tabata soña di bai studia na Hulanda, e tambe a bai Leiden pa studia medisina. Esei tabata e kuminsamentu di un biahe ku lo a hasi’e un di e investigadónan di kanser mas respetá na mundu. Tòg nunka el a lubidá su raisnan. Al kontrario, mas despues el a duna atenshon kompletu na nan.
Na Leiden Bob a pone e base pa su spesialisashon di onkologia. El a pasa gran parti i su estudio i trabou despues na Amsterdam na “ VU medisch centrum” kaminda pa añanan largu ( 1979 – 2005) e tabata hefe di e departamento médiko onkologia. Di su bida komo studiante nos no tin masha informashon.
For di e buki: “De ontdekkingsreis van Bob Pinedo” di René Steenhorst, por konkluí ku den kuminsamentu di su temporada komo internista, Bob Pinedo tabata puntra dikon no tabatin un departamento kaminda bo por a spesialisá i bira médiko onkólogo? I pakiko no tabatin departamento di médiko onkologia den hòspital? Den e buki e ta konta di e transformashon ku a tuma lugá den e siguiente 50 aña riba e tereno akí. E transformashon kaminda aktivamente el a tuma parti na dje. I kon el a lanta e departamento di médiko onkologia na Hulanda.
Su nòmber ta ligá ku VU medisch centrum (VUmc) na Amsterdam, kaminda for di 1979 te 2005 e tabata kabes di e departamento di onkologia médiko. Internashonalmente nan tabata mir’é komo un di e fundadónan di loke nan ta yama “investigashon di kanser traslashon”: siensia ku ta benefisiá e pashènt direktamente.
E tabata miembro di fundashon di Cancer Center Amsterdam (CCA), i e tabata un di e inisiadónan di Federation of European Cancer Societies (FECS) i European Cancer Organization (ECCO). El a publiká mas ku 750 artíkulo sientífiko, a duna mas ku 300 presentashon internashonal, i a guia desena di dòkter hóben. Pero mas impreshonante ku su kuríkulo ta su manera di traha: direkto, su humildat, i semper ku kompashon. Esnan ku konosé Bob, konosé tambe su palabranan fuerte: “Mi no ke djis tratá kanser. Mi ke mira e hende tras di e malesa.”
Su investigashonnan a trese loke hopi hende no tabata haña: speransa, bida i kurashi. Pa Bob Pinedo, su pashènt no tabata un “kaso”, bo tabata un hende E ta tende bo, e ta sinti ku bo i e ta aktua ku pasenshi i amor.
‘Nooit heb ik patiënten langer dan een kwartier laten wachten. Altijd haalde ik hen zelf op in de wachtkamer. Nimmer noemde ik hun naam, maar riep ze binnen via oogcontact. Opdat anderen niet zouden weten: dat is meneer Caspar of daar gaat mevrouw Peterson…’. (De ontdekkingsreis van Bob Pinedo, pagina 13)
Bob Komo Persona: Kaluroso, Energétiko i eksepshonalmente dediká
Esun ku a topa Bob, mesora ta ripará: ku e no ta un profesor normal. E tin algu kontagioso, un kombinashon di kompromiso sinsero, un energia haltu i bon humor. Asta den e kòmbersashonnan mas serio tokante malesanan mortal, e sa di trese lus i speransa.
E ta papia ku pashèntnan komo si fuera e konosé nan pa hopi aña. E ta tuma tempu. I e ta skucha di bèrdat. Esei ta loke ta hasi’e asina úniko. No djis komo dòkter, sino komo hende.
Na novèmber 2021 mi tabatin e honor di kòmbersá ku Bob Pinedo na radio i aki komo tata el a mustra kon relativo henter e asuntu di su fama ta. Kon na 2014 algun dia promé ku e haña un premio mundial, ta detektá kanser di ovario serka su yu muhé, miéntras ku su otro yu muhé tambe ta haña notisia ku e tambe posiblemente tin kanser.
Na 2009 Bob Pinedo ta regresá Kòrsou
Bèk na su Rais: Fundashon Prevenshon
Na 2008, Bob Pinedo a regresá aktivamente na Kòrsou, e biaha aki komo fundadó di Fundashon Prevenshon, e promé sentro di investigashon di poblashon den Antia (Karibense). Einan el a establesé programanan di ‘screening’ pa kanser di pechu, kanser di kueru di matris i kanser di tripa — tur dirigí riba detekshon trempan, pasobra: prevení ta mihó ku kura ku resultado ku a skapa bida di hopi hende pasobra ku a deskubrí kanser den un etapa trempan. Bob ta opiná: si bo tene muhénan di Kòrsou salú, bo ta tene henter famia salú. Su último mishon: Kambia enfoke di prevenshon a base di estilo di bida. Riba un isla kaminda sobrepeso i diabétis ta alarmante, awor e ta bringa kontra e epidemianan silensioso ku a keda bou di radar pa hopi tempu.
Na komienso di su penshun, diputado di Kòrsou ta pidi Bob pa yuda konstruí un hòspital nobo pa Kòrsou. Kosnan a kana kompletamente robes, ora pa motibunan polítiko a desmantelá e komishon. Esaki ta un kapítulo ku Bob no kier papia riba dje.
Rekonosementu!
Bob Pinedo a haña rekonosementu di tur kaminda na mundu:
- Spinozapremie (1997), e premio sientífiko mas haltu di Hulanda
- Josef Steiner Award (1995)
- David A. Karnofsky Award (2014), e onor mas haltu di onkologia merikano
- Ridder in de Orde van de Nederlandse Leeuw
- Commandeur in de Orde van Oranje-Nassau
- Krus di Mérito di Kòrsou (2017)
- Doktorado di Honor di universidatnan na Kòrsou i Perú
Pero si bo kòmbersá kuné riba e premionan aki, probablemente lo e hisa su skouder modestamente i hari. Pasobra Bob no ta buska fama. E ke hasi un impakto.
Kòrsou den su Kurason
Te awe, e ta biba gran parti di su tempu na Kòrsou. E ta kana, e ta hari, e ta traha — semper okupá. Tin biaha ainda na Amsterdam, kaminda e ta duna di dos opinion komo onkólogo. I semper disponibel pa koleganan hóben ku ta buska su konseho.
Kiko ta dun’é e forsa?
“Mi ta kere ku nos mester sigui siña. For di siensia. For di otro. I for di bida mes.”
Den un mundu kaminda hopi biaha ta ekspresá prestashon médiko den sifranan, Bob Pinedo ta e prueba bibu ku speransa, humanidat i dedikashon ta mes importante. No ta por nada nan a dun’é, e prestigioso Pinedo Award su nòmber, un premio ku anualmente ta duna dòkternan ku ta sobresalí den kuido ku kompashon.
5DDF5D5C-F77A-4033-B048-5ED8D8255B13-2
Tremendo atrobe. Mi ta keda bisa pa sigi Eduka ns adultonan i esnan hoben. Historia ta bon pa bo sa. Anto ora bo Dokunente e ta keda pa semper. Danki na ns Emensia i Sabio, Prof. Dr. Bob Pinedo. Ns ta Super orgulioso di bo. Danki Percey.
Un tremendo personaje. Ku tantu kos nan positivo bisa di Prof. Dr. Pinedo pakiko ta wardando tanto tempu pa duna CMC su nomber???
E historia ku bo a skibi tokante Prof. Dr. Herbert Michael “Bob” Pinedo ta realmente un testimonio e kombinashon di siensia ku humanidat. E ta un modelo pa mustra ku bo por yega na un nivel mas haltu den investigashon i medisins, pero sin perde bo alma ni bo konekshon ku hende.
Bob Pinedo no solamente a krea un legado riba tereno di onkologia, sino tambe riba e manera kon e ta trata hende. Ku respet, dignidat i sin show inesesario. E manera ku e no ta yama pashèntnan na voz haltu, sino ku kontakto visual, ta un detaye chikí ku tin un peso grandi den e manera ku e ta warda privasidat i e sentimiento di hende.
E echo ku despues di tur e eksito internashonal, e a bira bin bèk na Kòrsou pa yuda ku prevenshon i detekshon trempan di kanser, ta mustra un amor profundo pa su pueblo. E ta kompronde ku kuido di salú no ta so tumamente di
remedi sino ku prevení, eduká i inspiró un estilo di bida mihó ta parti di e medaja ku mester sigui
Loke ta impreshoná mas ta ku aun ku e tin mas ku medio siglo di eksperensha, premionan grandi i un nòmber respe’tá na mundu, e ta keda humilde. Esaki ta laga klaru ku pa Bob, e mas grandi premio ta mira bo pashènt biba ku mas speransa, mas tempu i mas kurashi.
E ta un bon les pa nos tur: bo por logra hopi na bida, pero lo ku ta keda pa semper ta e manera ku bo a trata hende.
Ora mi ta lesa no papia ku mi.E lecture ta más importante pa mi
Danki tremendo
Wak kuantu ela lucha pa por a logra un hospital nobo pa nos i no a logra.
Awor hopi ta lamenta.
Percy, segun mi bo por skirbi hopi buki riba e persona nan ku ta/a karga nomber di Pinedo.
Inkreibel! Ami ta gusta lesa tur loke bo ta skirbi pasobra mi ta siña hopi …
Ami lo ke pa esaki ku Bob a bisa: “Nooit heb ik patiënten langer dan een kwartier laten wachten. Altijd haalde ik hen zelf op in de wachtkamer. Nimmer noemde ik hun naam, maar riep ze binnen via oogcontact. Opdat anderen niet zouden weten: dat is meneer Caspar of daar gaat mevrouw Peterson…’. (De ontdekkingsreis van Bob Pinedo, pagina 13)”, lo bira un kustumber den tur botika i wachtkamer !
Danki !
Prof. Dokter Bob Pinedo. Un rolemodel pa hopi yu di Korsou i sigur pa su koleganan ku ta labora na Korsou. Of lo mi tin ku bisa ku e lo mester ta un rolemodel en general i sigur pa majoria di su koleganan. Pasobra pa basta anja kaba mi tin e impreshon ku pa algun kolega dokter nan patièntnan ta nada mas ku e siguiente numero. E punto di salida di dokter Bob Pinedo den su trato di patièntnan awendia ta kasi ìnvisibel. Nos país konosé masha hopi rolemodel riba tur tereno ku por wordu husa pa eleva nos komunidad. Pero nan no ta hanja e balor i nan luga ku nan merese den nos komunidad. Ta pesei mi ta apoyá e artíkulo aki 100% i gradisí dokter Pinedo pa su bon trabou rond mundu. Percy danki pa e artíkulo tremendo aki.
Dikon no a duna e hòspital e nòmber di Bob Pinedo????
Un oportunidat pèrdí.
Percy, masha danki pa e bunita artikulo di prof.Bob Pinedo. Nos tin e privilegio di konosé personalmente i enberdat un persona cariñoso, humilde i empatiko
Atenshon i kompashon pa su pashèntnan. Semper humilde, interesá i dispuesto pa yuda. Un dòlter kampeon, un bon hende i un tremendo yu di Kòrsou.
Hopi bon.Tur hende ta lesa ku smak i tur hende ta haña bon informa-shon.Dios kwida i yuda nos dokterPinedo pa basta aña mas.
Love it!! 🌺
Danki pa e informashon. Hopi orguyoso di ta Yu’Kòrsou.
Un tremendo personaje. Ku tantu kos nan positivo bisa di Prof. Dr. Pinedo pakiko ta wardando tanto tempu pa duna CMC su nomber???
👌🏿tremendo
Tremendo.
Un relato hopi interesante.
Danki Percey i un bendishon grandi pa Dr. Pinedo.
Un dje motibunan pa duna bo orguyo di ta yu’i Korsou.
*Percey Pinedo, e Pinedo ku ta skibi riba legasía dje otro Pinedo nan😀.
Forsa I motivashon pa sigi!!
Ekselente relato pa historia y orguyo di nos pais!
Danki, interesante un biaha mas.
Danki imteresante
Hopi dushi lesa
Relato di un legado impreshonante, di kua nos komo Yunan di Kòrsou por ta orguyoso di dje. 👍🏾
Tremendo un biaha mas. Sigi ku e bon trabou.
Nobody can compete with Dr “Bob” PINEDO as a Perfect Example for a (new) Handbook entitled “How to be the Best Medical Doctor within the Kingdom of The Netherlands (and most probably The World)
Tremendo un biaha mas.