Kranshi konosé 4 adrès

Den siudat so nos tin mas o ménos 765 monumento, ku nos mester kuida bon. P’asina bishitantenan por disfrutá di nos patrimonionan. Nan ta forma e kuenta pa nos historia, pa e desaroyo di nos siudat. Asina ei so nos por konservá e balor kultural históriko di nos Kòrsou. Den búskeda pa loke ta trata e promé edifisio di registro sivil, mi a haña asina tantu informashon, ku mi ta kere ku ta interesante kompartí esaki ku bo.

Den e promé edifisio, kaminda e promé ofisina di Registro Sivil ta situá, yu di un domi a funda na 1899 un klup di dama Eendracht Maakt Macht. E klup ta situá den Curacaostraat 50 den Otrobanda, nèt dilanti St. Thomas College den Hoogstraat. Den e edifisio ei nan ta bin huntu bin kose, brèi i traha obra di man. Dameskransje ta nifiká un klup (sociëteit).

Den korant Amigoe bo ta haña aviso kaminda ta anunsiá diferente aktividat ku ta tin den e edifisio aki i ta hasi menshon di Kransje i e Kransje aki a bira e aktual nòmber Kranshi, ku nos ta usa pa nos Registro Sivil. Aparentemente lo ta tin un skol di pòrnada tambe situá den e edifisio akí. Den añanan 30 lo ta tin un iglesia reformá tambe ei den.

Na mas o ménos 1940, ora ku e edifisio ya no ta tin e funshon di klup pa e grupo Eendracht Maakt Macht mas, a instituí e edifisio komo nos ofisina di Registro Sivil i a bai ku e nòmber Kranshi. Den dékada 60, ora ku ofisina a muda pa Skalo, e nòmber tambe a bai ku e ofisina, miéntras ku edifisio bieu su nòmber a bira “Kranshi Bieu”.

Segun sra Helma Maduro –Molhuijsen tempu ku na 1954 nos Registro Sivil a sali for di Otrobanda, e ta situá pa un par di aña den edifisio di Pietermaai, kaminda e ofisina di abogado “Soliana i Bonaparte” ta situá, promé ku el a muda pa Skalo (Het onbekende Kranshi, Archiefvriend juni 2014, jaargang 20, nummer 2). Pa hopi hende e edifisio akí no ta konosí komo Registro Sivil.

Na 1962 Credit Union a kumpra e edifisio i “Federashon di Koperativanan di Spar i Krédito Antia Neerlandes (Fekoskan) a bai aden. Ta tin tur sorto di aktividat den e edifisio aki despues; basta hende ta kòrda ku den edifisio ei nan a pasa nan èksamen i tambe diferente a risibí nan diploma ei den; show, fiesta, teater, sala di eksposishon, kòntèst di Body Building i asta inskripshon di Festival di Tumba a tuma lugá den Kranshi Bieu. Na 1955 e edifisio a sirbi tambe komo kas temporal pa Centro Cultural Curaçao (CCC).

I finalmente na 2002 Registro Sivil a drenta Otrobanda atrobe, i e biaha akí den e edifisio kompletamente renobá  di ‘Casa Blanca’. Skalo e ora ei a bira “Kranshi bieu” i Otrobanda ‘Kranshi Nobo’.