For di mart 1988 te dia djawe, mi a pasa diferente ora di mi wikèntnan den e kas akí na Otrobanda. Komo mucha, riba kaminda pa bai kumpra kos serka Madam den Kaya Grandi, mi ta pasa i atmirá e kas akí kontinuamente, sin por a imaginá mi ku despues di kasi 30 aña, e kas akí lo forma un parti masha importante di mi bida. Riba djasabra i djadumingu mi tin programa den e edifisio akí, ku ta fungi komo kas di Curom Broadcasting.
Vários eks katibu tabata doño di e tereno Roodeweg 64 – 66, kaminda awe e edifisio di Curom ta situá. E promé tabata e eks katibu Juan Pedro Crisson alias Amérika, ku a bende e tereno ku otro eks katibu, Juan Diego Nicolaas alias Juan Diego Striddels. Kuater aña despues, tabatin un kasita di piedra ku un renbak riba e tereno. Na 1858 Richard Frederik Hz Vegt, ku a kumpra e tereno i kasita pa 1800 florin, a laga drecha e kas i hasié mas grandi. Despues, segun dokumentonan, Clara Houweel t’esun ku a laga traha e kas, manera e ta te dia djawe. Na 1875 a bende e kas akí ku un marinero yamá Martijn Haseth, tambe yamá Louis Martis (de) Haseth. Na 1919 e komersiante Jacob Nicolaas Evertsz a kumpra e kas na findishi. Na 1938 Sally Elizabeth Prince a bira doño nobo di e kas.
Den añanan kuarenta i sinkuenta en todo kaso Sally su ruman hòmber Teofilo Prince tabata biba den e kas akí (piso abou). Ariba tabata biba Efraim Jonckheer, kofirmante di Statüt i Promé Minister di Antianan Hulandes, ku su kasá Blanca Heijer. E kas a keda den famia, despues di morto di Sally Prince na 1951. Ta te na 1982 numa, herederonan a bende e kas ku Curaçaose Radio Omroep CUROM), e emisora mas bieu di Antia, ku a kuminsá transmití na aña 1933. Curom a laga hasi renobashon na e kas, lagando mas tantu posibel di e kas históriko intakto. Na diferente okashon bo sa tende lokutornan ku sa, komentá ku ta hasi friu den e renbak akí, paso ta den e renbak a traha un studio. Na kabamentu di 1984 apertura di e edifisio a tuma lugá i na 1995 a designá e kas komo monumento. E balkon di palu ta aksesibel via dos trapi di piedra ku forma di bog. E sala ariba ta un presiosidat i a keda den su estado original.
E plafòn dekorá na kralchi tin bunita shanguilié ta kologá. Kaminda ta tin kamber, awor aki tin dos kantor i algun studio chikí. E edifisio mester di un mantenshon riguroso i ta kosta hopi plaka. Pero si nos ke keda gosa di e beyesa di edifisio akí, nos mester inbertí purá den dje, pa e no bai pèrdí. Konstantemente i ku masha orguyo, mi ta permití turista i lokalnan saka potrèt i ora e tempu ta permití, mi ta te hasta laga nan drenta i duna un splikashon chikí di mi Kas di Plèizí.
Fuente: Monumento habrí ’12 – Area di Kurá di Otrobanda
danki pa komparti hopi bunita
Masha danki Percy. Bo ta pèrmitími usa bo teksto tokante e edifisio bunita aki pa mi studiantenan na skol. Mas ku klaru ku lo.mi.hasi menshon di fuente i tambe splika ken ta Percy Pinedo. Danki ruman.
Roy bon dia, laga mi usa palabra di un hende ku mi ta kere masha den dje: Klaro ku bo por hasi uso di tur loke tin riba mi blog: “Nos folklor, historia i papiamentu ta di nos tur pa nos bib’e, kompartié i promové pa e keda konnservá.
Tremendo storia Percy. Interesante pa tuma nota di tur e doñonan ku e kas di ‘pleizi’ akí tabatin. Ohalá pronto por bini finansiamentu di mantenshon pa e kas keda e presiosidat ku e ta. Danki pa kompartí Percy
Danki Laura, mester hasi hopi ainda i bo sugerensianan semperta bon biní!
danki Percy, bo teksto a dibertí mi
Masha Danki i semper bo sugerensia ta bon biní
Bon Siman
Danki pa komparti, hopi interesante!
Danki Desta I sa ku semper ta Dushi risibí bo komentario i sugerensia. Bon Siman
Nice, hopi bon pa komparti historia di nos monumentonan
Bon Siman i danki pa bo komentario. Mi ta apresiá
Danki pa kompartí
Na bo òrdu
Bon Siman. Na bo òrdu semper
waw bunita Historia…. danki pa komparti……. mi tambe tatin e honor di tra pa 8 añ na bo Kas di Plèizí
i un experensia masha dushi mes
Kompartiendo basta tempu e mésun warda!