Buraché stinki!
Yuku di Sipoti!
B’a chupa alkohol
te bo boka a keda dwars.
Tende bròdu!
Dia mi bela paga,
pena la bida bo tribi
bin lastra tra’i mi morto,
konta tur mi amigunan kon
nos dos den peregrinashon
a zeilu pasa shap pa shap
adorá e líkido milagroso.
I manisé ora nos lanta
sin piká i blo bashí
ma ku set pa sigui adorá,
kon nos dos
haragán golos
ta hala otro na kònòpi
pa un beter’i baba.
OPI(21-84)
(Organisashon Planafikashon Independensha)
Bar
Mira nos sinta den bar
ta hunga mionario.
Kada beter ku nos dal
Nos ta sinti mas kariño
pa e reina enkantá
ku ta hari ku nos tur
segun pechunan ta lur
tra’i su blusa eskotá.
Nos kada un ke demostrá
ku nos stoma ta furá
ku chumbu di nos sueldo.
Kada be nos ta yam’é
ku masha bravura
trese un bòter mas dje kos
ku ta oumentá kentura.
Nos ta hala, hala, hala
gosa, hala, lubidá
tur fatiga, tur problema
dje muhé kansá na kas
ku ta blo yora preokupá
ki ora nos lo regresá
ku loke sobra pa e kumpra
maske t’un bleki machiká.
OPI(Organisashon Planafikashon Independensha)
Asina mes, Elis su poemanan sa pika. Spera esun ku e ta kritiká ta les’é, ta komportá despues.