Fransinèt, sintá bibitu na bentana di su kas di tabla den Hanchi Kalbas, tabata kaska wandu den un paila. Ounke su dedenan tabata bai-bini ku mashá afan, tur su atenshon tabata konsentrá na wak mira ken ta pasa, o kiko por tin ta ta sosodé den su hanchi.
Hopi aña di práktika den su stul di zoya di kabana a dun’é tal maestria di akshon, ku momentu ku algu interesante punta, e ta djis zuai su hep, pusha pia i e moveshon ei ta lans’é dilanti, di moda ku e ta keda, kasi por bisa, ku su kara pafó di bentana. (E bentana – May Henriquez – Mundu yama sinta mira).

Pega ku mi kas na Mundu Nobo, e parti ku ta tira pa Jacob Binckestraat, mi kas tabata pegá ku kas di Chinè (Fransinèt) ku Moi (Moises). E tempu ei un pareha di edat, ku nan kas chikí, mashá òrdènt, tabata bende li (adelisia) di preimu, strawberry i li di pinda pa dos plaka. Tambe nan tabata bende limonada Orange Crush, Coco-Rico, Grape, Cola Champagne di Britania i Pepsi Cola. Ora bo yega pa kumpra bo li, bo tabata pidi pa Chinè mes bin yuda bo, pasobra Moi no tabata kana masha bon i tabata dura un eternidat pa bo haña bo li òf bo limonada. Tur mucha di bario tabata sa di e benta di e produktonan akí. Bario su relashon ku Chinè ku Moi tabata manera pushi ku kachó. Ora di kumpra kos serka nan tur kos tabata oké, pero di otro un banda, nan tabata opstakulisá desaroyo di hubentut den bario. Hungando bala, nos bala kai den nan kurá, bo tabata pidi ku Chinè tin bon beis i bo ta haña bo bala bèk i otro biaha bo bala ta bin bèk riba kaya, kòrtá na dos.

Un tienda ku nos tabata bai ku mashá smak, tabata tienda di Mafita i Pa Nèto, kaminda bo tabata pasa den un hanchi smalitu i yega na bentana, i kumpra bo kosnan ku kas tabatin mester, Aki bo tabata bai ku mas frekuensia, pasobra nan tabata fia i tabata nota den un skref kiko bo a kumpra(fia) i loke bo tabatin ku paga despues. Aki bo tabata kumpra bo dòria di keshi, dies plaka di manteka den papel bruin, un bòkel, mei liber di bakiou, 14 plaka di kòfi, Odorono stick òf Mum, bo mushi di zeta òf liter di kerosin etcetera. Pa Nèto ku Mafita tur dos tabata rekonosé bo, i ta yu di ken bo ta.

Banda di e tienda aki, nos tabatin Nia ku den su bentana tabata bende su kosnan dushi (Mary Jane, dròp blue bird, zuip, bazooka, bals ku karchi di hungadónan di baseball, Lonka, sèn sèn, bals kusinchi, dèps i hopi mas.

Nos tabatin Djalia, ku huntu ku su ruman, tabata bende kos di boka dushi, orea, panseiku, tentalaria, djente di kachó, papilon di suku, kos di lechi, zjozjolí. Bo tabata yega su kurá, ku nan porta saya ku djèki i pidi bo kos di boka dushi. Aki tambe un rèspèt grandi pa e dos grandinan akí ku tabata bende kos ku nos, ounke bo sali djei nan i bo tenta nan i kore bai.

Deborita (Regales) na punta di hanchi di Jan Otzenstraat, ku tabata mas bien nos tienda pariba di Niewindt College, kaminda bo por a kumpra bo kosnan dushi, pero tambe bo pan franses ku diferente belèg. Un tienda masha chikí, pero íntimo.

Den e mesun kaya, na e otro punta, bo tabata haña tienda di bentana di Elena (Dania) ku tambe ta bende kos dushi

Chodorita tambe tabatin su tiendesita i nos tabata kumpra nos sigaria detayá i tambe kosnan di boka dushi serka dje.

Nos tabatin tambe shon Nani i shon Keta, kaminda bo por a kumpra bo pan di fòrnu na benta serka shon Nani (Jansen) i pasa drenta kurá pa bo kumpra bo pan serka shon Keta. Bo tabata haña bo pan kayente ku belèg serka nan i bo tabata kombiná esaki ku limonada bòter pretu.

Nea (Fabian) tambe tabatin su tiendesita i tambe mi ta kòrda Koti, ku tabata biba den hanchi dilanti vèlt di Mundu Nobo, den hanchi di Telemac (hòmber mágiko) i serka Koti nos por a kumpra e mihó kala ku tabata optenibel na Kòrsou.

Den Goeroeboeroeweg nos tabatin “Ons Hoekje” di Tuyu Bloem, un tienda mashá chikí, ku tabata bende e kosnan ku ta nesesario ora bo ta den pèrtá na kas. Nos tabata amigu di kas di famia Bloem i hopi biaha, ta djaki nos kosnan di bai kamper tabata sali i no nesesariamente nos a kumpra nan. Esaki tabata e úniko tienda ku tabatin un sukursal. Den Dòmi Tuyu tabatin un otro tienda chikí.

Nos tabatin “tienda mobil” tambe, pasobra dianan di skol, di djaluna pa djabièrnè tantu Shishi komo Nia, tabata bin na porta di skol (esta un lugá bou di palu ku sombra pegá ku skol) bin bende nan kosnan dushi,  fuera di e pandushi ku shokomèl ku  bo por a kumpra na skol mes.

Un tienda di bentana ku ta hopi na mi kurason, ta e tienda di Pe (pepe) Djen(Jane Matheeuw) Kortijnweg 13. E tienda akí tabata nèt dos stap dilanti di kas di mi wela den Kortijnweg 38 i esaki tabata e tienda di bentana di mas konosí pa mi i di kua mi tin asina dushi rekuerdo. Mi tabata manera yu na kas i mi por a tuma kos einan riba kuenta di mi wela, Tan Lu.

Mi a hasi un rekorido promé di skirbi e artíkulo akí i mi mester bisa tabata un rekorido “sweet and sour” di mira lugánan ku mi tabata vinkulá ku ne den mi bario Mundu Nobo asina dekaí. Tambe mi a bishitá Kortijnweg e tienda di Pe Djen ku awor akí ta será i bandoná.

Tuyu tabata doño di su dos tiendanan, pero ta Maché(kasa di Tuyu) tabata para den e tienda “Ons Hoekje”, miéntras ku Tuyu tabata para den e tienda den Dòmi. Pa Nèto tabata huntu ku Mafita den su tienda, miéntras ku tur e otro propietarionan tabata hende muhé. I den un otro toko mashá konosí Deborita (Tan Debo) tabata esun ku tabata doño, CEO, HR-manager i accountant di Mahuma Store, miéntras ku e yunan tabata trahadónan sin “werkboek”.