(Maria Diwan)

Fiesta a kaba i un di e mucha hòmbernan ku tabata kana piki stul ku mesa pa bai warda lo mester a tochi Wawa su pia. Ela habri wowo haña Barges Bad blo bashí, asta tokadónan a piki nan instrumènt t’e baha na awa.

Wawa a zeilu sali for di klup i kasi yegando na porta e la purba hisa su brasanan na laira mientras ku na bos haltu ela grita kanta “Hoy se mas que ayer, que diferencia…”

Su bos a bai haltu, pero su brasanan a keda na mitar kaminda, di pisá ku nan tabata. Wawa no por a bisa ku ta e bet’rnan ku ela hala manera awa den su kurpa òf ku ta su benanan a kenker dor ku henter anochi ela primi e damanan riba dansflur. Wawa su estatura tabata kòrtiku i e galiñanan ku hilchi haltu na pia tabata fòrs’é un poko segun un di su brasanan ta lora tras di nan garganta i e otro tabata keda move bai bin manera regtenweizer den laira. Kestion ku awor su brasanan no kera bai laira manera tabata su deseo.

Awa

Wawa ta pensa: Loke no bai na awa, ta bai na hariña i e ta gasta su sèn ku su fiestanan di kòmbèk; E ta prepará su mes masha bon mes kada biaha pa su fiestanan; su kasá no ta gusta e fiestanan aki, e no ta bai nan tampoko e ta gusta ku Wawa ta bai, pasó Wawa su yegamentu di kas ta mainta tempran; e la stòp di kritiká e echo aki, paso esei ta karga awa den makutu, yena barí sin bòm; Su siguiente siman mes, Wawa ta na su siguiente fiesta; Wawa ta di bon, paso e tipo di fiestanan aki ta tin 3 o 4 tur fin di siman i si un òf dos mes kai na awa, ainda ta tin mas pa bai.

Wawa a bolbe dal un“Hoy se mas que ayer, que diferencia”. i el ‘a tumba kara pabou sin sa eksaktamente kiko tabata e diferensha ku awe e tabata mas konsiente di dje ku ayera. Loke sí e tabata sa sigur ta, ku ayera ela bai fiesta i te awe e ta na kaminda di kas. Un di e trahadónan ku tabata konosé Wawa i ku a komprondé ku den e direkshon ku el ‘a kué nunka e lo a yega su kas, a dal’é un gritu “Wais kuidou ku kangreu”!

Wawa a mandé un grandi ku a resoná t’e den kustia di e olanan ku tabata lora bin kibra riba piedranan kant’i awa riba Ref ku tur sekretu di laman su mardugá. Muchu leu e no a yega. Djis dos tres stap mas pariba ela lèn su kurpa kant’i muraya di kas di awa bieu i kasi promé ku ela yega suela ela pega soño.

Un par di ora despues zonido di pia ta spièrta Wawa i e ta mira un hòmber ku tas di trabou na man ta kana drenta kurá di Gasmaatschappij. E hòmber ta bai subi warda….ke men ku dia a habri!

Ku difikultat Wawa ta reis su kurpa for di suela, purba para riba su pia. Ta tumé dòbel mas tantu tempu ku otro ora pa e kana yega skin’e hanchi di su kas, dor ku awor no únikamente su brasanan pero su kabes tambe tabata pisá manera bola di chumbu riba su kurpa.

Si Wawa a drumi fuma, lanta burachi antó ta t’é na momentu ku ela dobla skina i un hari skèrpi i kayehero a kòrta silensio mosa di mainta … e momentu ei su wowo a habri kla-kla.

Djaleu ela mira Dorita, yu di Ma Bel di Pedritu ta bin ku tur su dos kared’i djentenan afó.  Dorita ta ruman mas grandi di Isbel i nan ta parse otro manera dos gota di awa. Despues ku Isbel a nanse Pedritu a baha na awa bai i pober Ma Bel, apenas por a tene su kabes riba awa ku dos yu pa kria. Manera Dorita a mira Wawa e di: “Eh … Eh … Wawa … awe si awa a pasa hariña … ’N tin awa pa laba, awe si bo ta kué awa na man di Chencha bo kasá”.

“Mira un muhé di malora’sina… Echo ku mi a tuma dòbel mas tantu tempu pa mi kana yeg’aki, no ta únikamente debí na mi pianan pisá ku NO ke obedesé mi mente manera debe merese, ni tampoko dor ku ainda mi wowo ta poko skur komo konsekuensha di e kantidat di bet’r ku mi a hala den mi kurpa ayera nochi; sino mas bien … ku e loke ta wardami ora mi yega kas na bista, mi tabata purba formulá mi defensa di antemano pa ora Chencha mi kasá atakami.

Leu di ta kompletamente prepará, ata Shi mete-mete ta sakami for di mi konsentrashon i ponemi kurpa habrí dilanti mi kataklisma… Esaki si yama— si’n ta Dios mi ta kòrda mi ta kohé na e dos pal’i pia sekunan, manera pal’i lele kaka ku e tin, zwai’é den e awa sushi ku ta pasa patras di hòspital.

Wawa a keda para mira Dolorita ta yega serka. “Mir’é bin ei… triminti tinié ta seka na bida. Tein’su ten e tabata manera koi bebe den un glas di awa.. Un pal’i hembra! Haltu, elegante’asina riba su kurpa ku dos wowo pretu bibu den su kabes. E tabata karga dos pechu pará manera mespu medio reip ku tabata pone boka di kualke homber kore awa, anto tribí manera su so. Awó, ni pa spanta para lo mi no pone para den mi kunuku.

Miedu di presentá dilanti di Chencha despues di a pasa anochi for di kas i sin por bin kla kon e ta bai splika su muhé ku NO ta den ningun kama straño ela manisé, sino plat abou na suela dilanti di kas di awa i hostiná pasobra Dorita a atendé ku loke no ta tok’é, a pone ku Wawa a disidí ku awe Dorita no ta skap’é.

Wawa a stet su kurpa kant’i muraya i segun Dorita t’a kana pasa ela bis’é…” Hesú bo a bira mal awa”. Dorita a keda manera hende ku a haña un baño di awa friu. “Ki bo di…mal awa! Bo ke mi mustrabo ta ken ta mal awa”?

Riba un trankil Wawa a drei kontest’é…” Kon ku bo ke mi ke, mi ta hòmber ku a nabegá den tur sort’i awa, abo lo no t’esun di mas brutu. Gustami dibo, bo ta buska problema, mete den loke no ta bo asuntu anto awó bo ke hoga den un glas di awa. Dorita tabata pará ta mira Wawa manera hende ku a guli basora. Ora su promé asombro a pasa ela kompronde ku e mester a bin ku un ofensiva. Kos no por a keda asina, antó pa kolmo ya dos tres hende a hala para serka manera ku un interes pa sigui e espektákulo ku sigur nan no a spera riba e ora tempran aki di mainta.

Anto pa kolmo awa a kuminsá fin-fin. ”Wèl Eduardo, ta delaster bia den bo bida ku bo a yama un muhé ‘mal awa’; El ‘a ranka bin riba Wawa ku intenshon di dal’é un bòfta mientras e tabata grita…Ki mishimi ku bo t’e pa bo sa ki sorto di awa mi ta… mi no ta mòrs ku buraché manera bo. Awe mi ta bai mustrabo unda awa ta drenta barika di koko”.

Esaki sí Wawa no a spera. Den su bida el ‘a yega di hasi tur sorto di kos pero loke si ela hura ta ku hamas e ta hisa man pa hende muhé. Ata Dorita ta bin riba dje awó, manera toro ku a mira lapi kòra…Ta kon e ta hasi? Dorita no ta muhé pa pone kibra su huramentu. Si e kita for di kaminda, ku e fèrt ku e muhé ta bin kun’é lo e dal su kurpa den muraya haña mal sla. Si e keda pará e ta haña e bòfta i meskos ku e no ta dal muhé e no ta tuma nan sla tampoko. Ta inkreibel kon un mente ku ratu promé tabata funkshoná riba spit mínimo dor di ekseso di alkohòl i demasiado tiki soño, pa salba kara di su doño por reakshoná asina fantástiko.

Na momento ku Dorita su man tabata kasi – kasi alkansá Wawa su kara, esaki a lanta brasa kohe e muhé su man tene duru. Ke otro brasa ela hale pega na su kurpa di moda ku Dorita su orea a yega pegá ku Wawa su boka. E la sinti holo di e awa di kolonia ku e la usa awe mainta, ku ta parse mas bien un awe shete. Den e posishon prohibitivo aki Wawa a murmurá den Dorita su orea… “Bai poko poko Dorita, awa ketu sa gaña hende! (Awa no a pasa kampana ainda!) No a keda e mironesnan ku a prepará pa mira pelea nada otro ku sigui nan kaminda. Un di nan ku realmente a gosa e fin a grita“Dalé ku awa Wais”! Dorita a ranka for di den Wawa su brasa i ela pèrta pia bai.

Wawa a keda pará ta miré un ratu, djei ela sigui kaminda pa su kas i ku stèm ku por a bomba awa di tur bisiña pero ku kurason aliviá ela kanta

“Hoy se mas que ayer, que diferencia…”